Te Maʼua ʼAē ʼe Pipiki Ki Te ʼIloʼi ʼo Te Lotu Moʼoni

“Manuʼia ia nātou ʼaē ʼe nātou fagono ki te folafola ʼa te ʼAtua pea nātou taupau!”—Luka 11:28.

1. ʼI tanatou maʼu te lotu moʼoni, ko te faʼahiga hahaʼi feafeaʼi ʼaē ʼe nātou fakatafito tonatou maʼuli ki te lotu ʼaia?

ʼE MOLE feʼauga pe ʼi te ʼiloʼi ʼaē ʼo te lotu moʼoni. Kapau ʼe tou kaumeʼa mo te meʼa ʼaē ʼe totonu pea mo te meʼa ʼaē ʼe moʼoni, ʼi te temi ʼaē ʼe tou maʼu ai te lotu moʼoni, ʼe tou fakatafito totatou maʼuli ki te lotu ʼaia. Ko te lotu moʼoni ʼe mole ko he filosofia ia ʼo te ʼatamai; ʼe ko he faʼahiga maʼuli ia.—Pesalemo 119:105; Isaia 2:3; vakaʼi ia Gāue 9:2.

2, 3. (a) Neʼe feafeaʼi te haga ʼa Sesu ʼo fakahā fakalelei te maʼuhiga ʼaē ʼo te fai ʼo te finegalo ʼo te ʼAtua? (b) Koteā te meʼa ʼe fakamaʼua kia nātou fuli ʼaē kua nātou ʼiloʼi te lotu moʼoni?

² Neʼe fakamahino lelei e Sesu Kilisito te maʼuhiga ʼo te fai ʼo te finegalo ʼo te ʼAtua ʼo mulimuli pe ki te meʼa ʼaē neʼe ina fakahā. Moʼo fakaʼosi ʼo tana Akonaki ʼi te Moʼuga, neʼe fakahā e Sesu, ʼe mole ko nātou fuli ʼaē ʼe nātou ʼui mai kia te ʼau ʼAliki (ia nātou ʼe ʼui ko te kau Kilisitiano) ʼaē ka nātou hū anai ki te Puleʼaga; kae ko nātou pe ʼaē ka nātou fai te finegalo ʼo taku Tāmai. Neʼe ina toe ʼui ʼo ʼuhiga mo ʼihi, ʼe līaki anai ia nātou ohage ko he kau “tagata gāue ʼe manuki ki te lao.” He koʼe ʼe ʼui ʼe manuki ki te lao? Koteʼuhi ohage ko tona fakahā ʼi te Tohi-Tapu, ko te mole fai ʼo te finegalo ʼo te ʼAtua ʼe ko he agahala ia, pea ko te agahala fuli ʼe ko he manuki ki te lao. (Mateo 7:21-23; 1 Soane 3:4; vakaʼi ia Loma 10:2, 3.) ʼE feala pe ki he tahi ke ina ʼiloʼi te lotu moʼoni, ke ina vikiʼi ia nātou ʼaē ʼe nātou akoʼi pea mo maʼuliʼi te lotu ʼaia, kae ʼe toe fakamaʼua pe foki kia ia ʼaia ke ina maʼuliʼi te lotu ʼaia. (Sake 4:17) Kapau ʼe ina tali te maʼua ʼaia, ʼe liliu anai tona maʼuli ʼo tapuakina, pea mo ina maʼu anai te fiafia ʼaē mole feala ke ina maʼu ʼi he tahi age potu.

³ ʼI te alatike kua ʼosi, neʼe tou vakaʼi te ʼu fakaʼiloga e ono ʼo te lotu moʼoni. Ko te ʼu fakaʼiloga ʼaia neʼe tokoni kia tatou ke tou ʼiloʼi te lotu moʼoni kae neʼe nātou toe fakahā mai pe foki kia tatou takitokotahi te ʼu faigataʼaʼia pea mo te ʼu fealagia. ʼO feafeaʼi?

E Feafeaʼi Takotou Tali Ki Te Folafola ʼa Te ʼAtua?

4. (a) Mokā kamata fakatahi ni hahaʼi ki te kau Fakamoʼoni ʼa Sehova, koteā te meʼa ʼe nātou fakatokagaʼi fakavilivili ʼo ʼuhiga mo te fakaʼaogaʼi ʼaē e te kau Fakamoʼoni ia te tohi-Tapu? (b) ʼE malave feafeaʼi ki te kau kaugana ʼa Sehova tonatou fafaga fakalelei ʼi te faʼahi fakalaumālie?

