Kapite 56

Koteā Te Meʼa ʼAē ʼe Ina ʼUlihi Te Tagata?

KO TE fakafeagai ʼaē ʼe felāveʼi mo Sesu kua mālohi ia. Neʼe mole gata ʼaki pe te situʼa ʼo te tokolahi ʼo tana ʼu tisipulo kia ia, kae, ʼi Sutea, ʼe faiga te kau Sutea ke nātou matehi ia ia, ohage ko te Pāsikate ʼo te taʼu 31 ʼi tana ʼalu ʼaē ki Selusalemi.

Kua hoko mai te Pāsikate ʼo te taʼu 32. ʼO ʼalutahi mo te fakatotonu fakaʼatua, neʼe lagi ʼalu ia Sesu ki Selusalemi ke kau ki te fakamanatu ʼo te ʼaho lahi ʼaia. Kae, neʼe taka fakapotopoto ia, koteʼuhi ko tona maʼuli neʼe faigaʼi ke matehi. ʼOsi ʼaia, pea toe liliu ia ki Kalilea.

Neʼe lagi ko Kapenaume ʼaē neʼe ʼōmai ai te kau Faliseo mo te kau sekelipa mai Selusalemi kia te ia. Neʼe nātou kumi he ʼu meʼa moʼo talaʼakiʼi ʼo ia ʼo ʼui maʼa nātou ʼe ina maumauʼi te lao faka lotu. “He koʼe ʼe mole fai e tau ʼu tisipulo ki te talatisio ʼa te ʼu tagata ʼo te temi muʼa? ko tanatou fehuʼi age ʼaia. Heʼe mole fanofano ʼonatou nima mokā nātou kakai.” Neʼe mole ko he fakamaʼua fakaʼatua ia, kae, ki te kau Faliseo, ʼe ko he agahala mamafa ia te mole taupau ʼo te talatisio ʼaē ke fanofano te ʼu nima, pea ke fai ʼo aʼu ki te ʼu tuli nima.

Neʼe mole ina tali age ki tanatou fehuʼi, ka neʼe fakatokagaʼi age e Sesu kia nātou, ko nātou ʼe nātou maumauʼi ʼo kovi te Lao fakaʼatua kae nātou ʼiloʼi lelei pe. Neʼe ina tala age: “Kaeā ia koutou, he koʼe ʼe mole koutou fai koutou ki te fakatotonu ʼa te ʼAtua ʼuhi ko takotou talatisio? He neʼe ʼui maʼa te ʼAtua: ‘Faka maʼuhiga tau tāmai mo tau faʼe’; pea: ‘Ko ʼaē ʼe ina leakoviʼi tana tāmai pe ko tana faʼe, ke puli ia ʼi te mate!’ Kaʼe ko koutou, ʼe koutou ʼui: ‘Ko ʼaē ʼe ina ʼui ki tana tāmai pe ko tana faʼe: “Ko te ʼu meʼa fuli ʼaē ʼe ʼau maʼu ʼaē ʼe feala ke ke fakaʼaoga mai ʼa te ʼau ʼe ko he mōlaga ia kua foaki ki te ʼAtua”, ko ia ia ʼaia ʼe mole toe maʼua ia ke ina faka maʼuhiga tana tāmai.’ ”

ʼIo, ʼe akonakiʼi e te kau Faliseo ko te paʼaga, te ʼu koloā peʼe ko he tahi ʼatu meʼa kua foaki ko he meʼa ʼofa maʼa te ʼAtua ʼe ko te ʼu meʼa ʼaia ʼa te fale lotu pea ʼe mole feala hona fakaʼaogaʼi ki he tahi faʼahi. Kae, ko te meʼa ʼofa ʼaē neʼe kua foaki ʼe nofo pe ia mo ʼaē kua ina foaki. Koia ʼe feala ai he situʼa ʼa he tama ki tona maʼua ʼaē ki tana ʼu mātuʼa kua matutuʼa, ʼaē e lagi nonofo ʼi he faigataʼaʼia, ʼaki pe tana ʼui ʼaē ko tana paʼaga peʼe ko tona ʼu koloā kua “kolopano”, ko tona faka ʼuhiga ko he meʼa ʼofa kua foaki ki te ʼAtua peʼe ki te fale lotu.

