Ko He Lea Fakapolofeta Kua ʼAfeā Kae ʼe Maʼuhiga Kia Koe

1. Ka kotou lau ia Senesi 3:15, kotea ʼae neʼe fai e Sehova ʼi te hili pe ʼo te agahala ʼa Atama mo Eva?

ʼI TE hili pe ʼo te agahala ʼa Atama mo Eva, neʼe foaki e Sehova ia he ʼamanaki ki tona hakoga ʼaki he lea fakapolofeta maʼuhiga. ʼE tou maʼu ia te lea fakapolofeta ʼaia ia Senesi 3:15.​—Lau.

2. Kotea ʼae ʼe makehe ai ia te lea fakapolofeta ʼaia?

² ʼE maʼu ia te lea fakapolofeta ʼaia ʼi te ʼuluaki tohi ʼo te Tohi-Tapu, kae ʼe ʼi tona pikipikiga mo te ʼu tohi fuli ʼae ʼi te Tohi-Tapu. Ohage pe ko te ʼu pasina ʼo he tohi neʼe fakapipiki ki tona fakavaka, ʼe ʼi ai te pikipikiga ʼo te ʼu tohi fuli ʼi te Tohi-Tapu mo te ʼu palalau ʼae ʼe tuʼu ia Senesi 3:15. ʼE talanoa ai ki he logo ʼe tahi, ʼae ʼe ʼi ai anai he fakamaʼuli ka ina fakaʼauha anai ia te Tevolo pea mo natou fuli ʼe lagolago ki ai.b ʼI fakalotofimalie leva kia natou ʼae ʼe ʼoʼofa kia Sehova.

3. Kotea te ʼu fehuʼi ka tou vakaʼi anai ʼi te alatike ʼaeni?

³ ʼI te alatike ʼaeni, ʼe tou tali anai ki te ʼu fehuʼi ʼaeni ʼe tolu ʼo ʼuhiga mo te lea fakapolofeta ʼae ʼe tuʼu ia Senesi 3:15. Ko ai ia natou ʼae ʼe talanoa ki ai te vaega? ʼE hoko feafeaʼi anai ia te lea fakapolofeta ʼaia? Kotea te ʼu fua lelei ʼe tou maʼu ʼi te hoko ʼo te lea fakapolofeta ʼaia?

KO AI IA NATOU ʼAE ʼE TALANOA KI AI TE LEA FAKAPOLOFETA?

4. Ko ai ia “te gata,” pea kotea te ʼu fakamoʼoni ʼe tou iloʼi ai ko ia ʼaia?

⁴ ʼI te ʼu palalau ʼa Sehova ʼae ʼe tuʼu ia Senesi 3:14, 15, ʼe hahaʼi ia natou ʼe palalau ki ai te vaega, ʼe palalau ai ki he “gata,” ki te “hakoga” ʼo te gata ʼaia, ki he “fafine” pea mo te “hakoga” ʼo te fafine ʼaia. ʼE tokoni mai te Tohi-Tapu ke tou iloʼi pe ʼe ko ai ia natou ʼaia.c Tou palalau muʼa ki te “gata.” Neʼe mole feala ki he gata moʼoni ke mahino ki te ʼu palalau ʼae neʼe fai e Sehova ʼi te ʼoloto ʼo Eteni. ʼE mahino ia, neʼe fakaha ia te tautea ʼaia ki he tahi ʼe ina maʼu he ʼatamai. Ko ai ia ia ʼaia? Ia Apokalipesi 12:9, ʼe tou maʼu ai ia he tali ʼe mahino lelei. ʼE ui ʼi te vaega ʼaia, “ko te gata ʼafeā,” ʼe ko Satana te Tevolo. Kae ko ai ʼae ʼe kau ki te hakoga ʼo te gata?

5. Ko ai ʼae ʼe kau ki te hakoga ʼo te gata?

⁵ ʼE tautau fakaʼaogaʼi ʼi te Tohi-Tapu ia te kupu hakoga ʼi hona aluʼaga fakata moʼo fakaʼuhiga ki he ʼu hahaʼi ʼe hoko ki he tahi, he ʼe natou manatu tahi pea ʼe tatau ʼanatou gaue. ʼE feala pe ke fakaʼuhiga ko ʼana fanau. Ko te hakoga ʼo te gata, ʼe ko he ʼu laumalie pea mo he ʼu hahaʼi, ʼe natou hage pe ko Satana, ʼe natou fakafeagai kia Sehova pea mo ʼAna kaugana. ʼE kau kia natou ʼaia ia te ʼu ʼaselo ʼae neʼe natou liʼaki tanatou gaue ʼi te lagi ʼi te temi ʼo Noe pea mo te hahaʼi agakovi ʼae ʼe tatau tanatou aga mo tanatou tamai, ia te Tevolo.​—Sen. 6:1, 2; Soa. 8:44; 1 Soa. 5:19; Suta 6.

