ʼE Sisio Mai Koa Te Kau Mate Kia Tatou?

ʼE MATEHI e te fafine tona ʼohoana. Hili kiai taʼu e fitu ʼe mataku ʼaupito ʼuhi ko te misi ʼe ina ʼui ʼe ko he fakaʼiloga ʼo te lotokovi ʼo tona ʼohoana ʼaē kua mate. Moʼo fakafimālie ʼo te “laumālie” ʼo tona ʼohoana, ʼe ina fekauʼi tana taʼahine ke ina liligi ki tona falemaka he mōlaga ʼe huhuʼa.

ʼE mole ʼiloʼi e te taʼahine pe koteā hana faʼahiga palalau ki te laumālie ʼo tana tāmai, koteʼuhi ko te mōlaga ʼe haʼu mai tana faʼe ʼaē neʼe ina matehi ia ia. ʼE sioʼi e tona kiʼi tokolua mai te koga meʼa ʼe ū. ʼE haʼu kiai ʼo nā fai fakatahi he kole ki tanā tāmai ke tokoni age kia nātou ʼo ʼuhiga mo te lagavaka ki tona fakapō.

Ko te hisitolia ʼaia ʼe haʼu mai te gaoʼi faka Keleka (The Libation Bearers) neʼe tohi kua hili kiai taʼu e 2 400. ʼI ʼihi faʼahi ʼo te malamanei, tāfito ʼi Afelika, ʼe kei fai te ʼu mōlaga feiā ʼi te ʼu tafaʼaki ʼo te falemaka.

Ohage la, koutou fakatokagaʼi age muʼa, te meʼa ʼaē neʼe hoko kia Ibe, ʼaē ʼe maʼuli ʼi Niselia. ʼI te hili ʼaē ʼo te kua mate ʼo tana ʼu tamaliki e tolu, neʼe ʼalu ki te tagata gaohi meʼa mana, ʼo fakahā age e te tagata gaohi meʼa mana ki ai ʼe ʼi ai te tupuʼaga ki te mate ʼo tana ʼu tamaliki—ko te tāmai ʼa Ibe ʼaē kua mate ʼe ʼita koteʼuhi ko tona ʼavaifo neʼe mole fai ʼi tona faʼahiga fai totonu.

ʼO mulimuli ki te tokoni ʼa te tagata gaohi meʼa mana, neʼe momoli e Ibe te tao pea mo ina liligi te moʼi vino pea mo te moʼi gin ki te falemaka ʼo tana tāmai. Neʼe pāui ki te laumālie ʼo tana tāmai, ʼo ina kole ke fakamolemole age, ʼo ina fakahā tona ʼofa, pea mo ina kole he tapuakina.

Neʼe mole lotolotolua ia Ibe ki te fealagia ʼaē, ke sio age pea mo fagono age tana tāmai kia ia. ʼE mole tui ia ki te kua mate ʼo tana tāmai kae ʼi tana manatu neʼe “momoli” tana tāmai mai te mālama ʼaē ʼe hā ki te mālama ʼaē ʼe fakapulipuli ʼi te ʼaho ʼaē neʼe mate ai. Ko te tui ʼa Ibe, ko tana tāmai neʼe fakalaka mai te mālama ʼo te kakano pea mo te toto ki te mālama ʼo te kau laumālie, te nofoʼaga ʼo te ʼu kui.

ʼE manatu fēnei ia Ibe: ‘Logope la ko Papa ʼe mole kei kau ia ki te mālama ʼaenī, ʼe kei ina manatuʼi, ia ʼau pea mo tokaga ki toku fīmālie. Pea ʼi tana kua liliu ʼaē ko he laumālie ʼi te temi nei ʼaki he ʼu mālohi kua lahi age, kua lelei ʼaupito age tona ʼaluʼaga ʼi te temi nei ke tokoni mai kia te ʼau, ʼi te temi ia ʼaē neʼe kei maʼuli ai ʼi te kele ko he tagata. ʼO hilifaki kiai, ʼe feala pe ke fakaōviōvi fakahagatonu ki te ʼAtua ʼo ʼuhiga mo ʼau, koteʼuhi ko te ʼAtua ʼe ko he laumālie. Ko taku tāmai ʼe feala pe ke ʼita kia te ʼau ʼi te temi nei, kae kapau ʼe ʼau foaki te fakaʼapaʼapa ʼaē ʼe tāu mo ia, ʼe fakamolemole mai anai kia te ʼau pea mo ina tapuakina anai ia ʼau.’

ʼI Afelika ko te tui ʼaē ko te kau mate ʼe sisio ki te hahaʼi ʼi te kele pea mo nātou fakalotoʼi tonatou ʼu maʼuli, ʼe lahi tona mafola ia nātou ʼaē ʼe nātou kau ki te lotu faka talatisio ʼo Afelika. ʼE toe ʼiloga lelei pe foki ia nātou ʼaē ʼe nātou ʼui ko nātou ko te kau Kilisitiano. Ohage la, ʼi te hili ʼaē ʼo tona kua fakatapuʼi ʼi te ’Ēkelesia, ko te liliu ʼa he fafine ki te ʼapi ʼo tana ʼu mātuʼa ke foaki age ki ai he tapuakina faka talatisio, ʼe ko he meʼa ia ʼe tautau hoko. ʼI ai, ʼe pāui ki te ʼu kui, pea mo liligi maʼa nātou he mōlaga ʼe huhuʼa. Tokolahi te hahaʼi ʼe nātou tui, kapau ʼe mole fakahoko te faʼahi ʼaia ʼe feala ke fakatupu tuʼutāmaki ki te nofo ʼohoana.

ʼE ʼui ko te ʼu kui, peʼe ko te ʼu laumālie ʼa te ʼu kui, ʼe nātou tokakaga ki te hāofaki pea mo te maʼuli manuʼia ʼo tonatou ʼu famili ʼi te kele. ʼO mulimuli ki te manatu ʼaia, ko te ʼu laumālie ʼa te ʼu kui ʼe ko he ʼu kaumeʼa mālohi, ʼe feala ke nātou ʼaumai he ʼu taʼukai ʼe lelei, ke nātou lagolago ki te maʼuli fīmālie, pea mo hāofaki te hahaʼi mai te mamahi. ʼE nātou hūfia maʼa te tagata. Kae kapau ʼe meʼa noaʼi nātou peʼe fakamamahiʼi nātou, ʼe nātou ʼaumai te tuʼutāmaki—te mahaki, te masiva, tatau aipe mo te mate. Koia ko tona tupuʼaga la ʼaia ʼaē, ʼe faigaʼi aipe e te hahaʼi ke nātou taupau maʼu he vāhaʼa lelei mo nātou ʼaē kua mamate, ʼaki tanatou fai te ʼu sakilifisio pea mo te ʼu toʼotoʼoga.

ʼE koutou faka tui koa ki te ʼu gāue mālohi ʼa te hahaʼi kua mamate ki te maʼuli ʼo te hahaʼi maʼuʼuli? Neʼe mole heʼeki ke tuʼu koa la ʼi te falemaka ʼo he tahi neʼe ke ʼofa ki ai ʼo ke fai ni palalau, naʼa meʼa hala age pe ʼe feala ke fagono atu? Koia, ko te ʼiloʼi ʼaē peʼe sisio mai pea mo fagono mai te kau mate peʼe kailoa, ʼe fakalogo ki te meʼa ʼaē ʼe hoko ʼi te mate. Tou vakaʼi age muʼa pe koteā te meʼa ʼaē ʼe ʼui e te Tohi-Tapu ʼo ʼuhiga mo te faʼahi maʼuhiga ʼaia.