Tafitoʼaga ʼo Te Kaupepa Ako Te Maʼuli Fakakilisitiano Mo Te Faifakamafola
VAHAʼA ʼO TE ʼAHO 6-12 ʼO MAIO
TE ʼU KOLOA ʼO TE TOHI-TAPU | 2 KOLONITO 4-6
“ ʼE Mole Tou Tuku Anai”
(2 Kolonito 4:16) Koia ʼe mole tou tuku anai, tatau aipe pe ʼe hifo ʼotatou sinoʼi tagata, kaʼe ʼe mahino ia ko ʼotatou loto pea mo ʼotatou ʼatamai ʼe fakafoʼou ʼi te ʼaho fuli.
ʼE Nātou Gaʼegaʼe Kae Mole Nātou Fiu
16 ʼE moʼoni, ʼe maʼuhiga tāfito ke tou tokakaga ki totatou maʼuli fakalaumālie. ʼE feala ke tou gaʼegaʼe ʼi te faʼahi fakasino, tatau aipe mokā tou felogoi lelei mo Sehova ʼAtua, kae ʼe mole tou pipiko ʼi te tauhi kia te ia. Ko Sehova ʼaē ʼe ina “foaki te mālohi kia ia ʼaē kua gaʼegaʼe; pea ʼe ina fakatuputupu te mālohi ia ia ʼaē ʼe mole hona mālohi.” (Isaia 40:28, 29) Ko te ʼapositolo ko Paulo, ʼaē neʼe hoko tonu kia ia te ʼu meʼa ʼaia, neʼe ina ʼui fēnei: “Koia, e mole matou lotovaivai, kae kapau e lolotoga auha omatou gaasi tagata, e fakafoou aipe omatou tagata lotovaivai mai te aho ki te aho.”—2 Kolonito 4:16.
17 Koutou fakatokagaʼi ʼe ʼui “mai te aho ki te aho.” Ko tona faka ʼuhiga ʼe tou maʼu te ʼu fua lelei ʼo te ʼu fakatuʼutuʼu ʼaē ʼe foaki e Sehova ʼi te ʼaho fuli. Ko Susie, ʼaē neʼe gāue misionea agatonu ia taʼu e 43, neʼe tau mo te ʼu temi gaʼegaʼe ʼi te faʼahi fakasino pea neʼe lotovaivai. Kae neʼe heʼeki piko ia ʼi te gāue. ʼE ina ʼui fēnei: “Neʼe kua ʼau māhani ʼi te ʼala ʼi te kei uhuuhu, ke feala haku faikole kia Sehova pea mo lau tana Folafola, ʼi muʼa ʼo taku kamata taku ʼu gāue. Ko taku ʼu agamāhani ʼaia ʼi te ʼaho fuli neʼe tokoni mai kia ʼau ke ʼau faʼa kātaki ʼo aʼu mai ki te temi nei.” ʼIo ʼe tou lava falala ki te tokoni mālohi ʼa Sehova, mo kapau ‘ ʼi te ʼaho ki te ʼaho’ ʼe tou faikole kia te ia pea mo metitasioʼi tona ʼu kalitate pea mo tana ʼu fakapapau.
(2 Kolonito 4:17) Logope la te fakatemi pea mo te maʼamaʼa ʼo te mamahi, kaʼe ʼe ina fakatupu anai ia tatou he kololia ʼe fakatalakitupua pea mo heʼe gata.
it-1-F 759
Faʼa Kataki
ʼE toe maʼuhiga ʼaupito ke tou taupau maʼu te ʼamanaki Fakakilisitiano ʼae ko te maʼuli heʼe gata pea mo haohaoa. Maʼia moka matehi tatou e te kau fakafeagai, ʼe mole feala hanatou pulihi te ʼamanaki ʼaia. (Lom 5:4, 5; 1Te 1:3; Fkh 2:10) Ko te ʼu mamahi ʼae ʼe tou lolotoga tauʼi ʼe ko te ʼu meʼa noa ia moka tou fakatatau ki te fakahoko ʼo te ʼamanaki taulekaleka ʼaia. (Lom 8:18-25) Kia ia ʼae ʼe fakaʼamu ki te maʼuli heʼe gata, ʼe tatau aipe pe ʼe kovi ʼaupito ʼona mamahi, kae kia ia ʼe fakatemi pe mo maʼamaʼa.’ (2Ko 4:16-18) Kapau ʼe ina manatuʼi ko te ʼu ʼahiʼahi ʼe fakatemi pe pea ʼe ina taupau maʼu te ʼamanaki Fakakilisitiano, ʼe mole lotomamahi ʼaupito anai kae ʼe nofo agatonu kia Sehova.
(2 Kolonito 4:18) ʼE mole tou sisio fakamamaʼu ki te ʼu meʼa ʼae ʼe ha, kaʼe ki te ʼu meʼa ʼae ʼe mole ha. He ʼe ko te ʼu meʼa ʼae ʼe ha ʼe fakatemi, kaʼe ko te ʼu meʼa ʼae ʼe mole ha ʼe heʼe gata.
