‘Tou Fakalogo Ke Lahi Te ʼu Meʼa ʼAē ʼe Tou Ako’
1 ʼE ʼui e te tohi ʼo Tāʼaga Lea ko te poto ʼe ina pāui fēnei: “Koutou fakalogo, heʼe ʼau palalau ʼo ʼuhiga mo te ʼu meʼa maʼuhiga, pea ʼe ava toku ʼu laugutu ʼo ʼuhiga mo te faitotonu. ʼE ʼau maʼu te tokoni pea mo te poto ʼaē ʼe ʼaoga. . . . Koutou fakalogo mai kia te ʼau; ei, manuʼia ia nātou ʼaē ʼe nātou taupau toku ʼu ala. Heʼe ko ia ʼaē ʼe ina maʼu ʼau, ʼe ina maʼu moʼoni anai te maʼuli, pea ʼe ina maʼu te finegaloʼofa mai ia Sehova.” (Taag. 8:6, 14, 32, 35) Ko te ʼu palalau ʼaia ʼe ina fakahā lelei mai te ʼu meʼa ʼaē ka tou ako anai ʼi te Fakatahi Faka Tisitilike “Te Kau Faiako ʼo Te Folafola ʼa Te ʼAtua.”
2 Neʼe vakaʼi te ʼu meʼa ʼaē ʼe ʼaoga ki te foʼi famili faka tautēhina ʼi te malamanei katoa, pea neʼe teuteuʼi te polokalama ʼo te fakatahi moʼo tali ki te ʼu faʼahi ʼaia. Kapau ʼe tou maʼuliʼi te ako fakalaumālie pea mo te ʼu tokoni ʼaoga ʼaē ka foaki mai, pea ʼe tokoni mai anai ke tou maʼuli fiafia, ke tou taupau maʼu he ʼu felogoi lelei mo Sehova, pea mo tou haga haʼele ʼi te ala ki te maʼuli heʼegata. Ei, ʼe lelei ke tou ‘fakalogo ke lahi te ʼu meʼa ʼaē ʼe tou ako.’—Taag. 1:5.
3 ʼI Muʼa ʼo Te Polokalama: Ke tou logo katoa ki te polokalama, ʼe tonu ʼi te kamata ʼo te fakatahi, ke tou tahi nofo ʼi tona hekaʼaga pea mo tokalelei totatou ʼatamai. ʼE tonu ai ke tou fakatuʼutuʼu lelei totatou temi. Ko te meʼa ʼaē ʼe maʼuhiga tāfito, ko te foimo fai he ʼu fakatuʼutuʼu. Koutou momoe tautonu. Koutou foimo ʼaʼala ke lava tokalelei te loto fale katoa pea mo teuteuʼi takotou meʼa kai. Koutou ʼōmai fakatomuʼa ki te fale ʼo te fakatahi, ke maʼu hokotou hekaʼaga pea mo fai te ʼu meʼa ʼaē ʼe maʼua ke koutou fai ʼi muʼa ʼo te kamata ʼo te polokalama. ʼE avahi anai te ʼu matapā ʼi te hola 8 uhu, pea ʼi te ʼaho fuli ʼe kamata anai te polokalama ʼi te hola 9 vaelua.
4 Mai tona ʼuhiga ʼaē ko te fakatuʼutuʼu tāfito ʼo te fakatahi ʼe ko te fakavikiviki kia Sehova “ ʼi te ʼu hahaʼi kaugamālie ʼaē ʼe fakatahitahi,” koia ʼe tonu ai ke kamata te ʼu ʼaho ʼo te fakatahi ʼi he ʼaluʼaga ʼe ina fakavikiviki totatou ʼAtua. (Pes. 26:12) Koia ʼe fakaloto mālohiʼi ai ia tatou fuli ke tou heheka ʼi muʼa ʼo te tala mai ʼo te ʼuluaki katiko. ʼE ʼalutahi te faʼahi ʼaia mo te tokoni faka Tohi-Tapu ʼaenī: “Koutou fai ia meafuape i te fakapotopoto mo te fakatokatoka.” (1 Ko. 14:40) Koteā tona faka ʼuhiga kia tatou takitokotahi? Ko tona faka ʼuhiga ka tou sio ki te pelesita ʼo te fakatahi kua heka mai ʼoluga lolotoga te ʼuluaki musika, pea tou foimo ʼolo ʼo heheka. ʼE feala ai anai ke tou kau katoa ki te hiva ʼo te katiko ʼo te kamata, moʼo fakavikiviki kia Sehova.—Pes. 149:1.
