ʼAua Naʼa Kotou Manatu ʼe Mole Kotou Popoto ʼi Te Fai ʼo He Ako Tohi-Tapu
1. He koʼē ʼe mole kole e ʼihi ki he tahi ke fai hana ako Tohi-Tapu?
1 ʼE tupu koa lā takotou mole kole ki he tahi ke fai hana ako Tohi-Tapu heʼe kotou manatu ʼe mole kotou popoto ʼi tona fai? Ko te ʼu kaugana agatonu ʼo te temi muʼa, ohagē ko Moisese mo Selemia, neʼe natou manatu ʼi ʼihi temi ʼe mole natou popoto ʼi te fakahoko ʼo he gāue neʼe tuku age. (Eke. 3:10, 11; 4:10; Sel. 1:4-6) Tokolahi ʼe natou manatu fēia. Kae ʼe feafeaʼi hatatou tauʼi te manatu ʼaia?
2. He koʼē ʼe mole tonu ke tou kau pē ki te fai faka mafola ʼi te ʼu ʼapi kae tou tuku te ʼu ako Tohi-Tapu ki ʼihi atu?
2 Tou manatuʼi ʼe mole kole mai anai e Sehova ke tou fai he gāue ʼe mole tou lavaʼi. (Pes. 103:14) Koia ko te fakatotonu ʼaē ke tou “fai ni tisipulo” mo “ako natou,” ʼe ko he gāue ia ʼe tou lava fai. (Mat. 28:19, 20) ʼE mole ko he fealagia makehe neʼe foaki pē e Sehova kiā nātou ʼaē kua māhani age ʼi te faiako peʼe popoto age iā tātou. (1 Ko. 1:26, 27) Koia, e mole tonu ke tou kau pē ki te fai faka mafola ʼi te ʼu ʼapi kae tou tuku te ʼu ako Tohi-Tapu ki ʼihi atu.
3. ʼE akoʼi feafeaʼi tātou e Sehova ke tou popoto ʼi te fai ʼo he ako Tohi-Tapu?
3 ʼE Akoʼi Tātou e Sehova Ke Tou Popoto: ʼE akoʼi tātou e Sehova ke tou popoto ʼi te fai ʼo ni tisipulo. (2 Ko. 3:5) ʼAki tana kautahi ʼe ina akoʼi mai te ʼu moʼoni ʼo te Tohi-Tapu, ʼaē ʼe mole ʼiloʼi pē lā e te hahaʼi popoto ʼo te mālamanei. (1 Ko. 2:7, 8) Neʼe ina taupau te ʼu fakamatala ʼo te faʼahiga faiako ʼa te Tagata Faiako Lahi ko Sesu ke tou faʼifaʼitakiʼi, pea ʼe ina haga akoako tātou ʼi te kōkelekāsio. Pea tahi, neʼe foaki mai e Sehova he ʼu tohi ke tou akoʼi ai te Tohi-Tapu ki te hahaʼi. Ohagē lā ko te tohi Te Ako Mai Te Tohi-Tapu, ʼaē ʼe fakahoa lelei ai te fakamahino ʼo te moʼoni ʼi hona aluʼaga faigafua. Koia ʼe hā mai ai ʼe mole faigataʼa fau hatatou fai he ako Tohi-Tapu.
4. He koʼē ʼe feala ke tou falala ʼe tokoni mai anai Sehova?
4 Neʼe lava fakahoko e Moisese mo Selemia tanā gāue ʼaki te tokoni ʼa Sehova. (Eke. 4:11, 12; Sel. 1:7, 8) ʼE feala mo tātou ke tou kole ke tokoni mai Sehova. Heʼe kā tou fai he ako Tohi-Tapu, ʼe tou akoʼi ai ki he tahi te moʼoni ʼo ʼuhiga mo Sehova, pea ʼe ko he faʼahi ʼe lelei ki te ʼAtua. (1 Soa. 3:22) Koia, kotou fakatuʼutuʼu ke kotou fai ni ako Tohi-Tapu, heʼe kotou maʼu ai he toe fiafia pea mo he toe fakapale lahi.