ʼE Tokoni Mai Ia Te Ako Fakateokalatike ʼo Te Taʼu 2015 Ke Tou Hikihiki Tatatou Faʼahiga Faiako

¹ Neʼe tohi fenei e te tagata faipesalemo ko Tavite: “Ke ke tali te u palalau o toku gutu pea mo te u manatu o toku loto, oi [Sehova], toku utu mo toku fakamauli!” (Pes. 19:14) ʼE tou loto ke leleiʼia e Sehova ʼatatou palalau koteʼuhi ʼe tou fakamaʼuhigaʼi ia tatatou pilivilesio ʼae ko te palalau ki te moʼoni ʼi te kokelekasio pea mo te minisitelio. Ko te Ako Fakateokalatike, ʼe ko te faʼahiga fai ʼaia ʼe fakaʼaogaʼi e Sehova moʼo akoʼi ʼo tatou ki te minisitelio. ʼE fai te ako ʼaia ʼi te vahaʼa fuli ia kokelekasio ʼe 111 000 tupu ʼi te malamanei katoa. Neʼe tokoni ki he ʼu tehina pea mo he ʼu tuagaʼane ʼi te ʼu fenua kehekehe ke natou liliu ko he ʼu minisi faiva ʼo te logo lelei pea ke natou popoto ʼi te faiako ʼaki he fakamalotoloto, mo he fakaʼapaʼapa pea mo he lototoʼa.​​—Gaue 19:8; Kol. 4:6.

² ʼE kau anai ki te polokalama ako ʼo te taʼu 2015 ia te ʼu manatu ʼae ʼe tuʼu ʼi te “Ko Ai ’e Ina Fai Te Finegalo ’o Sehova Iā ’Aho Nei?” (jl), “Kotou Haga Nonofo ʼi Te ʼOfa ʼo Te ʼAtua” (lv), “Te Tohi ’o Te ’u Hisitolia Faka Tohi-Tapu” (my) pea mo “Te ʼu Fakamahino Mai Te Folafola ʼa Te ʼAtua” (igw). Koia, ʼe fai ai he ʼu fetogi ʼo ʼuhiga mo te temi ki te ʼu Puani ʼAoga pea mo te Akonaki N° 1. Ko te ʼu fetogi ʼaia pea mo te ʼu fakatuʼutuʼu ʼo ʼuhiga mo te fakahoko ʼo te ako, ʼe fakamahinohino anai ʼi te ʼu palakalafe ʼae ka hoa mai.

³ Te ʼu Puani ʼAoga: ʼE fai e he tehina ia te akonaki ʼaia. Ia minuta ʼe lua, ʼe palalau anai ki he puani ʼaoga pe ʼe tahi ʼi te ʼu vaega Tohi-Tapu ʼae ʼe lau ʼi te vahaʼa. Pea ʼe ʼaoga anai ia he teuteu lelei moʼo vaevae ia he puani ʼaoga mo te kokelekasio ʼo mulimuli ki te temi ʼae neʼe foaki age. ʼOsi ʼaia, ʼe foaki anai minuta ʼe ono ki te kokelekasio moʼo fai ʼanatou tali ia sekonita ʼe 30 peʼe siʼi ifo. ʼE ʼaoga anai ia he teuteu lelei mo he faiga ke tou tali ia sekonita ʼe 30 pea ʼe feala ke akoakoʼi ai tatou. Pea ʼe toe feala ai ki ʼihi ke natou vaevae ia te ʼu faʼahi ʼae neʼe natou teuteuʼi.

