“Kotou ʼOʼofa Ki Te Famili Katoa ʼo Te ʼu Tehina”
Neʼe tohi ia te ʼu palalau ʼaia ʼi te Folafola ʼa te ʼAtua, kua hili ki ai taʼu ʼe lua afe tupu. (1 Pet. 2:17) ʼE maʼuhiga ke tou maʼuliʼi ia te ʼu palalau ʼaia, tafitō ʼi te temi nei! Kaʼe, ʼe feafeaʼi hatatou ʼoʼofa ki he famili ʼe kauga malie ʼaupito? Kotea ʼe tonu ke tou fai ke ʼaua naʼa puli ia te ʼofa ʼaia ʼuhi ko te malama agakovi ʼaeni? (Mat. 24:12) Kotou faiga ke kotou tali ki te ʼu fehuʼi ʼaeni lolotoga takotou sioʼi te foʼi ʼata Toute la communauté des frères.
(1) Ko te temi fea ʼae ʼe tou kau moʼoni ai ki te famili ʼaia ʼo te ʼu tehina? (2) Kotea te ʼu gaue ʼe tolu ʼe tou fakahoko fakatahi mo ʼotatou tehina ʼi te malamanei katoa? (3) ʼE fakaha feafeaʼi e ʼotatou tehina tanatou lotomoʼoni ʼae ke hoko te gaue faifakamafola (1) ʼi te ʼu koga meʼa mamaʼo ʼo Alaska, (2) ʼi te ʼu uafu lalahi ʼo Eulopa, pea (3) ʼi te ʼu vao matuʼa o Pelu? (4) He ko ʼe ʼe tonu ke tou fakamaʼuhigaʼi tuʼumaʼu ia te gaue faifakamafola? (5) Fakamatala he ʼu aluʼaga neʼe fefakalotofimalieʼaki pea mo felagolagoʼaki ai ia te kau Fakamoʼoni ʼa Sehova ʼi te ʼu temi mamahi ʼuhi ko (1) te ʼu mafuike, (2) mo te ʼu ʼafa, (3) pea mo te ʼu tau? (6) Kotea te ʼu meʼa ʼe feala ke tou fai moʼo fakaha te fakailoga lahi ʼo totatou fale tautehina Fakakilisitiano? (Soa. 13:35) (7) Kotea te ʼu fua lelei ʼe feala ke tou maʼu moka tou gaue fakatahi mo te ʼu tehina ki te laga ʼo ʼotatou Fale Fono? (8) Kotea ʼae neʼe fai e te ʼu tehina ʼo te Potu Esite ʼo Eulopa pea mo Lusia, ke feala hanatou nonofo malohi ʼi te faʼahi fakalaumalie, ʼi te ʼu temi ʼae neʼe tapuʼi ai ʼanatou fono pea mo tanatou gaue faifakamafola? (9) Kotea te ʼu faiga malohi ʼe fakahoko e ʼihi ʼu fakamoʼoni ke feala hanatou kau ki te ʼu fakatahi lalahi, pea kotea tona tupuʼaga? (10) ʼE uga malohi feafeaʼi tatou e te foʼi ʼata ʼaeni (1) ke tou tauhi fakatahi kia Sehova, mo te ʼu tehina pea mo te ʼu tuagaʼane, ʼi te ʼu fono Fakakilisitiano, (2) ke tou felagolagoʼaki ʼi te ʼu temi mamahi, (3) ke tou fakahoko tuʼumaʼu te gaue faifakamafola ʼi he koga meʼa pe? (11) ʼE tou lava fakaʼaogaʼi feafeaʼi ia te foʼi ʼata ʼaeni ʼi tatatou gaue faifakamafola?
Ko te tupuʼaga tafitō ʼo tatatou kau ki te famili ʼo te ʼu tehina Fakakilisitiano ʼe ko totatou ʼofa ʼae kia Sehova. Koia la ʼae ʼe tou fia ako ai ke tou iloʼi lelei ia ia pea mo vaevae te ako ʼaia ki te hahaʼi. Pea ʼe tou ʼoʼofa kia natou ʼae ʼe ʼofa ki ai ia Sehova. Ka tou tokoni kia natou ʼae ʼe mamahi, ʼe mole tonu ke tou fakaʼamu ʼe fakamalō mai anai ia Sehova. Kaʼe ʼe tou fakafetaʼi ki te ʼAtua ʼi tana foaki mai ia te meʼa ʼofa maʼuhiga ʼae ko tatatou famili ʼo te ʼu tehina Fakakilisitiano. Kua vave pulihi ia te malama agakovi ʼaeni, koia la ʼae ʼe tonu ke tou haga fakaha ia te ʼofa ki totatou famili katoa ʼo te ʼu tehina!