KUA ʼAʼASILI KOVI TE MALAMANEI

3 | Taupau ʼAu Felogoi

HE KOʼE ʼE MAʼUHIGA

ʼI te lahi ʼo te tuʼania ʼo ʼuhiga mo te aluʼaga ʼo te malamanei, tokolahi ʼe mole kei natou taupau ʼanatou felogoi.

ʼE mole kei natou felogoi mo ʼonatou kaumeʼa.
Kua ke tuʼumaʼu pe te ʼu taumatuʼa.
ʼE mole kei tokakaga lelei te ʼu matuʼā ki te ʼu tuʼania ʼo ʼanatou fanau.

Ko Meʼa ʼe Tonu Ke Iloʼi

ʼE maʼuhiga te ʼu kaumeʼa koteʼuhi ʼe tokoni ki te lelei ʼo totatou maʼuli pea ke tokalelei totatou loto, tafito ʼi te ʼu temi faigataʼa.
ʼAki te hoha ʼo ʼuhiga mo te kua fakamataku ʼo te malamanei ʼe feala ke hoko he ʼu aluʼaga neʼe mole tou ʼamanaki ki ai ʼo tupu ai te faigataʼa ʼo te famili.
ʼAki te ʼu logo fakamataku ʼo te ʼu talalogo ʼe toe feala ai ki te ʼu fanau ke natou hoha.

Ko Meʼa ʼe Tonu Ke Fai Nei

ʼE ui ʼi te Tohi-Tapu: “E ofa te kaumea i te temi fuli, pea i te malaia e hage ia ia ko he tehina.”—Taaga Lea 17:17.

Filifili lelei pe ko ai ʼe feala ke tokoni atu pea mo fakalotomalohiʼi koe. ʼE tokoni tau iloʼi ʼae ʼe ʼi ai he tahi ʼe tokaga atu ke hoko atu tau tauʼi te ʼu faigataʼaʼia ʼi te ʼaho fuli.

ʼE FEAFEAʼI TONA KATAKIʼI—Ko Tokoni ʼAoga

Ko ʼihi aluʼaga maʼuhiga moʼo puipui ʼatatou felogoi lolotoga he temi faigataʼa.

FAKAMALOHIʼI TOKOLUA MAʼULI FAKATAUMATUʼA

Fakamalohiʼi tokolua maʼuli fakataumatuʼa

ʼE ui ʼi te Tohi-Tapu: “E lelei age te toko lua i te toko tahi, koteuhi e na mau he totogi lelei mai ana gaue. Koteuhi, kapau e na fetooki ki lalo, e lagai anai e te tahi ki oluga tona oloi.” (Ekelesiasi 4:9, 10) ʼI te maʼuli ʼohoana, ʼe tonu ko te tagata mo te fafine ke nā gaue tahi, kae ʼe mole tonu ke nā fefakafeagaiʼaki.

ʼAua naʼa ke agakovi ki tou ʼohoana ʼuhi ko tou lotohoha peʼe ko ʼou fihifihia. ʼE ʼaoga anai te faʼa kataki mo te lotomahino.
Tuʼa tahi ʼi te vahaʼa, palalau ki tou ʼohoana ki te ʼu faigataʼa ʼe tonu ke fakatoka. Manatuʼi tafito ko te ʼu fihifihia ʼae ʼe tonu ke tauʼi, kae ʼe mole ko tou ʼohoana.
Fakatuʼutuʼu he temi ke kolua fai he ʼu aluʼaga ʼe kolua leleiʼia.
Kolua fakamanatu te ʼu temi ʼae neʼe kolua fiafia fakatahi ai, ʼo kolua sioʼi te ʼu pakī ʼo tokolua ʼohoana peʼe ʼo te tahi ʼu suvenia.

“ ʼE feala ki he taumatuʼa ke mole nā loto tahi tuʼumaʼu, kae ʼe mole fakaʼuhiga leva ʼe mole nā faifaitahi. ʼE feala ke nā toʼo fakatahi he tonu pea mo faiga fakatahi ke to lelei te fakatuʼutuʼu ʼaia.”—David.

FAKAMALOHIʼI ʼAU FELOGOI MO ʼOU KAUMEʼA

Fakamalohiʼi ʼau felogoi mo ʼou kaumeʼa

ʼE moʼoni ʼe ke maʼu tokoni mai ʼou kaumeʼa kae ʼe tonu foki ke ke vakaʼi peʼe feafeaʼi hau tokoni mo koe. Ka ke fakamalohiʼi he tahi pea ʼe toe malohi ai mo koe.
ʼI te ʼaho fuli, faiga ke ke maʼu logo mai hou kaumeʼa ʼe tahi peʼe lua.
Fehuʼi ki ʼou kaumeʼa pe neʼe natou tauʼi feafeaʼi he ʼu aluʼaga faigataʼa ohage ko ʼae ʼe tau mo koe.

“Ka tou to lotoa ʼi he ʼu faigataʼa, ʼe feala ke tokoni mai ʼotatou kaumeʼa ke tou iloʼi te meʼa ʼae ʼe tonu ke tou fai, tatau aipe pe ko he ʼu tokoni neʼe kua tou logo pe ki ai. ʼE tokaga ʼotatou kaumeʼa kia tatou pea ʼe natou iloʼi ʼe tou tokaga anai kia natou.”—Nicole.

LILIU KO HE TAMAI PE KO HE FAʼE ʼE LOTOTOKAGA

Liliu ko he tamai pe ko he fae ʼe lototokaga

ʼE ui ʼi te Tohi-Tapu: “ ʼE tonu ki te tagata fuli ke lotolelei ʼo fagono, ke tuai ʼi te palalau.” (Sakopo 1:19) ʼI te kamata, ʼe feala ke mole faigafua te fakaha atu e te ʼu fanau ʼonatou tuʼania. Kae kapau ʼe kotou fakalogo lelei, pea ʼe feala ke ʼekenaki ai natou ke fia palalau.

Vakavakaʼi he aluʼaga ke tokalelei te fanau ke feala ai hana palalau. ʼE faigafua ki ʼihi fanau hanatou palalau moka natou olo motoka peʼe hahaʼele mo ʼonatou matuʼa, ʼi he nofo ʼi fale ʼo tautalaga ai.
Tokaga ke ʼaua naʼa lahi fau te sio ʼa te ʼu fanau ki te ʼu talalogo.
Fakaha ki ʼakotou fanau te ʼu tuʼutuʼuni haofaki maʼuli kua kotou fai moʼo puipui te famili.
Tohi te ʼu meʼa ʼe tonu ke fai moka hoko he ʼu aluʼaga fakafokifa, pea mo faʼifaʼitakiʼi mo te ʼu fanau.

“Kotou kataki ʼo faipalalau mo ʼakotou fanau ke feala hanatou fakaha atu te ʼu meʼa ʼae ʼe natou logoʼi. Heʼe lagi natou tuʼania, peʼe matataku, peʼe iita ki he meʼa. Kotou ui age ʼe kotou toe logoʼi te ʼu meʼa ʼaia pea mo fakaha age pe neʼe feafeaʼi takotou tauʼi te ʼu aluʼaga ʼaia.”—Bethany.