⁴ Akonaki N° 1: ʼE minuta tolu anai peʼe siʼi ifo ia te temi ʼae ʼe foaki kia ia ʼae ʼe ina lau ia te Tohi-Tapu pea ʼe mole lahi ia te koga ʼo te Tohi-Tapu ʼae ʼe ka lau anai. Ko te ʼu tehina ʼae neʼe foaki age ʼanatou lautohi, ʼe tonu anai ke natou lau liuliuga mo he leʼo lahi pea mo tokaga fakalelei ki te faʼahiga puʼaki ʼo te ʼu kupu ke hoholo lelei ia tana foaki ia te manatu. ʼE tonu ke faiga ia te hahaʼi ʼa Sehova ke lelei tanatou lautohi koteʼuhi ʼe maʼuhiga ki tatatou tauhi. ʼE lagi ʼe tou fiafia ki te lautohi lelei ʼo ʼatatou fanau. Pea ʼe fakamalo ki te ʼu matuʼā ʼo ʼuhiga mo te ʼu faiga ʼofa ʼae ʼe natou fai moʼo tokoni ki ʼanatou fanau ke natou lautohi lelei.

⁵ Akonaki N° 2: ʼE ko minuta ʼe nima ʼae ka foaki anai ki te tuagaʼane. ʼE ina fakaʼaogaʼi anai ia te kupu tafitō ʼae neʼe tuku age. Kapau ʼe fakatafito ki te ʼu manatu ʼae ʼe maʼu ʼi te kaupepa “Te ʼu Fakamahino Mai Te Folafola ʼa Te ʼAtua” ʼe feala ke ina fakaʼaogaʼi he aluʼaga moʼoni pea mo ʼaoga ʼi te faifakamafola ʼi te telituale ʼo takotou kokelekasio. Pea kapau ʼe fakatafito ki Te Tohi ’o Te ’u Hisitolia Faka Tohi-Tapu, ʼe tonu ki te tuagaʼane ke ina akoʼi te hisitolia ʼaia, mo filifili he ʼu vaega ʼe ina fakaʼaogaʼi anai pea mo fakaha pe ʼe kotea te ʼu ako ʼe feala ke tou taʼofi mai te hisitolia Fakatohi-tapu ʼaia. ʼE feala ke toe fakaʼaogaʼi ʼihi vaega ʼe alu tahi mo te kupu tafitō. ʼE ko te taupau ʼo te ako ʼae ka ina hinoʼi anai he hoa ʼo te tuagaʼane.

⁶ Akonaki N° 3: ʼE ko minuta ʼe nima ʼae ka foaki anai ki te tehina peʼe ko te tuagaʼane. Ka hinoʼi he tuagaʼane ʼe mulimuli anai ki te faʼahiga fai ʼo te Akonaki N° 2. Pea kapau ʼe tuku age ki he tehina ia he kupu tafitō ʼe maʼu ʼi Te Tohi ’o Te ’u Hisitolia Faka Tohi-Tapu, ʼe feala anai ke ina fai ohage ko he akonaki ki te nofoʼaki. ʼE fakamatalatala anai e te tehina ia te kupu tafitō ʼae neʼe tuku age, mo filifili he ʼu vaega ʼe ina fakaʼaogaʼi anai pea mo fakaha pe ʼe kotea te ʼu ako ʼe feala ke tou taʼofi mai te faʼifaʼitaki Fakatohi-tapu ʼaia.

⁷ Ko He Fakatuʼutuʼu Foʼou ʼo Te Akonaki N° 3 Maʼa Te ʼu Tehina: Kapau ʼe fakatafito te akonaki ki he kupu tafitō ʼe maʼu ʼi te ʼu kaupepa ʼo te Traduction du monde nouveau, ʼe tonu anai ke ina fai ohage ko he faʼifaʼitaki ʼo he ako fakafamili peʼe ko he faifakamafola. Ohage pe ko te agamahani, ʼe ko te taupau ʼo te ako ʼae ka ina hinoʼi he hoa ʼo te tehina pea mo te aluʼaga ʼo te faipalalau. ʼE tonu ke hoa mo he tahi ʼo tona famili peʼe ko he tehina ʼo te kokelekasio. ʼE feala ke ina hilifaki he tahi age ʼu vaega ki tana akonaki ʼe alu tahi mo te kupu tafitō. ʼI ʼihi temi, ʼe fai anai e he tagata ʼafeā ia te akonaki pea ʼe ina filifili pe anai tona hoa mo te aluʼaga ʼo te faipalalau. ʼE mahino ia, ʼe ko he alu­ʼaga fakalotomalohi ki te kokelekasio hanatou sisio ki te kau tagata ʼafeā, ʼe natou fakahaha tanatou faʼahiga faiako mo he tahi ʼo tona famili peʼe ko he tehina.