Kumi Te ʼu Koloa ʼi Te Tohi-Tapu
(2 Kolonito 4:7) Kaʼe ʼe matou maʼu te koloa ʼaia ʼi he ʼu ipu kele, ke ha lelei ai ko te malohi makehe ʼae ʼe matou maʼu ʼe haʼu ia mai te ʼAtua, kaʼe mole mai ia matou.
w12-F 1/2 28
“Ke Kotou Faigaʼi Ke Fia Malimali Ia Sehova”
Ko te tahi tehina ko David Splane ʼe kau ki te Kolesi Pule, neʼe ina fakamahino te kupu tafito ʼaia. (2 Kolonito 4:7) Kotea te koloa ʼaia? Neʼe ko te ʼatamai malama koa peʼe ko te poto? Neʼe ina tali fenei: “Kailoa. Ko te koloa ʼae neʼe talanoa ki ai te apositolo ko Paulo, ʼe ko te ‘minisitelio’ ʼae ko te ‘fakaha ʼo te moʼoni.’ ” (2 Kolonito 4:1, 2, 5) Neʼe fakamanatuʼi e te tehina ko Splane ki te kau ako, ko te ʼu mahina nima ʼae neʼe akoʼi ai natou, neʼe ko he faʼahiga teuteu ʼaia ki te gaue makehe ʼo te minisitelio. ʼE tonu ke natou fakamaʼuhigaʼi ʼaupito te gaue ʼaia.
Neʼe fakamahino e te tehina ko te ʼu “ipu kele” ʼe ko totatou sino kakano. Neʼe ina fakaha te kehekehe ʼo te ipu kele mo te ipu aulo. Ko te ʼu ipu aulo ʼe tahitahiga tanatou fakaʼaogaʼi. Kae ko te ʼu ipu kele ʼe fakaʼaogaʼi tuʼumaʼu. Kapau ʼe tou ʼai he koloa ʼi he ipu aulo, ʼe tokagaʼi e te hahaʼi ia te ipu ʼaia pea mo te koloa foki ʼae ʼe ʼi ai. Te ako ki te kau ako: “ ʼE mole kotou loto ke tokakaga te hahaʼi kia koutou totonu. ʼI tokotou ʼuhiga misionea, ko takotou gaue ʼe ko te taki te hahaʼi kia Sehova. Ko koutou ko he ʼu ipu kele fiamalalo.”
(2 Kolonito 6:13) Koia kotou fai feia maʼa matou, ʼe au palalau atu kia koutou ohage ko haku ʼu fanau, ke lahi age tokotou ʼofa ʼae kia matou.
Kotou Haga Tuputupu ʼi Tokotou ʼOfa Fakatautēhina
7 ʼE feafeaʼi ʼo ʼuhiga mo tātou? ʼI tatatou fakahā ia totatou ʼofa fakatautēhina, ʼe lava feafeaʼi hatatou “fakafālahi” ia te faʼahi ʼaia? ʼI te agamāhani, ko nātou ʼaē ʼe taʼu tahi peʼe natou fenua tahi, ʼe faigafua kiā nātou ʼaia hanatou feʼofaniʼaki. Pea ʼi te agamāhani, ko nātou ʼaē ʼe tāu te ʼu faʼahiga fakafiafia ʼe natou leleiʼia, ʼe natou fakatahitahi tuʼumaʼu. Kae kapau ko te ʼu meʼa ʼaē ʼe tou leleiʼia tona fai mo ʼihi Kilisitiano ʼe ina fakamavetevete ai tātou pea mo ʼihi age Kilisitiano, pea ʼe tonu ke tou “fakafālahi” atu ia totatou ʼofa ki niʼihi. ʼE ko he meʼa lelei anai hatatou fai kiā tātou totonu ia te ʼu fehuʼi ʼaenī: ‘ ʼE tahitahiga koa taku fai fakamafola peʼe ko haku fakatahi mo te ʼu tehina mo tuagaʼane ʼaē ʼe mole au feʼiloʼiʼaki lelei mo nātou? ʼI te Fale ʼo Te Puleʼaga, ʼe siʼisiʼi koa taku fai palalau mo nātou ʼaē ʼe foʼofoʼou mai, heʼe ʼi taku ia manatu, ʼe tonu muʼa ke natou fuafualoa ʼi te moʼoni ke feala ai hanatou liliu ko hoku ʼu kaumeʼa? ʼE au ʼalofa koa ki te hahaʼi mātutuʼa pea mo te kau tūpulaga ʼi te kōkelekāsio?’
VAHAʼA ʼO TE ʼAHO 13-19 ʼO MAIO
TE ʼU KOLOA ʼO TE TOHI-TAPU | 2 KOLONITO 7-10
“Tatatou Gaue Tokoni Moka Hoko He Tuʼutamaki Fakanatula”
(2 Kolonito 8:1-3) Koia ʼu tehina, ʼe matou fia palalau atu ʼo ʼuhiga mo te ʼofa makehe ʼo te ʼAtua, ʼae neʼe foaki ki te ʼu kokelekasio ʼo Masetonia. 2 Lolotoga ia he ʼahiʼahi lahi ʼi te mamahi, neʼe natou fakaha ai he fiafia lahi mo he lotofoaki, logope la tonatou masisiva. 3 Neʼe natou foaki ʼo mulimuli ki ʼonatou fealagia, pea ʼi tona fakahagatonu neʼe natou foaki ʼo laka age ʼi ʼonatou fealagia. Ko au totonu ʼe au fakamoʼoni ki te faʼahi ʼaia.
