Koutou Mulimuli Ki Te Faʼifaʼitaki ʼa Te Kau Polofeta ʼa Te ʼAtua
“ ʼU tēhina, ʼo ʼuhiga mo te ʼutaki ʼo te mamahi pea mo te loto faʼa kātaki, koutou mulimuli ki te faʼifaʼitaki ʼa te kau polofeta ʼaē neʼe nātou palalau ʼaki te huafa ʼo Sehova.”—Sake 5:10.
1. Koteā ʼaē ʼe tokoni ki te ʼu kaugana ʼa Sehova ke nātou fiafia logope la tonatou fakatagaʼi?
ʼE FIAFIA te ʼu kaugana ʼa Sehova logope la te fakapōʼuli gaogao ʼo te ʼu ʼaho fakamuli ʼo te malamanei. ʼE nātou fiafia koteʼuhi ʼe nātou ʼiloʼi ʼe leleiʼia nātou ye te ʼAtua. Ko te kau Fakamoʼoni ʼa Sehova ʼe nātou toe ʼutaki te fakataga pea mo te fakafeagai ʼaē ʼe felāveʼi mo nātou ʼi tanatou fagonogono koteʼuhi ʼe nātou ʼiloʼi ʼe nātou lolotoga mamahi ʼuhi pe ko te faitotonu. Neʼe ʼui fēnei e Sesu Kilisito ki tana kau tisipulo: “Manuʼia ia koutou mokā tauveleʼi koutou, pea mo fakatagaʼi koutou, pea mo fai kia koutou he ʼu fasituʼu ʼuhi ko ʼau. Koutou fiafia pea ke koutou hihiki fakafiafia, heʼe lahi tokotou fakapale ʼi selo; he neʼe feiā pe te fakatagaʼi ʼo te kau polofeta ʼaē neʼe mumuʼa ia koutou.” (Mateo 5:10-12) ʼIo ʼi te ʼu temi ʼaē ʼe felāveʼi ai te ʼu kaugana ʼa te ʼAtua mo te ʼu ʼahiʼahiʼi ʼo tanatou tui, kia nātou ʼe ko he meʼa fakafiafia ia.—Sake 1:2, 3.
2. ʼAki te manatu ʼaē ʼe tuʼu ia Sake 5:10, koteā ʼaē ʼe feala ke tokoni kia tatou ke tou loto faʼa kātaki?
2 Neʼe tohi fēnei e te tisipulo ko Sake: “ ʼU tēhina, ʼo ʼuhiga mo te ʼutaki ʼo te mamahi pea mo te loto faʼa kātaki, koutou mulimuli ki te faʼifaʼitaki ʼa te kau polofeta ʼaē neʼe nātou palalau ʼaki te huafa ʼo Sehova.” (Sake 5:10) Ko W. F. Arndt pea mo F. W. Gingrich ʼe nā fakamatala ko te kupu faka Keleka ʼi henī ʼe ina fakaliliu te kupu ʼaē ko te “faʼifaʼitaki” (hupodeigma) ko te “fakatā, faʼifaʼitakiʼaga, faʼifaʼitaki ohage la ko he meʼa ʼe ina uga ke faʼifaʼitakiʼi peʼe tonu ke faʼifaʼitakiʼi.” Ohage ko tona fakahā ia Soane 13:15, “ ʼe mole feʼauga pe ia ʼi he faʼifaʼitaki. ʼE ko he faʼifaʼitakiʼaga ʼaoga.” (Theological Dictionary of the New Testament). Koia ʼe feala ki te ʼu kaugana ʼa Sehova ʼo te temi ʼaenī ke nātou mulimuli ki te faʼifaʼitaki ʼa te kau polofeta agatonu ʼo ʼuhiga mo te “ ʼutaki ʼo te mamahi” pea mo te “loto faʼa kātaki.” Koteā te tahi age meʼa ʼe feala ke tou fakasiosioʼi mokā ʼe tou ako tonatou maʼuli? Pea ʼe lava feafeaʼi ke tokoni kia tatou ʼo ʼuhiga mo tatatou gāue fagonogono?
Neʼe Nātou ʼUtaki Te Mamahi
3, 4. Neʼe feafeaʼi te tali ʼa te polofeta ko Amosi ki te fakafeagai ʼa Amasia?
