Neʼe Nātou Fakatahitahi ʼo Vikiviki Fakafiafia Ki Te ʼAtua
ʼI TE temi ʼaē neʼe fakatahitahi ai te hahaʼi ʼāfea ʼa Sehova ʼAtua moʼo tauhi kia te ia, neʼe fakatotonu age kia nātou ke nātou “fiafia pe.” (Teutalonome 16:15) Ko te fakatahi faka Tisitilike “Tou Vikiviki Fakafiafia Ki Te ʼAtua” ʼaē neʼe fai ʼi te taʼu 1995 pea ʼi te 1996, ʼe mahino papau ia neʼe ina foaki he ʼu tupuʼaga lelei ke tou fiafia.
Talu te kamata ʼo te ʼu fakatahi ʼaia, neʼe tuputupu ai tatatou tui. Neʼe nātou toe fakahā foki peʼe feafeaʼi tatatou maʼu te fiafia ʼi he mālama ʼe mole fiafia. Tou vakaʼi te ʼu ʼaho takitahi ʼaia e tolu ʼo te fakatahi.
‘Tou Vikiviki Ia Sehova, . . . Tou Fiafia!’
Ko te kupu tāfito ʼo te ʼuluaki ʼaho ʼo te fakatahi neʼe fakatafito ki te Pesalemo 149:1, 2. Ko te akonaki “ ʼE Tou Maʼu Te ʼu Tupuʼaga Mālohi Ke Tou Kalaga Fakafiafia” neʼe fakamahino ai te faka ʼuhiga ʼo te lea faka polofeta ʼo Isaia kapite 35. Neʼe ʼuluaki hoko te lea faka polofeta ʼaia ki te Iselaele ʼāfea, kae neʼe hoko tāfito ʼi totatou temi ʼi te toe maʼu e te hahaʼi tauhi ʼa Sehova, te mahu pea mo te tokalelei ʼi te palatiso fakalaumālie. Koia, neʼe maʼu e nātou ʼaē neʼe kau ʼi te fakatahi he tupuʼaga moʼo kalaga fakafiafia, ʼuhi ko te meʼa ʼaē kua fakatuʼutuʼu e Sehova ke ina fai ki tana hahaʼi ʼi te palatiso fakalaumālie, pea mo te Palatiso fakakelekele ʼaē kua fakaōvi mai.
Ko te akonaki tāfito, “Kua Vaheʼi Nātou Moʼo Vikiʼi Fakafiafia Ia Te ʼAtua ʼi Te Kele Katoa,” neʼe ina tali ki te fehuʼi ʼaenī: Koteā ʼaē ʼe ina fakakeheʼi tatou mai te mālama ʼaenī? Ko tatatou logo tahi ʼi te tauhi ʼaē kia Sehova. ʼI te potu fuli ʼaē ʼe nonofo ai te kau Fakamoʼoni ʼi te kele, ʼe nātou felogoi tahi ʼi te ʼu meʼa ʼaē ʼe nātou palalau kiai pea mo te meʼa ʼaē ʼe nātou akoʼi ki te hahaʼi. ʼE nātou toe fiafia foki ʼi te fakatuʼutuʼu lahi ʼa Sehova ke ina tāpuhā tona huafa taputapu pea mo ina faka lākatonuʼi tona pule faʼifaʼitaliha ʼaki tona Puleʼaga. Kae, e feafeaʼi koa te tokoni mai ʼa te ʼAtua kia tatou ke tou kau ki tana fakatuʼutuʼu? Neʼe ina foaki mai kia tatou te moʼoni ʼo tana Folafola maʼoniʼoni. Neʼe foaki mai e te ʼAtua kia tatou tona laumālie maʼoniʼoni. Neʼe ina tapuakina tatou ʼaki te famili fakatautehina ʼi te malamanei katoa pea mo te fakatuʼutuʼu ʼaē neʼe ina fai ʼo ʼuhiga mo te tauhi maʼa. Ko tatatou famili faka malamanei ʼe tokoni kia tatou ke tou tauhi kia Sehova ʼaki he loto fiafia lahi.
