ʼE Feala Koa Hau ʼAhiʼahi Fai Te Aluʼaga ʼAeni ʼi He Taʼu Katoa?

Kotea te aluʼaga ʼaia? Ko te selevisi pionie temi katoa. ʼI tapuakina leva ka ke maʼu anai.—Taa 10:22.

ʼAKI TE SELEVISI PIONIE, ʼE FEALA KE KE . . .

• faiva ʼi tou ʼuhiga tagata fakamafola evaselio pea mo lahi age tou fiafia ʼi te faifakamafola

• fakamalohiʼi ʼau felogoʼi mo Sehova. Ka lahi tau palalau ʼo ʼuhiga mo ia ki te hahaʼi, ʼe toe lahi age anai mo tau manatuʼi ʼona kalitate fakatalakitupua

• iloʼi te fiafia ʼi tau fakamuʼamuʼa te Puleʼaga ʼi tou maʼuli pea mo tau tokoni ki ʼihi.—Mt 6:33; Ga 20:35

• kau ki te fono ʼa te kau pionie lolotoga te ʼaʼahi ʼa te taupau ʼo te siliko, mo kau ki te fono makehe ʼae ʼe fai ʼi muʼa ʼo te fakatahi fakasiliko pea mo kau ki te Ako ʼo Te Kau Pionie

• maʼu te ʼu faigamalie ʼae ke ke kamata mo takitaki he ʼu ako Tohi-Tapu

• fakaʼaogaʼi lahi ai tou temi ke ke fakatahi pea mo fefakalotomalohiʼaki mo ʼou tehina mo tuagaʼane.—Lo 1:11, 12