Te ʼu Puleʼaki ʼAē ʼe Natou Fai Moʼo Faka Mafola Te Logo Lelei
NEʼE fakatotonu ki te kau Kilisitiano ke natou “fai ni ʼu tisipulo ʼi te hahaʼi ʼo te ʼu fenua fuli pē,” kae ʼe mole faka ʼuhiga leva ʼe tonu ke natou faka mālohiʼi peʼe natou fakakinauʼi ia te hahaʼi ke natou tafoki. Neʼe ko te fakatotonu ʼa Sesu ke “fakahā he ʼu logo lelei ki te kau agavaivai,” ke “faitoʼo ia nātou ʼe lāvevea ʼonatou loto,” ke “fakapelepeleʼi ia nātou fuli ʼaē ʼe putu.” (Mateo 28:19; Isaia 61:1, 2; Luka 4:18, 19) ʼE faiga e te kau Fakamoʼoni ʼa Sehova ke natou fai te faʼahi ʼaia ʼo natou tala ia te logo lelei ʼaē ʼe tuʼu ʼi te Tohi-Tapu. Ohagē ko te polofetā ko Esekiele ʼo te temi muʼa, ko te kau Fakamoʼoni ʼa Sehova iā ʼaho nei, ʼe natou faiga ke natou maʼu ia nātou ʼaē “ ʼe natou toʼetoʼe pea mo lotomamahi ʼo ʼuhiga mo te ʼu meʼa fakalialia fuli ʼaē ʼe hoko.”—Esekiele 9:4.
Ko te puleʼaki ʼaē ʼe natou fai ke feala hanatou maʼu ia nātou ʼaē ʼe lotomamahi ʼuhi ko te ʼu ʼaluʼaga ʼo te temi ʼaenī, ʼe ko tanatou ʼolo ʼi te ʼu ʼapi, pea ʼe ʼiloʼi lelei e te hahaʼi ia te gāue ʼaia. Koia ʼe natou faiga mālohi ai ke natou maʼu te hahaʼi, ohagē ko tona fai e Sesu ʼi tana “ ʼalu ki te ʼu kolo lalahi pea mo te ʼu kolo liliki, ʼo fai faka mafola pea mo kalagaʼi te logo lelei ʼo te puleʼaga ʼo te ʼAtua.” Neʼe toe fai fēia mo tana ʼu ʼuluaki tisipulo. (Luka 8:1; 9:1-6; 10:1-9) Iā ʼaho nei, ʼi te ʼu potu ʼaē ʼe feala ke natou fai faka mafola ai, ʼe faiga e te kau Fakamoʼoni ʼa Sehova ke tuʼa lahi ʼi te taʼu kātoa ia tanatou ʼolo ki te ʼu ʼapi. ʼE natou faiga ke natou fai palalau mo te hahaʼi ʼi he ʼu kiʼi minuta ki he faʼahi ʼe natou fia logo kiai peʼe natou tuʼania kiai. ʼE feala ke natou lau he vaega Tohi-Tapu e tahi peʼe lua, pea kapau ʼe fia logo ia ia ʼaē ʼe natou palalau mo ia, pea ʼe natou fakatuʼutuʼu ke natou toe liliu age ʼi he temi ʼe ina leleiʼia moʼo hoko atu ʼo te fai palalau. ʼE feala ke natou tuku he Tohi-Tapu peʼe ko he ʼu tohi ʼe natou fakamahino ia te Tohi-Tapu, pea kapau ʼe lotolelei kiai he tahi, pea ʼe feala ke natou kamata he ako faka Tohi-Tapu ʼe mole totogi. Ko te ʼu lauʼi miliona ako faka Tohi-Tapu ʼaia ʼe fai tuʼumaʼu ki te hahaʼi pea mo te ʼu fāmili ʼi te mālamanei kātoa.