3 Ko te kau polofeta ʼa Sehova neʼe nātou ʼutaki tuʼumaʼu te mamahi peʼe ko he ʼu gaohi koviʼi ʼo nātou. Ohage la, ʼi te hiva sēkulō ʼi muʼa ʼo totatou temi, ko te pelepitelo ko Amasia neʼe atolasio ki te pipi, neʼe fakafeagai mālohi ki te polofeta ko Amosi. Neʼe loi ia Amasia, ʼo ina tala ko Amosi neʼe fonofono ʼo ʼuhiga mo Selopoame 2 ʼaki hana fakakikite ko te hau ʼe mate anai ʼaki te heletā pea ko Iselaele ʼe ʼaunofo anai. ʼAki tana palalau fiatuʼu, neʼe ʼui fēnei e Amasia kia Amosi: “Ê tagata neʼe hā kiai te ʼu meʼa, ʼalu, foimo hola ki te fenua ʼo Suta, pea ke ke kai ʼi ai te pane, pea ʼe feala ʼi ai ke ke fakakikite. Kae ʼaua naʼa ke fakakikite ʼi Petele, koteʼuhi ko te sagatualio ʼo te hau pea ʼe ko te fale ʼo te puleʼaga.” Neʼe mole lotovaivai ia ʼi te palalau fakamataku ʼaia, neʼe tali fēnei age e Amosi: “Neʼe mole ko ʼau ko he polofeta, pea neʼe mole ko ʼau ko he foha ʼo te polofeta, kae neʼe ko ʼau ia ko he tama tauhi manu pea mo huki te ʼu fua ʼo te fuʼu fiku sycomores. Pea ko Sehova neʼe ina toʼo ʼau mai te faga manu, pea mo ʼui maʼa Sehova kia te ʼau, ‘ ʼAlu, ʼo fakakikite ki taku hahaʼi ko Iselaele.’ ”—Amosi 7:10-15.
4 Ko te laumālie ʼa Sehova neʼe ina tuku te mālohi kia Amosi ke lototoʼa ʼo fakakikite. Koutou fakakaukauʼi age te tali ʼa Amasia ʼi te ʼui fēnei age e Amosi: “Fagono mai ki te folafola ʼa Sehova, ‘E ke ʼui koa la: “ ʼE mole tonu ke ke fakakikite ʼo ʼuhiga mo Iselaele, pea mo ʼaua naʼa ke fai he palalau ʼe fakafeagai ki te ʼapi ʼo Isaake”? Koia koʼeni te meʼa neʼe ʼui e Sehova: “ ʼO ʼuhiga mo tou ʼohoana, ʼe liliu anai ko te paomutu ʼi te kolo. Pea ki tou ʼu foha pea mo tou ʼu ʼofafine, ʼe nātou tō anai ʼaki te heletā. Pea ʼo ʼuhiga mo tou kele, ʼe tufa anai ʼaki te meʼa fua. Pea ʼo ʼuhiga mo koe, e ke mate anai ʼi tou kele heʼemaʼa, pea ʼo ʼuhiga mo Iselaele, ʼe ʼalu anai ia ʼo ʼaunofo kehe ʼi tona kele.” ’ ” Ko te fakakikite ʼaia neʼe hoko katoa. (Amosi 7:16, 17) Neʼe ko he meʼa fakapuna’maʼuli ki te ʼaposita ko Amasia.
5. Koteā te fakatatau ʼe feala ke tou fai ʼi te ʼaluʼaga ʼo te ʼu kaugana ʼa Sehova ʼo te temi nei pea mo te temi ʼo te polofeta ko Amosi?
5 ʼO toe feiā pe ki te hahaʼi ʼa Sehova ia ʼaho nei. ʼE tou ʼutaki te mamahi ohage pe ko nātou ʼaē neʼe nātou tala te ʼu logo ʼa te ʼAtua, pea tokolahi te hahaʼi ʼe nātou fakatutuʼu ki tatatou gāue fagonogono. ʼIo, ko te fakagafua ʼaē ke tou faka mafola ʼe mole haʼu ia mai he seminalio faka teolosia. Kailoa ia, ko te laumālie maʼoniʼoni ʼo Sehova ʼaē ʼe ina uga tatou ke tou faka mafola te logo lelei ʼo te Puleʼaga. ʼE mole feala ke tou fetogi peʼe ke tou fakamālaloʼi te logo ʼa te ʼAtua. Kailoa, ohage ko Amosi, ʼe tou tala te logo ʼaia ʼo mole tou tokagaʼi te aga ʼa te hahaʼi.—2 Kolonito 2:15-17.
