Tou Fefakalotomālohiʼaki Lolotoga Tatatou Kau Ki Te Minisitelio
1 Ko tātou fuli ʼe tou leleiʼia “he palalau [fakalotomālohi] ʼe fai ʼi tona lakaga totonu.” (Taag. 25:11) Kā tou gāue mo ʼihi atu ʼi te minisitelio, ʼe tou lava ʼiloʼi feafeaʼi ʼe fakalotomālohi tatatou ʼu fai palalau?
2 He Fai Palalau ʼe Fakalotomālohi: ʼE fakalotomālohi ʼaupitō mokā tou palalau ki he ʼu manatu fakalaumālie lolotoga tatatou fai fakamafola! (Pes. 37:30) ʼE feala ke tou talanoa ʼo ʼuhiga mo tatatou ʼu ʼuluaki palalau neʼe tou teuteuʼi peʼe tou fakamatala he meʼa fakalotomālohi neʼe hoko kiā tātou ʼi te fai fakamafola. (Gāue 15:3) Neʼe tou maʼu koa he manatu ʼe lelei ʼi tatatou lau takitokotahi ia te Tohi-Tapu, ʼi te ʼu nusipepa fakamuli, peʼe ʼi he fono? ʼE feala ke tou palalau ʼo ʼuhiga mo he ʼu manatu neʼe talanoa kiai ʼi te akonaki ki te hahaʼi fuapē neʼe tou logo kiai ʼi te Fale ʼo Te Puleʼaga.
3 Neʼe lagi tou lotovaivai ʼi te fai mai e he tahi ʼo te ʼapi he ʼu palalau neʼe mole feala hatatou tali kiai. ʼE fua lelei anai kiā tātou hatatou toʼo he ʼu kiʼi minuta ʼi tatatou ʼosi mavae ʼi te ʼapi moʼo vakaʼi mo totatou kaugā fai fakamafola pe feafeaʼi hatatou tali mokā toe fai mai anai he ʼu palalau fēia, ʼo lagi tou vakaʼi te tohi Comment raisonner. Pea kapau neʼe tou leleiʼia te ʼu ʼuluaki palalau neʼe fai e totatou kaugā fai fakamafola, ʼe feala hatatou fakalotomālohiʼi ia ia ʼaki hatatou fakamālo fakamālotoloto kiā ia.
4 Tou Fai He ʼu Fakatuʼutuʼu: ʼE ʼi ai koa ʼihi ʼi tatatou ako tohi kua fualoa tatatou mole gāue mo nātou? Ko te kole ʼaē ki he tahi ke kaugā gāue mo tātou ʼi te minisitelio ʼe feala ke hoko ai “he fefakalotomālohiʼaki.” (Loma 1:12) Ko te ʼu pioniē kātoa pea mo vaeluaʼi temi ʼe natou fiafia mokā maʼu he tahi ke natou kaugā gāue, tāfito ʼi te kei uhuuhu peʼe ʼi te afiafi, ʼi te temi ʼaē ʼe mole kau lahi ai he kau fai fakamafola ki te minisitelio. ʼE feala ke tou lagolago ki te ʼu pioniē ʼo tou fakatuʼutuʼu ke tou ava ke feala ai hatatou gāue mo nātou ʼi te lakaga ʼaē ʼe ʼaoga kiā nātou. ʼE ʼi ai koa he kaugā fagona ʼe mole feala ke lahi tana kau ki te minisitelio ʼuhi he mahamahaki? ʼE feala ke fua lelei mokā tou fakatuʼutuʼu ke kaugā gāue mo tātou, ʼe lagi feala ke kau ki he ako Tohi-Tapu.—Taag. 27:17.
5 Ko he fakavikiviki pea mo he fakafetaʼi ʼe fakalotomālohi tuʼumaʼu pē, tatau aipē pē ko he ʼu kiʼi faʼahi ʼe lagi mole faʼa maʼuhiga. ʼE tonu ke tou manatuʼi ia te faʼahi ʼaia mokā tou kaugā gāue mo ʼihi atu ʼi te minisitelio, koteʼuhi ʼe tou fia “haga . . . fefakalotomālohiʼaki.”—1 Tes. 5:11.