“Ko Te ʼAtua ʼe ʼOfa Kia Ia ʼAē ʼe Ina Foaki ʼAki He Loto Fiafia”
ʼUluaki neʼe fakahā e Paulo ki te kau Kolonito te loto fia foaki ʼa te kau Masetonia, ʼaē neʼe nātou tali lelei te tānaki ʼaē neʼe tonu ke fai. Neʼe tohi e Paulo: “ ʼI te lolotoga ʼo te ʼahiʼahi lahi, ko te mahu ʼo tonatou fiafia pea mo te kovi ʼo tonatou masiva neʼe nā faka mahu te koloaʼia ʼo tonatou loto fia foaki.” Neʼe mole ʼaoga ke fakakolekole ki te kau Masetonia ke nātou fai te faʼahi ʼaia. Kae neʼe ʼui e Paulo “ko nātou totonu, neʼe nātou kole mamahi mai kia mātou te pilivilesio ʼaē ke nātou foaki ʼaki he lotolelei.” ʼE fakaofoofo te loto fia foaki ʼa te kau Masetonia mokā tou manatuʼi “tonatou masiva fakaʼofaʼofa.”—2 Kolonito 8:2-4.
ʼE Kau Ki Tatatou Minisitelio Te ʼu Tokoni Moka Hoko He Tuʼutamaki
ʼI TE taʼu 46 H.T.S., neʼe hoko te toe hoge lahi ʼi Sutea. Neʼe totogi kovi te meʼa kai he neʼe kua tahitahiga. Koia neʼe pakupaku ai te ʼu tisipulo ʼa Kilisito ʼae ʼi Sutea ʼuhi neʼe mole hanatou foʼi falā moʼo totogi hanatou meʼa kai. Kaʼe neʼe natou sisio ki te haofaki ʼo natou e Sehova ʼi hona aluʼaga neʼe heʼeki hoko ki te ʼu tisipulo ʼa Kilisito. Kotea ʼae neʼe hoko?
(2 Kolonito 8:4) Pea neʼe ko natou totonu pe ʼae neʼe natou haga kole mamahi mai te fealagia ʼae ke natou foaki, pea mo kau ki te gaue tokoni maʼa te kau maʼoniʼoni.
ʼE Kau Ki Tatatou Minisitelio Te ʼu Tokoni Moka Hoko He Tuʼutamaki
4 ʼI tana lua tohi ki te kau Kolinito, neʼe fakamahino e Paulo ʼe ko faʼahi ʼe lua ʼe kau ki te minisitelio ʼa te kau Kilisitiano. Logo la neʼe faitohi ia Paulo ki te kau Kilisitiano fakanofo, kaʼe ʼe toe fakaʼuhiga pe foki ki te tahi ʼu ovi ʼa Kilisito ia ʼaho nei. (Soa. 10:16) Ko te ʼuluaki faʼahi ʼo totatou minisitelio ʼe ko “te gaue o te fakatokatoka,” ʼae ʼe ko tatatou gaue faifakamafola pea mo faiako. (2 Ko. 5:18-20; 1 Tim. 2:3-6) Pea lua, ʼe ko tatatou “tokoni” ki ʼotatou tehina, ohage ko tona ui e Paulo. (2 Ko. 8:4) Ko te ʼu kupu “gaue” pea mo “tokoni” ʼe ko te fakaliliu ʼaia ʼo te kupu Fakakeleka diakonia, ʼae ʼe fakaʼuhiga ki te kupu “minisitelio.” Kotea ʼae ʼe feala ke tou mahino ai?
5 ʼI te fakaʼaogaʼi e Paulo ia te kupu Fakakeleka ʼe tahi moʼo talanoa ki te ʼu gaue ʼaia ʼe lua, neʼe ina ui ai ko te tokoni ki ʼotatou tehina moka hoko he tuʼutamaki ʼe kau ki te ʼu minisitelio kehekehe ʼae ʼe fakahoko ʼi te kokelekasio. ʼI tana ʼuluaki tohi ki te kau Kolinito, neʼe ina ui fenei: “[ʼE ʼi ai] te u tauhi kehekehe, kae ko te Aliki pe e tahi; mo te u gaue kehekehe . . . [kaʼe] ko te Laumalie e tahi ae e ina fai te u mea fuli aia.” (1 Ko. 12:4-6, 11) Neʼe ui e Paulo ko te ʼu minisitelio kehekehe ʼae ʼe fakahoko ʼi te kokelekasio ʼe kau ki te tauhi taputapu. (Loma 12:1, 6-8) Koia ʼe mole tou punamaʼuli ai ki tana lotolelei ʼo fakaʼaogaʼi tona temi moʼo “tokoni” ki te kau maʼoniʼoni.—Loma 15:25, 26.