Ko te tahi puleʼaki moʼo tala ki te hahaʼi ia “te logo lelei ʼo te puleʼaga” ʼe ko te ʼu fono ʼaē ʼe fai ʼi te ʼu Fale ʼo Te Puleʼaga. ʼE fai ai e te kau Fakamoʼoni ia te ʼu fono ʼi te vāhaʼa fuli. ʼE ʼi ai te fono ʼe ko te akonaki ki te hahaʼi fuapē, ʼo hoa mai kiai ia te ako ʼo ʼuhiga mo he manatu tāfito ʼo te Tohi-Tapu peʼe ko he lea faka polofetā, ʼaki Te Tule Leʼo. Ko te tahi fono ʼe ko te akoʼi ʼo te kau Fakamoʼoni ke natou liliu ko he kau fai faka mafola faiva ʼo te logo lelei, ʼo hoa mai kiai ia te fono ʼaē ʼe talanoa tāfito ki te gāue fai faka mafola ʼi te telituale. Pea tuʼa tahi ʼi te vāhaʼa ʼe fakatahitahi ia te kau Fakamoʼoni ʼi he ʼu loto fale, faka kūtuga, moʼo akoʼi ai ia te Tohi-Tapu.
ʼE fakaafe ki te ʼu fono ʼaia ia te ʼu hahaʼi fuli pē. ʼE mole fai ai ia he tae falā. ʼE fua lelei ia te ʼu fono ʼaia ki te hahaʼi fuli pē. ʼE ʼui fēnei ʼi te Tohi-Tapu: “Tou fetokagaʼaki, ke tou feʼugaʼaki ki te ʼofa pea mo te ʼu gāue lelei. ʼAua naʼa kotou liʼaki takotou fakatahitahi, ohagē ko te agamāhani ʼa ʼihi; kae kotou fefakalotofīmālieʼaki, pea tāfito ʼi takotou sio ʼaē kua ovi mai te ʼAho.” ʼE maʼuhiga ke tou ako pea mo tou fai he ʼu kumi takitokotahi, kae ʼe tou fefakalotomālohiʼaki mo kapau ʼe tou fakatahitahi, ohagē ko tona ʼui fēnei ʼi te Tohi-Tapu: “Ko te ukamea ʼe fakamāsila ʼaki te ukamea, pea ko te tagata ʼe ina fakamāsila te ʼatamai ʼo tona tatau.”—Hepeleo 10:24, 25, Bible dʼOsty; Tāʼaga Lea 27:17, Bible de la Pléiade.
ʼE toe fakaʼaogaʼi lelei e te kau Fakamoʼoni ia te ʼu faigamālie moʼo palalau ki te logo lelei ʼi tanatou felāveʼi ʼaē mo te hahaʼi ʼi te ʼu ʼaluʼaga kehekehe. ʼE lagi feala anai ke natou fai palalau fakanounou mo honatou vāhaʼa fale peʼe ko he tahi ʼi te kā peʼe ʼi te vakalele, peʼe ko he fai palalau ʼe fuafualoa mo he kaumeʼa peʼe ko he tahi ʼo te fāmili, peʼe ko he fai palalau mo he kaugā gāue ʼi te temi kai hoʼatā. ʼI te agamāhani neʼe ko te faʼahiga fagonogono ʼaia ʼaē neʼe fai e Sesu—ʼi tana haʼele ʼi te matātai, ʼi tana ʼi te moʼuga, ʼi tana kai ʼi he loto fale ʼo he tahi, ʼi tana kau ki te fai ʼohoana, peʼe ʼi tana fakalaka ʼi te vaka ʼi te Tai ʼo Kalilea. Neʼe faiakonaki ʼi te ʼu sinakoka pea ʼi te fale lotu ʼo Selusalemi. ʼI te potu pē neʼe nofo ai, neʼe ina fakaʼaogaʼi ia te ʼu faigamālie ke palalau ʼo ʼuhiga mo te Puleʼaga ʼo te ʼAtua. ʼE toe faiga te kau Fakamoʼoni ʼa Sehova ke natou mulimuli ki tana faʼifaʼitaki ʼi te potu ʼaia.—1 Petelo 2:21.
