Ko Apalahamo—Ko Te Kaumeʼa ʼo Te ʼAtua

KO TE tahi koga meʼa ʼaē neʼe ʼolo te hahaʼi ʼo nonofo ai ʼi te ʼosi ʼo te Tulivio, neʼe ko Ule. Neʼe liliu ia Ule ko he kolo maʼuhiga mo tona ʼu ʼapi matalelei. Kae neʼe tauhi te hahaʼi ʼo te kolo ʼaia ki te ʼu ʼatua loi. Ko te faʼahiga aga ʼaia neʼe tatau mo te aga ʼaē neʼe fai ʼi Papele. Ko te hahaʼi ʼaē neʼe nonofo ʼi Ule pea mo Papele neʼe mole nātou tatau mo Noe pea mo tona foha ko Semi, ʼaē neʼe nā tauhi kia Sehova.

Ki muli age, ʼi te hili ʼo taʼu e 350 ki te tulivio, neʼe mate leva te tagata agatonu ko Noe. Hili taʼu e lua ki te mate ʼo Noe pea tupu te tagata ʼaē ʼe koutou sio kiai ʼi te paki ʼaenī. Neʼe makehe ʼaupito te tagata ʼaia ki te ʼAtua. Ko tona higoa ko Apalahamo. Neʼe nofo ia mo tona famili ʼi te kolo ʼaia ko Ule.

ʼI te tahi ʼaho neʼe ʼui age e Sehova kia Apalahamo: ‘Mavae ʼi Ule pea mo tou ʼu kāiga, pea ke ʼalu ki te fenua ʼaē ka ʼau fakahā atu.’ Neʼe fakalogo koa ia Apalahamo ki te ʼAtua pea mo ina tuku te ʼu koloā fuli ʼo Ule? Ei. Pea ʼi te fakalogo tuʼumaʼu ʼa Apalahamo ki te ʼAtua, neʼe liliu ia ko te kaumeʼa ʼo te ʼAtua.

Ko ʼihi ʼi te famili ʼo Apalahamo neʼe ʼolo mo ia ʼi te temi ʼaē neʼe mavae ai ʼi Ule. Neʼe kau ai mo tana tāmai ko Tela. ʼO kau ai mo tana fakafotu ko Lote, pea mo Sala te ʼohoana ʼo Apalahamo. ʼI tanatou tau atu ki te koga meʼa ʼaē ʼe higoa ko Halane, neʼe mate ai ia Tela. Neʼe kua nātou mamaʼo ʼi Ule.

ʼI te mavae ʼa Apalahamo pea mo tona famili ʼi Halane, neʼe nātou ʼolo ki te fenua neʼe higoa ko Kanaane. Neʼe ʼui age e Sehova: ‘Ko te fenua ʼaenī ʼe ʼau foaki atu anai maʼa tau fānau.’ Neʼe maʼuli ia Apalahamo ʼi Kanaane pea neʼe nofo ʼi te ʼu falelā.

Neʼe kamata tokoni ai te ʼAtua kia Apalahamo, ke lahi tana faga ōvi pea mo te tahi ʼu manu pea mo tana ʼu kaugana ʼe lauʼi teau. Kae neʼe mole ʼi ai hana fānau mo Sala.

ʼI te taʼu 99 ʼo Apalahamo, neʼe ʼui age leva e Sehova: ‘ ʼE ʼau fakapapau atu ʼe ke liliu anai ko te tāmai ʼa te hahaʼi ʼo te ʼu puleʼaga kehekehe.’ Kae ʼe lava hoko feafeaʼi koa ia te faʼahi ʼaia, he neʼe kua matutuʼa ʼaupito ia Apalahamo mo Sala, ʼo mole kei feala hanā maʼu fānau?