Ko te akonaki “Tou ʼĀteaina Mai Te ʼu Mele Fuli Pe Pea Mo ʼAua Naʼa Tou Kau ʼi Te Malamanei,” neʼe talanoa ki te ʼaoga ʼaē ke tou tekeʼi te meʼa ʼaē ʼe ʼuli ʼo ʼuhiga mo te fakapalatahi pea mo te fakakeheʼi ʼo te hahaʼi. (Sake 2:5-9) Ko ʼihi e lagi nātou fakatahitahi pe nātou mo te hahaʼi ʼo tonatou lanu, mo te hahaʼi ʼaē ʼe tatau tonatou ʼu ʼaluʼaga ʼi te faʼahi ʼo te paʼaga, ka mole nātou tokagaʼi nātou te kau Kilisitiano ʼaē ʼe māsisiva pea mo nātou ʼaē ʼe nonofo ʼi te faigataʼaʼia. Ko ʼihi e lagi nātou leleiʼia pe nātou te ʼu tēhina ʼaē ʼe maʼu tuʼulaga ʼi te kokelekasio. ʼE galo kia nātou ko te pilivilesio ʼaē ʼe lahi tokotahi, ko te liliu ʼaē ʼo he tahi ko he Fakamoʼoni ʼa Sehova. Koia ʼe mole tonu ke tou tuku te ʼu holi ʼo te mālama ke nātou ʼulihi tatou pea mo nātou maumauʼi te tokalelei ʼi te kokelekasio.—2 Petelo 3:14.
Ko te akonaki ʼaē “Kua Feala Koa Ke ʼAu ʼOhoana?” neʼe ina fakatokagaʼi mai ko te tokolahi ʼe fakavilivili fau tanatou ʼohoana. Ko ʼihi neʼe nātou ʼohoana moʼo tekeʼi te ʼu ʼaluʼaga faigataʼa ʼo te loto fale, peʼe nātou ʼohoana ʼi tanatou sio ʼaē kua ʼohoana tonatou ʼu kaumeʼa. Kae, ko te ʼu tupuʼaga lelei ʼaē ke ʼohoana ʼe kau kiai te loto ʼo nāua toko lua ke nā muliʼi he ʼu fakatuʼutuʼu faka teokalatike, he ʼofa moʼoni, he fia fakatahi, pea mo te loto ʼaē ke taupau he ʼu fānau. Ko he teuteu fakatomuʼa ʼi te faʼahi fakalaumālie, ʼe maʼuhiga ki te teuteuʼi ʼo te nofo ʼohoana. Tahi ʼaē meʼa, ʼe ʼaoga ke nā fakatuputupu ia nāua te ʼu kalitate lelei, ʼo nā kofuʼi te ʼuhigaʼi tagata foʼou. ʼE ko he tahi aga fakapotopoto, te ʼiloʼi papau ʼo ʼuhiga mo ia ʼaē ʼe tou fia ʼohoana mo ia peʼe vāhaʼa lelei mo Sehova pea mo aga fakaʼapaʼapa ki te hahaʼi. ʼE ko he tahi agapoto hatatou kumi tokoni ki te ʼu Kilisitiano ʼaē kua fakapotopoto ʼi te faʼahi fakalaumālie.—Tāʼaga Lea 11:14.
Neʼe hoa kiai te akonaki ʼaē ko tona kupu tāfito ʼaenī “Ko Te ʼu Fānau ʼe Nātou Fakafiafia Tanatou ʼu Mātuʼa.” Ko te tupu ʼa he tamasiʼi, ʼi te agamāhani, ʼe ko he temi fakafiafia ʼaupito. Kae, tahi ʼaē meʼa, ko te taupau fānau ʼe ko he toe maʼua lahi. (Pesalemo 127:3) Koia, ʼe maʼuhiga ke akoʼi te ʼu fānau ke nātou ʼoʼofa kia Sehova. ʼE feala ke fai e te ʼu mātuʼa te faʼahi ʼaia, ʼo nātou palalau tuʼumaʼu ki tanatou fānau ʼo ʼuhiga mo Sehova, pea mo nātou maʼuliʼi te ʼu pelesepeto ʼo tana Folafola ʼi te famili.
Neʼe fakaʼosi te ʼaho ʼaia ʼaki te fakahā ʼo te meʼa foʼou—ko te kaupepa lahi foʼou Les Témoins de Jéhovah et lʼinstruction. ʼE fakamahino lelei e te kaupepa ʼaia ko te kau Fakamoʼoni ʼe nātou “fakaloto mālohiʼi tanatou fānau ke nātou gāue fakamalotoloto pea mo fai lelei te ʼu gāue ʼaē ʼe tuku age kia nātou ʼi te ʼu faleako.” ʼE ina toe fakamahino foki te ʼu fua lelei ʼo te ʼu kalasi ako ʼaē neʼe taki e te kau Fakamoʼoni ʼa Sehova lolotoga ni ʼu taʼu ʼi Niselia, ʼi Mekesike, pea mo ʼihi ʼatu ʼu fenua. ʼE feala ke tokoni te kaupepa lahi ʼaia ki te kau faiako ke nātou mahino ʼe maʼuhiga kia tatou te ako.
