Ko Te Kau Faka Mafola ʼo Te Puleʼaga ʼe Nātou Fakamatala

“Ko Tau ʼu Fakatotonu Fuli ʼe Moʼoni”

ʼI TE kiʼi temi siʼipe ʼi muʼa ʼo tona mate, neʼe fakaloto mālohiʼi e Moisese te hahaʼi ʼo Iselaele ke nātou fakalogo ki te ʼu fakatotonu fuli ʼa Sehova. Neʼe ina ʼui fēnei: “Koutou gāueʼi tokotou loto ki te ʼu folafola fuli ʼaē neʼe ʼau fakatokagaʼi atu kia koutou ʼi te ʼaho nei, ke koutou fakatotonu age ki tokotou ʼu foha ke nātou tokakaga ʼo maʼuliʼi te ʼu folafola fuli ʼo te lao ʼaia. Heʼe mole ko he folafola noa maʼa koutou, kae ʼe faka ʼuhiga ia ko tokotou maʼuli.”​—Teutalonome 32:46, 47.

Hili kiai te ʼu taʼu ʼe lauʼi teau, neʼe fakahā e te tagata fai pesalemo te maʼuhiga ʼo te ʼu akonaki fuli ʼa te ʼAtua, ʼo ina ʼui fēnei: “ ʼE ke ōvi mai, Ê Sehova, pea ko tau ʼu fakatotonu fuli ʼe moʼoni.” (Pesalemo 119:151) ʼI te ʼuluaki sēkulō, neʼe fakaʼaogaʼi e Sesu te ʼu “folafola fuli pe [ʼaē] ʼe haʼu mai te gutu ʼo Sehova.” (Mateo 4:4) Pea ʼaki te takitaki ʼa te ʼAtua, neʼe tohi fēnei e te ʼapositolo ko Paulo, “ko te Tohi-Tapu katoa ʼe haʼu mai te ʼAtua pea ʼe ʼaoga.”​—2 Timoteo 3:16.

ʼE mahino ia, ʼe loto e Sehova ʼAtua ke tokagaʼi fakalelei e tana kau atolasio, te logo katoa ʼaē neʼe ina foaki mai ʼi te ʼu pasina ʼo tana Folafola. ʼE maʼuhiga fuli te ʼu vaega ʼo te Tohi-Tapu. Ko te manatu ʼaia ʼaē ʼe maʼu e te kau Fakamoʼoni ʼa Sehova ʼo ʼuhiga mo te Folafola ʼa te ʼAtua, ohage ko tona fakahā e te fakamatala ʼaē ʼe hoa mai, ʼaē neʼe hoko ʼi te motu ko Maulisi.

Ko te tagata ko D​—— neʼe nofo ʼi te kiʼi kolo neʼe tuʼu mamaʼo, pea neʼe ko te tagata leʼo. Talu mai fualoa, mo tana kumi fakamalotoloto ke ina ʼiloʼi pe koteā te faʼahiga tauhi ʼaē ʼe loto kiai te ʼAtua. Lolotoga tana gāue pōʼuli, neʼe ina kamata lau te Tohi-Tapu, pea neʼe ʼosi katoa ʼi tana lau. Neʼe ina maʼu ko te huafa ʼo te ʼAtua ʼe ko Sehova​—pea ko te huafa ʼaia ʼe hā tuʼa lahi ʼi tana Tohi-Tapu faka Initia. Neʼe ina leleiʼia tāfito te tohi ʼo te Fakahā.

Pea neʼe ina ʼeke ʼi tona loto peʼe ʼi ai koa he lotu ʼe mulimuli katoa ki te Tohi-Tapu. Neʼe ina fakatokagaʼi ko te ʼu lotu ʼaē neʼe ina ʼiloʼi, ʼe mole mulimuli nātou ki te Tohi-Tapu katoa. Ko ʼihi lotu ʼe nātou fakaʼaogaʼi te Tauhi ʼĀfea, kae nātou līaki te Tauhi Foʼou. Ko ʼihi lotu ʼe nātou fakafisi ki te Tauhi ʼĀfea, kae nātou faka maʼuhigaʼi tāfito te Tauhi Foʼou.

ʼI te tahi ʼaho ko te tagata ʼaia, neʼe sio ki te taumatuʼa neʼe nā haʼele ʼi te ʼua, pea neʼe ina fakaafe ia nāua ke nā ʼōmai ʼo fakamalumalu ʼi tona ʼapi. Neʼe ko te ʼu Fakamoʼoni ʼa Sehova. Neʼe fakahā age e te fafine te tohi La Révélation: le grand dénouement est proche!a Neʼe kole atu aipe e te tagata ʼaia, peʼe feala hana toʼo te tohi. Neʼe manatu e te taumatuʼa, ʼe faigataʼa anai kia ia hana mahino ki te ʼu lea faka polofeta ʼo te Fakahā, koia neʼe nā ʼavage ai te tahi tohi. Kae neʼe kole mamahi age e te tagata ke ʼavage kia ia te tohi ʼo te Révélation.

ʼI tana maʼu te tohi ʼaia, neʼe ina foimo lau atu aipe. Pea neʼe ina tali ke fai hana ako e te kau Fakamoʼoni ʼa Sehova. Neʼe ōfo lahi ʼi tana sio ʼaē ko te kau Fakamoʼoni ʼe nātou faka maʼuhigaʼi te Tohi-Tapu katoa. Neʼe kamata ʼalu tuʼumaʼu ai ki te ʼu fono ʼi te Fale ʼo te Puleʼaga ʼo te kau Fakamoʼoni ʼa Sehova, ʼaē ʼe akoʼi lelei ai te Tohi-Tapu katoa. ʼI te temi nei ʼe ko te kaugā fai faka mafola ʼo te Puleʼaga, pea ʼe ko he tēhina ʼi te kokelekasio faka Kilisitiano.