Te Tali Ki ʼAkotou ʼu Fehuʼi

◼ Koteā ʼaē ʼe feala ke fai e te nofoʼaki kātoa ke feala ai hanatou ako ʼi te temi ʼaē ʼe natou kau ai ki te ʼu fono ʼo te kōkelekāsio? (Teu. 31:12)

Moʼo fakahā he fakaʼapaʼapa lahi kiā Sehova pea mo tana fakatuʼutuʼu ʼaē ia he ʼu fono ʼi te kōkelekāsio, ʼe fakalotomālohiʼi ai tātou fuli ke tou ʼomai tautonu pea mo fakalogo ki tana akoʼi ʼaē tātou. ʼE lelei mo kapau ʼe tou heheka ʼi te ʼu hekaʼaga ʼaē ʼi muʼa ʼo te fale fono, ke ʼāteaina pē ia te ʼu hekaʼaga ʼaē ki muli maʼa nātou ʼaē ʼe maʼu fānau pea mo nātou ʼaē ʼe ʼomai tauhala ʼi ʼihi temi. ʼI muʼa ʼo te kamata ʼo te fono, ʼe tonu ke tou matehi tatatou ʼu kiʼi telefoni feʼāveʼaki pea mo te tahi age ʼu masini fēia, naʼa fakalelu ki te fia fakalogo ʼa te nofoʼaki. Kā tou taupau fuli ia he aga fakaʼapaʼapa lolotoga ia te fono, pea ʼe mole lahi anai te ʼu ʼaluʼaga ʼaē kā fakaleluʼi ai te nofoʼaki.—Tnk. 5:1; Filp. 2:4.

Kā kamata ʼomai ni ʼu hahaʼi foʼou ki tatatou ʼu fono, ko he tahi ʼi te kōkelekāsio ʼe ina ʼiloʼi lelei nātou ʼe lagi feala ke heka tahi mo nātou. ʼE ʼaoga tāfito anai ia te faʼahi ʼaia mo kapau ʼe ʼi ai hanatou ʼu fānau ʼe tonu ke akonakiʼi. Ko te kau ki te ʼu fono ʼe lagi ko he meʼa foʼou maʼa he fāmili. ʼE lagi natou leleiʼia anai hanatou heheka ʼi muli, ke mole natou fakalelu ki niʼihi mo kapau ʼe tonu ki te ʼu mātuʼa ke natou ʼolo fakatemi ki tuʼa ʼuhi ko tanatou ʼu tamaliki. (Taag. 22:6, 15) Ko te ʼu fāmili ʼaē ʼe kei liliki tanatou ʼu fānau ʼe mole tonu ke natou heheka ʼi he tahi age kiʼi koga fale ʼi te fale fono, heʼe fakatupu ai anai he logoaʼa faʼifaʼitaliha ʼa tanatou fānau. ʼI te agamāhani, ʼe lelei ke akonakiʼi e te tamai peʼe ko te faʼē ia te tamasiʼi peʼe ke tokaga ki te meʼa ʼaē ʼe ʼaoga kiā ia, ʼi tuʼa ʼo te fale fono pea toe liliu mai mo te tamasiʼi ki te loto fale fono.

Ko te ʼu tehina tali kāiga ʼe natou tōkakaga ke fakaʼapaʼapaʼi te fale fono. ʼE natou tokoni ki te ʼu fāmili pea mo nātou ʼaē ʼe tauhala mai ʼi ʼihi temi ke natou maʼu honatou hekaʼaga. Ko te ʼu tehina tali kāiga ʼe natou tōkakaga ke natou aga fakaʼapaʼapa pea mo fakaʼeteʼete ʼi tanatou faiga ʼaē ke heheka te hahaʼi, ke ʼaua naʼa natou fakalelu ki te fakalogo ʼa te nofoʼaki. ʼE natou aga fakapotopoto mokā tonu ke natou fakatokatoka he ʼu ʼaluʼaga ʼe hoko fakafokifā. Kā pago he tamasiʼi, ʼo fakalelu ai ki te fakalogo ʼa te nofoʼaki, ʼe feala ʼi te temi ʼaia, ʼaki he agalelei, ki te ʼu tehina tali kāiga ke natou foaki tanatou tokoni.

Ko te hahaʼi fuli ʼaē ʼe ʼomai ki te ʼu fono moʼo tauhi kiā Sehova, ʼe feala hanatou lagolago ki te lelei ʼo te ʼu fono ke feala ke maʼu ai he ako ʼo ʼuhiga mo Sehova pea mo tana fakatuʼu ʼo he mālama foʼou tokalelei pea mo faitotonu.—Hep. 10:24, 25.