Kei Koutou Manatuʼi Koa?

Neʼe koutou leleiʼia koa te ʼu alatike fakamuli ʼo Te Tule Leʼo? Koia, koutou vakaʼi peʼe feala hakotou tali ki te ʼu fehuʼi ʼaē ʼe hoa mai:

▫ He koʼe koa neʼe mole fakamanatuʼi e te kau ʼuluaki Kilisitiano ia te ʼaho tupu ʼo Sesu?

ʼI te manatu ʼa te tohi (The World Book Encyclopedia), “ko te kau ʼuluaki Kilisitiano neʼe mole nātou fakamanatuʼi te ʼaho tupu ʼo [Sesu] koteʼuhi kia nātou ko te fakamanatu ʼo he ʼaho tupu ʼo he tahi, neʼe ko he agaʼi fenua faka pagani.”—15/12, ʼi te pasina 4.

▫ ʼE tonu koa ke tou faikole kia Sesu?

Kailoa, koteʼuhi ko te ʼu faikole ʼe ko he faʼahiga tauhi ʼe fai ki te ʼAtua Māfimāfi tokotahi pe. ʼAki tatatou fai ʼatatou ʼu faikole fuli kia Sehova ʼAtua, ʼe tou fakahā ai ʼe tou tali fakamalotoloto ki te takitaki ʼa Sesu ke tou faikole fēnei: “Ko tamatou Tāmai ʼe ʼi selo.” (Mateo 6:9)—15/12, ʼi te pasina 21.

▫ Koteā ʼaē ʼe feala ke tokoni kia tatou ke tou kaugana kia Sehova ʼaki he loto fiafia?

ʼE tonu ke tou taupau he manatu ʼe lelei pea mo fakafetaʼi ki totatou ʼu tapuakina pea mo te ʼu pilivilesio ʼaē neʼe foaki mai e te ʼAtua, pea ʼe mole tonu ke galo ia tatou ʼi he temi ko tatatou muliʼi te Folafola ʼa te ʼAtua, ʼe leleiʼia ai tatou e te ʼAtua.—15/1, ʼi te pasina 16.

▫ Koteā te ʼu meʼa e lua ʼaē ʼe tonu ke tou manatuʼi ke maʼu he fua ʼo tatatou fakaloto mālohi?

ʼUluaki, koutou manatu ki te palalau ʼaē ʼe tonu ke koutou fai, ke feala ke totonu takotou fakaloto mālohi. Lua, koutou kumi te temi faigamālie ke koutou fakaōviōvi ki he tahi ʼe tāu mo te fakamālo peʼe ʼaoga ke fakamālohiʼi ia ia.—15/1, ʼi te pasina 23.

▫ He koʼe koa ko te “toe hahaʼi tokolahi . . . ʼe ʼi ai te ʼu pālema ʼi tonatou ʼu nima”? (Fakahā 7:9)

Ko te toʼo ʼo te ʼu pālema ʼe fakahā ʼaki ko te “toe hahaʼi tokolahi” ʼe nātou kalagaʼi fakafiafia te Puleʼaga ʼo Sehova pea mo tona Hau ʼaē neʼe ina fakanofo, ia Sesu Kilisito. (Vakaʼi ia Levitike 23:39, 40.)—1/2, ʼi te pasina 17.

▫ Koteā te ʼu ako maʼuhiga ʼe maʼu ʼi te tohi ʼo Sopo?

ʼE fakahā mai e te tohi ʼo Sopo peʼe feafeaʼi te fakatokatoka ʼo te ʼu faigataʼaʼia. ʼE ina tuku mai te ʼu faʼifaʼitaki makehe ʼo ʼuhiga mo te faʼahiga tokoni ʼaē ʼe tonu ke fai ki he tahi ʼe felāveʼi mo te ʼu ʼahiʼahi—pea mo te faʼahiga tokoni ʼaē ʼe mole tonu ke fai. Pea tahi ʼaē meʼa, ko te meʼa tonu ʼaē neʼe hoko kia Sopo ʼe feala ke tokoni kia tatou ke tou maʼu te aga fakapotopoto mokā tou felāveʼi mo he ʼu ʼaluʼaga faigataʼa.—15/2, ʼi te pasina 23.

