Tou Popoto ʼi Te Fakaʼaogaʼi ʼo Te Tohi-Tapu
1. He koʼē ʼe ʼaoga ʼaupitō ia te Tohi-Tapu?
1 Ko tatatou popoto ʼi te fakaʼaogaʼi ia te Folafola ʼaē ʼe haʼu mai te ʼAtua, ʼe feala ai kiā tātou ke tou fakamafola pea mo akoʼi fakalelei ia te moʼoni ki te hahaʼi, pea mo tala ia te ʼu akonaki loi pea mo te ʼu talatisio fakatagata.—2 Tim. 2:15; 1 Pet. 3:15.
2. Koteā ʼaē kā tokoni mai anai ke tou popoto lelei age ʼi te maʼu ʼo te ʼu vaega Fakatohi-tapu?
2 Ke Kotou ʼIloʼi Lelei Age Te Tohi-Tapu: Ohagē pē ko te fakaʼaogaʼi ʼo he meʼa gāue, ʼe tou popoto anai ʼi tona fakaʼaogaʼi mokā tou ʼiloʼi lelei te meʼa gāue ʼaia. Ko te lau kātoa ʼo te Tohi-Tapu, ʼe kotou mahino ai anai ki te ʼu faʼahi ʼo te kupu tāfito ʼo te Tohi-Tapu. Ko te taʼi fai ʼaia, ʼe toe tokoni atu ke kotou manatuʼi he ʼu vaega Fakatohi-tapu pea mo kotou maʼu fakavilivili. Kapau ʼe lelei age takotou ʼiloʼi ia te Tohi-Tapu, pea kā kotou fai fagonogono faigamālie ki niʼihi pea mo fai fakamafola ʼi te minisitelio, ʼe mole kotou fula anai ʼi te palalau pea ʼe kotou tui papau anai ʼo ʼuhiga mo te ʼu logo ʼaē ʼe kotou tala.—1 Tes. 1:5.
3, 4. (a) Ko te ʼu ʼaluʼaga fea ʼaē ʼe feala ai ke tou ʼiloʼi lelei age ia te Tohi-Tapu? (b) Neʼe kua kotou fakaʼaogaʼi koa he tahi ʼu fakatuʼutuʼu ke kotou ʼiloʼi lelei age ia te Tohi-Tapu?
3 Kotou fakamāmāhani ʼo ʼavahi takotou Tohi-Tapu pea mo muliʼi ia te ʼu vaega ʼaē ʼe lau mai lolotoga te ʼu fono. Kā kotou fai ia takotou ako tokotahi pea mo teuteuʼi takotou ʼu fono, kotou kumi ia te ʼu vaega Fakatohi-tapu ʼaē ʼe tuʼu ai pea mo metitāsioʼi peʼe feafeaʼi hakotou maʼuliʼi. Tokolahi ʼi tanatou manatu ʼe lelei age hanatou lau totonu te ʼu vaega ʼi tanatou Tohi-Tapu, ʼi hanatou lau ʼi te olotinatea peʼe ʼi he laupepa neʼe tā kiai, heʼe faigafua anai kiā nātou ki ʼamuli mokā natou fai fakamafola hanatou maʼu ia te ʼu vaega.—Soa. 14:26.
4 Ko ʼihi fāmili neʼe natou fakatuʼutuʼu he temi moʼo ako fakaʼatamai ia he ʼu vaega Fakatohi-tapu. ʼE feala ke fai ia te faʼahi ʼaia, ʼaki he tohi kātoa ia te ʼu vaega Fakatohi-tapu ʼi he tahi faʼahi ʼo he ʼu kiʼi kate, pea ʼi he tahi faʼahi ia te higoa ʼo te koga tohi ʼaē ʼe tuʼu ai. ʼE feala ke natou fesuisuiʼaki ʼo fakaʼaogaʼi te ʼu kiʼi kate ʼaia moʼo vakaʼi peʼe feala hanatou lau fakaʼatamai he vaega peʼe natou manatuʼi ʼe tuʼu ʼifea. Ko te akoako ia te ʼu faʼifaʼitaki ʼaē ʼe tuku atu ki te fai fakamafola pea mo te ʼu tali ki he palalau fakafeagai peʼe ki he fehuʼi ʼaki te Tohi-Tapu, ʼe toe fakatuputupu ai takotou popoto ʼaē ʼi te fakaʼaogaʼi ʼo te Tohi-Tapu.
5. He koʼē ʼe tou fia fakatuputupu ia tatatou popoto ʼaē ʼi te fakaʼaogaʼi ʼo te Tohi-Tapu?
5 ʼE mole he tahi age Tohi-Tapu ʼe feala ke fakatatau ki te Tohi-Tapu. ʼE gata pē ki te Tohi-Tapu ʼe maʼu ai ia te ʼu folafola ʼaē ʼe feala ki te hahaʼi ke natou liliu ʼo “poto ki te fakamaʼuli.” (2 Tim. 3:15) Mai tona ʼaluʼaga ʼaē, tokolahi ia te hahaʼi ʼi totatou telituale ʼe mole natou faʼa ʼiloʼi lelei ia te ʼu koloa maʼuhiga ʼaē ʼe maʼu ʼi te Tohi-Tapu, koia ʼe ʼaoga ai ke tou fakatuputupu ia tatatou popoto ʼaē ʼi te fakahā kiā nātou ia te ʼu manatu tāfito ʼaē ʼe fia fakahā mai ʼi te Tohi-Tapu.—Taag. 2:1-5.