Haga Tuputupu ʼi Te Minisitelio
1. Ko te ʼu faʼifaʼitaki fea ʼi te temi ʼo te kau apositolo ʼe ha mai ai ʼe tonu ke tou tuputupu ʼi te minisitelio?
1 ʼE tonu ki te kau Kilisitiano ke natou tuputupu ʼi te minisitelio. Ko te tupuʼaga la ʼaia ʼo te foaki e Sesu ki ʼana tisipulo he ako moʼo tokoni kia natou ke natou tuputupu ʼi te minisitelio. (Luka 9:1-5; 10:1-11) Koia, neʼe ʼave ai e Akilasi pea mo Pelesila ia Apolosio mo naua pea neʼe nā “fakahinohino lelei leva kia ia te ala totonu o te Atua.” (Gaue 18:24-26) ʼO toe feia pe, neʼe fakalotomalohiʼi e Paulo ia Timoteo, te tagata fakamafola evaselio, ke tokaga ki tana faiakonaki ke “ha lelei ki te tagata fuli” ia tana tuputupu. (1 Tim. 4:13-15) Tatau aipe pe ko taʼu ʼe fia tatatou nonofo ʼi te moʼoni, kaʼe ʼe tonu ke tou hikihiki tatatou faʼahiga faifakamafola.
2. ʼE tou lava ako feafeaʼi mai ni ʼihi?
2 Tou Ako Mai Ni ʼIhi: Ko te tahi puleʼaki ke tou tuputupu ai, ʼe ko te ako mai ni ʼihi. (Taag. 27:17) Koia tou tokaga fakalelei moka fai e te kau faifakamafola ʼanatou ʼuluaki palalau. Kotou kole tokoni ki te kau faifakamafola faiva pea mo kotou fagono lelei ki te ʼu faʼahi ʼae ʼe natou ui atu. (Taag. 1:5) ʼE kotou lotolotolua koa ʼi te fai ʼo he ʼaʼahi foʼou, mo te kamata ʼo he ako Tohi-Tapu peʼe ko he tahi age agaaga ʼo te minisitelio? Kotou fai ia he ʼu fakatuʼutuʼu pea mo kotou kole ki takotou tehina taupau peʼe ko he tehina faiva ke ina akoako koutou ki te faʼahi ʼaia. Kotou toe manatuʼi, ʼe feala ki te laumalie maʼoniʼoni ʼo Sehova ke ina fakatuputupu ʼatatou fealagia.—Luka 11:13.
3. ʼE tonu ke tou tali feafeaʼi mo kapau ʼe fai mai kia tatou he tokoni, ʼe lagi mole tou fakaʼamu ki ai?
3 ʼAua naʼa kotou iita mo kapau ʼe fai atu he tokoni ke kotou tuputupu ai, maʼia pe neʼe mole kotou fakaʼamu ki ai. (Ekl. 7:9) Ohage ko Apolosio, tou tali ʼaki he agavaivai mo he lotofakafetaʼi. Pea ʼe ko he aga fakapotopoto ia te fai ʼo te faʼahi ʼaia.—Taag. 12:15.
4. Kotea ia te tupuʼaga tafitō ʼae neʼe ui ai e Sesu ke tou tuputupu ʼi te minisitelio?
4 Tatatou Tuputupu, ʼe Fakakololiaʼi Ai Te ʼAtua: ʼAki he ʼu lea fakatata, neʼe fakalotomalohiʼi ai e Sesu ʼana tisipulo ke natou tuputupu ʼi te minisitelio. Neʼe ina fakatatau ia ia ki he fuʼu vite pea ko ʼana tisipulo fakanofo ki he ʼu vaʼa. Neʼe ina ui ʼe fakamaʼa e te Tamai te ʼu vaʼa fuli pe ʼae ʼe fua “o tupu ke toe asilisili fua ia ʼo lahi age.” (Soa. 15:2) Ohage ko he tagata pule ʼo he gaueʼaga vite, ʼe ina fakaʼamu ke fua fuli tana ulu vite, pea ʼe loto e Sehova ke haga tuputupu aipe ʼotatou fealagia ʼae ko “te fua o te u laugutu.” (Hep. 13:15) Kotea ia te ʼu fua lelei ʼe tou maʼu moka tou fai he ʼu faiga ʼi tatatou faʼahiga faifakamafola? ʼE foaki mai e Sesu ia te tali ʼaeni: “Ko taku Tamai ʼe fakakololiaʼi ʼi te faʼahi ʼaeni, ke koutou haga fua ke lahi.”—Soa. 15:8, MN.