ʼE Feala Koa Ke Kotou Fai Fakamafola ʼi Te Afiafi?
1. ʼO mulimuli ki te ʼu palalau neʼe fai e te tagata sivi Tohi-Tapu, neʼe ko te temi fea ʼaē neʼe ʼalu ai te ʼapositolo ko Paulo ʼo fai fakamafola ʼi te ʼu ʼapi?
1 ʼO mulimuli ki te tohi Daily Life in Bible Times, neʼe ko he agamāhani ʼa te ʼapositolo ko Paulo tana fai fakamafola ʼi te ʼu ʼapi “mai te hola 4 afiafi ʼo aʼu ki te pōʼuli.” ʼE mole tou ʼiloʼi tana fakatuʼutuʼu, kae ʼe tou ʼiloʼi papau ko Paulo neʼe loto ia ke ina “fai te u mea fuli aia uhi ko te Evaselio.” (1 Ko. 9:19-23) ʼE mahino ia, neʼe ina fai he fakatuʼutuʼu ʼo ʼuhiga mo tana gāue ke feala hana ʼalu ki te ʼu ʼapi ʼi te temi ʼaē ʼe ina maʼu atu ai te hahaʼi.
2. He koʼē ko te ʼu afiafi ʼe ko he temi lelei ʼaia ki te fai fakamafola?
2 ʼE lahi te ʼu fenua, ʼe ʼolo māhani ai te kau fai fakamafola ʼi te ʼu ʼapi ʼi te ʼuhu lolotoga te vāhaʼa. Kae, ʼi tokotou fenua, ʼe ko te temi pē koa ʼaia ʼaē ʼe lelei? ʼE ʼui fēnei e te pioniē ʼo ʼuhiga mo tona telituale: “ ʼE faigataʼa ia te maʼu ʼo te hahaʼi iō nātou lolotoga te ʼaho. Kae ʼi te afiafi, ko te tokolahi ʼe nonofo ʼi fale.” Ko te fai fakamafola ʼi te afiafi ʼe ko he faigamālie lelei ke tou tala te logo lelei ki te hahaʼi tagata. Pea ʼi te ʼu lakaga ʼaia, ko te hahaʼi ʼe natou fīmālie pea ʼe natou fia fai palalau. Kapau ʼe ʼaoga ke fakahoko te faʼahi ʼaia, ʼe feala ke fakatuʼutuʼu e te ʼu tagata ʼāfea ia he ʼu fono gāue fai fakamafola ʼi te afiafi.
3. ʼE tou fakahā feafeaʼi ia te fakasiosio tonu ʼi te fai fakamafola ʼi te afiafi?
3 Kotou Maʼu Te Fakasiosio Tonu: ʼI takotou fai fakamafola ʼi te afiafi, ʼe ʼaoga kiā koutou ia te fakasiosio tonu. Kapau ʼe kotou pāuiʼi he tahi ʼi he temi ʼe mole tō lelei, ohagē lā ko te temi kai, pea ʼe lelei anai ke kotou fakalelei age pea mo ʼui age ʼe kotou toe liliu age anai ʼi he tahi temi. Kapau kua pōʼuli, kotou tutuʼu ʼi he faʼahi ʼe feala ke ʼiloʼi ai koutou, mo kotou fakamālo age pea mo fakahā te tupuʼaga ʼo takotou ʼolo age. ʼE ko he meʼa fakapotopoto te gāue takitokolua peʼe fakakūtuga, pea kā kotou hahaʼi kotou tutuʼu ʼi te ʼu ala ʼaē ʼe mālamagia. ʼAua naʼa tauhala fau takotou fai fakamafola naʼa kotou tau atu ʼi te temi ʼaē ʼe teuteu ai te hahaʼi ke momoe. (2 Ko. 6:3) Kapau ʼe kotou fai fakamafola ʼi he kolo ʼe kovi ʼi te pōʼuli, pea ʼe tonu anai ke kotou tuku tautonu takotou gāue fai fakamafola.—Taag. 22:3.
4. Koteā te ʼu tapuakina ʼe tou maʼu ʼi te fai fakamafola ʼi te afiafi?
4 Te ʼu Tapuakina: ʼE lahi age te fiafia ʼi te minisitelio mokā tou lava fai palalau mo te hahaʼi. Pea ʼi te lahi ʼo tatatou fai fakamafola, ʼe lahi anai te ʼu faigamālie ʼe tou maʼu ke tou tokoni ki te haofaki ʼo te hahaʼi, “pea ke natou kaku ki te iloi katoa o te mooni.” (1 Tim. 2:3, 4) ʼE feala koa ke kotou fetogi takotou polokalama ke kotou fai fakamafola ʼi te afiafi?