⁴ ʼI te temi ʼaē ʼe lolotoga ako ai te kau Fakamoʼoni ʼa Sehova ia te Tohi-Tapu mo he tahi e fia mahino ki te faʼahi ʼaia, ʼe ʼiloʼi atu aipe e te ʼu hahaʼi foʼofoʼou ʼaia ko te meʼa ʼaē ʼe akoʼi age ʼe haʼu mai te Tohi-Tapu. Moʼo tali ki ʼanatou ʼu fehuʼi, ʼe mole talanoa te kau Fakamoʼoni ʼa Sehova ki te ʼu akonaki ʼa te ʼu ʼēkelesia, pea mo te ʼu talatisio fakatagata, peʼe ko he ʼu manatu ʼa ni ʼu hahaʼi māʼoluga. Ko te Folafola pe ʼa te ʼAtua ʼaē ʼe maʼuhiga ʼe tali ki te faʼahi ʼaia. Ka nātou ʼolo ki te Fale ʼo te Puleʼaga, ʼe nātou toe fakatokagaʼi aipe foki ko te Tohi-Tapu ʼaē ʼe fakaʼaogaʼi tāfito. ʼE mahino vave pe ki te hahaʼi ʼaē ʼe nātou kumi fakamalotoloto te moʼoni ko te tupuʼaga tāfito ʼaē ʼo te fiafia ʼa te kau Fakamoʼoni ʼa Sehova ko te lelei ʼo tonatou fafaga ʼi te faʼahi fakalaumālie ʼaki te Folafola ʼa te ʼAtua.—Isaia 65:13, 14.

5. (a) Koteā te meʼa mata faigataʼa ʼe ʼiloga kia nātou ʼaē ʼe nātou sioʼi te kau Fakamoʼoni ʼa Sehova? (b) E feafeaʼi hanatou kau ki te fakafiafia ʼa te kau Fakamoʼoni?

⁵ Kapau ʼe koutou fakamoʼoni ki te faʼahi ʼaia, koteā anai te meʼa ka koutou fai ki te faʼahi ʼaia? Kapau ʼe mahino kia koutou tona ʼuhiga, ʼe mole gata ʼaki pe takotou sio, peʼe ko takotou holi ʼaē kiai. ʼE fakahā e te Tohi-Tapu ko nātou ʼaē ʼe nātou “fagono pe” kae mole “ko he hahaʼi ʼe nātou maʼuliʼi te folafola” ʼe nātou ‘kākāʼi pe ia nātou ʼi he ʼu fakakaukau hala.’ (Sake 1:22) ʼE nātou kākāʼi totonu pe ia nātou koteʼuhi ʼe mole nātou tokakaga ki te faʼahi ʼaia logope la he ʼu faʼahiga meʼa ʼe feala pe ke ʼui age kia nātou, ko tanatou mole fia fakalogo ʼaē ki te ʼAtua ʼe hā ʼaki aipe tanatou mole ʼoʼofa moʼoni kia te ia. Ko he tui ʼe mole lagolago ʼaki ni ʼu gāue, ko he tui ia ʼe mate. (Sake 2:18-26; 1 Soane 5:3) Kae ko ʼaē ʼe uga ʼaki tona ʼofa ʼaē kia Sehova ke liliu ko he “tahi ʼe ina maʼuliʼi te gāue” ʼe “fiafia anai ia ʼi te meʼa ʼaē ʼe ina fai.” ʼIo, ohage ko tona fakamatala e Sesu, “Manuʼia ia nātou ʼaē ʼe nātou fagono ki te folafola ʼa te ʼAtua pea nātou taupau!”—Sake 1:25; Luka 11:28; Soane 13:17.

6. Kapau ʼe tou fakafetaʼi moʼoni ki te Folafola ʼa te ʼAtua, koteā anai te ʼu fealagia ʼe tou faiga anai ke tou fakahoko takitokotahi?