KO HE FAI FAKA MAFOLA ʼAKI TE FAʼIFAʼITAKI
ʼE mole he ʼaoga ʼo te ʼu puleʼaki ʼaia moʼo faka mafola ʼo te logo lelei mo kapau ʼe mole maʼuliʼi e ia ʼaē ʼe fai faka mafola ia te ʼu meʼa ʼaē ʼe ina akonakiʼi. Ko te mole fai ʼo te ʼu meʼa ʼaē ʼe tou ʼui ʼe ko he kākā ia, pea ko te kākā faka lotu neʼe ina fakamamaʼo ia te ʼu lauʼi miliona hahaʼi mai te Tohi-Tapu. ʼE mole ko he hala ʼa te Tohi-Tapu. Neʼe nonofo ia te kau sekelipa pea mo te kau Faliseo mo te Koga Tohi-Tapu Faka Hepeleo, kae neʼe ʼui e Sesu ʼe ko he ʼu hahaʼi kākā. ʼI te hili ʼo tana fakamoʼoni ko te ʼu hahaʼi ʼaia neʼe akoʼi nātou e te Lao ʼa Moisese, neʼe ina ʼui fēnei age ki tana kau tisipulo: “Kotou fai pea mo tauhi ia meʼa fuli ʼe natou ʼui atu kiā koutou, kae ʼaua naʼa kotou fai ʼo mulimuli ki ʼanatou gāue, heʼe natou ʼui kae mole natou fai.” (Mateo 23:3) Ko te faʼifaʼitaki lelei ʼaē ʼe tuku e he Kilisitiano, ʼe maʼuhiga age ia ʼi he ʼu akonaki ʼe loaloaga. Neʼe ko he faʼahi neʼe fakahā lelei e te ʼapositolo ki te ʼu fafine ʼohoana Kilisitiano ʼaē ʼe mole kau tonatou ʼohoana ʼi te moʼoni: “Ke natou tafoki mai ʼuhi ko te aga ʼo tonatou ʼu ʼohoana, kae heʼeki fai he palalau, he neʼe natou sisio mata ki takotou aga ʼaē ʼe maʼa.”—1 Petelo 3:1, 2.
Koia ʼe faiga e te kau Fakamoʼoni ʼa Sehova ke natou fakahā ia te logo lelei ki te hahaʼi ʼaki hanatou tuku ia he faʼifaʼitaki kiā nātou ʼi te aga faka Kilisitiano. ʼE natou ‘fai ki te hahaʼi te meʼa ʼaē ʼe natou loto ke fai age kiā nātou.’ (Mateo 7:12) ʼE natou faiga ke natou fai ia te faʼahi ʼaia ki te tagata fuli pē, mole gata pē ki te kau Fakamoʼoni, peʼe ki tonatou ʼu kaumeʼa, tonatou ʼu vāhaʼa fale peʼe ki tonatou ʼu kāiga. ʼE natou agahala, koia ʼaē ʼe tōtō ai ʼi ʼihi temi. Kae ʼe natou loto ke natou fai ia te meʼa ʼaē ʼe lelei ki te hahaʼi fuli pē, ʼo natou tala ia te logo lelei ʼo te Puleʼaga pea mo natou tokoni kiā nātou mo kapau ʼe natou fealagia.—Sake 2:14-17.
[Paki ʼo te pasina 19]
Hawaï
[Paki ʼo te pasina 19]
Venesuela
[Paki ʼo te pasina 19]
Iukoselavia
[Paki ʼo te pasina 20]
Ko te ʼu Fale ʼo Te Puleʼaga, ʼaē neʼe lelei ia tona faʼu, ʼe ko he ʼu potu ke fai ai he ʼu fai palalau faka Tohi-Tapu
[Paki ʼo te pasina 21]
ʼI tonatou fāmili pea mo tanatou felōgoi mo te hahaʼi, ʼe faiga fakamālotoloto ia te kau Fakamoʼoni ke natou maʼuliʼi ia te ʼu meʼa ʼaē ʼe natou akoʼi ki te hahaʼi