6. He koʼe ʼe mole feala ke fakaʼuhiga ia “te fafine” kia Eva?

⁶ Tou palalau leva ki “te fafine.” ʼE mole feala ke fakaʼuhiga kia Eva. Koʼeni tona tupuʼaga. Neʼe ui e te lea fakapolofeta ʼe malaki anai e te hakoga ʼo te fafine ia te ʼulu ʼo te gata. Ohage ko tatatou vakaʼi, ko te gata ʼe ko he laumalie, ʼe fakaʼuhiga kia Satana. Koia, ʼe mole he tahi ʼi te hakoga ʼo Eva ʼe feala ke ina malaki te ʼulu ʼo te gata, he ʼe natou heʼe haohaoa fuli. Kae ʼe pulihi feafeaʼi anai ia Satana?

7. Ia Apokalipesi 12:1, 2, 5, 10, ko ai ia te fafine ʼae ʼe talanoa ki ai ia Senesi 3:15?

⁷ ʼE tou iloʼi pe ʼe ko ai te fafine ʼae ʼe talanoa ki ai ia Senesi 3:15 he ʼe fakaha ʼi te tohi fakaʼosi ʼo te Tohi-Tapu. (Lau ia Apokalipesi 12:1, 2, 5, 10.) ʼE mole ko he fafine mahani pe. ʼE tuʼu ʼi ʼona lalo vaʼe ia te mahina pea ʼe hili ʼi tona ʼulu he kolona neʼe fai ʼaki he ʼu fetuʼu ʼe 12. Pea tahi ʼe ina fakatupu mai he fanau ʼe agaaga kehe, ia te Puleʼaga ʼo te ʼAtua. ʼUhi ʼae ʼe tuʼu te Puleʼaga ʼi te lagi, ʼe toe nofo foki mo te fafine ʼi te lagi. ʼE fakaʼuhiga ki te koga ʼo te kautahi ʼa Sehova ʼi te lagi, ʼae ʼe faʼufaʼu e te ʼu laumalie agatonu.​—Kal. 4:26.

8. Ka kotou lau ia Senesi 22:15-18, ko ai ia te koga tafito ʼo te hakoga ʼo te fafine? Pea neʼe hoko te faʼahi ʼaia ʼi te temi fea?

⁸ ʼE toe tokoni mai te Folafola ʼa te ʼAtua ke tou iloʼi pe ko ai ia te koga tafito ʼo te hakoga ʼo te fafine. ʼO mulimuli ki te lea fakapolofeta ʼae ʼe tuʼu ia Senesi 22:15-18 (lau), neʼe tonu ke haʼu te hakoga ʼaia mai te hakoga ʼo Apalahamo. Koia, neʼe haʼu ia Sesu mai tona hakoga. (Luka 3:23, 34) Kae ʼe mahino ia, neʼe malohi age te hakoga ʼo te fafine ʼi he tagata, koteʼuhi neʼe tonu ke ina pulihi ia Satana te Tevolo. ʼI tona taʼu 30, ʼi tona fakanofo, neʼe liliu leva ia Sesu ko te ʼAlo ʼo te ʼAtua neʼe tupu mai te laumalie. Neʼe liliu ai leva ko te koga tafito ʼo te hakoga ʼo te fafine. (Kal. 3:16) ʼI te hili ʼo tana mate pea mo tona fakatuʼuake, neʼe fakapale leva ia ia e te ʼAtua “ ʼaki te kololia mo te fakaʼapaʼapa.” Neʼe ina foaki age ki ai “te pule katoa ʼi te lagi pea mo te kele,” ia te malohi ʼae ke ina “maumauʼi te ʼu gaue ʼa te Tevolo.”—Hep. 2:7; Mat. 28:18; 1 Soa. 3:8.

