Tou Fakalotofīmālieʼi Ia Nātou ʼAē ʼe Putu
1. He koʼē ʼe ʼaoga ia he fakalotofīmālie kiā nātou ʼaē ʼe putu?
1 Ko te mate ʼo he tahi ʼe tou ʼofa mamahi ai ʼe ko he ʼaluʼaga faigataʼa, tāfito kiā nātou ʼaē ʼe mole natou maʼu ia te ʼamanaki ki te Puleʼaga. (1 Tes. 4:13) Tokolahi ʼi te agamāhani, ʼe natou feʼekeʼaki fēnei: ‘He koʼē ʼe mamate te hahaʼi? Koteā ʼaē ʼe hoko kiā nātou mokā natou mamate? ʼE au toe sio anai koa kiā ia ʼaē neʼe au ʼofa mamahi ai?’ Ki lalo ifo, ʼe foaki mai ai he ʼu tokoni fakalotofīmālie mokā tou fetaulaki ʼi te minisitelio mo he tahi ʼe putu heʼe neʼe mate he tahi ʼi tona fāmili peʼe ko hona kaumeʼa.—Isa. 61:2.
2. Kapau ʼi te fai fakamafola ʼe tou felāveʼi mo he tahi ʼe lotomamahi, ʼe tonu koa ke tou faiga tuʼumaʼu ke fualoa tatatou fai palalau ʼaē mo ia?
2 Te Fai Fakamafola ʼi Te ʼu ʼApi: ʼE feala pē ki he tahi ʼi te fai fakamafola ke ina ʼui mai, neʼe hoki mate atu pē he tahi ʼi tona fāmili. ʼE tou fakatokagaʼi koa ʼe lotomamahi? ʼE hahaʼi koa tona ʼapi ko te fāmili ʼe lotomamahi? ʼI te ʼu ʼaluʼaga ʼaia, ʼe lagi lelei ke ʼaua naʼa fualoa fau tata fai palalau ʼaē ʼi te ʼapi. (Tnk. 3:1, 7) ʼE lagi feala anai ke tou fakahā age tatatou lotomahino ʼaē ki tona lotomamahi, ʼo tou tuku age ia he kiʼi pepa lotu ʼe ʼalutahi mo te faʼahi ʼaia, he nusipepa, peʼe ko he kaupepa pea mo tou fakaʼapaʼapa ki tona mamahi, ʼo mole fualoa hatatou palalau kae tou ʼolo. ʼE feala anai ki muli age hatatou toe liliu mai ke tou vaevae mo ia he ʼu manatu fakalotofīmālie lahi mai te Tohi-Tapu.
3. Kapau ʼe tou fakatokagaʼi ʼe feala hatatou faifai palalau, ko te ʼu vaega Fakatohi-tapu fea ʼaē ʼe feala anai ke tou lau age kiā ia ʼaē ʼe lotomamahi?