⁶ Ko te fiafia ʼaia ʼe ʼāʼāsili loloto anai mokā ʼe koutou tuputupu ʼi te ʼatamai mālama ʼo te finegalo ʼo te ʼAtua pea mo koutou maʼuliʼi te ʼu meʼa ʼaē ʼe koutou akoʼi. ʼE lahi feafeaʼi anai takotou faiga ʼaē ke koutou akoʼi te Folafola ʼa te ʼAtua? Ko te toko lauʼi hogofulu afe hahaʼi ʼe mole popoto ʼi te lautohi pea mo te faitohi neʼe nātou gāue kinakina ke feala ai hanatou lau ia te Tohi-Tapu, pea mo akoʼi niʼihi age ʼu hahaʼi. Ko ʼihi ʼe nātou ʼaʼala vave ʼi te uhu ke feala ai hanatou maʼu he temi ʼi te ʼaho fuli moʼo lau te Tohi-Tapu pea mo te ʼu meʼa ʼaē tokoni ki te ako ʼo te Tohi-Tapu, ohage la ko Te Tule Leʼo. ʼI te temi fuli pe ʼaē ʼe koutou lau takitokotahi ai te Tohi-Tapu peʼe koutou kumi ni ʼu vaega ʼe tuʼu ʼi te tahi age tohi ʼe koutou akoʼi, koutou fakatokagaʼi lelei te ʼu lao ʼa Sehova pea mo tana ʼu fakatotonu, pea ʼi te faʼahi ʼaia, koutou faiga ke koutou mahino ki te ʼu pelesepeto ʼaē ʼaoga ki te takitaki ʼo totatou maʼuli. Koutou metitasioʼi ki te ʼu faʼahi fuli pe ʼaē ʼe talanoa ki te ʼAtua, pea mo tana ʼu aga ʼaē ki te tagata. Koutou fakatuʼutuʼu he temi kiai moʼo gāueʼi ʼo tokotou loto. Koutou vakaʼi, pe ko te ʼu faʼahi fea ʼaē ʼe feala ai ke koutou maʼuliʼi katoa te tokoni ʼa te Tohi-Tapu ʼi tokotou maʼuli.—Pesalemo 1:1, 2; 19:7-11; 1 Tesalonika 4:1.

Ko Te Momoli ʼo Tokotou Maʼuli Kia Sehova ʼe Katoa Koa?

7. (a) Neʼe malave feafeaʼi te Tahitolu ki te ʼu faiga ʼa te hahaʼi moʼo atolasio ki te ʼAtua? (b) Koteā te meʼa ʼe feala ke hoko mokā ako e he tahi te moʼoni ʼo ʼuhiga mo Sehova?

⁷ Ki te toko lauʼi miliona hahaʼi, neʼe ko he meʼa fakatupu fīmālie kia nātou, tanatou akoʼi ʼaē ko te ʼAtua moʼoni ʼe mole ko he Tahitolu. Neʼe mole fakafimālie pe la kia nātou ʼi he temi te fakamatala ʼaē ʼo ʼuhiga mo te faʼahi ʼaia, “ko he misitelio.” Neʼe lava feafeaʼi anai koa kia nātou hanatou fakaōviōvi ki he ʼAtua neʼe mata faigataʼa hanatou mahino ki ai? ʼUhi ko te akonaki ʼaia, neʼe fakahaʼuhaʼu leva tanatou meʼa noaʼi ʼaē ia te Tāmai (ʼaē ko tona huafa neʼe mole heʼeki nātou logoʼi pe la ʼi te ʼēkelesia) pea neʼe nātou atolasioʼi ia Sesu ko te ʼAtua peʼe ko tanatou tauhi neʼe fai kia Malia (ʼaē neʼe akoʼi age kia nātou ko te “Faʼe ʼa te ʼAtua”). Kae ko tonatou ʼu loto neʼe ō fakafiafia ʼi te temi ʼaē neʼe avahi ai e te Fakamoʼoni ʼa Sehova te Tohi-Tapu pea mo ina fakahā age kia nātou te huafa ʼo te ʼAtua, ʼaē ko Sehova. (Pesalemo 83:18) ʼI te lahi ʼaē ʼo te fiafia ʼo te fafine Venesuela ʼi te fakahā age ʼaē ʼo te huafa ʼo te ʼAtua, neʼe ina fāʼufua te kiʼi finemui Fakamoʼoni ʼaē neʼe ina fakahā age te moʼoni maʼuhiga ʼaia, pea neʼe ina tali aipe ke fai hana ako faka Tohi-Tapu. ʼI te ʼiloʼi ʼaē e te hahaʼi ʼaia ko Sesu neʼe talanoa ʼo ʼuhiga mo tana Tāmai ʼaki te ʼu kupu ʼaenī “toku ʼAtua pea ko tokotou ʼAtua” pea neʼe faikole Sesu ki tana Tāmai “te ʼAtua moʼoni e tahi,” ʼe mahino ai leva kia nātou ko te meʼa ʼaē ʼe akoʼi e te Tohi-Tapu ʼo ʼuhiga mo te ʼAtua ʼe mole fakapōʼuli ia. (Soane 17:3; 20:17) ʼAki tanatou ʼiloʼi ʼaē te ʼu kalitate ʼo Sehova, ʼe nātou logoʼi ʼe nātou ōvi kia te ia, ʼo nātou kamata faikole ai kia te ia, pea mo nātou fia fai te meʼa ʼaē ʼe ina leleiʼia. Koteā tona fua?

