Te Maheka—Neʼe Teitei Pe Ke Ina Maumauʼi Toku Maʼuli

NEʼE kamata malave moʼoni ia ʼau te maheka ʼi te temi ʼaē neʼe ʼau ʼohoana ai mo toku lua ʼohoana, ia Maleko.a Ko te meʼa neʼe ma tatau ai neʼe ko tama tuʼania ʼo ʼuhiga mo te lahi ʼo tama ʼu fānau takitokotahi pea mo te faʼahiga aga ki tama ʼu ʼuluaki ʼohoana. ʼI ʼihi temi, neʼe faigataʼa te kātakiʼi ʼo te ʼaluʼaga ʼaia. ʼI te temi fuli ʼaē neʼe ʼi ai he fetokakoviʼaki faka famili, neʼe hage ia neʼe mole kātakiʼi ʼau e Maleko. Neʼe ʼau kamata logoʼi ʼi toku loto neʼe kei ʼofa pe ia ki tona ʼuluaki ʼohoana. ʼO mole ʼui ke ʼau pule ki toku maheka, kae neʼe ʼau fakagafua ke ina taki toku maʼuli. Neʼe ʼau logo tuʼutāmakiʼia mokā neʼe nofo te ʼuluaki ʼohoana Maleko ʼo ʼi ʼoku tafa.

Neʼe ʼau lamalama tuʼumaʼu ia Maleko, māʼia mo te faʼahi ʼaē ʼe sio kiai neʼe ʼau lamalama. Neʼe ʼau lau ʼi tona ʼu mata he ʼu meʼa neʼe mole manatu pe la kiai. ʼI ʼihi temi, neʼe ʼau tukugakoviʼi fakahagatonu age ʼe kei ʼofa pe ia ki tona ʼuluaki ʼohoana. ʼI te tahi lakaga, ʼi te lahi fau ʼo tana tuʼania neʼe tuʼu ia pea neʼe mavae ʼi te fakatahi faka Kilisitiano. Neʼe ʼau logo lākahala ia muʼa ʼo Sehova. Neʼe ʼau fakaliliu toku maʼuli faka famili ʼo fakaʼofaʼofa ʼuhi heʼe ʼi te fakaʼosi, neʼe toe lave foki ki te ʼu fānau. Neʼe ʼau fehiʼa kia ʼau totonu ʼuhi ko te meʼa ʼaē neʼe ʼau fai, kae logope te agaaga fefeka ʼaē neʼe ʼau ʼahiʼahiʼi, neʼe mole feala ke ʼau puleʼi toku maheka.

ʼO mole ʼui ke tokoni mai, kae neʼe kamata tali mai e Maleko ʼaki te kovi. Mokā neʼe ʼau tukugakoviʼi ia ia, neʼe ina kalagaʼi mai, “Maheka, ʼe ke maheka pe.” Neʼe hage ia neʼe ina faigaʼi ke ʼau liliu ʼo maheka. Lagi neʼe manatu ia ko te faʼahi ʼaia ʼe ina pulihi toku maheka, kae neʼe faka lesili kovi ia meʼa fuli. Neʼe kamata mamata ki te tahi ʼu fafine, ʼo palalau ʼo ʼuhiga mo tanatou matalelei. Ko te faʼahi ʼaia neʼe ina fakatupu ʼāsili age taku logoʼi ʼaē ʼe ʼau mālalo pea mo taku fehiʼaʼinaʼi. Neʼe fakatupu e te faʼahi ʼaia te tahi meʼa neʼe ʼau logoʼi ʼi toku loto—te fehiʼa—ohage ko he meʼa moʼoni ʼe fakamataku. ʼI taku aʼu ki te faʼahi ʼaia, neʼe mole kei fakaʼaluʼalu lelei toku maʼuli ʼo ʼau loto pe ke ʼau mavae mo toku ʼohoana pea mo tona famili.

Mokā ʼui e te Tohi-Tapu ko “te maheka ʼe ko he ʼaukau ia ki te ʼu hui,” ko tona faka ʼuhiga tonu ʼaia. (Tāʼaga Lea 14:30) Neʼe kamata lave kovi ki toku maʼuli mālōlō. Neʼe tupu te ʼu papala ʼi toku fatu ʼaē neʼe loaloaga tona faitoʼo. Neʼe ʼau haga fakaliliu toku maʼuli ʼo fakaʼofaʼofa ʼo ʼau mahalohalo ki te ʼu meʼa fuli ʼaē ʼe fai e Maleko. Neʼe ʼau kumi ʼi tona ʼu tagaʼi vavae, pea kapau neʼe ʼau maʼu he numelo telefoni, neʼe ʼau telefoni moʼo vakaʼi pe ko ai ʼaē ka ina tali. ʼI toku loto, neʼe ʼau ufiufi ia ʼau totonu, neʼe ʼau tagi ʼuhi ko taku ufiufi ia muʼa ʼo Sehova. Pea neʼe mole feala ke ʼau tāʼofi ia ʼau totonu. Neʼe ko ʼau totonu pe toku fili lahi.

Neʼe lave kovi ki toku maʼuli fakalaumālie ʼo mole kei feala haku faikole. Neʼe ʼau ʼofa kia Sehova pea neʼe ʼau loto moʼoni ke ʼau fai te meʼa ʼaē ʼe totonu. Neʼe ʼau ʼiloʼi katoa te ʼu talanoa faka Tohi-Tapu ʼo ʼuhiga mo te ʼu tagata ʼohoana pea mo te ʼu fafine ʼohoana, kae neʼe mole feala ia ke ʼau maʼuliʼi. Ko tona hoki hokoe ʼi toku maʼuli, neʼe mole kei ʼau fia maʼuli, logope la neʼe ʼau maʼu he ʼu fānau matalelei.