5 Lolotoga Te Polokalama: Ko Esitalasi ‘neʼe ina teuteuʼi tona loto moʼo vakavakaʼi te lao ʼa Sehova, pea ke ina maʼuliʼi.’ (Esi. 7:10) ʼE tou lava teuteuʼi feafeaʼi totatou loto moʼo tali te ako ʼaē ʼe foaki mai e Sehova? ʼI takotou vakaʼi te ʼu kupu tāfito ʼo te ʼu akonaki ʼaē ʼe tuʼu ʼi te polokalama, koutou fehuʼi fēnei kia koutou, ‘Koteā ʼaē ʼe ʼui mai e Sehova kia ʼau ʼaki te polokalama ʼaenī? ʼE lava ʼaoga feafeaʼi te ʼu akonaki ʼaia kia ʼau pea mo toku famili?’ (Isa. 30:21; Ef. 5:17) Koutou fai tuʼumaʼu te ʼu fehuʼi ʼaia lolotoga te fakatahi. Koutou tohi te ʼu puani ʼaē ʼe koutou fia fakaʼaogaʼi. ʼI te ʼu ʼaho fuli ʼo te fakatahi, koutou palalau kiai ʼi te fakaʼosi ʼo te polokalama, heʼe tokoni atu anai ke koutou manatuʼi pea mo maʼuliʼi te ʼu puani ʼaia.
6 ʼE ko he meʼa faigataʼa hakita nofo lolotoga ni ʼu hola ʼo fakalogo katoa ki te polokalama. Koteā ʼaē ʼe lava tokoni kia tatou ke mole hēʼia tatatou fakakaukau? Koutou fakaʼaogaʼi lelei te fealagia ʼo tokotou ʼu mata. ʼI te agamāhani, ʼe tou tokagaʼi tāfito te meʼa ʼaē ʼe tou sioʼi. (Mat. 6:22) Koia, ʼaua naʼa koutou hoko mafuli ʼo sioʼi te ʼu feʼaluʼaki ʼa te hahaʼi peʼe koutou tokagaʼi te logoaʼa. Koutou haga sio te tēhina ʼaē ʼe ina fai te akonaki. Koutou sioʼi takotou Tohi-Tapu mokā lau mai he vaega, pea koutou tuku ava lolotoga te fakamahino ʼo te vaega ʼaia.
7 Ko te ʼofa faka Kilisitiano ʼe ina uga anai tatou ke mole tou hohaʼa ki te hahaʼi lolotoga te polokalama. (1 Ko. 13:5) ʼE ko “he temi moʼo fakalogologo” pea mo fakalogo. (Tnk. 3:7) Koia ʼaua naʼa koutou hoko palalau pea mo hoko feʼoloʼaki. Koutou vakaʼi fakatomuʼa te ʼu temi ʼaē ka koutou ʼolo ai ki te fale mamaʼo. ʼAua naʼa koutou kakai peʼe ʼiʼinu lolotoga te fakatahi, gata pe mo kapau ʼe koutou mahahaki. ʼAua naʼa tou hohaʼa ki te hahaʼi ʼaki tatatou ʼu telefoni feʼāveʼaki, peʼe ko he bip, mo te ʼu kamela pea mo te ʼu meʼa fai paki. ʼE tonu ke tokaga te ʼu mātuʼa ke heheka fakatahi mo tanatou ʼu fānau—māʼia mo nātou ʼaē kua lalahi—ke feala hanatou leʼoleʼo lelei nātou.—Taag. 29:15.
8 ʼI te taʼu ʼaenī kua ʼosi, neʼe ʼui fēnei e te tagata ʼāfea kua lauʼi taʼu tana kau ki te ʼu fakatahi: “ ʼI taku sio, neʼe ʼi ai te tahi tupuʼaga ʼo te fakaofoofo ʼo te fakatahi ʼaia. Neʼe teitei ko te hahaʼi fuli, ʼo feiā mo nātou liliki, neʼe nātou tohi te ʼu akonaki ʼaē neʼe fai. Neʼe ko he meʼa fakafiafia hakita sio ki te faʼahi ʼaia. Neʼe nātou avahi tanatou ʼu Tohi-Tapu ʼi te ʼu temi ʼaē neʼe tala mai ai te ʼu vaega e te ʼu tēhina fai akonaki.” ʼE feala moʼoni hatatou fakavikiviki ki te taʼi fakalogo ʼaia. ʼE ʼi ai tona ʼu fua lelei kia tatou pea mo totatou ʼu tēhina mo tuagaʼane, kae tāfito ʼe ko he fakavikiviki ʼaia ki totatou Tagata Faiako Lahi, ia Sehova ʼAtua.—Isa. 30:20.
9 Ko tatatou aga fakaʼapaʼapa pea mo tatatou aga faka Kilisitiano, ʼe ina fakamoʼoni anai ki tatatou tui faka Kilisitiano, pea mo ina faka faigafua anai ki te hahaʼi fakamalotoloto ke nātou ʼiloʼi te moʼoni. ʼOfa pe ke ʼaua naʼa tou fakatupu kovi ki te ʼuhiga fakalaumālie ʼo te fakatahi, ʼaki tatatou aga, mo tatatou faʼahiga teu pea mo te gaohi ʼo totatou ulu. (Filp. 1:10; 1 Tim. 2:9, 10) Koia tou tuku he faʼifaʼitaki lelei ʼo tou fakalogo pea mo tokoni ki te hahaʼi ke ‘lahi te ʼu meʼa ʼaē ʼe nātou ako’ ʼi te Fakatahi Faka Tisitilike “Te Kau Faiako ʼo Te Folafola ʼa Te ʼAtua.”—Loma 13:3.