8. (a) ʼUhi ko tonatou ʼofa ʼaē kia Sehova pea mo tonatou loto ʼaē ke nātou lelei kia te ia, koteā te meʼa neʼe fai e te toko miliona hahaʼi? (b) He koʼe koa ko te papitema faka Kilisitiano ʼe maʼuhiga ʼaupito?

⁸ ʼI te lolotoga ʼo te ʼu taʼu e hogofulu kua hili, ko te toko 2 528 524 hahaʼi ʼi te ʼu fenua lalahi e ono pea mo te ʼu motu, neʼe nātou foaki tonatou maʼuli kia Sehova ʼo nātou papitema ʼi te vai. Neʼe koutou kau koa ia nātou ʼaia, peʼe koutou lolotoga teuteu nei ke koutou papitema? Ko te papitema ʼe ko he temi maʼuhiga ʼaia ʼo te maʼuli ki te kau Kilisitiano moʼoni fuli. Neʼe fakatotonu e Sesu kia nātou ʼaē neʼe mulimuli ia te ia ke nātou fai ni ʼu tisipulo ʼi te ʼu puleʼaga fuli pea mo papitemaʼi nātou. (Mateo 28:19, 20) ʼE feala pe ke tou toe fakatokagaʼi ko Sehova neʼe palalau mai te lagi ʼi te hili pe ʼaē ʼo te papitema ʼo Sesu, ʼo ʼui maʼana: “Ko koe ko toku ʼAlo, te ʼofaina; neʼe ʼau ʼofa ki ai.”—Luka 3:21, 22.

9. Moʼo taupau ʼo he ʼu felogoi lelei mo Sehova, koteā te meʼa ʼe tonu ke tou fai?

⁹ Ko te felogoi lelei mo Sehova ʼe ko he meʼa ia ʼe tonu ke tou taupau fakalelei. Kapau neʼe koutou maʼu te faʼahi ʼaia ʼaki te papitema, koutou fakamamaʼo mai te ʼu meʼa ʼaē ʼe feala ke nātou maumauʼi te faʼahi ʼaia. ʼAua naʼa koutou tuku te ʼu faigataʼaʼia ʼo te maʼuli pea mo te ʼu meʼa fakamālama ke nātou haga ʼo tuku te faʼahi ʼaia ke tuʼulaga lua. (1 Timoteo 6:8-12) Koutou mulimuli fakalelei ki te tokoni ʼaē tuʼu ia Tāʼaga Lea 3:6: “ ʼI tou ʼu ala fuli tokagaʼi ia [Sehova], pea ʼe ina fakatonutonu anai tou ʼu ala.”

ʼE Malave Feafeaʼi Kia Koutou Te ʼOfa Lahi ʼa Kilisito?

10. He koʼe koa ko tatatou atolasio ʼaē kia Sehova ʼe mole ina uga tatou ke tou meʼa noaʼi ia Sesu?

¹⁰ ʼIo, ko te fakaʼapaʼapa ʼaē kia Sehova ʼi tona ʼuhiga ʼAtua moʼoni pe e tahi, ʼe mole ina uga he tahi ke ina meʼa noaʼi ia Sesu Kilisito. Kailoa ia, ʼe ʼui fēnei ia Fakahā 19:10: “Neʼe haʼu te ʼu lea faka polofeta mai te ʼAtua moʼo fakamoʼoni ʼo ʼuhiga mo Sesu.” Mai te tohi ʼo te Senesi ki te tohi ʼo te Fakahā, ko te ʼu lea faka polofeta mai te ʼAtua ʼe nātou foaki te ʼu fakamatalatala ʼo ʼuhiga mo te tuʼulaga ʼo Sesu Kilisito ʼi te ʼu fakatuʼutuʼu ʼa Sehova. ʼI te temi ʼaē ʼe ʼiloʼi e he tahi te ʼu meʼa fuli ʼaia, ko te paki matalelei ʼe maʼu mai ai, ʼe ʼāteaina mai te ʼu meʼa kovi pea mo te ʼu fakamatala hala ʼuhi ko te ʼu akonaki loi ʼa te Keletiate.

