Te Tohi Mai Te Kolesi Pule
Naʼi Kaugā Fakamoʼoni ʼa Sehova:
Neʼe fakaʼaogaʼi e te ʼapositolo ko Paulo te ʼu faigamālie fuli pē moʼo fakahā ia tona ʼofa pea mo tona loto fakafetaʼi ki tona ʼu tehina ʼaē ʼi te tui. Ki te ʼu Kilisitiano ʼo Loma, neʼe ina tohi fēnei: “ ʼE au fakafetaʼi ki toku ʼAtua ʼaki ia Sesu Kilisito ʼo ʼuhiga mo kotou fuli, heʼe fakamatala ʼi te mālamanei kātoa ia takotou tui.” (Loma 1:8) ʼEī, ʼi te Puleʼaga kātoa ʼo Loma neʼe ʼiloa te kau Kilisitiano ʼaia ʼo te ʼuluaki sēkulō ʼuhi ko tanatou tui mālohi, ʼo fēia mo tanatou faʼafai ʼi te gāue fai fakamafola. (1 Tes. 1:8) Koia ʼe mole fakapunamaʼuli ai ki te ʼofa lahi ʼaē ʼo Paulo ki tona ʼu tehina!
Ohagē ko Paulo, ʼe matou fakafetaʼi kiā Sehova ʼi te temi fuli pē ʼaē ʼe matou manatuʼi ai koutou. ʼE matou ʼoʼofa ʼaupitō kiā koutou fuli! Pea ʼe feala ke kotou tui papau ʼe ʼofa Sehova kiā koutou takitokotahi. ʼE tau ʼihi iā koutou mo te fakafeagai lahi, kae ʼe kotou haga fai fakamafola aipē. ʼE mahino ia ʼe fiafia ia te loto ʼo Sehova ʼi takotou lototoʼa ʼaia pea mo takotou mole mātataku!—Taag. 27:11.
ʼI takotou lau fakalelei pea mo metitāsioʼi “Te ʼu Gāue ʼa Te Kau Fakamoʼoni ʼa Sehova ʼo Totatou Temi” ʼaē ʼe tuʼu ʼi te Annuaire, ʼaē ʼe fakatupu loto fiafia pea mo fakalotomālohi ki tatatou tui, ʼe kotou maʼu ai anai ia te tahi age ʼu fakamoʼoni, ko te ʼAliki ko Sesu Kilisito ʼe lolotoga hū “fakatoʼa ia” ki tuʼa “pea mo fakaʼosi tana mālo,” pea ʼe mole he fua anai ʼo te ʼu mahafu fuapē ʼaē ʼe faʼu moʼo fakafeagai ki te ʼu tisipulo ʼa Kilisito.—Fakh. 6:2; Isa. 54:17.
Ki te ʼu Kilisitiano ʼo Filipe, neʼe tohi fēnei e Paulo: “ ʼE au fakamālo . . . ki toku ʼAtua . . . ʼuhi ko te lagolago ʼaē neʼe kotou fai ki te logo lelei.” (Filp. 1:3-5) ʼE matou toe maʼu mo mātou ia te manatu ʼaia ʼo ʼuhiga mo koutou, ia mātou ʼaenī ʼo te Kolesi Pule. Lolotoga te taʼu 2007, ko te toko 6 691 790 kau fai fakamafola neʼe natou fai iā hola e 1 431 761 554 ʼi te fakamafola ʼo te logo lelei iā fenua e 236 ʼi te kele kātoa. ʼE ko he toe tokoni lahi ʼaia neʼe kotou foaki moʼo fakamafola ia te logo lelei! Kotou fakakaukauʼi age muʼa ia te ʼu toko lauʼi teau afe hahaʼi ʼaē neʼe tou tokoni ki ai, ʼaki tatatou ʼu faiga fakatahi ʼaia, ko gāue fuli ʼaia moʼo fakavikiviki ia Sehova!
