Koutou Fakalogo Lelei Ki Te ʼu Folafola Taputapu
1 ʼE mole ʼaoga ke tou fakalogo ki te ʼu meʼa fuli ʼaē ʼe ʼui e te hahaʼi. Kae ka palalau te ʼAtua, pea ʼe maʼuhiga ʼaupito ke tou fakalogo. (Teu. 28:1, 2) Meʼa lelei foki, he neʼe takitaki e te laumālie maʼoniʼoni te ʼu tagata ke nātou tohi “te u folafola a te Atua” ke ʼaoga kia tatou. (Loma 3:2) Ko te fakatahi faka tisitilike ʼaē ka hoko mai, ʼe ina foaki mai anai he ʼu faigamālie ke tou logo ki te ʼu folafola ʼaia, mokā lau anai pea mo fakamahino. ʼE lava feafeaʼi hakotou fakalogo lelei?
2 Koutou ’Ōmai Fakatomuʼa ʼi Te Uhu Fuli: Koutou fakakaukauʼi age muʼa te fiafia ʼa te kau Iselaele, ʼi te ʼui age ʼaē ke nātou felāveʼi mo Sehova ʼi te Moʼuga ʼo Sinai, ke nātou logo ki tana Lao! (Ek. 19:10, 11, 16-19) Kapau ʼe koutou maʼu te taʼi fiafia ʼaia moʼo tali te ʼu akonaki ʼaē ka foaki mai e Sehova ʼi te fakatahi faka tisitilike, pea ʼe koutou fai anai he ʼu fakatuʼutuʼu ke koutou ʼōmai fakatomuʼa ʼi te ʼaho fuli. ʼE mole feala anai ke tou fakalogo ki te polokalama katoa, kapau ʼe tou tauhala mai, pea mo tou fakalelu ki te hahaʼi, heʼe tou kumi hatatou hekaʼaga. ʼE avahi anai te ʼu matapā ʼi te hola valu uhu, pea ʼi te ʼaho fuli ʼe kamata anai te polokalama ʼi te holo hiva vaelua.
3 Ko ʼihi ʼaē ʼe ʼōmai fakatomuʼa, ʼe mole heʼeki nātou heheka mokā kamata te polokalama. Koteā tona tupuʼaga? Heʼe nātou talitali ke hoki fakahā mai te katiko e te pelesita ʼo te fakatahi, pea hoki nātou tuku ai tanatou fai palalau mo tonatou ʼu kaumeʼa, kae nātou kumi tonatou ʼu hekaʼaga. ʼE tou fakatokagaʼi anai, lolotoga he ʼu minuta ʼi muʼa ʼo te kamata ʼo te katiko, kua heka mai ʼoluga te pelesita ʼo te fakatahi, kae lolotoga tatagi te musika ʼo te ʼu katiko ʼo te Puleʼaga. Ko tona faka ʼuhiga kua tonu ke tou ʼolo ʼo heheka! Pea ka kamata te ʼuluaki katiko, pea kua feala leva hatatou hiva fakavikiviki kia Sehova.
4 Ko He ʼu Famili Logo Tahi ʼe Nātou Fakalogo: ʼI te temi ʼaē neʼe lau ai te ʼu folafola taputapu ki te kau Iselaele ʼaē neʼe fakatahitahi, ko te ʼu famili, ʼo kau ai “mo nātou liliki,” neʼe tonu ke nātou fakalogo pea mo ako. (Teu. 31:12) ʼI tatatou ʼu fakatahi, ʼe mole tonu ke tou tuku te fānau ke nātou “faʼitaliha.” (Taag. 29:15) ʼE fakatuʼutuʼu anai e te ʼu mātuʼa ke heheka fakatahi tonatou kiʼi famili, ʼo kau kiai mo tanatou ʼu fānau ʼaē kua lalahi. Ko ʼihi mātuʼa ʼe nātou talitali ke hoki kamata te ʼuluaki katiko, pea nātou ʼave ai tanatou ʼu tamaliki ki te fale vao. Kae ko te taʼi fai ʼaia ʼe mole ina akoʼi anai ki te fānau te maʼuhiga ʼo te ʼu katiko pea mo te ʼu faikole ʼi tatatou tauhi. Koia ʼe lelei age, kapau ʼe feala, ke koutou ʼave takotou ʼu fānau ki te ʼu fale vao ʼi muʼa ʼo te kamata ʼo te polokalama!