9-10. (1) Ko ai ʼae ʼe toe kau ki te koga ʼo te hakoga ʼo te fafine? Pea kotea ʼe tupu ai tatatou ui ʼe natou kau ki ai? (2) Kotea ʼae ka tou talanoa anai ki ai?

⁹ Tou palalau leva ki te lua koga ʼo te hakoga ʼo te fafine. Neʼe fakamahino e te apositolo ko Paulo pe ʼe ko ai ia te koga ʼo te hakoga ʼaia ʼi tana ui ki te kau Kilisitiano Sutea pea mo te kau Senitile ʼae neʼe fakanofo: “Kapau ʼe kotou kaugana kia Kilisito, ʼe ko koutou moʼoni te hakoga ʼo Apalahamo pea ʼe feala ke kotou maʼu te tofiʼa ʼae neʼe fakapapauʼi kia Apalahamo.” (Kal. 3:28, 29) Ka fakanofo e Sehova ia he Kilisitiano ʼaki tona laumalie maʼoniʼoni, ʼe kau ia ia ʼaia ki te koga ʼo te hakoga ʼo te fafine. ʼE faʼufaʼu ia te hakoga ʼaia e Sesu pea mo te toko 144 000 ʼae ka kauga hau mo ia. (Apk. 14:1) ʼE natou tahi faiga fuli ke natou manatu pea mo gaue ohage ko tanatou Tamai, ia Sehova.

¹⁰ ʼI te temi ʼaeni kua tou iloʼi ai pe ʼe ko ai ia natou ʼae ʼe talanoa ki ai ia Senesi 3:15. Tou vakaʼi fakanounou leva pe neʼe fakahoko feafeaʼi e Sehova ia te lea fakapolofeta ʼaia ʼaki te alu ʼo te temi pea kotea te ʼu fua lelei ʼe tou maʼu ʼi te hoko ʼo te lea fakapolofeta ʼaia.

NEʼE HOKO FEAFEAʼI IA TE LEA FAKAPOLOFETA ʼAIA?

11. Neʼe taʼi feafeaʼi ia te hakoga ʼo te fafine ʼi tona “mulivaʼe”?

¹¹ Neʼe fakaha ʼi te lea fakapolofeta ʼae ʼe tuʼu ia Senesi 3:15, ʼe taʼi anai e te gata ia te hakoga ʼo te fafine “ ʼi tona mulivaʼe.” Neʼe hoko ia te aluʼaga ʼaia ʼi te uga e Satana ia te kau Sutea pea mo te kau Loma ke natou tamateʼi ia te ʼAlo ʼo te ʼAtua. (Luka 23:13, 20-24) Ohage pe ko he mataʼi lavea ʼi he mulivaʼe, ʼe mole feala ai ke kita haʼele lolotoga he temi, ʼaki tana mate, neʼe mole feala ai ke gaue ia Sesu lolotoga he temi. ʼE moʼoni, neʼe nofo ʼi te faitoka lolotoga ʼaho ʼe tolu.​—Mat. 16:21.

12. ʼE malaki feafeaʼi anai te ʼulu ʼo te gata pea ʼi te temi fea?

¹² Ke hoko ia te lea fakapolofeta ʼae ʼe tuʼu ia Senesi 3:15, neʼe mole tonu ke nofo ia Sesu ʼi te faitoka. Kotea tona tupuʼaga? Koteʼuhi ʼe ui ʼi te lea fakapolofeta ʼaia, ʼe tonu ke malaki e te hakoga ʼo te fafine ia te ʼulu ʼo te gata. Ko tona fakaʼuhiga ʼe lelei anai te lavea ʼo Sesu ʼi tona mulivaʼe. Pea neʼe hoko ia te faʼahi ʼaia. Hili te ʼu ʼaho ki te mate ʼa Sesu, neʼe fakatuʼuake leva ia ia pea neʼe liliu leva ko he laumalie tuputupua. ʼE pulihi anai e Sehova ia Satana ʼi te temi ʼae kua ina fakatuʼutuʼu ki ai. (Hep. 2:14) ʼAki te tokoni ʼa natou ʼae ka kauga hau mo ia, ʼe natou fakamaʼa anai ia te kele mai te ʼu fili ʼo te ʼAtua, ia te hakoga ʼo te gata.​—Apk. 17:14; 20:4, 10.d

KOTEA TE ʼU FUA LELEI ʼE TOU MAʼU ʼI TE HOKO ʼO TE LEA FAKAPOLOFETA ʼAIA?

