Ko ʼĀfea ʼAē Ka Gata Ai Anai Te Mataku?
ʼE KOUTOU punamaʼuli anai koa mo kapau ʼe koutou mahino ko te fīmālie moʼoni ʼe ʼi ai tona pikipikiga mo te tagata neʼe maʼuli kua hili nei kiai taʼu e 2 000? ʼI tana fakahā te ʼaoga ʼo te ʼofa, neʼe fai fakamatala e Sesu Kilisito te lea fakatātā fakatalakitupua: “Ko te tagata neʼe hifo mai Selusalemi ki Seliko, pea neʼe fetaulaki ia mo te kau kaihaʼa, ʼo nātou kaihaʼa ia ia pea mo nātou tāmateʼi, pea nātou ʼolo ai, kaʼe tuku ai kua teitei mate.” Logope la tona mole tokagaʼi ʼaē e te ʼu tagata fagona e lua, neʼe manavaʼofa te tagata Samalitana agalelei kia ia. Kae, ia ʼaho nei, ko ai ʼaē ʼe tokaga ki te ʼu vikitima ʼo te fai fakapō? Koteā te fīmālie mai te mataku ʼe feala ke tou ʼamanaki kiai?—Luka 10:30-37.
Logope tanatou ʼui ʼe nātou tui ki te ʼAtua, tokolahi ʼe nātou manatu ko te lao pea mo te tokalelei neʼe fakatuʼu e te tagata. Kae, ko te fakamamafa ʼo te ʼu tūʼa ʼi te pilisoni peʼe ko te lahi age ʼo te kau tagata polisi pea mo te lelei ʼo tonatou totogi ʼe ina fakagata anai koa te fai fakapō? ʼE koutou tui moʼoni koa ko te ʼu fale polisi faka puleʼaga, logope te ʼu faiga fakamalotoloto moʼo foaki he faʼahiga fīmālie, ʼe nātou fakagata anai koa te ʼu taʼi meʼa ʼaē ohage ko te toloke, te fakatuʼutuʼu ki he fai fakapō pea mo te masiva? Kae, ko tatatou fia kakai pea mo tatatou fia ʼiʼinu ki te faitotonu ʼe mole tonu ia ke vaʼiganoa.—Mateo 5:6.
ʼE ʼui fēnei ia Pesalemo 46:1: “Ko te ʼAtua ko he tauʼaga maʼa tatou pea mo he mālohi, ko he tokoni ʼe faigafua tona maʼu ʼi te ʼu temi mamahi.” ʼE tou vakaʼi anai ko te ʼu kupusiga palalau ʼaia ʼe faka ʼuhiga lahi age ia ʼi he talanoa fakatuketuke.
Ohage ko te meʼa kua koutou ʼiloʼi, ʼi te ʼaho fuli ʼe fakahā pe ʼi te ʼu logo ʼo te lātio, ʼo te televisio, pea mo te ʼu sulunale te fai fakapō faʼifaʼitaliha ʼi te ʼu tau sivile pea mo te ʼu ʼohofi ʼa te ʼu kūtuga fai fakapō. ʼI ʼihi ʼu potu ʼo te mālama, kua liliu ko he agamāhani te tāmateʼi ʼo te ʼu tamaliki ʼaē ʼe mole ʼofainaʼi, peʼe ko nātou ʼaē neʼe sio mata ki te fai fakapō. He koe kua liliu te maʼuli ʼo mole faʼa maʼuhiga? Logope la te ʼu tupuʼaga ʼo te ʼu taʼi agamālohi ʼaia, ʼe ʼi ai te faʼahi e tahi ʼe tonu ke mole tou meʼa noaʼi.
