Te ʼu Fehuʼi ʼa Te Kau Lautohi

Ko te fuakava ʼa Sehova mo Apalahamo neʼe fai koa ʼi Ule peʼe ʼi Halane?

ʼE tou maʼu te ʼuluaki fakamatala ʼo ʼuhiga mo te fuakava ʼa Sehova mo Apalahamo ia Senesi 12:1-3, ʼaē ʼe ʼui fēnei: “Neʼe ʼui maʼa Sehova kia Apalamo: ‘Mavae mai tou fenua pea mai tou ʼu kāiga pea mai te ʼapi ʼo tau tāmai, pea ke ʼalu ki te fenua ʼaē ka ʼau fakahinohino atu. ʼE ʼau fakaliliu anai ia koe ko he puleʼaga lahi . . . pea ʼaki ia koe ʼe tapuakina moʼoni anai te ʼu famili fuli ʼo te kele.’ ”a Ko te fuakava ʼaia neʼe fai e Sehova mo Apalahamo ʼi tana kei nofo ʼi Ule pea lagi neʼe ina toe fakamanatuʼi age ʼi tana kua nofo leva ʼi Halane.

ʼI te ʼuluaki sēkulō, neʼe talanoa ia Setefano ki te fakatotonu ʼaē neʼe fai e Sehova kia Apalahamo ke ʼalu ki Kanaane. ʼI tana palalau ʼaē ʼi te Sanetualio, neʼe ina ʼui fēnei: “Nee ha te Atua o te kololia kia Apalahamo tatatou tamai i tana mauli i Mesopotamia, i mua o tana nofo i [Halane]. Pea nee folafola kia te ia: Mavae mai tou fenua mo tou famili pea ke alu ki te fenua e au fakahinohino atu anai kia te koe.” (Gaue 7:2, 3) Neʼe ʼuluaki nofo ia Apalahamo ʼi Ule, pea ohage ko tona ʼui e Setefano, neʼe ko tana nofo ʼi Ule ʼaē neʼe ʼuluaki logo ai ki te fakatotonu ʼaē ke ʼalu ki Kanaane. (Senesi 15:7; Nehemia 9:7) Neʼe mole talanoa ia Setefano ki te fuakava ʼa te ʼAtua mo Apalahamo, kae ia Senesi 12:1-3, ʼe pipiki te fuakava ʼaia ki te fakatotonu ʼaē ke ʼalu ki Kanaane. Koia ʼe feala ai ke tou ʼui ko te fuakava ʼa Sehova mo Apalahamo neʼe fai ʼi Ule.

Kae ka tou laulau fakalelei te fakamatala ʼaē ia Senesi, pea ʼe hā mai ko Sehova neʼe ina toe fakamanatuʼi tana fuakava mo Apalahamo ʼi Halane, pea ki muli age neʼe ina toe fakamanatuʼi age liuliuga pea mo fakamahino lelei te tahi ʼu koga ʼo te fuakava ʼaia ʼi te ʼu lakaga kehekehe. (Senesi 15:5; 17:1-5; 18:18; 22:16-18) Ia Senesi 11:31, 32, ko Tela te tāmai ʼa Apalahamo neʼe mavae mai Ule ki Kanaane, pea neʼe kaugā ʼolo mo Apalahamo, mo Sala pea mo Lote. Neʼe nātou nonofo ʼi Halane ʼo aʼu ki te mate ʼo Tela. Neʼe fualoa te nofo ʼa Apalahamo ʼi Halane koia ʼaē neʼe lahi ai tona ʼu koloā. (Senesi 12:5) Neʼe ko te temi ʼaia ʼaē neʼe toe haʼu ai mo te tēhina ʼo Apalahamo ko Nahole ki Halane.

ʼI te ʼosi fakamatala ʼo te mate ʼo Tela, ʼe fakahā ʼi te Tohi-Tapu te ʼu palalau ʼa Sehova kia Apalahamo, ʼaē ʼe ʼui fēnei: “Pea neʼe ʼalu ia Apalamo ʼo mulimuli pe ki te meʼa ʼaē neʼe ʼui age e Sehova.” (Senesi 12:4) Koia ʼe tou mahino ʼaki ia Senesi 11:31 ki te 12:4 neʼe fai e Sehova te ʼu palalau ʼaē ʼe tuʼu ia Senesi 12:1-3, ʼi te ʼosi mate ʼo Tela. Kapau koia, pea neʼe mavae ia Apalahamo ʼi Halane ʼo ʼalu ki te fenua ʼaē neʼe hinoʼi age e Sehova, he neʼe mulimuli ki te fakatotonu ʼaē neʼe hoki fai age, ʼi tuʼa atu ʼo te fakatotonu ʼaē neʼe kua ʼuluaki logo kiai ʼi muʼa atu ʼi Ule.

Ia Senesi 12:1, neʼe fakatotonu fēnei e Sehova kia Apalahamo: “Mavae mai tou fenua pea mai tou ʼu kāiga pea mai te ʼapi ʼo tau tāmai.” ʼI te tahi moʼi temi, ko te fenua ʼo Apalahamo neʼe ko Ule, pea neʼe ko te “ ʼapi” ʼaia ʼo tana tāmai. Kae neʼe ʼave e te tāmai ʼa Apalahamo tona famili ki Halane, pea koia ʼaē neʼe higoaʼi ai e Apalahamo te koga meʼa ʼaia ko tona fenua. Hili te ʼu taʼu ki tana nofo ʼi Kanaane, neʼe ina fekauʼi tana tagata kaugana ke ʼalu ki ‘tona fenua pea mo tona ʼu kāiga’ ʼo kumi mai he ʼohoana ʼo Isaake, pea ʼi te temi ʼaia neʼe ʼalu te tagata kaugana ki “te kolo ʼo Nahole” (peʼe ko Halane peʼe ko he fenua ʼe feōvi kiai). (Senesi 24:4, 10) ʼI te koga meʼa ʼaia neʼe maʼu ai e te tagata kaugana ia Lepeka ʼaē neʼe kau ki te ʼu kāiga ʼo Apalahamo, te foʼi famili lahi ʼo Nahole.—Senesi 22:20-24; 24:15, 24, 29; 27:42, 43.

ʼI te akonaki ʼa Setefano ʼi te Sanetualio, neʼe ina ʼui fēnei ʼo ʼuhiga mo Apalahamo: “Pea nee mate ai tana tamai, nee mavae mai ai ki te fenua nei e koutou nonofo ai.” (Gaue 7:4) ʼE hā mai neʼe palalau ia Sehova kia Apalahamo ʼi Halane. ʼE feala ke tou ʼui ʼi te ʼaluʼaga ʼaia, neʼe toe fakamanatuʼi age e Sehova tana fuakava mo Apalahamo ohage ko tona tuʼu ia Senesi 12:1-3, koteʼuhi neʼe fakahoko te fuakava ʼi te temi ʼaē neʼe ʼalu ai Apalahamo ki Kanaane. Koia ʼi tatatou kua ʼosi vakaʼi te ʼu potu fuli ʼaia, ʼe mahino mai kia tatou neʼe ʼuluaki fai e Sehova te fuakava mo Apalahamo ʼi Ule pea neʼe lagi ina toe fakamanatuʼi age te fuakava ʼaia ʼi Halane.

[Kiʼi nota]