⁸ Faitokoni: Hili te u akonaki ʼe fakaʼaogaʼi anai e te taupau ʼo te ako ia minuta ʼe lua moʼo fakamalo ki te tehina pea mo foaki he ʼu tokoni fakalotomalohi ʼe toʼo mai te tohi Tirez profit de l’École du ministère théocratique. ʼE mole fakaha fakatomuʼa anai e te taupau ʼo te ako te puani ʼae ʼe gaueʼi e ia ʼae ʼe ina fai tana akonaki. ʼI te hili ʼo te ʼu akonaki takitahi, ʼe tonu anai ki te taupau ʼo te ako ke fakamalo ki te tehina peʼe ko te tuagaʼane pea mo fakaha ia te puani ʼae neʼe tonu ke gaueʼi. ʼE ina fakaha anai pe neʼe tokoni feafeaʼi age ia te puani ʼae neʼe ina gaueʼi ki te lelei ʼo tana akonaki, peʼe ʼaki he agalelei ʼe ina fakamahino pe koʼe ʼe lelei kia ia hana toe gaueʼi ia te puani ʼaia.

⁹ ʼE feala ki te kau ako ke natou maʼu ia te ʼu puani ʼae ʼe tonu ke gaueʼi ʼi te pasina 79 ki te 81 ʼi tanatou tohi École du ministère. Hili he akonaki, ʼe nota anai e te taupau ʼo te ako ʼi te tohi ʼo ia ʼae neʼe ina fai tana akonaki pea mo ina fakalavelave age pe neʼe ina fai te kiʼi gaue ʼo ʼuhiga mo te puani ʼae neʼe tonu ke gaueʼi. ʼE fai anai he ʼu fakamalo pea mo foaki he ʼu tokoni ʼaoga ki te kau ako ʼi te hili ʼo te fono peʼe ʼi he tahi age temi. Ko te ʼu tokoni ʼae ʼe maʼu e te kau ako mai te ako fakateokalatike, ʼe ko he faigamalie ʼaia ke natou tuputupu ai ʼi te faʼahi fakalaumalie.​​—1 Tim. 4:15.

¹⁰ Kapau ʼe fakalaka te temi ʼo he akonaki, ʼe fakatokaga anai e te taupau ʼo te ako peʼe ko he tahi ʼo te nofo­ʼaki, ʼaki he kiʼi pele peʼe pasi te ʼu nima moʼo fakaha ʼaki he aga fakaʼeteʼete kua ʼosi tona temi faiakonaki. ʼE mahino anai ia te tehina, ʼe tonu ke tuku la tana palalau pea mo mavae mai te faiakonakiʼaga.​​—Vakaʼi te tohi École du ministère p. 282, pal. 4.

¹¹ ʼE fakalotomalohiʼi ia natou ʼae ʼe natou mulimuli ki te ʼu fakamaʼua tafitō ki te Ako Fakateokalatike ke natou tohi tonatou higoa. (Vakaʼi te tohi École du ministère p. 282, pal. 6.) ʼAki te ako ʼaia, neʼe ina fakafealagia ai ki te hahaʼi ʼa Sehova ke natou fakamafola pea mo akoʼi ia te logo lelei ʼo te Puleʼaga ʼaki he lototoʼa, mo he faka­ʼapaʼapa pea mo he lotoʼofa. ʼE mahino ia, ʼe fiafia ʼaupito ia Sehova ʼi te fakavikiviki ʼa natou fuli ʼae ʼe natou faka­ʼaogaʼi katoa ia te ako fakateokalatike.​​—Pes. 148:​12, 13; Esa. 50:4.