ʼO mulimuli pe ki te Folafola ʼa te ʼAtua, te Tohi-Tapu, “ko te malamanei katoa ʼe takoto ia ʼi te mālohi ʼo te agakovi.” (1 Soane 5:19) ʼI tona fakahagatonu, neʼe fakahā e Sesu Kilisito ia Satana te Tevolo ʼe mole gata pe ki he tahi ʼe loi kae “ko he tahi ʼe fai fakapō.” (Soane 8:44) ʼI tana fakalalata te malamanei ʼaki he ʼu faʼahiga ʼaluʼaga kehekehe, ko te meʼa maʼuli fakalaumālie mālohi ʼaia ʼe ina uga te tuputupu ʼo te agamālohi ʼaē ia ʼaho nei. ʼE ʼui fēnei ia Fakahā 12:12: “Malaʼia ki te kele mo te tai, he kua hifo atu te Tevolo kia koutou, mo tona ʼita lahi, he kua ina ʼiloʼi kua nounou tona temi.” Kae, meʼa fakafiafia foki, ko te tuʼu agakovi ʼaenī ʼe fetogi anai ia ʼaki “te ʼu lagi foʼou pea mo te kele foʼou . . . , ʼe tonu ke nofo ai te faitotonu.”—2 Petelo 3:13.
ʼO hilifaki ki te ʼamanaki taulekaleka ʼaia ʼo ʼuhiga mo te mālama foʼou, koteā koa te tokoni ʼe tonu ke tou maʼu ʼi te temi nei?
ʼI muʼa ʼo te tali ki te fehuʼi ʼaia, ʼe lelei ke tou manatuʼi, ʼe mole maʼu, māʼiape la mo te kau Kilisitiano moʼoni he fakamoʼoni ʼe puipui anai nātou mai te fai fakapō. Neʼe fakamatala e te ʼapositolo ko Paulo te ʼu tuʼutāmaki neʼe felāveʼi mo ia. Neʼe “ ʼi te ʼu tuʼutāmaki ʼo te ʼu vaitafe, ʼi te ʼu tuʼutāmaki mai te kau kaihaʼa, ʼi te ʼu tuʼutāmaki mai te hahaʼi ʼo [tona] fenua, ʼi te ʼu tuʼutāmaki mai te ʼu puleʼaga, ʼi te ʼu tuʼutāmaki ʼi te kolo, ʼi te ʼu tuʼutāmaki ʼi te ʼu toafa, ʼi te ʼu tuʼutāmaki ʼo te tai.” (2 Kolonito 11:26) Kae neʼe hāo aipe Paulo mai te ʼu tuʼutāmaki ʼaia. ʼE toe tatau pe ia ʼaho nei; ʼaki he tokaga, ʼe kei feala pe ke tou haga fai tatatou ʼu gāue ohage pe ko te agamāhani. Tou vakaʼi te ʼu meʼa ʼe tokoni anai kia tatou.
Kapau ko he tahi ʼe maʼuli ʼi he koga meʼa tuʼutāmakiʼia, ko he aga ʼe lelei ʼe feala ke liliu ko he puipuiʼaga, ʼuhi he ko te hahaʼi ʼe nātou fakasiosio lelei niʼihi. Logope la ʼaē ko te kau kaihaʼa ʼe nātou fai te ʼu fakatuʼutuʼu pea mo nātou fakahoko tanatou ʼu fakapō, tokolahi ia nātou ʼaia ʼe nātou faka ʼuhiga pe ia nātou totonu ʼe mole ko nātou ko ni hahaʼi ʼe agakovi. ʼAua naʼa koutou fatufatuʼi te ʼu meʼa ʼaē ʼe nātou fai, pea ʼaua naʼa koutou faiga ke koutou ʼiloʼi te ʼu meʼa ʼaē ʼe nātou fakatuʼutuʼu ke nātou fai. Koia, ʼe feala ai leva ke ʼaua naʼa koutou liliu ko he tahi ʼe fakafihiʼi e niʼihi. Koutou manatuʼi ʼe faiga te kau kaihaʼa ke nātou ʼiloʼi pe ko ai ʼaē neʼe ina toʼo he meʼa foʼou pe ko ai ʼaē ʼe ʼalu ʼo mālōlō, ʼo feala ai ke lāvaki tonatou ʼu ʼapi, koia ʼaē ʼe tonu ke koutou tokakaga ʼo ʼuhiga mo te ʼu meʼa ʼaē ʼe koutou fakahā ki niʼihi.
