Tokaga Ki Te ʼu Polofeta Loʼi!

KO TE tau mātuʼa Pelesile neʼe nā teuteu ʼolo ʼo momoe, pea nā logoʼi te ʼu tagata kaihaʼa ʼe hu ki ʼonāua. Neʼe nā matataku ʼaupito, ʼo nā feholaʼaki ʼi te matapā fakamālama ʼo te kogafale moe pea pāuʼi te kau polisi. Kae ʼi te lahi ʼaupito ʼo te mataku ʼo te fafine neʼe mole lava moe ia, ʼo ʼalu ki tana faʼe.

Ko natou ʼaē kua kaihaʼa ʼonatou ʼu loto fale pe ʼe ko he tahi age faʼahiga kaihaʼa ʼe mahino lelei ki te fahaʼi ʼaia. Ko te malaʼia ia. Kua tokolahi te hahaʼi ʼe mamahi ʼo ʼuhiga mo te ʼu fahaʼi ʼaia. Kae, ʼe ʼi ai, te faʼahiga kaihaʼa ʼe kovi age ʼaupito tona ʼu fua.

Koteā te faʼahiga kaihaʼa ʼaia, pea ko ai te kau kaihaʼa? Ko Sesu Kilisito neʼe ina foaki mai kia tatou te ʼu naunau ʼi tana palalau ki totatou temi, neʼe ina ʼui: “Pea tokolahi te kau polofeta loʼi ʼe natou tuʼu ake ānai pea ʼe natou fakahēhē ānai he tokolahi” (Mateo 24:11). Ko te ʼu polofeta loʼi ʼaia ko te kau kaihaʼa. ʼO kaihaʼa feafeaʼi koa? ʼO kaihaʼa te ā? ʼE ʼalu tahi tanatou ʼu kaihaʼa mo ʼanatou ʼu palalau faka polofeta. Ko ia, kapau ʼe tou fia mahino ki te fahaʼi ʼaia, ʼe tonu muʼa ke tou ʼiloʼi pe ko te ʼu palalau faka polofeta fea ʼaē ʼe ʼalu tahi mo te Tohi-Tapu.

Koteā te ʼuhiga ʼo te lea faka polofeta

Ka koutou fakakaukau ki te ʼu lea faka polofeta, mahalope ko te ʼuluaki meʼa ʼaē ʼe koutou manatu ki ai ko te ʼu fai kikite. Neʼe ko te fahaʼi moʼoni ia ʼo te gāue ʼa te kau polofeta ʼafea ʼo te ʼAtua, kae neʼe mole ko tanatou gāue tāfito ʼaia. Ohage la, ʼi te fai kikite ʼa te polofeta ko Esekiele neʼe ʼui age “ke fai kikite ki te matagi”, neʼe ko he fakatotonu mai pe ia mai lagi (Esekiele 37:9, 10). ʼI te temi neʼe fakamāuʼi ai Sesu e te kau pelepitelo, neʼe ʼaʼanuʼi ʼe natou ʼe fakafeagai ki ai pea mo paki, pea natou manumanukiʼi ʼo fēnei age: “Polofeta mai, Kilisito, pe koai neé ina táí koe?” Neʼe mole natou kole age kia Sesu ke fai kikite ʼo ʼuhiga mo te temi ka haʼu. Neʼe natou ʼahiʼahiʼi ia ia ke ina fakahā totonu ʼaki te mālohi ʼo te ʼAtua pe ko ai ʼaē neʼe ina paki ia ia. — Mateo 26:67, 68, T.T.K.

Kae, ko te manatu maʼuhiga ʼaē neʼe foaki ʼi te talanoa totonu ʼa te Tohi-Tapu, ʼo ʼuhiga mo te fakaliliu ʼo te ʼu kupu “fai kikite” pe ʼe “lea faka polofeta” neʼe ʼuluaki fakatafito ia ʼi te ʼu fakatokaga ʼa te ʼAtua ʼo ʼuhiga mo he talanoa pe ʼe, ko te tohi Gāue ʼe palalau “Ki te ʼu meʼa matalelei ʼo te ʼAtua” (Gāue 2:11). Ko te fahaʼi ʼaia, neʼe lahi ai, te hahaʼi neʼe kaihaʼa e te kau polofeta loʼi.

Ko ai te ʼu polofeta loʼi, pea koteā ʼaē ʼe natou kaihaʼa? Moʼo tali ki te fehuʼi ʼaia, tou vakaʼi muʼa te hisitlolia ʼo te fenua ʼo Iselaele ʼi te temi ʼo Selemia.