11. Neʼe malave feafeaʼi ki te loto ʼo te fafine Polonia te meʼa ʼaē ʼe akoʼi e te Tohi-Tapu ʼo ʼuhiga mo te ʼAlo ʼo te ʼAtua?

¹¹ Ko te holi mālohi ʼaē ki te moʼoni ʼo ʼuhiga mo te ʼAlo ʼo te ʼAtua ʼe feala ke malave lahi ki he tahi. Neʼe hoko te faʼahi ʼaia kia Danuta, ko te fafine Polonia. Neʼe tatuʼu te kau Fakamoʼoni ʼa Sehova kia ia, ia taʼu e valu, neʼe fiafia ʼi te ʼu meʼa ʼaē ʼe nātou akoʼi age, kae neʼe mole pe ina faka ʼalutahi tona maʼuli ki te tauhi moʼoni. ʼOsi ʼaia pea ina maʼu te tohi Le plus grand homme de tous les temps, ʼaē ʼe talanoa lelei ki te maʼuli ʼo Kilisito.a ʼI te pōʼuli, neʼe ina avahi te tohi, ʼaki te fakatuʼutuʼu ʼaē ke ina lau pe he kapite e tahi. Neʼe ina lau fuli te tohi kae mole heʼeki pe la mafoa te ʼaho. Pea tagi. “Sehova, fakamolemole mai kia te ʼau,” ko tana tagi ʼaia. ʼI tana lau ʼo te tohi, neʼe mahino lelei ai leva kia te ia te ʼofa ʼaē ʼo Sehova pea mo tona ʼAlo. Neʼe mahino kia ia ko taʼu e valu neʼe mole ina maʼu he loto fakafetaʼi ki te tokoni ʼaē neʼe kātaki aipe te ʼAtua ʼo foaki kia te ia. ʼI te taʼu 1993 neʼe papitema ai leva, ʼo fakahā ʼaki ai tana foaki ʼaē ʼo tona maʼuli kia Sehova ʼaki tana tui ʼaē kia Sesu Kilisito.

12. ʼE malave feafeaʼi kia tatou te ʼatamai mālama ʼo ʼuhiga mo Sesu Kilisito?

¹² “Ko te ʼatamai mālama totonu ʼo ʼuhiga mo totatou ʼAliki ko Sesu Kilisito.” ʼe fakamaʼua ke liliu he tahi ko he Kilisitiano ʼe faʼa gāue pea mo lahi te ʼu fua ʼo tana gāue. (2 Petelo 1:8) E feafeaʼi te lahi ʼo takotou kau ki te gāue ʼaia, ʼo faka mafola te logo ʼo te Puleʼaga ki niʼihi? ʼE lahi te ʼu ʼaluʼaga ʼe feala ai ki te hahaʼi ke nātou fai te faʼahi ʼaia. (Mateo 13:18-23) Ko ʼihi ʼaluʼaga ʼe mole feala ke tou fetogi; kae ko ʼihi ʼe feala ke tou fetogi. Koteā anai ka ina uga tatou ke tou ʼiloʼi pea mo fai te ʼu fetogi ʼaē ʼe tonu ke fai? Neʼe tohi e te ʼapositolo ko Paulo, ʼo fēnei: “Ko te ʼofa ʼaē ʼo Sesu ʼe ina fakamaʼuaʼi tatou”; ko te fakaliliu ʼo te ʼu palalau ʼaia, ko te ʼofa ʼaē neʼe ina fakahā ʼi tana foaki ʼaē ʼo tona maʼuli maʼa tatou ʼe maʼuhiga ʼi te tuputupu ʼo tatatou fakafetaʼi ki te sakilifisio ʼaia, ko totatou loto ʼe malave ʼaupito anai. Pea ʼe tou mahino ai leva ʼe mole ʼaoga ke tou muliʼi he ʼu fakatuʼutuʼu ʼe ʼaoga pe kia kita pea mo maʼuli ʼaki he fakafimālieʼi ʼo tokita ʼu holi. ʼO mole tou mulimuli ki te faʼahi ʼaia, ʼe tou fakatuʼutuʼu totatou maʼuli ke takimuʼa aipe te gāue ʼaē neʼe akoʼi mai e Kilisito ke fai e tana kau tisipulo.—2 Kolonito 5:14, 15.