Neʼe Nātou Loto Faʼa Kātaki
6, 7. (a) Koteā ʼaē neʼe ina fakamakehe ai te fakakikite ʼa Isaia? (b) E feafeaʼi te tatau ʼo te aga ʼa te ʼu kaugana ʼa Sehova ʼo te temi nei pea mo Isaia?
6 Ko te kau polofeta ʼa te ʼAtua neʼe nātou loto faʼa kātaki. Ohage ko te loto faʼa kātaki ʼa Isaia, ko te polofeta ʼa Sehova neʼe kaugana ʼi te hiva sēkulō ʼi muʼa ʼo totatou temi. Neʼe ʼui fēnei age e te ʼAtua kia te ia: “ ʼAlu, pea ʼe tonu anai ke ke ʼui age ki te hahaʼi ʼaia, ‘Koutou toe fagono pea mo toe fagono, kae ke ʼaua naʼa koutou mahino, pea ke koutou sisio pea mo sisio, kae ke ʼaua naʼa koutou maʼu he mālama.’ Ke ke fakaliliu te loto ʼo te hahaʼi ke fefeka, pea ke ke fai ke mole fia fagono tonatou ʼu taliga, pea ke ke pulusi tonatou ʼu mata, ke mole feala ai hanatou sisio pea ke mole fagono tonatou ʼu taliga, pea ke mole mahino tonatou ʼu loto, pea ke mole nātou toe maliu mai pea ke mole feala honatou fakamālōlōʼi.” (Isaia 6:9, 10) ʼE moʼoni ko te hahaʼi neʼe feiā pe tanatou aga. Kae neʼe ko he ʼaluʼaga koa neʼe ina uga ia Isaia ke ina līaki tana faka mafola? Kailoa, ʼaki te loto faʼa kātaki pea mo te faiga fakamalotoloto neʼe ina tala te ʼu fakatokaga ʼa Sehova. Ko te faʼufaʼu faka Hepeleo ʼo te ʼu palalau ʼa te ʼAtua ʼaē neʼe hoki ʼosi atu pe tona talanoaʼi, ʼe pipiki kiai te manatu “hoholo fualoa” te ʼu tala ʼa te polofeta, pea koia ko te hahaʼi “neʼe nātou toe fagono pea mo toe fagono.”—Gesenius’ Hebrew Grammar.
7 Tokolahi ia ʼaho nei ko tanatou faʼahiga tali te logo lelei ʼe hage ko te hahaʼi ʼaē neʼe fekauʼi kiai e Sehova ia Isaia. Kae ohage ko te polofeta agatonu ʼaia, ʼe tou liuliuga te logo ʼo te Puleʼaga. ʼE tou fai fakamalotoloto te faʼahi ʼaia pea mo loto faʼa kātaki heʼe ko te finegalo ʼaia ʼo Sehova.
“Neʼe Nā Fai Ia Meʼa Fuli ʼo Mulimuli Pe Kiai”
8, 9. He koʼe ko he faʼifaʼitaki lelei te polofeta ko Moisese?
8 Ko te polofeta ko Moisese neʼe ko he faʼifaʼitakiʼaga lelei ʼo ʼuhiga mo te loto faʼa kātaki pea mo te talagafua. Neʼe ina fili ke gaohi koviʼi ia ia mo te kau Iselaelite ʼaunofo, kae ʼaki te loto faʼa kātaki neʼe fakatalitali ia ki te temi ʼaē ʼe hāofaki ai nātou. Lolotoga taʼu e 40 neʼe maʼuli ʼi Matiane ʼo aʼu ki te temi ʼaē neʼe haga ai te ʼAtua ʼo fakaʼaogaʼi ia ia ke ina taki te hahaʼi ʼo Iselaele ʼaē neʼe nofo popūla. ʼI te temi ʼaē neʼe tuʼu ai ia Moisese pea mo tona taʼokete ko Alone ʼi muʼa ʼo te Pule ʼo Esipito, neʼe nā fakalogo aipe ʼo fakahā te meʼa ʼaē neʼe fakatotonuʼi age e te ʼAtua. ʼIo, “neʼe nā fai ia meʼa fuli ʼo mulimuli pe kiai.”—Ekesote 7:1-6; Hepeleo 11:24-29.