“Tou Momoli Tuʼumaʼu Ki Te ʼAtua He Sakilifisio Fakavikiviki”
Ko te kupu tāfito ʼo te lua ʼaho neʼe fakatafito ki te tohi ʼo Hepeleo 13:15. Neʼe fakahā ʼi te uhu te ʼu akonaki ʼaki te kupu tāfito ʼaenī “Tou Tali Ki Te Fakaafe Mai ʼAē Ke Tou Vikiʼi Ia Sehova.” ʼE mole lauʼia peʼe tou taʼu fia moʼo tali ki te pāui ʼaia. ʼE uga e te Pesalemo 148:12, 13 te kau talavou, te kau finemui, te ʼu mātuʼa, pea mo te kau tama ke nātou vikiviki kia Sehova. Tokolahi ʼi te kau kaugana fiafia ʼa Sehova neʼe feala tanatou fakatuputupu tanatou fakavikiviki. ʼI te malamanei katoa, ko te toko 600 000 kau tūpulaga ʼe nātou kau ki te gāue fai faka mafola ʼi te temi katoa, peʼe ʼi te selevisi pionie. Ko te toko 15 000 tupu kua nātou kau ki te gāue pionie makehe, pea ko te toko 15 000 ʼe nātou gāue ʼi te Petele.
“Tou Tauhi Agatonu Mo Te Kautahi ʼa Sehova,” neʼe ko te akonaki ʼaē neʼe ina fakahā ko te agatonu ʼe ko he meʼa maʼuhiga maʼa te kau kaugana ʼa te ʼAtua. Ko takita faitotonu kia Sehova ʼe ko tona faka ʼuhiga ke tou nonofo pipiki kia te ia ʼaki he tauhi mālohi ʼe liliu ohage ko he meʼa fakapipiki mālohi. ʼE fakamaʼuaʼi e te faitotonu ke ʼaua naʼa tou talagataʼa ʼaki he loto faʼitaliha ki te ʼu fakatotonu ʼo te Tohi-Tapu, tatau aipe peʼe sio niʼihi kia tatou peʼe kailoa. ʼE toe fakamaʼua foki ke tou lagolago ʼaki he faitotonu ki te ʼu akonaki faka Tohi-Tapu ʼaē ʼe tou maʼu ʼi te ʼu nusipepa ʼo Te Tule Leʼo pea mo te Réveillez-vous!, ʼo toe feiā mo te ʼu meʼa kai fakalaumālie fuli ʼaē ʼe foaki mai e te Sosiete Watch Tower. Neʼe hoa ki te akonaki ʼaia te akonaki ʼo te papitema. Neʼe tou fiafia ʼi te temi ʼaē neʼe fakamoʼoni ai e te kau papitema kua nātou foaki tonatou maʼuli kia Sehova!
Ko te ʼu palalau ʼaē ʼe tuʼu ia Osea 4:1-3 neʼe fakatafito kiai te akonaki ʼo te hili hoʼatā, ʼaē ko tona kupu tāfito ʼaenī “Koteā ʼAē ʼe Tou Mulimuli Kiai: Ko Te Agakovi Peʼe Ko Te Vilitute?” Logope ko te manatu ʼo te mālama ʼo ʼuhiga mo te vilitute kua puli, ʼe tonu ki te kau Kilisitiano ke nātou “faiga mālohi” ke nātou mulimuli ki te ʼu aga lelei ʼaē ʼe tonu ke fai. (2 Petelo 1:5) ʼE kamata te faʼahi ʼaia ʼaki te faʼahiga manatu ʼaē ʼe maʼu e he tahi. Kapau ʼe lelei te ʼu manatu ʼaia, pea ʼe ina fai anai he ʼu palalau maʼa, pea mo he ʼu lea fakatupu lotomālohi, pea mo ina faiga anai ke faitotonu ʼi tana ʼu aga pea mo ʼihi. Ko te muliʼi ʼo te ʼu aga ʼaē ʼe lelei, ʼe toe pipiki kiai te faiga ʼaē ke tou mahino pea ke tou manavaʼofa ki te Kilisitiano ʼaē ʼe felāveʼi mo te lotomamahi pea mo te lotohoha.—1 Tesalonika 5:14.
