Ko Te Kau Fakamoʼoni ʼa Sehova ʼi Te Malamanei Katoa—Niselia

ʼE TUʼU te fenua ko Niselia ʼi te faʼahi ʼaē ʼe kamata ai te potu hahake ʼo Afelika. ʼE tuʼu tonu ʼi te Golf de la Guinée, ʼi te potu tokelau ʼo te Ekuatole pea ko tona hahaʼi e ko te toko 88 miliona tupu.a

ʼI te ʼu taʼu gāue ʼaenī e lua kua hili, ko te filiale ʼo te Sosiete Watch Tower ʼo Niselia neʼe tokaga tāfito ki te kau tūpulaga. Neʼe fakahā e te tānaki gāue neʼe fai ʼi te ʼu kokelekasio ʼa te kau Fakamoʼoni ʼa Sehova, ia nātou ʼaē neʼe nātou faka mafola te logo lelei ʼi Niselia ʼi te lolotoga ʼo te taʼu 1992, ko te toko 80 ki te teau neʼe nātou taʼu 10 pea mo taʼu 20. Ia nātou ʼaē neʼe papitema ʼi te taʼu ʼaia, neʼe ko te toko 63 ki te teau neʼe kau ʼi te taʼiake ʼaia.

Ko Te Kau Tūpulaga ʼe Nātou Liliu Ko He Kau Pionie

Tokolahi te kau tūpulaga ʼe nātou kau ki te gāue fai faka mafola ʼi te ʼaho fuli, ko te kau pionie. ʼE ʼui fēnei e te pionie ko Hannah: “ ʼI te fakaōviōvi ʼaē ke ʼosi taku ako, neʼe ʼau ʼaʼahi ia nātou ʼaē neʼe kau ki te ako ʼa te kau pionie, pea neʼe ʼau felāveʼi mo te ʼu tuagaʼane e lua kua finematuʼa. Neʼe ʼau fakakaukauʼi pe ʼi toku loto, ‘Kapau ko nāua ʼaenī ʼe feala ke nā pionie, e feafeaʼi koa la kia ʼau?’

“Koia ʼi te ʼosi ʼo taku ako, neʼe ʼau pionie katoa. Hili ʼaia māhina e tolu pea neʼe ʼau felāveʼi mo Sosefina e taʼu 26, neʼe tauhi ki te ʼu juju. Neʼe ina ʼui fēnei: ‘Ko koutou, te kau Fakamoʼoni ʼa Sehova, ʼe ko te hahaʼi ʼe agakovi. ʼE mole koutou faka ʼuhigaʼi te Po tapu peʼe ko te ʼu kiʼi kahoa.’ Neʼe ʼau tali age kia ia, kapau ʼe ina fakagafua mai ke ʼau ako mo ia te Tohi-Tapu, pea ʼe ina ʼiloʼi anai he koʼe ʼe mole mātou fai te ʼu meʼa ʼaia. Neʼe ina fakagafua mai ke ʼau toe liliu age. ʼO mole tuai pea neʼe kamata kau ki te ʼu fono pea mo ina fai te ʼu fetogi lahi ʼi tona maʼuli. Neʼe papitema ʼi te māhina ʼo Tesepeli 1990. Talu mai te taʼu 1991 kua pionie ia Sosefina. ʼI tana kau ʼaē ki te Ako ʼa te kau Pionie ʼi te taʼu ʼaenī kua hili, neʼe talanoa ʼo ʼuhiga mo ʼau ki tona ʼu kaugā ako ohage ko tana faʼe ʼi te faʼahi fakalaumālie!”

Ko Te Viteo Pea Mo Te Fale ʼo Te Puleʼaga

Ko te foʼi fime viteo ʼo te Sosiete neʼe tokoni ki te kokelekasio veliveli ke ina maʼu te moʼi kele moʼo laga te Fale ʼo te Puleʼaga. ʼO ʼuhiga mo te totogi ʼo te moʼi kele, neʼe felogoi te ʼu tēhina e fā mo te Onojie, ko te pule faka talatisio ʼo te koga meʼa. Neʼe ina foaki age te moʼi kele ʼe tāu ki te 20 000 naira (102 500F CFP). Neʼe mole feala ki te kokelekasio ke ina maʼu te toe totogi ʼaia, koteʼuhi neʼe ko te kau fai faka mafola pe e toko 17 moʼo lagolago ki te fakatuʼutuʼu ʼaia. Neʼe ʼui e te Onojie ʼe fakakaukau anai ki te tahi age moʼi kele.

Te ʼu māhina ki muli age, ko te tagata ʼāfea ʼi te ʼu tagata ʼāfea ʼo te kokelekasio neʼe ʼalu ʼo fakasiosio ki te nofoʼaga ʼo te Onojie. Neʼe lolotoga sioʼi e te Onojie tona fakanofo ʼaliki ʼi te foʼi fime viteo. Neʼe ʼui fēnei age e te tagata ʼāfea: “ ʼE ʼi ai taku foʼi fime viteo ʼe ʼau loto ke ke sioʼi. Koʼeni tona kupu tāfito Les Témoins de Jéhovah: un nom, une organisation.”

Ki muli age, neʼe fehuʼi age e te tagata ʼāfea ki te Onojie, pe neʼe koteā tana manatu ki te foʼi fime viteo. Neʼe tali fēnei age e te Onojie: “Neʼe ʼau sioʼi tuʼa nima te foʼi fime.” Neʼe palalau age te tagata ʼāfea ki te Onojie ʼo ʼuhiga mo te ʼu Fale ʼo te Puleʼaga ʼaē neʼe sio kiai ʼi te foʼi fime viteo pea neʼe ina fakamahinohino age ko te kokelekasio ʼo te kolo ʼe fakaʼamu ke laga he fale feiā. Pea neʼe kole age e te tagata ʼāfea peʼe feala ki te kokelekasio ke ina totogi te moʼi kele ʼaē ʼe tafa age pe ki te moʼi kele ʼo te kokelekasio. Neʼe tali fēnei age e te Onojie: “ ʼI te po ʼaē atu ʼi te ʼosi ʼo taku sioʼi te foʼi fime viteo, neʼe ʼau nofo pe mo te manatu ʼaia.” Pea hili atu pe kiai, ko te Onojie neʼe ina fua te moʼi kele e meta 6 maʼa te kokelekasio. Neʼe ina ʼui fēnei age: “Kua feala hakotou fakaʼaogaʼi te moʼi kele ʼaia. ʼI te fakaloa ʼo te moʼi kele, koutou fili faʼitaliha te moʼi kele ʼaē ʼe ʼaoga kia koutou. Koutou teuteuʼi te ʼu pepa, pea ʼe ʼau sinie anai te ʼu pepa ʼaia.”

[Nota ʼi te lalo pasina]

[Talanoa ʼo te pasina 9]

TE FAKAʼALUʼALU ʼO TE FENUA

ʼI Te Taʼu Gāue 1993

TE LAHI ʼO TE KAU FAI FAKA MAFOLA: 174 582

KO TE FAKAFUAFUA: Ko Te Fakamoʼoni e 1 Maʼa Te Toko: 507

TE HAHAʼI ʼI TE ʼAHO ʼO TE FAKAMANATU: 473 245

TE LAHI ʼO TE KAU PIONIE: 19 777

TE ʼU AKO FAKA TOHI-TAPU: 242 028

TE LAHI ʼO TE KAU PAPITEMA: 8 888

TE LAHI ʼO TE ʼU KOKELEKASIO: 3 289

TE TUʼULAGA ʼO TE FILIALE: TE KOLO ʼO PENINE, KO EDO STATE