9 Neʼe ʼutakiʼi e Moisese te ʼu taʼu faigataʼa ʼaē e 40 ʼo Iselaele ʼi te toafa. Neʼe toe mulimuli fakalelei pe ia ki te takitaki fakaʼatua ʼo ʼuhiga mo te laga ʼo te tapenakulo ʼo Iselaele pea mo te fai ʼo ʼihi ake meʼa neʼe fakaʼaogaʼi ʼi te tauhi kia Sehova. Pea neʼe mulimuli lelei te polofeta ki te ʼu fakatotonu ʼa te ʼAtua, koia ʼe tou lau fēnei: “Pea neʼe mulimuli ia Moisese kia meʼa fuli neʼe fakatotonuʼi age e Sehova. Pea neʼe ina fai ʼo mulimuli pe kiai.” (Ekesote 40:16) ʼAki tatatou kaugā gāue mo te kautahi ʼa Sehova ki te fai ʼaē ʼo tatatou minisitelio, tou manatuʼi te talagafua ʼa Moisese pea ke tou maʼuliʼi te tokoni ʼa te ʼapositolo ko Paulo ʼaē ke ‘tou talagafua kia nātou ʼaē ʼi ʼotatou fuga ʼulu.’—Hepeleo 13:17.
Neʼe Nātou Maʼu Te Aga ʼAē ʼe Lelei
10, 11. (a) Koteā ʼaē ʼe ʼiloga ai ko te polofeta ko Osea neʼe ina maʼu he faʼahiga fakasiosio lelei? (b) ʼE lava feafeaʼi ke tou taupau maʼu he aga ʼe lelei ʼi te temi ʼaē ʼe tou fakaōvi ai ki te hahaʼi ʼo totatou telituale?
10 Neʼe ʼaoga ki te kau polofeta ke ia nātou te aga ʼaē ʼe lelei mokā nātou tala te ʼu fakamāu pea mo te ʼu lea faka polofeta ʼaē ʼe ʼiloga ai te tokaga ʼofa ʼa te ʼAtua ki te kau agatonu ʼaē neʼe mavetevete ʼi Iselaele. Neʼe moʼoni te faʼahi ʼaia ʼo ʼuhiga mo Osea, ʼaē neʼe ko te polofeta ia taʼu e 59. ʼAki he aga ʼe lelei, neʼe hoko aipe tana tala te ʼu logo ʼa Sehova pea neʼe ina fakaʼosi tana tohi fakakikite ʼaki te ʼu palalau ʼaenī: “Ko ai ʼaē ʼe poto, ke mahino ki te ʼu meʼa ʼaia? ʼAtamai, ke ina ʼiloʼi te ʼu meʼa ʼaia? Heʼe ko te ʼu ala ʼa Sehova ʼe totonu, pea ko te kau faitotonu ko nātou ʼaē ʼe haʼele anai ʼi ai, kae ko te kau talagataʼa ko nātou ʼaē ʼe nātou tūkia ai anai.” (Osea 14:9) ʼO mulimuli pe anai ki te faka fealagia ʼaē e Sehova ke tou fagonogono, ke ia tatou te aga ʼaē ʼe lelei pea ke tou haga kumi ia nātou ʼaē ʼe nātou tali anai ʼaki te aga fakapotopoto te ʼofa heʼe tau ʼa te ʼAtua.
11 ʼO ʼuhiga mo te ‘kumi pe ko ai te hahaʼi ʼaē ʼe tāu mo nātou,’ ʼe ʼaoga ke tou loto faʼa kātaki pea mo tou maʼu te manatu ʼaē ʼe tāu ʼo ʼuhiga mo te ʼu meʼa ʼaia. (Mateo 10:11) Ohage la, kapau neʼe puli tatatou ʼu kalavi, ʼe feala pe anai ke tou fakamanamanatuʼi lelei te ʼu faʼahi ʼaē neʼe tou fakalaka ai pea mo kumi ʼi te ʼu koga meʼa kehekehe ʼaē neʼe tou nonofo ai. ʼE hoki hili anai hatatou fai liuliuga te faʼahi ʼaia pea hoki tou maʼu ai leva anai. ʼE tonu ke toe feiā mo tatatou loto faʼa kātaki ki te kumi ʼaē ʼo te ʼu ōvi. ʼE ko he meʼa fakafiafia kia tatou mokā fagono te hahaʼi ki te logo ʼi te ʼu telituale ʼaē tuʼa lahi tona gāueʼi! Pea ʼe tou fakafiafia ʼi te haga ʼa te ʼAtua ʼo tapuakina tatatou gāue ʼi te ʼu fenua ʼaē neʼe tapuʼi ai tatatou minisitelio ʼi te ʼu ʼapi.—Kalate 6:10.
