Te ʼu Ako ʼe Tou Taʼofi Mai Te Tekeʼi e Sesu Te ʼu Fakahala

Hili pe tona papitemaʼi e Soane, neʼe taki e te laumalie ʼo te ʼAtua ia Sesu ki te toafa ʼo Sutea. Neʼe lahi te ʼu meʼa neʼe tonu ke fakakaukau ki ai. ʼI te papitema ʼa Sesu, “neʼe ava leva te lagi.” (Mateo 3:16) Neʼe ina manatuʼi ai te ʼu meʼa ʼae neʼe ina ako pea mo fai ʼi selo. Koia, neʼe lahi te ʼu meʼa neʼe tonu ke metitasio ki ai.

Neʼe nofo Sesu ia ʼaho ʼe 40 pea mo po ʼe 40 ʼi te toafa. Lolotoga te temi ʼaia, neʼe mole kai. Pea ʼi tona kua fia kai, neʼe fakaovi age leva ia Satana te Tevolo ʼo fakahalaʼi ia ia, ʼo ina ui fenei: “Kapau ko koe ko te ʼalo ʼo te ʼAtua, ui age ki te ʼu maka ʼaeni ke liliu ko he ʼu foʼi pane.” (Mateo 4:3) Neʼe iloʼi e Sesu neʼe kovi tana fakaʼaogaʼi tona malohi moʼo fai he ʼu milakulo maʼa ia totonu, koia neʼe ina tekeʼi ai te fakahala ʼaia.

Neʼe mole gata ai te faifakahala ʼa te Tevolo. Neʼe ina fai te tahi puleʼaki. Neʼe ina uga ia Sesu ke fakato ifo mai te potu maʼoluga ʼo te fale lotu, ke feala ai hona haofaki e te kau ʼaselo. Kaʼe neʼe mole fia fakato ia Sesu. Neʼe fakaʼaogaʼi e Sesu te Tohi-Tapu moʼo fakaha ʼe kovi te ʼahiʼahiʼi feiaʼi ʼo te ʼAtua.

ʼI te tolu fakahala, neʼe fakaha age e te Tevolo kia Sesu “te ʼu puleʼaga fuli ʼo te malamanei mo ʼonatou kololia” pea neʼe ina ui fenei: “ ʼE au foaki atu anai te ʼu meʼa fuli ʼaeni mo kapau ʼe ke tuʼutuli tuʼa tahi ifo ʼo atolasio mai kia au.” Neʼe toe fakafisi ki ai Sesu, ʼo ina ui fenei: “Alu Satana!” (Mateo 4:8-10) Neʼe mole loto ia ke to ki te fakahala, he neʼe ina iloʼi ʼe tonu ke foaki he tauhi taputapu kia Sehova tokotahi pe. ʼEi, neʼe ina filifili ia ke nofo agatonu ki te ʼAtua.

ʼE feala ke tou taʼofi he ʼu ako mai te ʼu fakahala ʼaia pea mo te fakafisi ʼa Sesu ki ai. Neʼe moʼoni te ʼu fakahala, ʼo ha ai ko te Tevolo ʼe mole ko te ʼu manatu kovi ʼae ʼe maʼu e te tagata takitokotahi, ohage ko te manatu ʼa ʼihi. Kaʼe ʼe ko he tahi ia ʼe maʼuli moʼoni pea mo fakapulipuli. ʼE toe ha ʼi te fakamatala ʼaia, ʼe puleʼi e te Tevolo te ʼu puleʼaga ʼo te malamanei. He ʼe ka na ʼaua la, ko tana fia foaki te ʼu puleʼaga kia Kilisito neʼe mole fakaʼuhiga ki he fakahala.

Pea neʼe ui e te Tevolo ʼe ina fakapale anai ia Sesu ʼo ina foaki age te ʼu puleʼaga fuli ʼo te malamanei mo kapau ʼe tuʼutuli ifo tuʼa tahi ʼo atolasio kia ia. ʼE feala ke toe fakahalaʼi feia tatou e te Tevolo, lagi ʼaki he ʼu faigamalie ke tou maʼu he ʼu koloa, peʼe ko te pule, peʼe ko he tuʼulaga ʼi te malamanei. ʼE tou popoto anai mo kapau ʼe tou mulimuli ki te faʼifaʼitaki ʼo Sesu ʼo tou nonofo agatonu ki te ʼAtua. Kaʼe ke ke manatuʼi, neʼe mavae te Tevolo ia Sesu “ ʼo atali ki he tahi age temi faigamalie.” (Luka 4:13) ʼE feala ke ina fai feia kia tatou, koia ʼae ʼe tonu ai ke tou nonofo tokaga tuʼumaʼu.