6 Neʼe tokoni ia Paulo ki te kau Kolinito ke natou mahino pe ko ʼe ko te tokoni ki te ʼu tehina moka hoko he tuʼutamaki ʼe kau ki tanatou minisitelio pea mo tanatou tauhi kia Sehova. Neʼe ina ui ʼe foaki e te kau Kilisitiano ia te tokoni he ʼe natou “fakalogo ki . . . te Evaselio a Kilisito.” (2 Ko. 9:13) Koia, ʼe tokoni te kau Kilisitiano ki ʼonatou tehina he ʼe natou fia maʼuliʼi ia te ʼu akonaki ʼa Kilisito. Pea ohage ko tona ui e Paulo, ko tanatou tokoni ʼe ko te fakaha ʼo te ʼofa makehe ʼo te ʼAtua. (2 Ko. 9:14; 1 Pet. 4:10) ʼO ʼuhiga mo te tokoni ʼae ki ʼotatou tehina moka hoko he tuʼutamaki, neʼe ui fenei ʼi Te Tule Leʼo ʼo te ʼaho 1 ʼo Malesio 1976 (Fakafalani): “ ʼE tonu ke tou tui papau ʼe maʼuhiga ʼaupito kia Sehova ʼAtua pea mo tona ʼAlo ko Sesu Kilisito te gaue ʼaia.” Koia, ko te tokoni ki ʼotatou tehina moka hoko he tuʼutamaki ʼe ko he faʼahi maʼuhiga ʼo tatatou tauhi taputapu.—Loma 12:1, 7; 2 Ko. 8:7; Hep. 13:16.
(2 Kolonito 9:7) Ke tahi foaki ʼo mulimuli ki te meʼa ʼae kua ina fakatotonu ʼi tona loto, ʼo mole foaki ʼaki he lotofakahemala peʼe fakakinau, koteʼuhi ʼe ʼofa te ʼAtua ki ʼae ʼe ina foaki ʼaki he loto ʼe fiafia.
ʼE Fakapaʼaga Feafeaʼi Te ʼu Gaue ʼo Te Puleʼaga?
10 ʼUluaki, ʼe tou fai ni meʼa ʼofa he ʼe tou ʼoʼofa kia Sehova pea mo tou faiga ke tou “fai te mea ae e lelei kia ia.” (1 Soa. 3:22) ʼE mahino ia ʼe fiafia lahi Sehova moka foaki e he tahi ʼo mulimuli ki tona loto. Tou vakaʼi te ʼu palalau neʼe fai e te apositolo ko Paulo ʼo ʼuhiga mo he Kilisitiano ʼe ina foaki he meʼa ʼofa. (Lau ia 2 Kolinito 9:7.) Ko te Kilisitiano moʼoni ʼe mole ina foaki he neʼe fakakinauʼi. Kaʼe ʼe ina foaki koteʼuhi neʼe ina “fakapapau i tona loto” ke ina foaki. Ko tona fakaʼuhiga, ʼi muʼa ʼo tana foaki he meʼa ʼofa, ʼe ina fakakaukauʼi muʼa pe ʼe kotea ʼae ʼe ʼaoga ki ʼona tehina pea mo te meʼa ʼae ʼe feala ke ina fai. ʼE ʼofa ia Sehova kia ia, he ʼe “ofa te Atua ki ae e foaki mo te fiafia.” ʼE fakaliliu fenei ʼi te tahi Tohi-Tapu: “ ʼE ʼofa te ʼAtua ki te hahaʼi ʼae ʼe natou fia foaki.”
Kumi Te ʼu Koloa ʼi Te Tohi-Tapu
(2 Kolonito 9:15) Ke tou fakafetaʼi ki te ʼAtua ʼo ʼuhiga mo tona meʼa ʼofa taulekaleka.
ʼE ʼEkenaki Tatou e Te “Meaofa Matalelei” ʼo Te ʼAtua
2 Koteʼuhi neʼe iloʼi e Paulo ko te sakilifisio ʼa Sesu ʼe ha ai ko te ʼu fakapapau taulekaleka fuli ʼa te ʼAtua ʼe hoko moʼoni anai. (Lau ia 2 Kolinito 1:20.) Koia, ko te “meaofa matalelei” ʼo te ʼAtua ʼe kau ki ai te sakilifisio ʼa Sesu pea mo te agalelei mo te ʼofa ʼo Sehova ʼae ʼe ina fakaha mai. ʼE mole maʼu he kupu feʼauga moʼo fakaha ia te maʼuhiga ʼo te meʼa ʼofa ʼaia pea ke tou mahino katoa ki ai. Kotea ʼae ʼe tonu ke tou logoʼi ʼo ʼuhiga mo te meʼa ʼofa makehe ʼaia? Pea ʼe ʼekenaki feafeaʼi tatou e te meʼa ʼofa ʼaia ke tou nofo teuteu ki te Fakamanatu ʼo Te Mate ʼo Kilisito ʼi te Feliafa ʼaho 23 ʼo Malesio 2016?
(2 Kolonito 10:17) “Kaʼe ko ʼae ʼe fiameʼameʼa ke fiameʼameʼa ia ia Sehova.”
g99-F 8/7 20-21
ʼE Kovi Koa Hakita Fiameʼameʼa?
ʼI te Koga Tohi-Tapu Fakakeleka Fakakilisitiano, ko te kupu kaukhaomaï, ʼe fakaliliu ko “tokita fiameʼameʼa, te fakakololiaʼi ʼo kita totonu,” ʼe fakaʼaogaʼi moka talanoa ki he fiameʼameʼa ʼe lelei pea mo ʼae ʼe kovi. Ohage la, ʼe ui e Paulo ʼe tonu ke tou “fiafia” peʼe ke tou fiameʼameʼa ‘ ʼuhi ko te ʼamanaki ʼae ʼe foaki mai anai e te ʼAtua he tuʼulaga ʼe maʼoluga.’ ʼE ina toe fakatotonu mai fenei: “Ko ʼae ʼe fiameʼameʼa ke fiameʼameʼa ia ia Sehova.” (Loma 5:2; 2 Kolonito 10:17) Ko tona fakaʼuhiga ʼe tou fiameʼameʼa he ʼe ko Sehova ko totatou ʼAtua, pea ʼe uga ai tatou ke tou fiafia ʼuhi ko tona huafa mo tona logologona.
