Te Gāue ʼAē ʼe Maʼuhiga ʼAupitō Age
1. ʼI te maʼuhiga ʼaupitō ʼaē kiā tātou ia te minisitelio, koteā te ʼu sākilifisio ʼaē ʼe tou fia fai anai?
1 He koʼē ʼe fakalotomālohiʼi tuʼumaʼu tātou ke tou foaki ia totatou temi, mo totatou mālohi pea mo totatou ʼu koloa ki te fai ʼaē ʼo te minisitelio? Heʼe mole he tahi gāue ʼe maʼuhiga age! Ko tatatou fakakaukauʼi ki te ʼu fua ʼo te gāue ʼaia, ʼe fakatuputupu ai anai hatatou fia kau kiai he mole toe fakahoko anai ki muli age.—Gāue 20:24.
2. ʼE tokoni feafeaʼi tatatou fai fakamafola ke tou fakatapuhā ia te huafa lahi ʼo Sehova?
2 ʼE Fakatapuhā Ai Ia Te Huafa ʼo Sehova: ʼI te gāue fai fakamafola, ʼe tou fakahā tāfito ʼe ko te Puleʼaga ʼo Sehova ʼaē ʼe puleʼi e Kilisito Sesu, ʼaē kā ina fetogi anai ia te ʼu puleʼaga fakatagata fuli pea mo ina foaki ia te ʼu puleʼaki ki te ʼu faigataʼaʼia fuli ʼo te mālamanei. (Mat. 6:9, 10) ʼE tou fakakolōliaʼi ai ia Sehova, ʼe ko ia tokotahi pē ʼaē ʼe feala ke ina haofaki tātou mai te mahaki pea mo te mate. (Isa. 25:8; 33:24) Mai tona ʼaluʼaga ʼaē ʼe tou fua ia tona huafa, ko te hahaʼi ʼaē ʼe natou sisio ki tatatou aga ʼaē ʼe lelei pea mo tatatou faʼafai, ʼe feala aipē ke natou fakakolōliaʼi ia Sehova. (1 Pet. 2:12) ʼE tou fiafia lahi ʼi tatatou fakaʼilo ʼi te kele kātoa ia te huafa ʼo te Tuʼi ʼAliki ko Sehova!—Pes. 83:18.
3. Koteā te ʼu lelei ʼe maʼu e nātou ʼaē ʼe natou tali ia te logo ʼo te Puleʼaga?
3 ʼE Haofaki Ai Te ʼu Maʼuli: Ko Sehova “[ʼe] mole ina loto ke fakaʼauha he tahi kae ʼe loto ia ke aʼu te hahaʼi fuli ki te fakahemala.” (2 Pet. 3:9) Kae kapau ʼe mole he tahi moʼo akoʼi te hahaʼi, ʼe natou ʼiloʼi feafeaʼi anai te aga ʼaē ʼe lelei kiā Sehova pea mo ʼaē ʼe kovi? (Son. 4:11; Loma 10:13-15) Kā tali e te hahaʼi ia te logo lelei, ʼe hikihiki te lelei ʼo tonatou maʼuli heʼe natou liʼaki ia te ʼu aga ʼaē ʼe kovi. (Mik. 4:1-4) Tahi ʼaē meʼa, ʼe natou maʼu ia te ʼamanaki fiafia ʼaē ko te maʼuli heʼegata. Ko tatatou faʼafai ʼi te fai fakamafola pea mo te faiako ʼe haofaki ai tātou pea mo nātou ʼaē ʼe fagono mai. (1 Tim. 4:16) Ko he toe pilivilēsio lahi ʼe tou maʼu ʼi te gāue ʼaia ʼaē ʼe maʼuhiga ʼaupitō!
4. He koʼē ʼe tonu ke tou kau lahi ki te gāue fai fakamafola pea mo te fai ʼo he ʼu tisipulo?
4 ʼI te mamahi lahi ʼaē kua ovi mai, ʼe pulihi fakafokifā anai ia te mālama heʼe agatonu ʼaenī. Ko nātou ʼaē ʼe natou lagolago kiā Sehova ʼe haofaki anai nātou. Koia, ko te fai fakamafola pea mo te fai ʼo he ʼu tisipulo ʼe ko te gāue ʼaē ʼe maʼuhiga, mo fua lelei ʼe lolotoga fai ʼi te temi nei. Tou fakahoko tāfito ia te gāue ʼaia ʼi totatou maʼuli!—Mat. 6:33.