5 ʼE feala anai hatatou fakalogo lelei ki te polokalama, kapau neʼe tou mālōlō lelei ʼi te pōʼuli, pea kapau neʼe mole lahi fau tatatou kakai ʼi te ʼaho ʼo te fakatahi. Koutou fakalogo lelei ki te akonaki ʼa te tēhina. ʼAua naʼa koutou fakakaukau ki he tahi meʼa. Koutou mulimuli ʼi te Tohi-Tapu te ʼu vaega ʼaē ʼe lau mai. Koutou tohi fakanounou te ʼu puani ʼo te ʼu akonaki. Ka fai he akonaki, pea koutou fakakaukauʼi te ʼu palalau ʼaē neʼe fai e te tēhina, pea mo vakaʼi peʼe koutou fakaʼaogaʼi feafeaʼi anai te ʼu puani ʼaia. Koutou fai palalau mo takotou famili ki te ʼu akonaki ʼaē neʼe fai ʼi te ʼaho ʼaia ʼo te fakatahi. Koteā te ʼu puani ʼaē neʼe koutou leleiʼia takitokotahi? ʼE lava fakaʼaogaʼi lelei feafeaʼi e takotou famili te ʼu akonaki ʼaē neʼe fai?
6 Koutou Fakaʼapaʼapa Ki Te Folafola ʼa Te ʼAtua: Ko te ʼu fakatahi ʼe ko he temi faigamālie ʼaia ke tou fai palalau ai mo tatatou ʼu kaumeʼa, pea ke tou fakatahi ai mo he ʼu hahaʼi fakaloto mālohi. Kapau ʼe tou ʼōmai fakatomuʼa, pea ʼe maʼu anai hatatou temi ke tou fai palalau ʼi muʼa ʼo te kamata ʼo te polokalama. Kae ko ʼihi ʼe nātou fai palalau lolotoga te polokalama, ʼo lagi nātou manatu ʼe mole fakalelu ki te hahaʼi he ko te fale lahi. Tatau aipe pe ko he fakatahi ʼe kaugamālie ai te hahaʼi, kae ʼe ko he temi moʼo fakalogo, ohage pe ko hatatou fakalogo mokā tou kau ki he fono ʼe fai ʼi te Fale ʼo te Puleʼaga. ʼE mole tonu ki te ʼu telefoni taki, te ʼu bips, te ʼu kamela pea mo te ʼu meʼa toho paki ke nātou fakalelu lolotoga te fakatahi.
7 ʼI te temi ʼaē neʼe foaki ai te Lao e Sehova kia Moisese, “neʼe mole ina kai he pane pea mole ina ʼinu he vai.” (Ek. 34:28) ʼO toe feiā pe, ʼe mole lelei anai hatatou kakai peʼe tou ʼiʼinu lolotoga te fakatahi, gata pe mokā kita mahaki, kae kapau leva ʼe mole kita mahaki, pea ʼe tonu ke kita talitali ki tona ‘temi totonu.’—Tnk. 3:1.
8 ʼI ʼihi fakatahi, ʼe ʼi ai te meʼa ʼe tau hoko, ko te tokolahi ʼo te ʼu tēhina mo tuagaʼane pea mo nātou liliki, ʼe nātou fakapupu ʼi tuʼa lolotoga te ʼu fakatahi. Ko te ʼu tēhina ʼaē ʼe gāue ʼi te tali kāiga, ʼe nātou kole anai kia nātou ʼaia ke nātou ʼolo ʼo nonofo ki tonatou ʼu hekaʼaga. Ko nātou ʼaē ʼe nātou fai he tahi ʼu gāue, ʼe tonu anai ke nātou ʼolo ʼo heheka mokā ʼosi tanatou gāue. Kapau ko ʼihi kau gāue ʼe mole hanatou ʼu gāue maʼuhiga ʼe tonu ke nātou fai lolotoga te polokalama, pea ʼe tonu ke nātou heheka maʼu, ʼo fakalogo ki te ʼu akonaki, kae ʼe mole tonu ke nātou feʼoloʼaki, peʼe nātou taka ʼi tuʼa lolotoga te fakatahi.
9 ʼE mole tou fia liliu anai ʼo ‘logogataʼa’ mokā tou fakalogo ki te Folafola ʼa te ʼAtua. (Hep. 5:11) Koia tou faiga mālohi ke tou fai he aga fakaʼapaʼapa, ʼo tou fakalogo lelei ki te ʼu folafola taputapu ʼa Sehova ʼaē ka fakahā mai ʼi te fakatahi faka tisitilike.