VAHAʼA ʼO TE ʼAHO 20-26 ʼO MAIO
TE ʼU KOLOA ʼO TE TOHI-TAPU | 2 KOLONITO 11-13
“ ‘Te Tala ʼi Te Kakano’ ʼa Paulo”
(2 Kolonito 12:7) Kaʼe ʼe mole tonu ke fakamaʼuhigaʼi au e he tahi ʼuhi ko te ʼu logo fakaofoofo ʼae neʼe fakaha mai. Ke ʼaua naʼa au fiameʼalahi fau, neʼe ʼai te tala ki toku kakano, ko he ʼaselo ʼa Satana, ke ina ta tuʼumaʼu au ke mole au fiameʼalahi fau ai.
w08-F 15/6 3-4
Neʼe Natou Malolohi Logo La ʼAnatou Vaivaiʼaga
Neʼe ʼi ai te tahi kaugana agatonu neʼe ina kole kia Sehova ke ina fakafimalieʼi ia ia ʼi te faigataʼaʼia ʼe tau mo ia, ʼae neʼe hage ko he ‘tala ʼi tona kakano’. Neʼe kolekole tuʼa tolu e Paulo ki te ʼAtua ke ina fakafimalieʼi ia ia. Tatau aipe pe neʼe kotea te ʼahiʼahi ʼaia, ʼae neʼe ina fakamamahiʼi ia ia ohage ko he tala ʼi tona kakano, neʼe feala ai ke puli ai te fiafia ʼa Paulo ʼi tana tauhi kia Sehova. Neʼe fakatatau e Paulo te ʼahiʼahi ʼaia ki he ta tuʼumaʼu ʼo he tahi. Neʼe tali age fenei e Sehova: “ ʼE feʼauga mo koe toku ʼofa makehe, ke liliu toku malohi ʼo katoa moka ke vaivai.” Neʼe mole toʼo e Sehova te tala ʼaia ʼae ʼi tona kakano. Neʼe tonu kia Paulo ke ina ʼutakiʼi, kae neʼe ina fakamoʼoni mai: “ ʼE hoki au malohi moka ʼe au vaivai.” (2 Ko. 12:7-10) Kotea neʼe ina fia ui ai?
(2 Kolonito 12:8, 9) Tuʼa tolu neʼe au kolekole ki te ʼAliki ke ina toʼo te tala ʼaia. 9 Kaʼe neʼe ina ui fenei mai: “ ʼE feʼauga mo koe toku ʼofa makehe, ke liliu toku malohi ʼo katoa moka ke vaivai.” Koia, ʼe au fiameʼameʼa anai ʼaki he fiafia lahi ʼo ʼuhiga mo ʼoku vaivaiʼaga, ke nofo te malohi ʼo Kilisito ia au.
Ko Sehova ʼe Ina Foaki “Te Laumālie Māʼoniʼoni Kiā Nātou ʼAē ʼe Natou Kole Kiā Te Ia”
17 Moʼo tali ki te ʼu faikole ʼa Paulo, neʼe ʼui fēnei age e te ʼAtua kiā te ia: “Ko toku ʼofa makehe ʼe feʼauga kiā koe; heʼe ko toku mālohi ʼe lolotoga fakaliliu ʼo haohaoa ʼi te vaivai.” Neʼe ʼui fēnei e Paulo: “Koia ʼe lelei age ke au faka kolōliaʼi ʼo ʼuhiga mo toku ʼu vaivaiʼaga, ke nofo te mālohi ʼo Kilisito ʼi ʼoluga ia te au.” (2 Kolonito 12:9, MN; Pesalemo 147:5) Koia, neʼe mahino kiā Paulo ʼaki ia Kilisito, ko te puipui mālohi ʼo te ʼAtua neʼe mafola kiā te ia ohagē he falelā. Iā ʼaho nei, ʼe tali mai e Sehova ki tatatou ʼu faikole ohagē pē ko tana fai ʼaē kiā Paulo. ʼE ina folahi tana puipui ohagē ko he malumaluga ki tana ʼu kaugana.
18 ʼE moʼoni, ʼe mole feala ki he falelā ke ina fakagata ia te tō ʼa te ʼua peʼe ko te agi ʼa te matagi, kae ʼe ko he puipuiʼaga mai te ʼu meʼa ʼaia. ʼO toe feiā pē, ko te malumaluga ʼaē ʼe tou maʼu ʼaki “te mālohi ʼo Kilisito” ʼe mole ina fakagata te ʼu fihifihia ʼaē ʼe hoko kiā tātou peʼe ko te ʼu faigataʼaʼia. Kae ʼe ina foaki te puipui ʼi te faʼahi fakalaumālie moʼo tauʼi te ʼu meʼa fakatupu tuʼutāmaki ʼo te mālamanei pea mo te ʼu fakafeagai mai ia Satana, te pule ʼo te mālamanei. (Apokalipesi 7:9, 15, 16) Tahi ʼaē meʼa, tatau aipē peʼe kotou tau mo he fihifihia ʼe mole feala ke ‘toʼo keheʼi iā koutou,’ kae ʼe feala hakotou tui papau ko Sehova ʼe ina ʼiloʼi lelei takotou ʼu faiga pea ʼe ina tali anai ‘ki takotou tagi.’ (Isaia 30:19; 2 Kolonito 1:3, 4) Neʼe tohi fēnei e Paulo: “Ko te ʼAtua ʼe agatonu, ʼe mole ina tuku anai ke fakahalaʼi koutou ʼo laka age ʼi te meʼa ʼaē ʼe kotou lava tali, kae ʼaki te fakahala ʼe ina toe foaki atu anai mo he faigamālie ke kotou hao ai, ke feala hakotou ʼūtakiʼi.”—1 Kolonito 10:13, MN; Filipe 4:6, 7.
