“Ke Kotou Vela ʼi Te Laumālie”
1. ʼE tonu ke feafeaʼi tatatou fai fakamafola?
1 ʼE mole he faʼahi ʼo tatatou tauhi Fakakilisitiano ʼe tonu ke tou fakafīfīmālie ai. Kae ʼe fakalotomālohiʼi tātou “ke [tou] vela ʼi te laumālie” pea mo tou “kaugana kiā Sehova.” (Loma 12:11) Kae ʼe lahi te ʼu faʼahi ʼe feala ke natou fakavaivaiʼi ai ia tatatou faʼafai ʼaē ʼi tatatou minisitelio. ʼE lava feafeaʼi hatatou “fakaulo ohagē he afi” tatatou faʼafai pea mo tatatou fiafia ʼi tatatou gāue ki te Puleʼaga?—2 Tim. 1:6, 7.
2. Koteā te pikipikiga ʼo te ako takitokotahi ʼo te Tohi-Tapu mo te faʼafai ʼi te minisitelio?
2 Te Ako Takitokotahi ʼo Te Tohi-Tapu: Ko he tahi ʼe gāue fakalelei ʼi tana fakamafola ia te Puleʼaga, ʼe ko he tahi ʼe ʼofa ki te lao ʼa te ʼAtua pea mo malave loloto kiā ia te ʼu moʼoni ʼaē ʼe tuʼu ai. (Pes. 119:97) Kā tou ako he ʼu moʼoni Fakatohi-tapu ʼi tatatou ako takitokotahi, pea ʼe malave ki totatou loto, pea mo fakatuputupu ai tatatou faʼafai. Ko tatatou ʼofa kiā Ia ʼaē neʼe ina foaki mai ia te ʼu moʼoni ʼaia pea mo tatatou fia vaevae te logo lelei mo ʼihi, ʼe uga ai tātou ke tou foaki he ʼu fakavikiviki ki te ʼAtua pea mo tala iā muʼa ʼo te hahaʼi ia tona huafa. (Hep. 13:15) ʼE mahino ia, ko te tala ʼaki he loto fakamālotoloto ia te logo lelei ʼe hā ai ʼe maʼuhiga ʼaupitō kiā tātou ia te logo ʼaia.
3. ʼE lava tokoni feafeaʼi mai ia te laumālie ʼo te ʼAtua ʼi tatatou minisitelio?
3 Tou Kole Ia Te Laumālie ʼo Te ʼAtua: Ko he minisitelio ʼe fua lelei ʼe mole fakahoko ʼaki pē totatou mālohi. ʼE tou maʼu te faʼafai moʼoni heʼe tou maʼu tuʼumaʼu pē ia te laumālie ʼo te ʼAtua. (1 Pet. 4:11) Ko tatatou fakaovi ki te Tupuʼaga ʼo “te mālohi” ʼe tou maʼu ai anai ia te mālohi fakalaumālie ʼaē moʼo fai fakamafola ʼaki he lototoʼa. (Isa. 40:26, 29-31) ʼI te temi ʼaē neʼe tau ai te ʼapositolo ko Paulo mo te ʼu faigataʼaʼia ʼi tana minisitelio, neʼe ina “maʼu ia te tokoni ʼaē mai te ʼAtua.” (Gāue 26:21, 22) Ko te laumālie māʼoniʼoni ʼo Sehova ʼaē ʼe ina foaki ia te mālohi, ʼe lava tokoni mai ke tou vela ʼi tatatou minisitelio, koia ʼe tonu ai ke tou kole ia te laumālie ʼaia.—Luka 11:9-13.
4. Koteā te ʼu lelei ʼaē ʼe feala ke toe fakatupu e te faʼafai, pea koteā ʼaē ʼe tonu ke tou tōkakaga kiai?
4 ʼI te agamāhani, ko te fakamafola ʼo te Puleʼaga ʼaki he faʼafai mālohi, ʼe ina toe fakatupu he faʼafai ʼe lahi age ʼi te kau Kilisitiano. (2 Ko. 9:2) ʼI te telituale, ʼe tali lelei age e te hahaʼi ia te logo mokā tou palalau fakafiafia pea mo tui papau ki te ʼu manatu ʼaē ʼe tou palalau age kiai. Kae ʼo hilifaki ki tatatou faʼafai, ʼe tonu tuʼumaʼu pē ke tou fakaʼeteʼete ʼi tatatou ʼu palalau pea mo tou agavaivai. (Tito 3:2) ʼI te temi fuli pē, ʼe tou kumi ke tou fakamaʼuhigaʼi te hahaʼi pea mo tou fakaʼapaʼapa ki tanatou loto faʼifaʼitaliha.
5. Koteā te tokoni ʼaē ʼe haʼu mai te ʼAtua ʼe tonu ke tou faiga ʼo mulimuli kiai?
5 ʼI totatou ʼuhiga kau fai fakamafola ʼo te Puleʼaga, ʼofa pē “ke [tou] vela ʼi te laumālie.” Tou haga maʼu ia te faʼafai ʼaki tatatou ako takitokotahi ia te Tohi-Tapu pea mo faikole fakamālotoloto kiā Sehova, ia ia ʼaē ʼe feala ke ina foaki mai ia te laumālie māʼoniʼoni mālohi. ʼAki te taʼi fai ʼaia, ʼe feala ai ke tou faʼafai ʼo fakahoko ia tatatou minisitelio “ ʼaki te laumālie māʼoniʼoni pea mo he tui papau.”—1 Tes. 1:5.