Ko Te Faleako ʼo Kalaate ʼe Ina Fekauʼi Tana 100 Kalasi

NEʼE maʼuhiga te gāue ʼaē neʼe fai e te Faleako Faka Tohi-Tapu ʼo Kalaate ʼo te Watchtower ʼo ʼuhiga mo te kalagaʼi ʼo te Puleʼaga ʼo te ʼAtua ʼi te malamanei katoa, ʼi totatou temi. Talu te kamata akoʼi e te Faleako ʼo Kalaate ia te kau misionea ʼi te taʼu 1943, neʼe gāue te kau misionea ia fenua e 200 tupu. ʼI te ʼaho 2 ʼo Malesio 1996, neʼe foaki te ʼu pepa ʼo te 100 kalasi.

Neʼe kau te kau ako ki te faiako lolotoga te temi ʼaē neʼe meta 2 ai te mātolu ʼo te nive ʼaē neʼe tō ʼi te potu ʼaē ʼe tuʼu ai te Fale Faiako ʼo te Watchtower ʼi Patterson, New York. Neʼe mole nātou punamaʼuli ʼi te tō ʼo te nive ʼi te ʼaho ʼaē neʼe foaki ai tonatou ʼu pepa. Kae, neʼe fonu te fakatahi, pea neʼe kaugamālie ia nātou ʼaē neʼe fagono ki te fono ʼaia, ʼi Patterson, mo Wallkill, pea mo Brooklyn​—ko te hahaʼi e toko 2 878.

Ko Theodore Jaracz, ʼaē ʼe kau ki te Komite Faiako ʼo te Kolesi Pule, neʼe ko te pelesita ʼo te fono. ʼI tana ʼosi fakaʼalofa ki te kau fakaafe ʼaē neʼe ʼōmai mai te ʼu fenua kehekehe, neʼe ina fakaafe ia nātou fuli ke nātou tutuʼu pea ke nātou hiva te katiko 52. Neʼe logoʼi lelei ʼi te fale ʼo te fakatahi tanatou fakavikiviki kia Sehova, ʼi tanatou hiva “Te Huafa ʼo Totatou Tāmai,” mai te tohi Tou Vikivikiʼi Ia Sehova ʼAki Tatatou ʼu Hiva. Ko te katiko ʼaia, ʼo fakatahi mo te talanoa ʼo te pelesita ʼo ʼuhiga mo te fakaʼaogaʼi ʼo te ako moʼo vikiʼi ia Sehova, neʼe fakahā ai te meʼa ʼaē ka talanoa kiai te polokalama ʼaē ka hoa kiai.

Te ʼu Tokoni Fakaʼatua Mai Te Kau Tagata ʼĀfea

Ko te ʼuluaki koga ʼo te polokalama, neʼe fai e te kau kaugana ʼa Sehova ʼaē kua fualoa tanatou kau ki te moʼoni, ʼo nātou fai te ʼu akonaki nounou ki te kalasi maʼu pepa ʼaia. Ko Richard Abrahamson, ʼaē ʼe kau ki te famili ʼo te Petele, neʼe kamata tana gāue katoa ʼi te taʼu 1940, pea neʼe ina fakaloto mālohiʼi fēnei te kalasi ʼaki te kupu tāfito ʼaenī: “Ke Hoko Atu Takotou Fakatonutonuʼi ʼo Koutou.” Neʼe ina fakamanatuʼi age kia nātou, kua ʼi ai te ʼu meʼa neʼe kua nātou fakatonutonuʼi ʼi tonatou maʼuli faka Kilisitiano, ʼo kau ai mo te ʼu māhina e nima ʼaē neʼe nātou ako ai ʼi Kalaate. Koia, he koe ʼe tonu ke toe hoko atu tanatou fakatonutonuʼi ʼo nātou?