Mavae Mai te Malamanei—ʼI Te ʼu Faʼahi Fea?

13. He koʼe koa ʼe mole tou fia kau ki he lotu kua liliu ia ko he koga ʼo te malamanei?

¹³ ʼE mole faigataʼa te sio ʼaē ki te meʼa neʼe fai e te Keletiate pea mo ʼihi ʼu lotu koteʼuhi ʼe nātou fia kau ki te mālama. Ko te falā ʼo te ’Ēkelesia neʼe fakaʼaogaʼi moʼo lagolago ki te ʼu gāue fakatupu maveuveu. Ko te kau patele kua nātou liliu ko te kautau guérilla. ʼI te ʼaho fuli pe, ko te ʼu sulunale e talanoa ki te ʼu logo ʼo ʼuhiga mo te ʼu faʼahiga lotu kehekehe ʼe nātou fetauʼaki ʼi te ʼu potu fuli pe ʼo te kele. Ko tanatou ʼu nima neʼe fonu ʼi te toto. (Isaia 1:15) Pea ko te kau takitaki lotu ʼo te malamanei ʼe nātou faiga aipe ke nātou kākāʼi te ʼu meʼa faka politike. Ko te kau atolasio moʼoni ʼe mole nātou kau nātou ʼi te ʼu meʼa ʼaia.—Sake 4:1-4.

14. (a) Koteā te meʼa ʼe tonu ke tou tekeʼi takitokotahi mo kapau ʼe mole tou fia kau ki te malamanei? (b) Koteā te meʼa ʼe feala ke tokoni kia tatou ke ʼaua naʼa tou tō ki te ʼu hele ʼo te ʼu agaaga ʼa te mālama pea mo tana ʼu gāue?

¹⁴ Kae ʼe mole feʼauga ia te mavae ʼaē mai te malamanei. Ko te malamanei ʼe fakaʼiloga ʼaki te manako ki te falā pea mo te meʼa ʼaē ʼe feala ke totogi ʼaki te falā, te holi ʼaē ke kita ʼiloa, pea mo te holi tuʼumaʼu ki te fakafiafia, ʼo toe feiā aipe ki te mole kei maʼu ʼo te ʼofa moʼoni ki ʼihi ʼi te gutuloi pea mo leakovi ki te pule, pea mo te mole maʼu ʼo te loto lolomi. (2 Timoteo 3:2-5; 1 Soane 2:15, 16) ʼI totatou ʼuhiga agahala, ʼe feala ʼihi temi ke tou fakahā te ʼu agaaga ʼaia. Koteā ʼe feala ke tokoni mai kia tatou moʼo tekeʼi te ʼu taʼi hele ʼaia? ʼE tonu ke tou manatuʼi pe ko ai ʼaē ʼe ina fakaneke te ʼu hele ʼaia. “Ko te malamanei katoa ʼe takoto ia ʼi te mālohi ʼo te agakovi.” (1 Soane 5:19) Logope la he faʼahiga maʼuli ʼe feala ke fakatupu holi peʼe lahi te hahaʼi ʼaē ʼe nātou muliʼi te taʼi maʼuli ʼaia, kae ka tou sio ki te fakafeagai lahi ʼo Sehova, ia Satana te Tevolo, ʼaē ʼe ina fakaneke te ʼu meʼa ʼaia, ʼe tou mahino lelei ai leva ki te fakalialia ʼo te faʼahi ʼaia.—Pesalemo 97:10.

ʼE Aʼu Koa Kifea Tokotou ʼOfa?