Ko Te ʼu Matapuna ʼo Te Fakaloto Mālohi
12. Ko te fakakikite fea ʼa Soele ʼe lolotoga hoko ʼi te 20 sēkulō, pea ʼe hoko feafeaʼi?
12 Ko te ʼu folafola ʼa te ʼu polofeta ʼa Sehova ʼe feala ke nātou fakaloto mālohiʼi tatou ʼi tatatou minisitelio. Ohage la, tou vakaʼi age muʼa te lea faka polofeta ʼa Soele. ʼE tuʼu ai te ʼu fakamāu neʼe fai ʼi te hiva sēkulō ʼi muʼa ʼo totatou temi ki te kau Iselaelite ʼaposita pea mo niʼihi age. Kae, neʼe fakahā e te ʼAtua kia Soele ke ina fakakikite te meʼa ʼaenī: “ ʼE ʼau tufa moʼoni anai toku laumālie ki te kakano fuape, pea, ʼe mahino papau, ko tokotou ʼu foha pea mo tokotou ʼu ʼofafine ʼe nātou fakakikite anai. Pea ʼo ʼuhiga mo takotou kau matutuʼa, ʼe nātou moemisi anai ki te ʼu misi. Pea ʼo ʼuhiga mo takotou ʼu tūpulaga, ʼe nātou sisio anai ki te ʼu meʼa. ʼO toe feiā aipe mo te ʼu tagata kaugana pea mo te ʼu fafine kaugana, ʼi te ʼu ʼaho ʼaia, ʼe ʼau tuku ifo anai toku laumālie.” (Soele 2:28, 29) Neʼe hoko moʼoni la te faʼahi ʼaia ʼo ʼuhiga mo te kau tisipulo ʼa Sesu ʼi te Penikosite ʼo te taʼu 33 ʼo totatou temi. Pea ʼe ko he fakahoko lahi ʼo te fakakikite ʼaia ʼe tou sisio kiai ʼi te 20 sēkulō! Ia ʼaho nei ʼe tou maʼu te toko miliona ʼe nātou “fakakikite,” peʼe nātou faka mafola te logo ʼa Sehova—ko te toko 600 000 ia nātou ʼaia ʼe pionie katoa.
13, 14. Koteā ʼaē ʼe feala ke tokoni ki te kau tūpulaga Kilisitiano ke nātou fiafia ʼi te minisitelio?
13 Ko te tokolahi ʼi te kau fai faka mafola ʼe kei tūpulaga. ʼE mole ko he meʼa faigafua kia nātou te palalau ki te kau matutuʼa ʼo ʼuhiga mo te Tohi-Tapu. ʼI ʼihi temi neʼe ʼui fēnei age e ʼihi ki te kau kaugana tūpulaga ʼa Sehova: ‘ ʼE pulinoa tokotou temi ʼi te fai faka mafola,’ pea ‘ka na neʼe koutou fai age la he tahi age meʼa.’ ʼE feala pe ke tali fakaʼapaʼapa age e te Fakamoʼoni tūpulaga, ʼe nātou mahino ki tanatou manatu. Ki te tūpulaga ʼe kau ki te faka mafola ʼo te logo lelei, kia ia neʼe maʼuhiga hana tali age fēnei: “ ʼE ʼau leleiʼia taku palalau ki te hahaʼi matutuʼa ohage ko koe, pea ʼe ko he meʼa fakaloto fiafia kia ʼau.” ʼIo, ʼe mahino papau ia ko te faka mafola ʼo te logo lelei ʼe mole ko he meʼa fakapuli temi ia. ʼE ʼi ai te ʼu hahaʼi ke hāofaki. ʼAki ia Soele, neʼe toe tala e te ʼAtua: “ ʼE hoko moʼoni anai ia ko ʼaē ʼe fetapā ki te huafa ʼo Sehova ʼe hāo anai ia.”—Soele 2:32.