Neʼe fakamahino e te Tēhina ko te kupuʼi palalau ʼaē neʼe fakaʼaogaʼi e te ʼapositolo ko Paulo ia 2 Kolonito 13:11 “ ʼe faka ʼuhiga ko he tuputupu māmālie, ko he fakalogo tuʼumaʼu ki te ako peʼe ki te fakatonutonuʼi ʼo tatou e Sehova, ko he fakatonutonuʼi ke liliu ʼo lelei, ke feala ai ki he tahi ke ina fakahoko te ʼu lekula ʼa Sehova.” ʼI te ʼu fenua matāpule ʼaē ʼe fekauʼi nātou kiai, ʼe felāveʼi anai te kau misionea ʼaia mo te ʼu ʼahiʼahiʼi foʼou ki tanatou tui. ʼE ʼaoga anai ke nātou ako he lea foʼou, ke nātou mulimuli ki te tahi faʼahiga maʼuli, pea ke nātou maʼuʼuli ʼi he tahi ʼu ʼaluʼaga, pea mo nātou mulimuli ki te faʼahiga telituale ʼaē ʼe nātou ʼolo kiai. Tahi ʼaē meʼa, ʼi tonatou ʼapi misionea pea mo te ʼu kokelekasio foʼou ʼaē ʼe nātou ʼolo kiai, ʼe nātou felāveʼi anai mo te tahi ʼu tēhina mo tuagaʼane ʼe mole tatau tonatou ʼu ʼulugaaga. Kapau ʼe nātou mulimuli lelei ki te ʼu pelesepeto ʼo te Tohi-Tapu ʼi te ʼu ʼaluʼaga fuli ʼaia, ʼaki te lotolelei ʼaē ke fakatonutonuʼi nātou, pea ʼe mahino ia, ohage ko te meʼa ʼaē neʼe tohi e te ʼapositolo ko Paulo, ʼe toe feala anai ke “hoko atu tanatou fiafia.”

Ko John Barr, te tahi ʼi te toko nima ʼo te Kolesi Pule ʼaē neʼe kau ʼi te polokalama, neʼe ina toʼo te kupu tāfito ʼo tana akonaki mai ia 1 Kolonito 4:9. Neʼe ina toe fakamanatuʼi kia nātou ʼaē neʼe fakalogo ki tana akonaki, ʼe sioʼi te kau Kilisitiano e te kau ʼaselo pea mo te hahaʼi. Neʼe ina ʼui fēnei: “Ko te ʼiloʼi ʼo te faʼahi ʼaia, ʼe hā ʼaki ai te maʼuhiga ʼo te faʼahiga maʼuli ʼa te Kilisitiano, tāfito la mokā mahino kia ia, ko tana ʼu palalau pea mo te ʼu meʼa ʼaē ʼe ina fai, ʼe feala ke ʼi ai hona fua kia nātou ʼaē ʼe nātou sio kiai, ʼo mole gata ʼaki pe te hahaʼi, kae toe feiā pe foki mo te kau ʼaselo. ʼE ʼau mahalo, ʼe lelei anai kia koutou fuli, ʼu tēhina mo tuagaʼane ʼofaina ʼo te kalasi 100 ʼo Kalaate, takotou manatuʼi te faʼahi ʼaia mokā koutou ʼolo anai ki te ʼu potu taupotu ʼo te kele.”

Neʼe fakaloto mālohiʼi e te Tēhina ko Barr te kau ako ʼaia e 48 ke nātou manatuʼi, mokā nātou tokoni ki te hahaʼi ʼaē ʼe nātou tatau ki ni ʼu ōvi ke nātou ako te moʼoni, “ ʼe ʼi ai te fiafia ʼi te kau ʼaselo ʼa te ʼAtua ʼo ʼuhiga mo he tagata agahala e tahi ʼe fakahemala.” (Luka 15:10) ʼI tana talanoa ʼo ʼuhiga mo te vaega ʼo 1 Kolonito 11:10, neʼe ina fakahā ko te aga ʼa he tahi ʼo ʼuhiga mo te ʼu fakatuʼutuʼu faka teokalatike, ʼe lave ki te ʼu tēhina mo tuagaʼane ʼaē ʼe tou sisio kiai, pea ʼe toe malave foki ki te ʼu ʼaselo ʼaē ʼe mole tou sisio ki ai. ʼE lelei ke tou manatuʼi tuʼumaʼu te faʼahi ʼaia!