Ko te tahi akonaki, “Tou Tokakaga Ki Te ʼu Hele ʼa Satana,” neʼe ina fakatokagaʼi te kau Kilisitiano ke ʼaua naʼa nātou haga ki te ʼu meʼa fakatemonio. Ohage ko he faitoʼo ʼo te mahaki, ʼe ʼaoga ki te kau Kilisitiano ke nātou tokakaga ki te ʼu faʼahiga faitoʼo ʼaia, ohage ko te hypnotisme, ʼaē ʼe ʼi ai tona pikipikiga mo te ʼu meʼa fakatemonio. Pea tahi ʼaē, ko te meʼa ʼaē ʼe fai e ʼihi moʼo tokakaga ki tonatou maʼuli mālōlō, ʼe ʼa tatou takitokotahi te vakaʼi ʼo te faʼahi ʼaia.
Neʼe fakaʼosi te lua ʼaho ʼaki te meʼa fakafiafia—ko te kiʼi tohi foʼou, neʼe tā moʼo tokoni ki te ʼu hahaʼi ʼaē ʼe tui moʼoni, ke nātou tuputupu vave mo nātou foaki tonatou maʼuli kia Sehova pea mo nātou papitema. Ko te tohi foʼou ʼaia ʼe pasina 192, ko tona kupu Te ʼAtamai Mālama ʼAē ʼe Ina Taki Ki te Maʼuli Heʼegata. Ko te tohi Te ʼAtamai Mālama ʼe ina fakahā te moʼoni moʼo fakatuputupu ʼo te tui. ʼE mole lahi te talanoa ʼa te tohi ʼaia ki te ʼu akonaki loi. Ko te faigafua ʼo te ʼu palalau ʼaē ʼe fakaʼaogaʼi pea mo te fakaʼaluʼalu lelei ʼo te ʼu fakamahino, ʼe fakagafua ai te fakaʼaoga ʼo te tohi ʼaia moʼo fai ʼo he ʼu ako Tohi-Tapu, pea mo tokoni ki te hahaʼi ke nātou mahino ki te ʼatamai mālama ʼo ʼuhiga mo te ʼAtua ʼaē ʼe feala ke lave ki tonatou loto.
“Ke Koutou Fiafia Lahi Pea Mo Loto Fiafia ʼo Talu Ai”
Ko te ʼu kupu ʼaia ʼaē ʼe tuʼu ia Isaia 65:18, neʼe ko te kupu tāfito ʼo te fakatahi ʼo te tolu ʼaho. Ko te fakahoko ʼo te lea faka polofeta faka Tohi-Tapu neʼe hoko ʼi te taʼu 1914, te taʼu ʼaē neʼe kamata hū ai te mālama agakovi ʼaenī ki te ʼu ʼaho fakamuli. Koia, ko te ʼu kupu tāfito ʼo te ʼu akonaki “Tou Fakavikiviki Fakafiafia Lolotoga Te Fakaʼosi ʼo Te Tuʼu ʼo Te ʼu Faʼahiga Meʼa ʼAenī,” neʼe fakalogo lelei te hahaʼi ʼaē neʼe kau kiai. Neʼe fakahā e te ʼu tagata ʼaē neʼe nātou fai te ʼu akonaki, ko te lauʼi miliale hahaʼi ʼe lahi tanatou mānumānu ki te ʼu koloā pea mo nātou fia fai ʼaupito ki te agamālohi ʼo te mālama. ʼI tona temi totonu, ʼe fakamāu anai nātou koteʼuhi ʼe nātou kau ki te mālama ʼaē ʼe pule ai Satana. Koia ʼi te temi nei ʼe tonu ke tou vakaʼi peʼe tou fia kau ki te faʼahi fea. ʼE tou fia tauhi koa kia Sehova pea mo lagolago ki tana pule faʼifaʼitaliha, peʼe tou faka fealagia koa tatou ke liliu ia Satana ko totatou pule ʼi tatatou fai te ʼu meʼa ʼaē ʼe ina leleiʼia? Ko tatou fuli ʼe tonu anai ke tou kau ki te faʼahi ʼa Sehova.