15. E feafeaʼi te tokoni ʼa te ʼofa ʼaē ʼe mole liufaki ki te maʼu ʼo te lotu moʼoni?

¹⁵ ʼI takotou kamata fakatahi ʼaē mo te kau Fakamoʼoni ʼa Sehova, ʼe mahino ia ko te ʼofa ʼaē neʼe maʼu ia nātou neʼe malave ki tokotou loto, koteʼuhi he mole tatau ia mo te manatu ʼa te mālama ʼaenī. E kehekehe ʼaupito te tauhi maʼa ʼa Sehova ʼi te ʼatu ʼu tauhi fuli heʼe ina uga mālohi te ʼofa ʼaē ʼe mole liufaki. E lagi ko te meʼa pe ʼaia ʼaē neʼe ina fakalotoʼi ia koutou ke koutou faka tui ko te kau Fakamoʼoni ʼa Sehova ʼe ko te lotu moʼoni. Neʼe ʼui totonu e Sesu Kilisito, ʼo fēnei: “ ʼAki te meʼa ʼaenī ʼe ʼiloʼi fuli ai e te hahaʼi ko koutou ko taku ʼu tisipulo: mo kapau ʼe koutou maʼu ia koutou te ʼofa.”—Soane 13:35.

16. Ko te ʼu faigamālie fea ʼe feala ai ke tou faka fālahi totatou ʼofa?

¹⁶ Ko te kalitate ʼaia ʼe ina fakaʼiloga koa ia koe ko he tisipulo ʼa Kilisito? ʼE ʼi ai koa he ʼu ʼaluʼaga ʼe feala ke koutou faka fālahi ai tokotou ʼofa? ʼE mahino ia kia tatou fuli ʼe feala noa pe ia. ʼE fakalaka age te ʼofa ia ʼi hakita kaumeʼa lelei pe mo niʼihi ʼi te Fale ʼo te Puleʼaga. Pea kapau nei ʼe tonu ke tou fakahā tokita ʼofa kia nātou ʼaē ʼe ʼoʼofa mai kia tatou, ʼe tou kehekehe anai koa mo te malamanei? “Ia meʼa fuli, ke koutou feʼofaʼaniʼaki ia koutou,” ko te tokoni ʼaia ʼa te Tohi-Tapu. (1 Petelo 4:8) Ko ai koa niʼihi ʼe feala ke tou fakahā ki ai te ʼofa lahi? E lagi ko he tēhina peʼe ko he tuagaʼane ʼe mole lanu tahi mo tatou pea ko tana faʼahiga fai ʼo ni ʼu meʼa ʼe fakatupu ʼita kia tatou. E lagi ko he tahi ʼuhi ko te mahaki pe ko te kua matuʼa, ʼe mole kei feala hana kau tuʼumaʼu ki te ʼu fono? E lagi ko totatou hoa. Peʼe lagi ko ʼatatou ʼu mātuʼa ʼaē kua matutuʼa. Ko ʼihi neʼe kua lelei pe tanatou maʼuliʼi te ʼu fua ʼo te laumālie, ʼaē kau kiai mo te ʼofa, neʼe hage kia nātou neʼe toe ʼāsili age leva tanatou mahino ki te faʼahi ʼaia ʼi te temi ʼaē neʼe nātou fetaulaki ai mo te ʼu faigataʼaʼia, ʼe feala ke malaga mai te foaki ʼaē ʼo he loto tokaga katoa ki he tahi ʼo tonatou famili ʼe kua kovi ʼosi tona mahaki. Tatau aipe, ʼi te temi ʼaē ʼe tou felāveʼi ai mo te ʼu ʼaluʼaga ʼaia, ʼe mahino papau ia, ko totatou ʼofa ʼe mole tonu anai ia ke gata pe ʼi totatou ʼu famili.

Ko Te Faka Mafola ʼo Te Puleʼaga—E Feafeaʼi Tona Maʼuhiga Kia Koutou?

17. Kapau neʼe ʼaʼahi tatou e ni kau Fakamoʼoni ʼa Sehova, koteā anai te meʼa ʼe tonu ke tou fai ʼi te temi nei?

¹⁷ Ko he ʼaluʼaga ʼe feala ai ke tou fakahā te ʼofa ki te hahaʼi, ko te faka mafola kia nātou te Puleʼaga ʼo te ʼAtua. ʼE gata pe ki te kūtuga e tahi ʼe nātou lolotoga fai te gāue ʼaē neʼe fakakikite e Sesu. (Maleko 13:10) Ko te kau Fakamoʼoni ʼa Sehova. ʼE tou maʼu takitokotahi tona fua lelei. ʼE ko hotatou pilivilesio ʼi te temi nei ia tatatou tokoni ʼaē ki niʼihi. Kapau ʼe tou manatu tahi mo te ʼAtua ki te faʼahi ʼaia, ʼe takimuʼa pe anai te gāue ʼaia ʼi totatou maʼuli.