(2 Kolonito 12:10) Koia ʼe au fiafia ai ʼi te ʼu vaivaiʼaga, ʼi te ʼu leakovi, ʼi te ʼu temi mamahi, ʼi te ʼu fakataga pea mo te ʼu faigataʼaʼia, ʼuhi ko Kilisito. Koteʼuhi ʼe hoki au malohi moka ʼe au vaivai.
“E Ina Foaki He Malohi Ki Ae Kua Vaivai”
8 Lau ia Esaia 40:30. Logo la te ʼu fealagia ʼae ʼe tou maʼu, kae ʼe fakatuʼakoi totatou malohi. Ko he aluʼaga ia ʼe tonu ke tou fakamoʼoni fuli ki ai. Tou toʼo te faʼifaʼitaki ʼo te apositolo ko Paulo. Neʼe lahi te ʼu gaue neʼe feala ke ina fai, kae neʼe mole ina lava fai ia meʼa fuli neʼe loto ki ai. ʼI tana faikole kia Sehova ʼo ʼuhiga mo te faʼahi ʼaia, neʼe ui fenei age e Sehova: “Ke liliu toku malohi ʼo katoa moka ke vaivai.” Neʼe mahino ia Paulo ki te ʼu palalau ʼa Sehova. He neʼe ina ui fenei: “ ʼE hoki au malohi moka ʼe au vaivai.” (2 Kolonito 12:7-10) Kae kotea ʼae neʼe fia ui e Paulo?
9 Neʼe mahino kia Paulo, ko te ʼu gaue ʼae neʼe feala ke ina fai ʼaki pe tona malohi ʼe ʼi ai ʼona tuʼakoi. Neʼe ʼaoga ke tokoni age he tahi ʼe malohi age. Ko te ʼAtua neʼe feala ke ina fakamalohiʼi ia Paulo ʼaki tona laumalie maʼoniʼoni ʼi te temi ʼae neʼe vaivai ai. Kae ʼe mole gata ai. ʼAki te laumalie ʼo te ʼAtua, neʼe toe feala kia Paulo ke ina fakahoko he ʼu gaue neʼe mole feala ke ina fai ʼaki pe tona malohi. Pea ʼe toe feia pe kia tatou. Ka foaki mai e Sehova ia tona laumalie maʼoniʼoni, ʼe tou malolohi moʼoni anai.
Kumi Te ʼu Koloa ʼi Te Tohi-Tapu
(2 Kolonito 12:2-4) Koia, ʼe au iloʼi ia te tagata, ʼe ko te tisipulo ʼa Kilisito, neʼe ʼave ki te tolu lagi kua hili ki ai taʼu ʼe 14 (pea ʼe mole au iloʼi pe neʼe ʼave ʼaki tona sino peʼe kailoa, kaʼe ʼe iloʼi e te ʼAtua). 3 ʼE au iloʼi ia te taʼi tagata ʼaia neʼe ʼave ki te palatiso (pea ʼe mole au iloʼi pe neʼe hoko ʼaki tona sino peʼe kailoa, kaʼe ʼe iloʼi e te ʼAtua). 4 Pea ʼi tana ʼi te palatiso, neʼe logo ai ki he ʼu palalau ʼe mole feala ke fai pea ʼe mole gafua ke puʼaki e te tagata.
w18.12-F 8 ¶10-12
Te ’u Fehuʼi ’a Te Kau Lautohi
Ko te “tolu lagi” ʼae ʼe talanoa ki ai ia 2 Kolonito 12:2 ʼe fakaʼuhiga ki te Puleʼaga Fakamesia ʼe ʼafio ai ia Sesu Kilisito pea mo te kau 144 000, ʼae ko te “lagi foʼou.”—2 Pet.3:13.
He koʼe ʼe ui “tolu” lagi? Koteʼuhi ko te faʼahiga pule ʼo te Puleʼaga ʼe maʼoluga age mo fakatalakitupua.
Ko te “palatiso” ʼae neʼe ʼave ki ai ia Paulo ʼi he aluʼaga fakata, ʼe fakaʼuhiga ki he ʼu aluʼaga ʼe tolu: (1) ko te Palatiso ʼi te kele ʼi te ka haʼu, (2) te palatiso fakalaumalie ʼae ka fakatuʼu anai kae ʼe toe lahi age ia ʼi ʼae ʼo totatou temi, pea (3) “te palatiso ʼo te ʼAtua” ʼi selo.
