ʼE Kamata ʼi Te ʼAho 17 ʼo Malesio Ia Te Tufa Moʼo Fakaafe Ia Te Hahaʼi Ki Te ʼAho Fakamanatu
1. Koteā ia te tufa ʼaē kā kamata anai ʼi te ʼaho 17 ʼo Malesio?
1 Ko te toʼotoʼoga ʼo te ʼAho Fakamanatu ʼe fai ʼi te taʼu fuli moʼo fakahā ia te mate ʼo Sesu. (1 Ko. 11:26) Koia, ʼe tou fakaʼamu ke kau fakatahi ni ʼihi mo tātou pea ke natou fakalogo ki te meʼa ʼofa ʼo Sehova, ia te totogi. (Soa. 3:16) ʼI te taʼu ʼaenī, ʼe kamata anai ia tatatou tufa moʼo fakaafe ia te hahaʼi ke ʼomai ki te ʼAho Fakamanatu ʼi te Moeaki ʼaho 17 ʼo Malesio. ʼE kotou fakatuʼutuʼu koa ke kotou lagolago kātoa ki te tufa ʼaia?
2. Koteā ʼaē ʼe feala ke tou ʼui ʼi te tufa ʼo te pepa fakaafe?
2 Koteā ʼAē ʼe Feala Ke Tou ʼUi: ʼE lelei ke nounou ʼatatou palalau. ʼE tou lava ʼui fēnei: “Mālo te maʼuli. Neʼe mā ʼomai ʼo tuku atu ki tou fāmili ia te pepa fakaafe ʼaenī ki he toʼotoʼoga maʼuhiga kā fai anai ʼi te taʼu ʼaenī, ʼe fai ʼi te mālamanei kātoa ʼi te ʼaho 5 ʼo ʼApelili. ʼE fai anai ia he akonaki Fakatohi-tapu, ʼe fakamahinohino ai te ʼu meʼa ʼaē neʼe lava hoko ʼaki ia te mate ʼa Sesu pea koteā ʼaē ʼe ina lolotoga fai. ʼE fakahā atu ʼi te pepa fakaafe ʼaenī ia te koga meʼa ʼaē kā fai ai te fono pea mo tona hola.” Kā tou kau ki te tufa ʼi te ʼu Moeaki pea mo te ʼu ʼAhotapu, ʼe tonu ke tou toe tufa mo te ʼu nusipepa mokā ʼe feala ia te faʼahi ʼaia.
3. ʼE tou lava fakaafe feafeaʼi ia he hahaʼi tokolahi?
3 Kotou Fakaafe Ia He Hahaʼi Tokolahi: Ko tatatou fakatuʼutuʼu ke tou fakaafe ia he hahaʼi tokolahi. Kotou manatuʼi ʼo fakaafe ʼakotou ako, mo ʼakotou ʼaʼahi, mo ʼokotou kāiga, mo ʼokotou kaugā gāue, mo ʼokotou kaugā ako, mo ʼokotou vāhaʼa fale, pea mo ʼihi atu ʼe kotou feʼiloʼiʼaki mo nātou. ʼE fakahā atu anai e te kau tagata ʼāfea he ʼu fakatuʼutuʼu ʼo ʼuhiga mo te faʼahiga fai ʼo takotou telituale. ʼE fua lelei anai ia tatatou tufa ʼi te taʼu ʼaenī moʼo fakaafe ia te hahaʼi ki te ʼAho Fakamanatu. ʼI te taʼu ʼaenī kua hili atu, neʼe haʼu te fafine ki te fakatahi, pea neʼe fia tokoni ia te tehina ʼo te tali kāiga ke ina maʼu ia te tuagaʼane ʼaē neʼe ina fakaafe ia ia. Kae, neʼe ʼui e te fafine ʼe mole ina ʼiloʼi ia he tahi pea neʼe ina maʼu tona pepa fakaafe mai he tahi neʼe fai fakamafola ʼi te ʼu ʼapi ʼi te ʼuhu ʼo te ʼaho pē ʼaia.
4. Koteā ia te ʼu tupuʼaga ʼaē ke tou lagolago ai ʼaki he faʼafai ki te tufa?
4 ʼE lagi kotou maʼu anai ia he tahi ʼi te nofoʼaki ʼi te ʼAho Fakamanatu, he neʼe kotou tuku age ki ai he pepa fakaafe. Tatau aipē pe neʼe tali e he tahi ia takotou fai fakaafe peʼe kailoa, kae ʼaki ʼakotou faiga neʼe kotou foaki ia he fakamoʼoni. Ko te ʼu pepa fakaafe ʼaē ʼe kotou tufa ʼe ina tala anai ko Sesu ʼe ko te Hau mālohi iā ʼaho nei. Ko takotou lagolago ʼaki he faʼafai, ʼe fakahā anai kiā nātou ʼaē ʼe natou sioʼi koutou—te hahaʼi ʼi te telituale, te kau fai fakamafola, pea mo ia ʼaē ʼe maʼuhiga ʼaupitō, ia Sehova—ʼe kotou loto fakafetaʼi lahi ki te meʼa ʼofa ko te totogi.—Kol. 3:15.