ʼI te tahi ʼaluʼaga, neʼe fakahā e Paulo tana lotomahino ʼaupitō ʼo ʼuhiga mo te ʼu meʼa ʼaē ʼe felāveʼi mo tona ʼu tehina. Neʼe faitohi fēnei kiā nātou ʼaē ʼi Tesalonika: “ ʼE matou manatuʼi tuʼumaʼu pē . . . takotou faʼa kātaki ʼuhi ko takotou falala ʼaē ki totatou ʼAliki ko Sesu Kilisito iā muʼa ʼo totatou ʼAtua pea mo Tamai.” (1 Tes. 1:2, 3) ʼE moʼoni, ʼe lahi te ʼu faigataʼaʼia ʼe tau mo tātou ʼi totatou maʼuli. ʼE hoko te ʼu fihifihia kae ʼe tonu ke tou faʼa kātaki. Koteā te ʼu faigataʼaʼia ʼe tau mo koutou takitokotahi? ʼE kotou lotomamahi koa ʼuhi heʼe kotou tau mo he mahaki kovi, ʼo mole lahi ai hakotou ʼu gāue ʼe kotou fai ʼi te tauhi ʼaē kiā Sehova? Ko tokotou hoa ʼaē neʼe maʼuli mo koutou talu mai fualoa, kua tō koa ia ki te ʼu nima ʼo te Seole, ia te mate, te fili ʼaē ʼe mole mākona ʼi he temi? (Taag. 30:15, 16) ʼI takotou fia nofo agatonu ki te tokoni Fakatohi-tapu ʼaē ke kotou ʼohoana ʼi te ʼAliki pē, ʼe lagi heʼeki kotou maʼu he tahi ke ʼohoana mo koutou, ko he tahi ʼe toe ʼofa mo ia kiā Sehova. (1 Ko. 7:39) ʼE kotou lolotoga taupau koa takotou fānau logolā ni ʼu fihifihia fakapaʼaga? Tatau aipē pe feafeaʼi tokotou maʼuli, kae kapau ʼe kotou haga fakamuʼamuʼa aipē ia te ʼu gāue ʼo te Puleʼaga, pea ʼe feala hakotou tui papau ko Sehova ʼe mole ina “galoʼi [anai] takotou gāue pea mo te ʼofa neʼe kotou fakahā ʼo ʼuhiga mo tona huafa.” ʼE matou kole atu, ʼu tehina mo tuagaʼane, ke ʼaua naʼa kotou “fiu ʼi te fai ʼo te meʼa ʼaē ʼe lelei”!—Hep. 6:10; Kal. 6:9.
Koteā ʼaē kā tokoni atu anai ke kotou faʼa kātaki? Ohagē ko te kau Tesalonika, ʼe ko “te falala ʼaē ki totatou ʼAliki ko Sesu Kilisito” ʼaē kā tokoni mai anai ke tou faʼa kātaki. Ko tona tupuʼaga lā ʼaia, ki muli age neʼe fakatatau e Paulo ia “te falala ʼaē ki te maʼuli” ki he puloga tau ukamea ʼe feala ke ina puipui he Kilisitiano mai ni ʼu manatu ʼe kovi pea mo fakalotolotolua.—1 Tes. 5:8.
ʼI takotou faʼa kātakiʼi tokotou ʼu fihifihia ʼaki he lotofiafia, ʼe kotou foaki moʼoni ai he tali ki te ʼu fasituʼu ʼa Satana ʼi te fihi lahi ʼo ʼuhiga mo te pule faʼitaliha ʼo te ʼatulaulau. ʼE lau e Satana ko te ʼu kaugana ʼa te ʼAtua ʼe natou manatu pē kiā nātou pea ʼe lagi natou tali lelei ke natou tauhi ki te ʼAtua ʼi he kiʼi temi pē, kae ʼe natou fakasiʼisiʼi anai tanatou tauhi ʼaē kiā Sehova mo kapau ʼe ʼāʼāsili age pē ia te ʼu faigataʼaʼia peʼe mo kapau ʼe kei fualoa atu pē ia te tuʼu ʼaenī logolā tanatou ʼu fakaʼamu ʼaē ke pulihi lā. ʼE kotou maʼu te pilivilēsio ʼaē ke kotou fakahā ko Tevolo ʼe gutuloi! Ko he ʼaho pē ʼe fakalaka, ʼe ko he ʼaho ia ʼe kotou fakaovi ai ki te tapuakina ʼaē ʼe kotou fakaʼamu kiai.
Ohagē pē ko te fakaʼaogaʼi e Paulo ia te ʼu faigamālie moʼo vikiʼi tona ʼu tehina ʼo ʼuhiga mo te mālohi ʼo tanatou tui pea mo tanatou lagolago lelei ki te gāue fai fakamafola pea mo tanatou faʼa kātaki, ʼe matou fakaʼaogaʼi ia te faigamālie ʼaenī moʼo vikiʼi koutou pea mo fakahā atu ia tomatou ʼofa ʼaē kiā koutou. Kotou haga hoko atu takotou gāue lelei!
ʼOfa pē ke tapuakinaʼi lahi koutou e te ʼAtua ʼi te taʼu ʼaenī. ʼE matou ʼofa atu,
Tokotou ʼu tehina,
Te Kolesi Pule ʼa Te Kau Fakamoʼoni ʼa Sehova