14 Ko te fānau ʼaē ʼe kaugā ʼolo mo tanatou ʼu mātuʼa ki te fai faka mafola ʼe nātou tali lelei te tokoni ʼa tanatou ʼu mātuʼa moʼo fakahoko ʼo tanatou ʼu fakatuʼutuʼu takitokotahi. ʼO faifai pe, ko te kau tūpulaga ʼaia ʼe nātou tuputupu, ʼo nātou lau he vaega moʼo fakamatalatala ʼo tanatou falala ʼaē ʼe fakatafito ki te Tohi-Tapu pea mo nātou foaki te tohi ʼaē ʼe tāu mo te hahaʼi ʼe fia fagono ki te logo. ʼI tanatou sisio ʼaē ki tanatou ʼu faiga pea mo te tapuakina ʼa Sehova, ko te kau fai faka mafola tūpulaga ʼe nātou maʼu te fiafia ʼaupito ʼi te fagonogono ʼo te logo lelei.—Pesalemo 110:3; 148:12, 13.
Faiga Fakamalotoloto Pea Mo Fakatalitali
15. ʼE lava feafeaʼi ke tokoni kia tatou te faʼifaʼitaki ʼa Esekiele moʼo toe fakamālohiʼi tatatou faiga fakamalotoloto ki te gāue fagonogono ʼo te Puleʼaga?
15 Ko te kau polofeta ʼa te ʼAtua neʼe nātou toe tuku mo nātou he faʼifaʼitaki lelei ʼo ʼuhiga mo te faiga fakamalotoloto pea mo te fakatalitali—ko te ʼu agaaga ʼaia ʼe ʼaoga ki totatou minisitelio ia ʼaho nei. ʼI te temi ʼaē neʼe tou kamata ako ai te moʼoni ʼo te Folafola ʼa te ʼAtua, ʼe mahalo neʼe hage tatatou faiga fakamalotoloto ko he afi kakaha neʼe ina uga tatou ke tou palalau ʼaki te lototoʼa. Kae kua hili te ʼu taʼu talu mai tatatou ako ʼo te moʼoni, pea e lagi kua tuʼa lahi tatatou fagonogono ʼi totatou telituale. ʼE feala pe ko he tokosiʼi ʼi te temi nei ʼe nātou tali te logo ʼo te Puleʼaga. Ko te faʼahi ʼaia neʼe ina haga koa ʼo fakasiʼisiʼi tatatou faiga fakamalotoloto? Kapau koia ʼaia, koutou fakatokagaʼi te polofeta ko Esekiele, ʼaē ko te faka ʼuhiga ʼo tona higoa “ko te ʼAtua ʼe ina Fakamālohi.” Logope la te felāveʼi ʼaē ʼa Esekiele mo te hahaʼi loto fefeka ʼi te Iselaele ʼāfea, neʼe fakaloto mālohiʼi ia ia e te ʼAtua pea ʼaki he ʼaluʼaga fakatā neʼe ina fakafefeka tona laʼe ohage ko he maka māsila. Koia, neʼe feala ai leva kia Esekiele ke ina fai tana minisitelio ʼi te ʼu taʼu loaloaga logope la pe neʼe fagono te hahaʼi peʼe kailoa. ʼE hā ʼaki mai tana faʼifaʼitaki ʼe feala ke tou fai te faʼahi ʼaia, pea ʼe feala ki tana faʼifaʼitaki ke tokoni kia tatou moʼo toe fakamālohiʼi ʼo tatou ʼo ʼuhiga mo te faiga fakamalotoloto ʼaē ki te gāue fagonogono.—Esekiele 3:8, 9; 2 Timoteo 4:5.
16. Koteā te aga ʼa Mikea ʼe tonu anai ke tou maʼuliʼi?
16 Neʼe fakaofoofo te loto faʼa kātaki ʼa Mikea, ʼaē neʼe fakakikite ʼi te valu sēkulō ʼi muʼa ʼo totatou temi. Neʼe ina tohi fēnei: “Kae ʼo ʼuhiga mo ʼau, ʼe ʼau lamalama anai ia Sehova. ʼE ʼau fakatalitali anai ki te ʼAtua ʼo toku maʼuli. Ko toku ʼAtua ʼe fagono mai anai.” (Mikea 7:7) Ko te falala ʼa Mikea neʼe fakatafito ʼaki tana tui neʼe mālohi. Ohage ko te polofeta ko Isaia, neʼe ʼiloʼi e Mikea ko te meʼa ʼaē neʼe fakatuʼutuʼu e Sehova ʼe ina fakahoko moʼoni anai. ʼE tou ʼiloʼi pe foki mo tatou te meʼa ʼaia. (Isaia 55:11) Koia, tou haga fakatalitali ki te fakahoko ʼo te ʼu fakapapau ʼa te ʼAtua. Pea ke tou faiga fakamalotoloto ʼo faka mafola te logo lelei, ʼo feiā aipe mo te ʼu koga meʼa ʼaē ʼe mole lahi ai te fia fagono ʼa te hahaʼi ki te logo ʼo te Puleʼaga.—Tito 2:14; Sake 5:7-10.