▫ Koteā ʼaē ʼe akoʼi mai kia tatou e te ʼu milakulo ʼa Sesu?

Ko te ʼu milakulo ʼa Sesu ʼe nātou faka kolōliaʼi te ʼAtua, ʼo nātou tuku he faʼifaʼitaki ki te kau Kilisitiano ʼaē ʼe uga ia nātou ke nātou ‘faka kolōliaʼi te ʼAtua.’ (Loma 15:6) ʼE nātou fakaloto mālohiʼi te fai ʼo te meʼa ʼaē ʼe lelei, mo te fakahā ʼo te agaʼofa, pea mo te fakahā ʼo te manavaʼofa.—1/3, ʼi te pasina 8.

▫ Koteā te tupuʼaga ʼo te toe vakaʼi e te kau tagata ʼāfea te ʼu fehuʼi neʼe teuteuʼi mo nātou ʼaē ʼe fia foaki tonatou maʼuli?

ʼE fakamoʼoni e te potu ʼaia kua mahino lelei kia nātou ʼaē ʼe nātou foaki tonatou maʼuli, ia te ʼu akonaki tāfito ʼo te Tohi-Tapu pea kua nātou mahino lelei ki te ʼu meʼa fuli ʼaē ʼe pipiki ki takita liliu ʼaē ko he Fakamoʼoni ʼa Sehova.—1/3, ʼi te pasina 13.

▫ ʼE lava feafeaʼi ke fua manuʼia te ʼu faikole faka Tohi-Tapu kia tatou?

ʼAki he vakaʼi fakalelei ʼo te ʼu faikole ʼaē ʼi te Tohi-Tapu, ʼe feala ke tou ʼiloʼi te ʼu faikole ʼaē neʼe fai ʼi te ʼu ʼaluʼaga ʼe tatau mo ʼaē ʼa tatou. Ko te maʼu, pea mo te lau, pea mo te metitasioʼi ʼo te ʼu taʼi faikole ʼaia ʼe tokoni anai kia tatou ke tou faka koloaʼia tatatou ʼu felogoi mo Sehova.—15/3, ʼi te ʼu pasina 3 ki te 4.

▫ Koteā te manavasiʼi faka lotu?

Ko te manavasiʼi faka lotu ʼe ko te manavasiʼi kia Sehova, ʼe ko he fakaʼapaʼapa lahi kia te ia, ʼo fakatahi mo te manavasiʼi fakatupu hāofaki ʼaē ke ʼaua naʼa kita fakaloto mamahiʼi ia ia. (Pesalemo 89:7)—15/3, ʼi te pasina 10.

▫ Koteā te ʼu faʼahi e tolu ʼe fakahā mai ai e te Tohi-Tapu, ʼe tou maʼuhiga kia mata ʼa te ʼAtua?

ʼE akoʼi mai e te Tohi-Tapu, ʼe tou tahi maʼu tona maʼuhiga kia mata ʼo te ʼAtua (Luka 12:6, 7); ʼe ina fakahā fakalelei mai te meʼa ʼaē ʼe faka maʼuhigaʼi e Sehova io tatou (Malakia 3:16); pea ʼe ina fakamatala te meʼa ʼaē neʼe fai e Sehova moʼo fakahā ʼaki tona ʼofa kia tatou. (Soane 3:16)—1/4, ʼi te ʼu pasina 11, 12, mo te 14.

▫ He koʼe koa ko te manatu ʼaē ia Hepeleo 10:24, 25 ʼe mole faka ʼuhiga pe ko he fakatotonu ke fakatahi te kau Kilisitiano?

ʼE tuku e te ʼu palalau ʼaia ʼa Paulo he fakatuʼutuʼu fakaʼatua ʼo ʼuhiga mo te ʼu fono faka Kilisitiano fuli—ʼio, ʼi te ʼu ʼaluʼaga fuli ʼaē ʼe fakatahi ai te kau Kilisitiano.—1/4, ʼi te pasina 16.