Kapite 13

Tou Toʼo He Ako Mai Te ʼu Fakahala ʼAē Neʼe Fai Kia Sesu

ʼI TE ʼosi pe ʼo tona papitemaʼi, neʼe taki ia Sesu e te laumālie ʼo te ʼAtua ki te toafa ʼo Sutea. Neʼe ʼaoga kia ia ke fakakaukau, heʼe ʼi te temi ʼaē neʼe papitemaʼi ai “koʼeni ia te lagi ʼe ava age”, ʼo feala ai tana ʼiloʼi te ʼu meʼa ʼaē ʼo te lagi. ʼE lahi ʼaupito tana ʼu meʼa ke metitasio ki ai.

Neʼe nofo Sesu ʼi te toafa ia ʼaho e 40 pea mo po e 40, neʼe mole kai. Pea ʼi te kovi ʼaē ʼo tona pakupaku, neʼe fakaōvi age te Tevolo kia ia ko tona fakahalaʼi; ʼo ina ʼui age: “Kapau ko te ʼalo koe ʼo te ʼAtua, fekau ki te ʼu maka ʼaenī ke liliu ia ko he ʼu pane.” Kae ʼe ʼiloʼi e Sesu ʼe kovi te fakaʼaogaʼi ʼo tona mālohi ʼaē ki te fai ʼo he ʼu milakulo moʼo fakahoko ʼo he ʼu meʼa ʼe loto tokotahi ki ai. ʼO fakafisi ia, ki te fakahala ʼaia.

Neʼe mole gata aipe te fakahala ʼa te Tevolo. Neʼe ina ʼahiʼahiʼi te tahi meʼa. Neʼe ina ʼui age kia Sesu ke fakatōtō mai te fuga kaupā ʼo te fale lotu ke ʼōmai te kau ʼaselo ʼo hapo ia ia. Kae neʼe mole fai ia Sesu ki te fakahala ʼaia. Neʼe ina lau age te ʼu palalau ʼe tuʼu ʼi te Tohi-Tapu, ʼo ina fakamahino age ʼe mole lelei te ʼahiʼahiʼi feiā ʼo te ʼAtua.

ʼI te tuʼa tolu ʼo tana fai fakahala, neʼe fakahā faka milakulo age e te Tevolo kia Sesu te ʼu puleʼaga katoa ʼo te malamanei pea ina ʼui age: “ ʼE ʼau foaki atu anai kia te koe te ʼu meʼa fuli ʼaenī mo kapau ʼe ke punou pea mo fai ʼi ʼoku muʼa he atolasio.” Neʼe toe fakafisi ia Sesu ki te fakahala ʼaia; neʼe ina fili ia te nofo agatonu ki te ʼAtua.

ʼE feala ke tou toʼo he ako mai te ʼu fakahala ʼaia neʼe fai kia Sesu. Ohage la, ʼe hā mai ai ko te Tevolo ʼe mole ko te fakatā ʼo te kovi ohage ko te manatu ia ʼa ʼihi, kae ko te laumālie fakapulipuli moʼoni. ʼI te tahi fakahala ʼaē neʼe fai kia Sesu neʼe hā mai ai ko te ʼu puleʼaga katoa ʼo te malamanei ʼe pule ki ai te Tevolo. Heʼe ka na pau la neʼe mole ko hana ʼu puleʼaga, neʼe mole feala ia ke liliu te meʼa ʼaē neʼe ina fakaʼui age ko he fakahala moʼoni?

Koutou fakakaukau foki ki te meʼa ʼaenī: Neʼe ʼui age e te Tevolo kia Sesu kapau ʼe ina fai he atolasio e tahi pe kia ia pea ʼe ina fakapale anai ia Sesu, ʼo ina foaki age te ʼu puleʼaga katoa ʼo te malamanei. Ko te Tevolo ʼe feala pe hana toe fakahalaʼi feiā ia tatou, ʼo foaki mai he faigamālie ke tou maʼu ai he ʼu koloā fakamālama, peʼe ko he mālohi, peʼe ko he tuʼulaga ʼe tou hā ai. Kae tou fakahā anai ʼe tou popoto ʼi hatatou faʼifaʼitaki kia Sesu; ʼe tou nonofo agatonu anai kia Sehova tatau aipe pe koteā he fakahala ʼe fai kia kita. Mateo 3:16; 4:1-11; Maleko 1:12, 13; Luka 4:1-13.

▪ Koteā te ʼu meʼa, ʼaē ʼe mahino neʼe metitasio kiai ia Sesu lolotoga te ʼu ʼaho ʼaē e 40 neʼe nofo ai ʼi te toafa?

▪ Neʼe feafeaʼi koa te fakahalaʼi ʼo Sesu e te Tevolo?

▪ Koteā koa tatatou maʼu ki te ʼu fakahala ʼaē neʼe fai kia Sesu?