3 ʼI ʼihi ʼaluʼaga, ʼe lagi tou fakatokagaʼi ʼe lahi te ʼu fakamatala ʼe feala ke tou fai ʼi tatatou ʼuluaki palalau ʼaē mo ia ʼi te fai fakamafola. Logolā ʼe mole ko he temi ke tou fakatonutonuʼi ai ni ʼu manatu ʼe mole lelei, kae ʼe feala anai ke tou lau age ki ai ia te ʼu fakapapau Fakatohi-tapu ʼo ʼuhiga mo te fakatuʼuake. (Soa. 5:28, 29) Peʼe feala hatatou fakahā age ia te manatu ʼa te Tohi-Tapu ʼo ʼuhiga mo te ʼaluʼaga ʼo te kau mate. (Tnk. 9:5, 10) Ko he hisitolia ʼi te Tohi-Tapu ʼo ʼuhiga mo he fakatuʼuake ʼe ko he tahi ʼaia fakalotofīmālie. (Soa. 11:39-44) Ko te tahi tokoni, ʼe ko hatatou lau age ia te ʼu palalau ʼaē neʼe fai e te tagata agatonu ko Sopo ʼo ʼuhiga mo tana ʼamanaki ʼaē kiā Sehova. (Sopo 14:14, 15) ʼI muʼa ʼo tatatou mavae mai te ʼapi ʼaia, tou tuku age ia te kaupepa Koteā ʼAē ʼe Hoko Kia Tatou Mokā Tou Mamate?, peʼe ko te kaupepa Mokā Mate He Tahi ʼe Tou ʼOfa Mamahi Ai, peʼe ko he tahi age kaupepa peʼe ko he ʼu kiʼi pepa lotu ʼe ʼalutahi mo te faʼahi ʼaia. Peʼe lagi feala ke tou tuku age ia te tohi Te Ako Mai Te Tohi-Tapu, ʼo tou fakahā age ia te ʼu manatu ʼaē ʼe tuʼu ʼi te kāpite 6, pea mo tou fakatuʼutuʼu ke tou toe liliu mai ʼo hoko atu te fai palalau ki te faʼahi ʼaia.
4. Koteā te tahi ʼu fealagia ʼe tou maʼu moʼo foaki ia he fakalotofīmālie ki te hahaʼi?
4 Te Tahi ʼu Fealagia: Kapau ʼe fai he akonaki ʼo he ʼavaifo ʼi te Fale ʼo te Puleʼaga, ʼe nofo ai anai koa ni hahaʼi ʼe mole ʼi te moʼoni? ʼE feala ke tou foaki age kiā nātou he ʼu tohi ʼe tuʼu ai ni ʼu fakalotofīmālie. Ko ʼihi fale mate neʼe natou leleiʼia ia tanatou maʼu ia he ʼu tohi maʼa te ʼu fāmili ʼaē ʼe lotomamahi. ʼI ʼihi temi, ʼi te sulunale ʼe fakahā ai te ʼu higoa ʼo nātou kua mamate, pea ko he faigamālie ʼaia moʼo fai ʼo he kiʼi tohi ki te ʼu fāmili ʼaē ʼe putu, moʼo fakalotofīmālieʼi ʼo nātou. ʼI te tahi ʼaluʼaga, ʼi te ʼosi maʼu e te tagata vītua pea mo tona ʼofafine ia te tohi neʼe ʼai ai te ʼu kiʼi pepa lotu, neʼe ʼolo leva ia te tautāmai ʼaia ki te ʼapi ʼo te ʼu tehina, ʼo fehuʼi age: “Ko kotou ʼaē neʼe kotou momoli mai ia te tohi ʼaenī? ʼE au fia mahino lahi age ki te Tohi-Tapu!” Neʼe tali e te tautāmai ke fai hanā ako Tohi-Tapu pea neʼe nā kau atu aipē ki te ʼu fono ʼo te kōkelekāsio.
5. He koʼē ʼe tonu ke tou vakavakaʼi te ʼu fealagia ʼaē ke tou fakalotofīmālieʼi ai ia nātou ʼaē ʼe lotomamahi?
5 ʼE ʼui fēnei iā Tagata Tānaki 7:2 “ ʼE lelei age [hakita] ʼalu ki te ʼapi ʼo ia ʼaē ʼe putu ʼi [hakita] ʼalu ki te ʼapi ʼaē ʼe fai ai te kātoaga.” ʼI te agamāhani ko ʼaē ʼe putu ʼe ina tali lelei age te Folafola ʼa te ʼAtua ʼi ʼaē ʼe fia fakafiafia. ʼE tonu kiā tātou fuli ke tou vakavakaʼi ia te ʼu fealagia ʼaē ke tou fakalotofīmālieʼi ai niʼihi ʼe natou lotomamahi he neʼe mate he tahi neʼe natou ʼofa mamahi ai.