(2 Kolonito 13:12) Kotou feʼalofaʼaki ʼaki he fekita.
it-1-F 753
Fekita
Te “fekita.” Neʼe feʼalofaʼaki te kau ʼuluaki Kilisitiano ʼaki he “fekita” ʼe maʼoniʼoni (Lom 16:16; 1Ko 16:20 nota; 2Ko 13:12; 1Te 5:26), peʼe ko he fekita moʼo fakaha tonatou ʼofa. (1Pe 5:14) Kae ʼe fai ʼateaina pe e te fafine ki he fafine, mo he tagata ki he tagata, kae mole fai e he fafine ki he tagata. Ko te faʼahiga fai ʼalofa ʼaia ʼo te Kau ʼuluaki Kilisitiano neʼe lagi ko te faʼahiga fai ʼaia ʼo te kau Hepeleo ʼi te ʼu temi muʼa, ʼae neʼe ko he agamahani ke feʼalofaʼaki mo he fekita. Logo la ʼe mole fakamahino ʼi te Tohi-Tapu, kae neʼe ha ʼi te fekita ʼaia te ʼofa moʼoni pea mo te logo tahi ʼae ʼi te kokelekasio Fakakilisitiano.—Soa 13:34, 35.
VAHAʼA ʼO TE ʼAHO 27 ʼO MAIO–2 ʼO SUNIO
“Neʼe Au Fakafeagai Fakahagatonu Kia Ia”
(Kalate 2:11-13) Kaʼe ʼi te temi ʼae neʼe haʼu ai ia Sefasi ki Atiokia, neʼe au fakafeagai fakahagatonu kia ia, he neʼe mole lelei te meʼa ʼae neʼe ina fai. 12 Koteʼuhi ʼi muʼa ʼo te tau mai ʼa ʼihi tagata neʼe fekauʼi mai e Sakopo, neʼe kai mahani ia mo te hahaʼi ʼe mole Sutea. Kaʼe ʼi te tau mai ʼa te ʼu tagata ʼaia, neʼe mole kei ina fai ia te faʼahi ʼaia pea neʼe mole kei fakatahi mo natou, he neʼe mataku ia ʼi te kau silikosisio. 13 Neʼe toe malualoi foki mo te tahi age kau Sutea, ohage pe ko ia, pea maʼiape la mo Palenapa neʼe mulimuli ki tanatou malualoi ʼaia.
ʼE Kotou Maʼu Koa Te Manatu ʼa Sehova ʼo ʼUhiga Mo Te Faitotonu?
16 Lau ia Kalate 2:11-14. Neʼe kua mataku ia Petelo ki te tagata. (Taaga Lea 29:25) Neʼe iloʼi e Petelo te manatu ʼa te ʼAtua ʼo ʼuhiga mo te kau Senitile. Kaʼe neʼe mataku ia ki te kau Kilisitiano Sutea ʼae neʼe ʼomai mai Selusalemi. Neʼe tuʼania ia naʼa fatufatuʼi ʼuhi ko tana fakatahi mo te kau Kilisitiano ʼe mole Sutea. Koia neʼe ui ai e te apositolo ko Paulo kia Petelo, ʼe ko he tagata malualoi. He koʼe neʼe fai e Paulo te ʼu palalau ʼaia? Koteʼuhi neʼe logo ki te ʼu palalau ʼae neʼe fai e Petelo ʼo ʼuhiga mo te kau Senitile, ʼi tanatou fono ʼae ʼi Selusalemi ʼi te taʼu 49. (Gaue 15:12; Kalate 2:13, nota.) Kotea ʼae neʼe fai e te kau Kilisitiano Senitile ʼi tanatou sisio ki te aga ʼa Petelo? Neʼe natou to koa ʼi te moʼoni? Neʼe toʼo koa te pilivilesio ʼa Petelo ʼuhi ko tana aga ʼaia?
(Kalate 2:14) Kaʼe ʼi taku sio ʼae ki tanatou mole mulimuli fakalelei ki te moʼoni ʼo te logo lelei, neʼe au ui fenei kia Sefasi ia muʼa ʼo natou fuli: “Kapau ko koe, logo la ʼe ke Sutea kaʼe ʼe ke maʼuli ohage ko te hahaʼi matapule kaʼe mole ohage ko te kau Sutea, pea he koʼe ʼe ke fakamaʼua ki te hahaʼi matapule ke natou maʼuʼuli ʼo mulimuli ki te ʼu talatisio Fakasutea?”
“E Mole Pe Hoko He Malaia Kia Natou” ʼAe ʼe ʼOʼofa Kia Sehova
12 Neʼe tuʼania ia Petelo ki te tagata. Neʼe nofo agatonu kia Sehova pea mo Sesu logola tana laka hala ʼi ʼihi temi ʼuhi ko tana tuʼania ʼae te tagata. Ohage la, neʼe fakafisi tuʼa tolu ʼo ina ui ʼe mole ina iloʼi ia Sesu. (Luka 22:54-62) ʼI te tahi lakaga, neʼe mole ina fakamaʼuhigaʼi tatau te kau Kilisitiano. Neʼe mole lelei te aga ʼaia ʼa Petelo pea neʼe feala ke faʼifaʼitakiʼi e ʼihi ʼo te kokelekasio. Koia neʼe fakatonutonuʼi malohi ai e Paulo ia Petelo. (Kal. 2:11-14) Neʼe lotomamahi koa ia Petelo ʼi tona fakatonutonuʼi ʼaia ʼo tuku ai tana lele ki te maʼuli? Kailoa ia. Neʼe ina fakakaukauʼi lelei te ʼu palalau ʼa Paulo, mo fetogi ai tana aga pea mo hoko atu tana lele.