Ko te ʼu tagata ʼāfea ʼo te kokelekasio faka Kilisitiano neʼe ko he fakaloto mālohi lahi pea neʼe nātou faiga ke nātou tokoni mai. Kae ʼi te temi ʼaē neʼe nātou mahino lelei ai ki te ʼuhiga ʼo toku maheka, neʼe ʼau fakafisi ki te faʼahi ʼaia heʼe neʼe ʼau ufiufi, neʼe mole ʼau fia ʼui ʼe ʼau tau mo te fihifihia ʼaia.

Ki muli age, ʼi te kua liliu ʼaē ʼo kovi toku maʼuli mālōlō neʼe ʼave ʼau ki te lopitali ke tafa ʼau. ʼI ai, neʼe ʼau mahino leva ʼe mole feala ke hoko atu toku maʼuli feiā. Ko Maleko pea mo ʼau neʼe ma fakatotonu ke ma mavete lolotoga māhina e tolu moʼo vakavakaʼi te ʼaluʼaga ʼo tomā maʼuli ʼo tuku keheʼi te meʼa ʼaē ʼe ʼi te loto. Lolotoga te temi ʼaia neʼe hoko te meʼa fakaofoofo. ʼI te nusipepa Réveillez-vous! neʼe tā te alatike ko tona kupu tāfito “Ko He Tokoni Ki Te ʼu Fānau ʼe ʼInu Kava Tanatou ʼu Mātuʼa.”b

Ko taku faʼe neʼe ko te fafine ʼinu kava. Logope la neʼe mole gaohi koviʼi ʼau, kae neʼe mole fakahā tuʼa tahi e taku ʼu mātuʼa he feʼofaʼaki peʼe nā ʼofa kia ʼau. ʼE mole ʼau manatuʼi tuʼa tahi neʼe kua fāʼufua ʼau e taku faʼe peʼe ina ʼui mai ʼe ʼofa ia ʼau. Koia, ʼi tona fakahagatonu neʼe ʼau lahilahi ake kae neʼe mole ʼau ʼiloʼi lelei peʼe feafeaʼi te fakahā ʼo te ʼofa peʼe, ko te faʼahi ʼaē ʼe maʼuhiga age, ke feafeaʼi hoku ʼofainaʼi.

Neʼe fakamatala mai e taku faʼe te ʼu agakākā ʼo taku matuʼa pea mo tana mole kei falala ʼaē ki ai. Koia ʼe ʼau mahalo neʼe ʼau lahilahi ake ʼaki te mole falala ʼaē ki te ʼu tagata fuli. ʼUhi ko taku faʼahiga ako, neʼe ʼau logoʼi tuʼumaʼu toku mālalo age ʼi niʼihi, tāfito ki te tahi ʼatu ʼu fafine. ʼI taku lau te alatike ʼo te Réveillez-vous! neʼe tokoni mai ke ʼau mahino ki te faka ʼuhiga ʼo te ʼu meʼa ʼaia. Ko tona hoki hokoe, neʼe ʼau mahino ki te tupuʼaga tāfito ʼo taku fihifihia mo taku maheka.

Neʼe ʼau fakahā te alatike ʼo te Réveillez-vous! ki toku ʼohoana, ia Maleko, pea neʼe toe tokoni pe foki kia ia ke mahino lelei age kia ʼau. Mole fualoa pea neʼe feala ke ma mulimuli ki te ʼu tokoni faka Tohi-Tapu ʼo ʼuhiga mo te ʼu taumatuʼa ʼaē ʼe manatu ke mavete. Neʼe ma toe fakatahi. (1 Kolonito 7:10, 11) ʼI te temi nei ko tama nofo faka taumatuʼa kua lelei age ia. ʼE ma fai te ʼu meʼa fuli fakatahi, tāfito mokā ko he ʼu gāue faka Kilisitiano. Neʼe fakahā e Maleko he agaʼofa ʼe lahi age. Teitei pe ʼi te ʼaho fuli ʼe ina fakahā mai tona ʼofa lahi kia ʼau, pea ʼi te temi nei kua ʼau tui moʼoni ki ai.

ʼI te temi pe ʼaē ʼe ʼau ʼiloʼi ai ʼe ʼau fetaulaki anai mo te ʼuluaki ʼohoana ʼo Maleko, ʼe ʼau faikole kia Sehova ke ʼau maʼu te mālohi, ʼo ʼau kole age ke tokoni mai ke ʼau maʼu he aga faka Kilisitiano ʼe lelei age. Pea ʼe ʼi ai tona fua. Māʼia mo taku fehiʼa kia ia, kua siʼisiʼi. ʼE mole kei ʼau tuku toku ʼatamai ki he ʼu manatu ʼe mole lelei peʼe ke ʼau tuku taku fakakaukau ke ina taki ʼau.

ʼE kei ʼau logoʼi pe ni ʼu meʼa kovi ʼo ʼuhiga mo te maheka. ʼE gata pe ki te maʼuli haohaoa ʼi te mālama foʼou ʼa te ʼAtua ʼaē ka ina pulihi anai toku maheka. ʼI te temi nei, ʼe ʼau ako peʼe feafeaʼi haku tātāʼofi te maheka, ke mole ʼau tuku ke ina puleʼi ʼau. Ei, neʼe teitei ke maumauʼi e te maheka toku maʼuli, kae ʼe ʼau fakafetaʼi kia Sehova pea mo tana kautahi, ʼi te temi nei ʼe lahi age toku fiafia, pea kua lelei toku maʼuli mālōlō. Kua ʼau toe maʼu he ʼu felogoi mālohi mo toku ʼAtua, ia Sehova—Ko he tahi ʼi te kau lautohi.

[Nota ʼi te lalo pasina]