Te ʼu Fehuʼi ʼa Te Kau Lautohi

Ko te kupusiga palalau ʼaē “ ʼe ina maʼu he ʼu meʼa ʼofa mai te laumālie”, ʼaē ʼe maʼu ia 1 Kolonito 14:37, ʼe faka ʼuhiga koa ko he tahi neʼe ina maʼu te laumālie maʼoniʼoni ʼi tona ʼuhiga ʼaē neʼe fakanofo, peʼe faka ʼuhiga ʼe ina maʼu he meʼa ʼofa faka milakulo mai te laumālie?

ʼI te Tohi-Tapu Les Saintes Écritures — Traduction du monde nouveau, ʼe lau fēnei te vaega ʼaia: “Kapau ʼe manatu he tahi ko ia ko he polofeta peʼe ʼe ina maʼu he ʼu meʼa ʼofa mai te laumālie, ke ina fakamoʼoni te ʼu meʼa ʼaē ʼe ʼau tohi atu kia koutou, koteʼuhi ko te folafola ʼaenī ʼa te ʼAliki.” — 1 Kolonito 14:37.

Ko he tahi ʼe lautohi ʼe feala ke ina fakaʼaogaʼi te kupusiga palalau ʼaē “ ʼe ina maʼu he ʼu meʼa ʼofa mai te laumālie” moʼo faka ʼuhiga ki te kau kilisitiano ʼo te ʼuluaki sēkulō ʼaē neʼe tutupu ʼi te laumālie pea mo nātou liliu ko te ʼu foha ʼo te ʼAtua. Peʼe feala pe ke mahino ko te kupusiga palalau ʼe fakaʼaogaʼi moʼo faka ʼuhiga ki he tahi neʼe ina maʼu he meʼa ʼofa makehe mai te laumālie maʼoniʼoni. ʼE ʼiloga ia ko te lua faka ʼuhiga ʼaē ʼe tonu, ohage pe ko te faiga ʼaē ke fakahā mai e te koga tohi katoa.

ʼE fakaʼaogaʼi ʼi henī e Paulo te kupu faka keleka pneumatikos, ʼaē ko tona ʼuhiga ʼuluaki “ ʼe ʼi ai tona pikipikiga mo te laumālie, ʼe ʼuhiga fakalaumālie”. Ko te ʼu faʼahi ʼo te kupu ʼaia ʼe fakaʼaogaʼi ʼi te ʼu fakamatalatala ʼo te “sino fakalaumālie”, ki te “tapuakina fakalaumālie”, ki te “mahino fakalaumālie”, pea mo te “ ʼapi fakalaumālie”. — 1 Kolonito 15:44; Efesi 1:3; Kolose 1:9; 1 Petelo 2:5.

ʼI te ʼu faʼahi ʼaia, ʼe fakahā e te Tohi-Tapu ko te ʼuluaki kupu (ko te sino, te tapuakina, te mahino, te ʼapi) ʼe faka ʼuhigaʼi e te “ ʼuhiga fakalaumālie”. Kae ʼi ʼihi ʼaluʼaga, ko te faka ʼuhiga pea mo tana fakaliliu ʼaē ke tau “ ʼo te ʼuhiga fakalaumālie” ʼe tonu ia ke vakaʼi ʼaki te sinoʼi tohi. Ohage la, ko te vaega ʼo 1 Kolonito 2:14, 15 ʼe ina fakakeheʼi te agaaga ʼo te tagata fakakakano mo te agaaga ʼo te ho pneumatikos, ʼaē ʼi tona faka ʼuhiga tonu ko “te tagata fakalaumālie”.

Ko te ʼu kapite 12 ʼo aʼu ki te 14 ʼo te ʼuluaki tohi ki te kau Kolonito ʼe nātou fakahāhā te ʼu meʼa ʼofa faka milakulo ʼo te laumālie maʼoniʼoni. Neʼe foaki e te ʼAtua te ʼu meʼa ʼofa faka milakulo ʼaia ki ʼihi kilisitiano ʼo te temi muʼa moʼo fakahā ʼe mole kei na fakaʼaogaʼi te Iselaele ʼo te kakano kae neʼe ina tapuakiʼi te “Iselaele ʼo te ʼAtua” ʼaē ʼe faʼufaʼu ʼaki te ʼu kilisitiano (Kalate 6:16). ʼO ʼuhiga mo te ʼu meʼa ʼofa ʼaia, neʼe tohi fēnei e Paulo: “ ʼI te temi nei, ʼe ʼi ai te ʼu meʼa ʼofa kehekehe, kae ko te laumālie pe e tahi.” (1 Kolonito 12:4). Ko te poto makehe, ko te ʼatamai mālama, pea mo te tui ʼe kau ʼi te ʼu meʼa ʼofa ʼaē ʼo te laumālie, ohage pe ko te fakakikite, te palalau ʼi te ʼu lea, pea mo te fakahoko lea. — 1 Kolonito 12:8-11.