18. ʼE feafeaʼi anai he fakamālohiʼi ʼo tatou ke tou kau ki te faka mafola ʼo te Puleʼaga ʼaki hatatou lau te tohi Les Témoins de Jéhovah: Prédicateurs du Royaume de Dieu?

¹⁸ Ko te fakamatala fakaofoofo pe neʼe feafeaʼi te aʼu ʼo te logo ʼo te Puleʼaga ki te ʼu potu taupotu ʼo te kele ʼi te ʼu ʼaho fakamuli ʼaenī ʼe tuʼu ʼi te tohi Les Témoins de Jéhovah: Prédicateurs du Royaume de Dieu. Kapau ʼe koutou popoto ʼi te lau fakafalani, koutou tokakaga ʼo lau. Pea ka koutou lau, koutou fakatokagaʼi te ʼu fealagia fuli ʼaē neʼe fakaʼaogaʼi e te hahaʼi moʼo kau ki te faka mafola ʼo te Puleʼaga. ʼE ʼi ai koa niʼihi ia nātou ʼe feala ke koutou faʼifaʼitakiʼi? ʼE lahi te ʼu fealagia ʼe tuku mai kia tatou fuli. ʼOfa pe ke haga totatou ʼofa ʼaē kia Sehova ʼo uga tatou ke tou fakaʼaogaʼi lelei te ʼu fealagia ʼaia.

19. Koteā te meʼa ʼe tou maʼu mokā ʼe tou tali te maʼua ʼaē ʼe pipiki ki te ʼiloʼi ʼo te lotu moʼoni?

¹⁹ Koia ka tou tokakaga ʼo fai te finegalo ʼo Sehova, ʼe tou maʼu te tali ki te fehuʼi, Koteā te ʼuhiga ʼo te maʼuli? (Fakahā 4:11) ʼE mole kei tou lotolotolua, ʼo tou nonofo mo he manatu ʼe mole hona ʼuhiga. ʼE mole he tahi age gāue ʼe feala ke koutou kau kiai ʼe ina foaki atu anai he fiafia lahi, gata pe mokā ʼe koutou kaugana kia Sehova ʼAtua ʼaki tokotou loto katoa. Pea ʼe ko he ʼapogipogi taulekaleka ia ka ina foaki! Ko te maʼuli fīmālie pea mo heʼegata ʼi tona mālama foʼou, ʼe feala ai anai ke tou fakaʼaogaʼi ʼatatou ʼu fealagia fuli ʼo mulimuli pe ki te fakatuʼutuʼu ʼofa ʼaē neʼe haga ai ia te ʼAtua ʼo fakatupu te tagata.

[Nota ʼi te lalo pasina]

Koteā Anai Takotou Tali?

◻ He koʼe ʼe maʼuhiga ʼaupito ki he lotu ke ina tali te Tohi-Tapu ko te Folafola ʼa te ʼAtua pea mo ina fakaʼapaʼapa kia Sehova ko te ʼAtua moʼoni?

◻ Koteā te akonaki ʼa te lotu moʼoni ʼo ʼuhiga mo te tuʼulaga ʼo Sesu, ko te Tagata totogi?

◻ He koʼe koa ʼe tonu anai ke tokakaga te kau Kilisitiano ʼo fakamamaʼo mai te mālama pea mo nātou fakahā te ʼofa ʼaē ʼe mole liufaki?

◻ Koteā te tuʼulaga ʼi te lotu moʼoni ʼo te faka mafola ʼo te Puleʼaga?

[Paki ʼo te pasina 16]

Ko te papitema ʼe ko he faʼahi tāfito ʼaia moʼo tali ʼo te ʼu maʼua ʼaē ʼo te tauhi moʼoni. ʼI te māhina fuli, ko te toko 25 000 ʼi te malamanei ʼe nātou fai te faʼahi ʼaia

Lusia

Senekale

Papuasia Niu Kinea

U.S.A.

[Paki ʼo te pasina 17]

Ko te vaevae ʼo te moʼoni ʼo te Tohi-Tapu mo ʼihi ʼe ko he faʼahi ʼaia ʼo te tauhi moʼoni

U.S.A.

Pelesile

U.S.A.

Hong Kong