13. Kotea te ʼu fua lelei ʼe tou maʼu ʼi te hoko ʼo te lea fakapolofeta ʼaia?

¹³ Kapau ʼe ke tauhi kia Sehova, ʼe lahi te ʼu fua lelei ʼe ke maʼu mai te hoko ʼo te lea fakapolofeta ʼaia. Neʼe fekauʼi mai Sesu ki te kele, pea neʼe liliu ai ko he tagata ʼe sino kakano. Neʼe ina fakaha ia te ʼuhiga ʼo tana Tamai ʼaki tana faʼifaʼitakiʼi lelei ʼona kalitate. (Soa. 14:9) ʼAki te faʼahi ʼaia, neʼe tou ako ai ke tou iloʼi pea mo ʼoʼofa kia Sehova. ʼE tou maʼu he ʼu fua lelei mai tana ʼu akonaki pea mo tana faʼahiga takitaki ia te kokelekasio Fakakilisitiano ia ʼaho nei. Neʼe ina akoʼi mai te faʼahiga maʼuli ʼae ʼe tou maʼu ai te ʼofa ʼo Sehova. ʼE tou maʼu fuli te ʼu fua lelei ʼo tana mate, te lavea ʼi tona mulivaʼe. Koia, ʼi te temi ʼae neʼe fakatuʼuake ai Sesu, neʼe ina fakaha ai kia Sehova ia te maʼuhiga ʼo tona taʼataʼa pea neʼe tali e Sehova ia tana sakilifisio haohaoa ʼae ʼe ina “fakamaʼa tatou mai te ʼu agahala fuli.”​—1 Soa. 1:7.

14. ʼE tou iloʼi feafeaʼi neʼe mole hoko te lea fakapolofeta ʼa Sehova ʼi Eteni ʼi te temi pe ʼaia? Fakamahino.

¹⁴ ʼE ha mai ʼi te lea fakapolofeta ʼa Sehova ʼi te ʼoloto ʼo Eteni ʼe fakalaka anai he temi loaloaga pea hoki hoko katoa ia te lea fakapolofeta ʼaia. ʼE moʼoni, ʼe ʼaoga anai he temi ki te fafine ke ina fakatupu mai te hako ʼae neʼe fakapapauʼi, ke feala ke tanaki e te Tevolo tana hahaʼi pea ke hoko he feagai ʼi te ʼu kutuga ʼaia ʼe lua. He koʼe ʼe ʼaoga ke tou mahino lelei ki te lea fakapolofeta ʼaia? He neʼe fakaha ai, ʼe fehiʼa anai te malama ʼa Satana ki te ʼu kaugana ʼa Sehova, pea neʼe fakamoʼoni ki ai ia Sesu ki muli mai. (Mko. 13:13; Soa. 17:14) Neʼe hoko moʼoni ia te koga ʼaia ʼe tuʼu ia Senesi 3:15, lolotoga te ʼu taʼu ʼe 100 kua hili atu?

15. He koʼe kua ʼaʼasili ia te fehiʼa ʼo te malamanei kia tatou? Pea he koʼe ʼe mole he tupuʼaga ke tou matataku ai ia Satana?

¹⁵ ʼI te hili pe ʼo te fakanofo Hau ʼo Sesu ʼi te taʼu 1914, neʼe kapu ifo ia Satana mai te lagi. ʼE lolotoga nofo nei ʼi te ʼu tafaʼaki ʼo te kele ʼo fakalogo ki tona fakaʼauha. (Apk. 12:9, 12) Kae ʼe mole nofo feia pe. ʼE kovi ʼosi te ita ʼo Satana pea ʼe ina ʼohofi te hahaʼi ʼa te ʼAtua. (Apk. 12:13, 17) Ko te tupuʼaga la ʼo te kua ʼaʼasili age ʼo te fehiʼa ʼo te malamanei kia tatou. Kae ʼe mole tonu ke tou matataku kia Satana mo tana hahaʼi. ʼE feala ke tou tui papau ohage ko te apositolo ko Paulo, ʼae neʼe ina tohi fenei: “Kapau ʼe kau ia te ʼAtua mo tatou, ko ai ʼae ka fakafeagai mai anai kia tatou?” (Loma 8:31) Ohage ko tatatou vakaʼi, kua lahi ia te ʼu koga ʼo te lea fakapolofeta ʼae ʼe tuʼu ia Senesi 3:15 kua hoko. ʼE lahi te ʼu tupuʼaga ke tou falala ai kia Sehova.