Ko te kau kilisitiano ʼo Kolonito ʼaē neʼe faitohi ki ai ia Paulo neʼe fakanofo nātou e te laumālie maʼoniʼoni ʼa te ʼAtua. Neʼe ʼui fēnei e Paulo: “Kae neʼe kua fufulu koutou, neʼe kua koutou fakamaʼa pea neʼe kua koutou fakanofo ko he kau agatonu ʼi te huafa ʼo totatou ʼAliki ia Sesu Kilisito pea ʼaki te laumālie ʼo totatou ʼAtua.” (1 Kolonito 6:11; 12:13). ʼIo, ko nātou fuli neʼe kua nātou maʼu “te fakamoʼoni ʼo te meʼa ʼaē ka haʼu, ʼaē ko te laumālie”. (2 Kolonito 5:5.) Kae, neʼe mole ko nātou fuli ʼaē neʼe nātou maʼu he meʼa ʼofa makehe ʼaki te laumālie maʼoniʼoni. ʼE ʼiloga ia neʼe tokolahi ia nātou ʼaē neʼe fia fai ki te palalau ʼi te ʼu lea, ʼo nātou faka maʼuhiga fau te meʼa ʼofa ʼaia. Neʼe faitohi ia Paulo moʼo fakatonutonu ʼanatou ʼu manatu pea mo fakaʼiloga lelei ko te palalau ʼi te ʼu lea ʼe mole ʼaoga ki te tokolahi ohage pe ko te meʼa ʼofa ʼaē ko te fakakikite. ʼI te fakaʼosi ʼo te kapite 12, neʼe fēnei te tokoni ʼa Paulo ki te kau Kolonito: “Koutou haga kumi fakamalotoloto te ʼu meʼa ʼofa lalahi age.” — 1 Kolonito 12:28-31.

Koia, ʼi te kamataʼaga ʼo te kapite 14, neʼe fēnei tana fakaloto mālohiʼi: “Koutou tuli te ʼofa, kae koutou kumi fakamalotoloto [ta pneumatika], kae tāfito te fai fakakikite.” Ko te kumi ʼo te ā? Neʼe mole tonu ia ke kumi e te kau kilisitiano ʼaia ke fakanofo nātou, koteʼuhi kua ʼosi hoko te faʼahi ʼaia kia nātou. ʼE mahino ia ko Paulo neʼe fia palalau ki te ʼu “meʼa ʼofa” ʼo te laumālie, ohage ko tona tuʼu ʼi te fakaʼosi ʼo te kapite 12, neʼe ina fakaloto mālohiʼi te kau Kolonito ke nātou faiga kiai. Koia, ko te Tohi-Tapu Les Saintes Écritures — Traduction du monde nouveau ʼe ina fakaliliu fēnei te vaega ʼo 1 Kolonito 14:1: “Koutou kumi fakamalotoloto te ʼu meʼa ʼofa fakalaumālie.” Ko ʼihi Tohi-Tapu ʼe nātou fakaliliu ʼi henī te ta pneumatika ki te kupu “te ʼu meʼa ʼofa fakalaumālie” peʼe “ko te ʼu meʼa ʼofa ʼo te laumālie”.

ʼAki te fakamahino ʼaia, tou fakatokagaʼi ʼi te fakaʼosiʼosi ʼo te kapite 14, ʼe fakapipiki e Paulo te fakakikite pea mo te pneumatikos. Ohage ko te vaega 1, ko te sinoʼi tohi ʼe ina fakahā mai ko Paulo neʼe palalau ʼo ʼuhiga mo te meʼa ʼaē neʼe foaki e te laumālie. Ko te tohi (The New Testament in Modern Speech) neʼe fai e R. F. Weymouth, ʼe ina fakaliliu fēnei: “Kapau ʼe ʼi ai he tahi ʼe ina fakamoʼoni ko ia ko he polofeta peʼe ko he tagata ʼe ia ia he meʼa ʼofa fakalaumālie, ke ina fakamoʼoni ko te folafola ʼa te ʼAliki ʼaenī ʼe ʼau lolotoga tohi atu.”

ʼIo, ko te kau kilisitiano fuli, peʼe nātou maʼu te meʼa ʼofa ʼaē ko te fakakikite peʼe ko he tahi age pe meʼa ʼofa ʼo te laumālie, neʼe tonu ke nātou tali pea mo muliʼi te tokoni ʼaē neʼe tohi e Paulo ʼo ʼuhiga mo te faʼahiga fakaʼaluʼalu ʼo te ʼu meʼa ʼi te kokelekasio.