Kumi Te ʼu Koloa ʼi Te Tohi-Tapu
(Kalate 2:20) Kua tutuki au ki te pou fakatahi mo Kilisito. ʼE mole ko au ʼae ʼe kei maʼuli, kaʼe ʼe ko Kilisito ʼae ʼe maʼuli ʼo fakatahi mo au. Koia, ʼe au maʼuli ʼi te temi nei ʼo mulimuli ki taku tui ki te ʼAlo ʼo te ʼAtua, ʼae neʼe ʼofa ia au pea neʼe ina foaki ia ia totonu maʼaku.
Tou Tauhi Agatonu Ki Te ʼAtua Logo La Te Lahi ʼo Te ʼu Mamahi
20 Kaʼe ʼe feafeaʼi ki te ʼu ʼohofi fakakakā ohage la ko te lotovaivai, pea ʼe feafeaʼi anai ia tona tauʼi? ʼE lelei ke tou metitasio ki te sakilifisio faitotogi ʼa Sesu. Pea neʼe ko te faʼahi ʼaia, neʼe fai e te apositolo ko Paulo ʼi te ʼu lakaga ʼae neʼe manatu ai ko ia ko he tagata fakaʼofaʼofa. Kaʼe neʼe mahino kia ia neʼe mole mate ia Kilisito maʼa te hahaʼi haohaoa, koteʼuhi neʼe mate ia maʼa te kau agahala ohage pe ko ia. Neʼe ina tohi fenei: “E au mauli i te tui ki te Alo o te Atua, ae nee ofa kia au, pea nee ina foaki ia ia uhi ko au.” (Kalate 2:20) ʼEi, neʼe tali e Paulo ia te totogi pea neʼe ina fakaʼuhiga kia ia totonu.
21 ʼE feala foki ke toe fua lelei kia koe mo kapau ʼe ke tali ia te totogi ohage ko he meʼa ʼofa neʼe foaki atu e Sehova kia koe totonu. ʼE mole fakaʼuhiga leva ʼe puli atu aipe anai ia te lotovaivai. Ko ʼihi ʼe lagi tonu anai ke natou tauʼi ia te lotovaivai ʼo kaku ki te malama foʼou. Kaʼe ʼe tonu ke tou manatuʼi ia te faʼahi ʼaeni: ʼE maʼu ia te fakapale e natou ʼae ʼe natou faʼa kataki. ʼI te ʼaho fuli, ʼe tou fakaovi ai ki te temi ʼae ka hoko mai ai anai ia te Puleʼaga ʼo te ʼAtua. Moka hoko mai ia te faʼahi ʼaia, ʼe maʼu anai ia te tokalelei ʼi te kele pea ʼe haohaoa anai ia te tagata fuli pe. Koia, tatau aipe pe ʼe lahi ia te ʼu mamahi ʼae ʼe tonu ke ke fakalaka ai, kaʼe kataki ʼo faiga malohi ke ke hu ki te Puleʼaga.
(Kalate 3:1) Kau Kalate vavale, ko ai koa ʼae neʼe ina kakaʼi koutou, logo la neʼe fakamatalatala lelei atu te tutuki ʼae ʼo Sesu Kilisito ki te pou?
it-1-F 940
Kalate, Tohi ki te kau
ʼI te kalaga fenei ʼa Paulo: “Kau Kalate vavale,” neʼe mole ina hinoʼi totonu he hahaʼi ʼae ko te ʼu Gaulois neʼe maʼuʼuli ʼi te potu Noleto ʼo Kalate. (Kal 3:1) Kailoa ia. Kae neʼe fakatonutonuʼi e Paulo ʼihi ʼo te ʼu kokelekasio ʼo te koga meʼa ʼaia, he neʼe natou muliʼi te ʼu manatu ʼo ʼihi Sutea neʼe natou faigaʼi te fakatuʼu ʼo tanatou faitotonu ʼaki te Lao ʼa Moisese kae neʼe mole natou muliʼi te faitotonu ʼo te ‘tui’ ʼae ʼe tupu mai te fuakava foʼou. (2:15–3:14; 4:9, 10) ʼI “te ʼu kokelekasio ʼo Kalate” (1:2) ʼae neʼe faitohi ki ai ia Paulo neʼe maʼu ai te ʼu Sutea mo he ʼu hahaʼi ʼe mole Sutea. Ko ʼihi ia natou neʼe ko he ʼu poloselite kua silikosisioʼi, pea ko ʼihi ia neʼe ko te ʼu Senitile mole silikosisioʼi pea ko ʼihi ia natou neʼe ko he ʼu celtes. (Gau 13:14, 43; 16:1; Kal 5:2) Neʼe fakaʼuhiga ko natou ko he Kau Kilisitiano Kalate, koteʼuhi ko te koga meʼa ʼae neʼe nonofo ai neʼe higoa ko Kalate. Neʼe faitohi ia Paulo ki he ʼu hahaʼi neʼe ina iloʼi lelei ʼi te potu Saute ʼo te kolo Loma ʼaia, kae mole ki he ʼu hahaʼi ʼi te potu Noleto neʼe mole ina iloʼi, koteʼuhi neʼe mole heʼeki alu ki ai.