16-18. Kotea te ʼu fua lelei neʼe maʼu e Curtis, mo Ursula pea mo Jessica ʼi tanatou mahino lelei kia Senesi 3:15?

¹⁶ ʼE feala ke tokoni mai ia te fakapapau ʼa Sehova ʼae ʼe tuʼu ia Senesi 3:15 ke tou tauʼi he fihifihia pe. ʼE fakamatala fenei e Curtis, ʼe misionea ʼi Guam: “Neʼe kua hoko kia au he ʼu aluʼaga faigataʼa pea neʼe au lotovaivai ai ʼo liliu ai ko he ʼahiʼahi ki taku tauhi ʼae kia Sehova. ʼI te ʼu lakaga ʼaia, neʼe au metitasio kia Senesi 3:15, pea neʼe malohi ai taku falala ʼae ki taku Tamai ʼe ʼi selo.” ʼE fakaatalitali ia Curtis ʼaki he lotofalala ki te ʼaho ʼae ka pulihi katoa ai e Sehova ʼotatou faigataʼaʼia.

¹⁷ Neʼe fakamahino fenei e te tuagaʼane mai Bavière, ʼe higoa ko Ursula ia te ʼaoga ʼo te mahino lelei kia Senesi 3:15, he neʼe tui papau ai ko te Tohi-Tapu ʼe haʼu mai te ʼAtua. Neʼe punamaʼuli ʼi tana sio ʼae ʼe ʼi ai te pikipikiga ʼo te lea fakapolofeta ʼaia pea mo te ʼu lea fakapolofeta fuli ʼae. Neʼe ina ui fenei: “Neʼe malave ki toku loto ʼi taku iloʼi ʼae neʼe foimo fai atu aipe e Sehova ia te ʼu fakatuʼutuʼu pea neʼe mole ina tuku feia pe te hahaʼi ke mole hanatou ʼamanaki.”

¹⁸ Neʼe ui fenei e Jessica, ʼae ʼe maʼuli ʼi Micronésie: “ ʼE kei au manatuʼi pe ia te meʼa ʼae neʼe au logoʼi ʼi te temi ʼae neʼe au iloʼi ai kua au maʼu te moʼoni. Kua hoko ia Senesi 3:15. Neʼe au mahino ai ko te maʼuli ʼaeni ʼe tou nofo ai ʼi te temi nei, ʼe mole ko te maʼuli moʼoni ʼaia. ʼAki te lea fakapolofeta ʼaia, neʼe malohi ai taku tui papau ʼae ʼe lelei age toku maʼuli ʼi taku tauhi kia Sehova pea ʼe kei toe age la te lelei ʼo toku maʼuli.”

19. He koʼe ʼe tou tui papau ʼe hoko anai ia te koga fakaʼosi ʼo te lea fakapolofeta ʼae ʼe tuʼu ia Senesi 3:15?

¹⁹ Ohage ko tatatou vakaʼi, kua lahi ia te ʼu koga ʼo te lea fakapolofeta ʼae ʼe tuʼu ia Senesi 3:15 kua hoko. Kua iloʼi lelei pe ʼe ko ai te hakoga ʼo te fafine pea mo te hakoga ʼo te gata. Ko Sesu, ia te koga tafito ʼo te hakoga ʼo te fafine, kua lelei te lavea ʼi tona mulivaʼe, pea kua liliu nei ko He hau ʼe fonu ʼi te kololia pea ʼe tuputupua. Kua vave fakaʼosi pe ia te filifili ʼo te lua koga ʼo te hakoga ʼo te fafine. Kua lahi ia te ʼu koga ʼo te lea fakapolofeta kua hoko, koia ʼe tou tui papau ʼe hoko anai ia te koga fakaʼosi, ia te malaki ʼo te ʼulu ʼo te gata. ʼE pulihi anai ia Satana. ʼI fakalotofimalie leva ki te hahaʼi agatonu. Koia, tou haga kataki. ʼE tuha totatou ʼAtua mo te falala. ʼAki te hakoga ʼo te fafine, ʼe ina foaki anai he ʼu tuʼuga tapuakina ki “te ʼu puleʼaga fuli ʼo te kele.”​—Sen. 22:18.