ʼI tana ʼita tonu ʼi te faʼahiga pikohi e te kau Faliseo te Lao fakaʼatua, neʼe tala age e Sesu kia nātou: “Koia kua koutou fakanoaʼi te folafola ʼa te ʼAtua ʼuhi ko takotou talatisio. Kau malualoi! Neʼe tonu ai te lea faka polofeta ʼa Isaia kia koutou, ʼi tana ʼui ʼaē: ‘Ko te hahaʼi nei ʼe nātou faka maʼuhiga ʼau ʼaki ʼonatou laugutu, kaʼe mamaʼo ʼaupito tonatou loto ia te ʼau. ʼE ko he maumau noa pe ʼo tanatou haga fai mai kia te ʼau he tauhi, heʼe nātou akonakiʼi te ʼu akonaki ʼe ko he ʼu fakatotonu fakatagata pe.’ ”

Neʼe lagi kua fakatafa te hahaʼi ke feala ai te fai fehuʼi ʼa te kau Faliseo kia Sesu. ʼI tanatou mole kei ʼiloʼi hanatou tali ki te valoki mālohi ʼaē neʼe ina fai age kia nātou, neʼe fakaafe e Sesu te hahaʼi ke fakaōvi age. “Koutou fagono mai, ko tana ʼui age ʼaia, pea ke koutou mahino ki tona faka ʼuhiga: ʼe mole ko te meʼa ʼaē ʼe ulu ki te gutu ʼaē ʼe ina ʼulihi te tagata; kaʼe ko te meʼa ia ʼaē ʼe haʼu mai tona gutu, koʼena te meʼa ia ʼaē ʼe ina ʼulihi te tagata.”

Ki muli age, ʼi tanatou hū ki he loto fale, neʼe fehuʼi age e tana ʼu tisipulo ki ai: “ ʼE ke ʼiloʼi koa ko te kau Faliseo ʼi tanatou logo ki te palalau ʼaenā neʼe hoki ke ʼosi ifo tona fai neʼe nātou tūkia ai?”

“Ko te ʼakau fuli pe ʼaē neʼe mole to e taku Tāmai ʼaē ʼi selo ʼe taʼaki anai ia, ko te tali age ʼaia ʼa Sesu. Koutou tukunoa ia nātou. Ko te kau takitaki kivi ia nātou. Pea kapau ʼe takitaki e he kivi ia he tahi kivi, pea ʼe nā fetōki toko lua anai ia nāua ki he luo.”

Neʼe lagi punamaʼuli ia Sesu ʼi te fai age kia ia e Petelo te kole ʼa te kau tisipulo ke ina fakamahino age pe koteā te faka ʼuhiga ʼo tana palalau ʼi tana talanoa ki te meʼa ʼaē ʼe ina ʼulihi te tagata. “ ʼE kei toe feiā aipe koa la ia mo koutou, ʼo hala mo ʼatamai? ko tana tali age ʼaia. ʼE mole koa la heʼeki koutou mahino ko te ʼu meʼa fuli ʼe ulu ki te gutu ʼe ʼalu ki te ʼu vavā, pea ʼe faka ʼalu ki tuʼa ʼi te ʼu potu ʼaē ʼe fakaū? Kaʼe ko te meʼa ʼaē ʼe haʼu ki tuʼa mai te gutu ʼe haʼu ia mai te loto, pea ʼe ko te meʼa ʼaia ʼaē ʼe ina ʼulihi te tagata. Heʼe haʼu mai te loto te ʼu mahalohalo kovi, te ʼu fakapō, te ʼu tono, te ʼu folonikasio, te ʼu kaihaʼa, te ʼu fakamoʼoni loi, te ʼu lea hala. Koʼena te ʼu meʼa ʼe nātou ʼulihi te tagata; kaʼe ko he kai ʼaki he ʼu nima neʼe mole fanofanoʼi ʼe mole ʼulihi ai te tagata.”

Neʼe mole ʼui e Sesu te meʼa ʼaia ke ʼaua naʼa kita tokaga ki te aga fakamaʼa. Neʼe mole ina ʼui mai ia ʼe mole he ʼaoga ʼo te fanofano ʼo te ʼu nima ʼi muʼa ʼo te teuteuʼi ʼo he meʼa kai peʼe ko te kai. Kailoa; ʼe ina faka lākahalaʼi ia te malualoi ʼa te kau takitaki lotu ʼi tanatou faiga ke fulihi te ʼu lao totonu ʼa te ʼAtua ʼaki he ʼu faʼahiga puleʼaki faigataʼa ke ʼaua naʼa nātou fai kiai, ʼonatou fakamamafa ki te ʼu talatisio ʼe mole fakatafito ki te Tohi-Tapu. ʼE ko te ʼu aga kovi ia ʼaē ʼe nātou ʼulihi te tagata, pea ʼe fakamahino mai e Sesu ko te ʼu aga ʼaia ʼe haʼu mai te loto. Soane 7:1; Teutalonome 16:16; Mateo 15:1-20; Maleko 7:1-23; Ekesote 20:12; 21:17; Isaia 29:13.

▪ Koteā te fakafeagai ʼaē ʼe felāveʼi nei mo Sesu?

▪ Koteā te meʼa ʼaē neʼe talaʼakiʼi ai e te kau Faliseo ia Sesu, kae, ʼi tana manatu, e feafeaʼi tanatou maumauʼi totonu e nātou te Lao ʼa te ʼAtua?

▪ Maʼa Sesu koteā te ʼu meʼa ʼaē ʼe nātou ʼulihi te tagata?