Tokolahi ʼi te kau Fakamoʼoni ʼa Sehova neʼe mahino kia nātou ko tonatou ʼiloa ʼaē ohage ko ni ʼu minisi neʼe foaki kia nātou he faʼahiga puipui ʼe lelei. Ko te kau tagata fai fakapō neʼe nātou tautau fakahā ʼe nātou fakaʼapaʼapa ki te ʼu taʼi Kilisitiano ʼaia, pea ʼe mole nātou fakapalatahi mokā nātou tokoniʼi te hahaʼi ʼo tonatou kolo. Ko te kau Fakamoʼoni ʼe mole ko ni hahaʼi fai fakapō peʼe mo kaihaʼa, pea ‘ ʼe mole nātou palalau ki he ʼu meʼa ʼa niʼihi hahaʼi,’ pea ʼe mole nātou fakatupu tuʼania.—1 Petelo 4:15.
Ko Te Fīmālie ʼi Te Mālama Foʼou ʼa Te ʼAtua
ʼE tou lotomamahi ʼi te “ ʼāsilisili ʼo te manukinukiʼi ʼo te lao” ʼaē neʼe fakakikite e Sesu Kilisito, kae ʼe mole tou tuʼania ʼaupito leva, ʼe feala pe ke tou falala kua vave pe anai te haga ʼa te ʼAtua ʼo pulihi te mālama agakovi ʼaenī. ʼO hilifaki mai kiai te fakakikite ʼo te faka mafola ʼi te malamanei katoa ʼo “te logo lelei ʼaenī ʼo te Puleʼaga,” neʼe toe fakamanatuʼi age e Sesu ki tana ʼu tisipulo: “Ko ʼaē ka faʼa kātaki anai ʼo kaku ki te fakaʼosi, ʼe ko ia ia ʼaē ka maʼuli anai.”—Mateo 24:12-14.
ʼE feala ke tou tui papau ko nātou ʼaē ʼe nātou fai te meʼa ʼaē ʼe kovi ki niʼihi, ʼaē ʼe fai ʼi ʼihi temi ʼaki te aga fakapō fakamataku, ʼe pulihi anai nātou. ʼE ʼui fēnei ia Tāʼaga Lea 22:22, 23: “ ʼAua naʼa ke fakatelefua ia ia ʼaē ʼe veliveli, ʼuhi heʼe veliveli, pea ʼaua naʼa ke moloki ʼi te matapā he tahi ʼe lotomamahi. Heʼe ko Sehova totonu ʼe talaga anai maʼa nātou pea, ʼe mahino papau ia, ʼe ina fakatelefua anai te nefesi ʼo nātou ʼaē ʼe nātou fakatelefua ia nātou.” ʼE fakaʼauha anai e Sehova te kau agakovi, ohage la ko te kau kaihaʼa, te kau fai fakapō, pea mo te hahaʼi ʼaē ʼe nātou fakaʼaogaʼi kovi te ʼu felāveʼi fakasino. Pea tahi foki, ʼe mole ina galoʼi anai te ʼu vikitima ʼo te ʼu taʼi fai fakapō ʼaia. ʼE ina toe foaki anai te ʼu meʼa ʼaē neʼe puli ia nātou pea mo ina fakamālōlōʼi katoa anai nātou.
Koia, ko nātou ʼaē ʼe nātou “maliu mai te meʼa ʼaē ʼe kovi pea mo haga fai te meʼa ʼaē ʼe lelei” ʼe nātou maʼu anai te maʼuli heʼegata ʼaki tanatou hāo ʼi te toe mamahi lahi ʼaē ka hoko mai peʼe ʼaki tonatou fakatuʼuake mai te mate. “ ʼE maʼu anai te kele e te kau faitotonu, pea ʼe nātou nonofo anai ʼi ai ʼo talu ai.” (Pesalemo 37:27-29) ʼE hoko anai te ʼu taʼi tapuakina ʼaia ʼuhi ko te sakilifisio faitotogi ʼa Sesu. (Soane 3:16) Kae ʼe feafeaʼi anai te maʼuli ʼi te toe fakatuʼu ʼaē ʼo te Palatiso?