Ko te akonaki ʼaē neʼe fai tāfito maʼa te hahaʼi ʼi te ʼAhotapu, ʼaē ko tona kupu tāfito ʼaenī “Tou Vikiʼi Te Hau ʼo Te Heʼegata!” neʼe ina uga te hahaʼi fuli ke nātou fakakaukau. Logope ko te manatu ʼaē ʼo ʼuhiga mo te heʼegata ʼe ko he meʼa ʼe mole feala ke kaku kiai te fakakaukau ʼa te hahaʼi vaivai, ʼe mahino katoa kiai ia Sehova. Neʼe hiva fēnei te tagata fai pesalemo: “ ʼE Hau anai Sehova ʼi te ʼu temi ʼe mole ʼi ai honatou gataʼaga, ʼio ʼo talu ai.” (Pesalemo 10:16) Ko te Hau ʼaia ʼo te heʼegata neʼe ina faka fealagia ki te malamanei ke ina maʼu te maʼuli heʼegata ʼaki tona Foha, ia Sesu Kilisito. (Soane 17:3) Neʼe ʼui fēnei e te tagata faiakonaki: “Ei, ko tatou kau hahaʼi agahala, ʼe feala ke tou maʼu te maʼuli heʼegata ʼaki te ako fakaʼatua pea mo te tui ki te sakilifisio faitotogi ʼa Sesu.”
ʼI te kua vave ʼosi ʼo te fakatahi, neʼe fakaloto mālohiʼi ia nātou ʼaē neʼe kau ki te fakatahi ʼaki te akonaki fakaʼosi, ʼaē ko tona kupu tāfito ʼaenī “Tou Vikiʼi Fakafiafia Ia Sehova ʼi Te ʼAho Fuli.” Neʼe ko he meʼa fakaloto mālohi te logo ki te fakahāhā ʼo te haʼele ki muʼa ʼo te gāue ʼaē ko te fai ʼo ni ʼu tisipulo ʼi te malamanei katoa. Pea neʼe uga ia nātou ʼaē neʼe kau ki te fakatahi ke nātou ‘tapuakina ia Sehova ʼi te ʼaho katoa, pea mo nātou fakavikiviki tona huafa ʼo talu ai.’—Pesalemo 145:2.
Ko te ʼu aga fakalialia neʼe nātou pulihi te fiafia ʼo te malamanei. Kae, ko te hahaʼi, ʼaki tanatou tui mālohi kia Sehova, ʼe feala ke nātou maʼu te fiafia ʼo te aga faka lotu. ʼI tonatou ʼuhiga fale fakatautehina ʼi te malamanei, ko te kau Fakamoʼoni ʼa Sehova ʼe feala ke nātou fai mo nātou te ʼu palalau ʼaē ia Pesalemo 35:27, 28: “Ke nātou kalaga fakafiafia pea mo nātou fiafia, ia nātou ʼaē ʼe nātou leleiʼia taku faitotonu, pea ke nātou ʼui tuʼumaʼu: ‘Ke vikiʼi ia Sehova, ia ia ʼaē ʼe ina leleiʼia te tokalelei ʼo tana kaugana!’ Pea ke fakahā e toku ʼalelo tau faitotonu ʼaki he leʼo veliveli, tou vikiʼi ʼi te ʼaho katoa.”
[Paki ʼo te pasina 7]
ʼE ʼaoga anai ki te ʼu famili te kaupepa lahi ʼaenī “Les Témoins de Jéhovah et lʼinstruction”
[Paki ʼo te pasina 8, 9]
Ko te tohi foʼou ʼaenī, “Te ʼAtamai Mālama ʼAē ʼe Ina Taki Ki Te Maʼuli Heʼegata,” ʼe ina fakahā te ʼu moʼoni ʼo te Tohi-Tapu moʼo fakatuputupu ʼi te faʼahi fakalaumālie
[Paki ʼo te pasina 9]
Tokolahi neʼe nātou papitema moʼo fakahā kua nātou momoli tonatou maʼuli kia Sehova
[Paki ʼo te pasina 9]
Neʼe lave ʼaupito ki te loto ʼo te hahaʼi ʼaē neʼe kau ki te fakatahi, te kiʼi gaoʼi ʼaē ko tona kupu tāfito ʼaenī “Tou Fakaʼapaʼapa Ki Totatou ʼu Kaugā Gāue Kua Matutuʼa ʼAē ʼe Tau Mo Nātou Te Faʼahi ʼAia”