Kapite 21

ʼI Te Sinakoka ʼo Nasaleti

ʼE MAHINO ko Nasaleti kua gatutu ʼi te temi ʼaē neʼe toe liliu mai ai ia Sesu ki tona ʼapi. ʼI muʼa ʼo tana ʼalu ʼaē ke papitemaʼi e Soane, kua ʼosi kiai te taʼu e tahi tupu, neʼe ʼiloʼi pe ia ia ko te tagata tufuga ʼakau. Kae, ʼi te temi nei kua lau ʼi te potu fuli pe ko ia ko te tagata fai milakulo. Ko te hahaʼi ʼo Nasaleti ʼe nātou loto ʼaupito ke ina fai he ʼu milakulo ke nātou mamata kiai.

Neʼe toe ʼāsili age tanatou fia mamata ʼaē ki he milakulo ʼi te ʼalu ʼa Sesu ki te sinakoka ohage ko tana agamāhani. Lolotoga te fono, neʼe tuʼu ia ko te lautohi, pea neʼe ʼavage kia ia te takaiga tohi ʼa te polofeta ko Isaia. Neʼe ina maʼu te vaega ʼaē ʼe palalau ai ki te tagata neʼe fakanofo e Sehova ʼaki tona laumālie, ko te vaega ʼaia ʼe tuʼu ia Isaia kapite 61 ʼi tatatou ʼu Tohi-Tapu ʼo te temi ʼaenī.

ʼI tana ʼosi lau ʼaē ko te tagata ʼaia ʼe ina fagonogono anai te ʼāteaina kia nātou ʼe popūla, te toe sio ʼo te ʼu mata ʼo te ʼu kivi, pea mo faka mafola te taʼu fakaʼofa ʼo Sehova, neʼe toe ʼavage e Sesu te takaiga tohi ki te tagata faifekau pea heka ia. Ko nātou ʼaē neʼe nonofo ʼi te sinakoka neʼe tuku fuli tanatou sio kia ia. Pea palapalalau ai, neʼe lagi loaloaga te temi neʼe palalau ai, ʼo ina fakahā lelei age: “ ʼI te ʼaho nei ko te folafola ʼa te Tohi-Tapu ʼaenī kua koutou logo kiai kua hoko ia.”

Neʼe punamaʼuli foki ia nātou ʼaē neʼe fakalogo age ki tana “ ʼu lea mālie” pea neʼe nātou feʼuiʼaki ʼo fēnei: “Ko ia nei ʼe mole koa la ko he foha ʼo Sosefo?” Kae ʼi tana ʼiloʼi ʼaē ʼe nātou fia sio ki he ʼu milakulo ʼe ina fai, neʼe toe ʼui age e Sesu: “ ʼE mahino ia ʼe koutou fai mai anai kia te ʼau te lea fakatātā ʼaenī: ‘Tōketā, fakamālōlō muʼa ia koe totonu; ko te ʼu meʼa fuli ʼaē neʼe mātou logo kiai neʼe hoko ʼi Kapenaume, toe fai foki ʼi henī, ʼi tou fenua totonu ʼo koe.’ ” ʼIo, ʼi te manatu ʼa te hahaʼi ʼo te kolo ʼo Sesu, neʼe tonu muʼa ke ina kamata fai te ʼu fakamālōlō faka milakulo ʼi tona kolo, ke nātou ʼuluaki maʼu muʼa te ʼu lelei ʼaia. Neʼe hage kia nātou ko he pauʼu neʼe fai age e Sesu kia nātou.

ʼI te ʼiloʼi ʼaē e Sesu tanatou ʼu manatu, neʼe ina fakamanatu age te ʼu meʼa faka hisitolia neʼe hoko ʼe feʼauga lelei mo nātou: Neʼe tokolahi te ʼu fafine vitua ʼi Iselaele ʼi te ʼu ʼaho ʼo Elia, ko tana ʼui age ʼaia, kae neʼe mole fekauʼi ia Elia ki he tahi ʼi te ʼu fafine ʼaia. Neʼe ʼalu ia ki te fafine vitua ʼe mole ko he Sutea ʼi Sitoni, pea neʼe ina hāofaki tona maʼuli ʼaki te milakulo. ʼO toe feiā aipe, neʼe tokolahi te ʼu tagata kilia ʼi te ʼu ʼaho ʼo Eliseo, kae neʼe ina fakamaʼa pe ia ia Naamane te tagata Silia.

Kia nātou ʼaē ʼe nonofo ʼi te sinakoka neʼe mole faʼa lelei kia nātou te ʼu fakatatau faka hisitolia ʼaia heʼe fakahā ai tanatou manatu pe ʼaē kia nātou pea mo te mole feʼauga ʼaē ʼo tanatou tui. ʼI tanatou kua ʼiʼita, neʼe tutuʼu ake ai te ʼu tagata ʼaia ki ʼoluga pea nātou humuhumuki ia Sesu ki tuʼa ʼi te kolo. ʼI te faʼahi ʼaia, ʼi te mata mato ʼo te moʼuga ʼaē neʼe laga ai Nasaleti, neʼe nātou faigaʼi ke nātou lī ia Sesu ki te vanu. Kae neʼe matagaki mai ia Sesu mai ia nātou, pea hola ia ʼo hāo. Luka 4:16-30; 1 Hau 17:8-16; 2 Hau 5:8-14.

▪ He koʼe koa neʼe gatutu te kolo ko Nasaleti?

▪ Koteā te manatu ʼa te kau Sutea ki te akonaki ʼa Sesu, kae koteā koa te tupuʼaga ʼo tonatou vale ʼitaʼita?

▪ Koteā te meʼa ʼaē neʼe faigaʼi ke fai kia Sesu?