Loto Faʼa Kātaki Ia ʼAho Nei
17, 18. Koteā te ʼu faʼifaʼitaki ʼo te temi muʼa pea mo te temi nei ʼe feala ke tokoni kia tatou ke tou loto faʼa kātaki?
17 Ko ʼihi kau polofeta ʼa Sehova neʼe nātou loto faʼa kātaki ʼi te ʼu gāue ʼaē neʼe hinoʼi age kia nātou ʼi te lolotoga ʼo te ʼu taʼu kae neʼe mole nātou sisio ki te fakahoko ʼo tanatou ʼu lea faka polofeta. Kae, ko tanatou haga faʼa kātaki, māʼiape la tonatou gaohi koviʼi, ʼe tokoni kia tatou ke tou mahino ʼe feala ke tou fakahoko tatatou minisitelio. ʼE toe ʼaoga pe foki kia tatou te faʼifaʼitaki ʼa te kau fakanofo agatonu ʼi te ʼu ʼuluaki taʼu e hogofulu ʼo te 20 sēkulō. Logope la te mole hoko fakavilivili ʼo tanatou falala ʼaē ki selo ohage ko te meʼa neʼe nātou fakaʼamu kiai, neʼe mole nātou faka fealagia ki te lotomamahi ke ina fakavaivai tanatou faiga fakamalotoloto ʼo ʼuhiga mo te fai ʼaē ʼo te finegalo ʼo te ʼAtua ohage ko tona fakahā age kia nātou.
18 ʼI te lolotoga ʼo te ʼu taʼu, tokolahi ʼi te kau Kilisitiano ʼaia neʼe nātou tufa hoholo Te Tule Leʼo pea mo te nusipepa Réveillez-vous! (neʼe ʼuluaki higoa ko te Age dʼor pea ki muli mai ko te Consolation). Neʼe nātou fakatuʼutuʼu fakamalotoloto ke nātou tuku te ʼu nusipepa maʼuhiga ʼaia ki te hahaʼi ʼi te ʼu ala pea mo tonatou ʼu ʼapi ʼaē ʼe higoa ia ʼaho nei ko te hahaʼi ʼaē ʼe tou ʼave tuʼumaʼu kia nātou te ʼu nusipepa. Ko te tuagaʼane finematuʼa kua mate nei neʼe fakatokagaʼi tana kua puli ʼe nātou ʼaē neʼe fakalaka ʼi te ala he kua nātou māhani ki tana fagonogono ʼaē ʼi ai. ʼE ko he fagonogono neʼe ina fai ʼi te lolotoga ʼo te ʼu taʼu neʼe kaugana agatonu ai, ohage ko tona fakahā ʼe nātou ʼaē neʼe nātou tokagaʼi tana minisitelio! ʼI tou ʼuhiga fai faka mafola ʼo te Puleʼaga, e ke tuku tuʼumaʼu koa Te Tule Leʼo pea mo te nusipepa Réveillez-vous! ki te ʼu nima ʼo nātou ʼaē ʼe felāveʼi mo koe ʼi tau minisitelio?