Ko he fiafia moʼoni anai te maʼuli ʼaē ʼi te pule ʼa te Puleʼaga ʼa te ʼAtua. ʼE fakakikite fēnei e Sehova: “ ʼE tonu anai ke nofo taku hahaʼi ʼi he nofoʼaga tokalelei, pea ʼi he ʼu nofoʼaga ʼo te falala katoa pea mo he ʼu koga meʼa mālōlō ʼe tokalelei.” (Isaia 32:18) Ko nātou fuli ʼaē ka nātou maʼu anai ia te maʼuli heʼegata ʼe nātou fakatonutonuʼi anai tonatou ʼuhigaʼi tagata. ʼE mole ʼi ai anai he tahi ʼe agakovi peʼe heʼe agatonu, peʼe gaohi koviʼi anai ʼo he tahi. ʼE ʼui fēnei e te polofeta ko Mikea: “ ʼE nātou tahi heheka anai ʼi tona lalo fuʼu vite pea mo tona lalo fuʼu fiku, pea ʼe mole ʼi ai anai he tahi ʼe ina fakamanavaheʼi ia nātou.” (Mikea 4:4; Esekiele 34:28) ʼI kehekehe leva mo te ʼu koga meʼa tuʼutāmakiʼia ʼaē ia ʼaho nei!
[Talanoa ʼo te pasina 6]
KOUTOU TOKAKAGA
Tokolahi te kau fai fakapō ʼe nātou fakahoko tanatou ʼu gāue māmio kovi ʼi te temi fuli pe, ʼo liliu te fai fakapō ko hanatou gāue. ʼE feala ke nātou gāue fakakaugā, ko he toko lua peʼe ko he toko tolu, māʼiape la mo kapau ko he toko tahi ʼaē ʼe ina fakahaga atu he fana kia koutou. Kua ʼiloga lelei ia, ko he tahi ʼe māmio kovi ka kei tūpulaga, ko ia ʼaia ʼe fakatupu tuʼutāmaki ʼaupito. Koteā ʼaē ʼe feala ke koutou fai mo kapau ʼe koutou liliu ko he vikitima?
ʼAua naʼa koutou hohaʼa fau heʼe feala ke fakatupu ʼita ki te tagata kaihaʼa—ko tana mole māhani ʼe feala ke ina matehi koutou. Kapau ko koutou ko he Fakamoʼoni ʼa Sehova, koutou fakahā age. Kae, koutou fakalogo ki te ʼu meʼa ʼaē ʼe loto kiai te tagata kaihaʼa. Kapau ʼe koutou gaohi meʼa mio, ʼe feala ke maui kovi kia koutou. Ki muli age, ʼe koutou fakafuafua anai kua feala ke koutou kole age ke ina tuku atu takotou carte dʼidentité peʼe ko he falā moʼo totogi ʼo tokotou kā.
ʼI ʼihi lakaga, ʼe mole feala ke koutou ʼiloʼi pe ko ai ʼaē ʼe faka ʼuhigaʼi ko he tahi ʼe fakapō. Ko ʼihi kau kaihaʼa ko te kau toloke peʼe ko he kau fai fakapō kua faiva, ko ʼihi ʼe nātou loto pe ki he falā moʼo totogi hanatou meʼa kai. ʼI he faʼahiga ʼaluʼaga pe, ʼaua naʼa koutou taka haʼele mo he foi falā lahi. ʼAua naʼa koutou fia fakahāhā fau he ʼu meʼa gigila, he ʼu mama aulo, peʼe ko he ʼu ʼuasi totogi kovi. Koutou haʼele pea mo folau ohage ko te agamāhani, ʼo mole koutou fakahā ʼe koutou matataku. ʼAua naʼa koutou sioʼi fakamamaʼu te hahaʼi ohage ʼe koutou fia ʼiloʼi pe ko ai ia nātou ʼaia. Kapau ʼe hoko he ʼu pa fana ʼi te ala, koutou takokoto ki te kele; ko te ʼu mutuʼi meʼa ʼe feala pe hona ia fō ki muli age.—Ko he tagata polisi ʼāfea ʼi Rio de Janeiro.
[Paki ʼo te pasina 5]
Koutou tokakaga pea mo koutou foaki te ʼu meʼa fuli ʼaē ʼe loto kiai e te tagata kaihaʼa. Kapau ʼe koutou gaohi meʼa mio, ʼe feala ke maui kovi kia koutou