19. Koteā te fakaloto mālohi ʼe foaki mai ia Hepeleo 6:10-12?
19 Koutou toe fakatokagaʼi pe foki, te faʼa kātaki pea mo te gāue agatonu ʼa te ʼu tēhina ʼaē ʼe nātou kau ki te gāue ʼi te Kolesi Pule ʼa te kau Fakamoʼoni ʼa Sehova. Tokolahi ia nātou ʼaia kua nātou taʼu hivagofulu peʼe taʼu teau, kae ko nātou ko te kau fai faka mafola ʼo te Puleʼaga ʼe nātou tokakaga fakamalotoloto ki tonatou ʼu maʼua ʼaē neʼe hinoʼi nātou kiai. (Hepeleo 13:7) Pea koteā te ʼui kia nātou kua matutuʼa ʼaē ʼe fakaʼamu ke nātou maʼuʼuli ʼi selo pea ko ʼihi ia nātou ko te “tahi ʼu ōvi” ʼaē ʼe lolotoga tuputupu pe ʼi te ʼu taʼu? (Soane 10:16) ʼE feala ke nātou ʼiloʼi papau ko te ʼAtua ʼe mole heʼe faitotonu ke ina galoʼi tanatou gāue pea mo te ʼofa ʼaē neʼe nātou fakahā ki tona huafa. Ko te kau Fakamoʼoni ʼa Sehova kua matutuʼa pea mo tonatou kaugā fagona tūpulaga, ʼe feala ke nātou ʼutaki ʼo fai te meʼa ʼaē ʼe nātou fealagia, ʼo nātou haga tui pea mo loto faʼa kātaki ʼi te gāue ʼa te ʼAtua! (Hepeleo 6:10-12) Koia, pe ko te fakatuʼuake, ohage ko te meʼa ka hoko ki te kau polofeta ʼo te ʼu temi ʼāfea, peʼe ko te hāo ʼi te “toe mamahi lahi” ʼaē ʼe ʼamanaki ke hoko mai, ʼe nātou maʼu anai te fakapale lahi ko te maʼuli heʼegata.—Mateo 24:21.
20. (a) Koteā te ako neʼe koutou maʼu mai te “faʼifaʼitaki” ʼa te kau polofeta? (b) ʼE tokoni feafeaʼi kia tatou hatatou mulimuli ki te loto faʼa kātaki ʼa te kau polofeta?
20 ʼE ko he faʼifaʼitaki lelei neʼe tuku mai e te kau polofeta ʼa te ʼAtua! Koteʼuhi neʼe nātou ʼutaki te mamahi, loto faʼa kātaki, pea neʼe nātou fakahā ʼihi ʼu kalitate faka lotu, neʼe nātou maʼu te pilivilesio ʼaē ke nātou palalau ʼaki te huafa ʼo Sehova. ʼI totatou ʼuhiga kau Fakamoʼoni ʼo te temi nei, tou faʼifaʼitakiʼi ia nātou pea ke tou faiga fakamalotoloto ohage ko te polofeta ko Hapakuke, ʼaē neʼe ina ʼui fēnei: “ ʼE ʼau haga tuʼu anai ʼi toku tuʼulaga leʼo, pea ʼe ʼau leʼo anai ʼi te kaupā; pea ʼe ʼau lamalama anai ke ʼau sio ki te meʼa ʼe ina [ʼAtua] ʼui anai ʼaki ia te ʼau.” (Hapakuke 2:1) Ke ia tatou te faiga fakamalotoloto ʼaia ʼi te temi ʼaē ʼe tou ʼutaki pea mo fagonogono fakafiafia aipe te huafa fakaofoofo ʼo totatou Tupuʼaga Lahi, ko Sehova!—Nehemia 8:10; Loma 10:10.
Koteā ʼAē Neʼe Koutou Tāʼofi Mai Te ʼu Puani ʼAia?
◻ Koteā te faʼifaʼitaki lototoʼa neʼe tuku e te polofeta ko Amosi?
◻ He koʼe koa ko te polofeta ko Moisese ʼe ko he faʼifaʼitaki lelei?
◻ E feafeaʼi he faʼifaʼitakiʼi e te kau Fakamoʼoni ʼa Sehova ʼo te temi nei ia Amosi pea mo Isaia?
◻ Koteā te ako ʼe feala ki te kau minisi Kilisitiano ke nātou maʼu mai te aga ʼa Osea pea mo Soele?
◻ E feafeaʼi koa he fua lelei kia tatou ia te ʼu faʼifaʼitaki ʼaē ʼa Esekiele pea mo Mikea?
[Paki ʼo te pasina 16]
Logope la te fakafeagai mālohi ʼa Amasia, ko te laumālie ʼa Sehova neʼe ina tuku te mālohi kia Amosi ke lototoʼa ʼo fakakikite
[Paki ʼo te pasina 18]
Neʼe tuku e te kau fakanofo agatonu te faʼifaʼitaki lelei ʼaki tanatou lotoʼutaki ʼi te gāue ʼa Sehova