Ko Gerrit Losch, ʼaē ʼe kau mo ia ki te Kolesi Pule pea neʼe ko he misionea ki muʼa atu ʼo te Ako ʼo Kalaate, neʼe palalau ki te ʼu vaega faka Tohi-Tapu ohage ko Pesalemo 125:​1, 2; Sakalia 2:​4, 5; pea mo Pesalemo 71:21, moʼo fakahā ko Sehova ʼe ‘ina ʼatakai tana hahaʼi.’ ʼE ina puipui ia nātou ʼi te ʼu potu fuli. ʼE foaki pe anai koa e te ʼAtua te taʼi puipui ʼaia lolotoga te mamahi lahi? Neʼe tali fēnei e te tēhina: “Kailoa, koteʼuhi, ko Sehova kua liliu ko he ‘kaupā afi,’ ko he puipui ki tana hahaʼi. ʼI te 1919, ʼi te kua hili ʼo te tau, neʼe kua fia faka mafola e te toe ʼo te Iselaele fakalaumālie, ia te logo lelei ʼo te Puleʼaga ki te malamanei katoa, ohage ko he fakamoʼoni ki te ʼu fenua fuli pe. Neʼe ko nātou ʼaē neʼe nātou fakafofoga te Selusalemi fakatātā ʼaē ʼe ʼi te lagi. ʼE fakapapau e Sehova ʼe ina puipui anai te kau fakafofoga ʼaia, ʼaē ʼe nātou hage ko he kūtuga, lolotoga te temi fakaʼosi. Koia, ko ai ʼaē ʼe feala ke ina tāʼofi nātou? ʼE mole he tahi.” ʼI meʼa fakaloto fīmālie kia nātou pea mo nātou fuli ʼaē ʼe nātou fakatahi lelei mo nātou ʼo fai te finegalo fakaʼatua!

Ko Ulysses Glass, ia ia ʼaē kua matuʼa age ia nātou ʼaē neʼe nātou akoʼi te kau misionea, neʼe ina fakaloto mālohi te kalasi ke ‘nātou maʼu honatou nofoʼaga ʼi te kautahi faka malamanei ʼa Sehova.’ Ko te nofoʼaga ʼaia, ko tona faka ʼuhiga, ʼe ko he ʼaluʼaga peʼe ko he gāue ʼe tau mo te ʼu fealagia ʼa he tahi peʼe ko tona ʼu kalitate. Neʼe ina tala fēnei: “Ko koutou ʼaē ʼe ʼamanaki ke liliu ko he kau misionea, kua koutou maʼu tokotou lapalasi ʼi te kautahi faka malamanei ʼa te kau Fakamoʼoni ʼa Sehova. Kae, ko te meʼa ʼaē ʼe maʼuhiga ʼi te temi nei, ʼe ko te kamata ʼaia ʼo tokotou maʼuli faka misionea.” ʼE tonu anai kia nātou ke nātou faiga ke nātou fakaʼaogaʼi lelei tanatou ʼu fealagia, pea ke tau mo feʼauga mo nātou te gāue makehe ʼaē neʼe tuku age kia nātou e Sehova pea mo tana kautahi kia nātou.

Ko te akonaki fakaʼosi ʼi te koga ʼaia ʼo te polokalama neʼe fai e Wallace Liverance, ʼe kau ki te kau faiako ʼo Kalaate pea neʼe gāue ia taʼu e 17 ʼi Polivia. Neʼe ina fehuʼi age fēnei ki te kau ako fuli: “ ʼE koutou ʼahiʼahiʼi anai koa te ʼAtua?” ʼE tonu ke nātou ʼahiʼahiʼi feafeaʼi ia ia? Ko te puleʼaga ʼo Iselaele neʼe nātou ʼahiʼahiʼi kovi te ʼAtua. (Teutalonome 6:​16) Neʼe ʼui fēnei e te Tēhina: “ ʼE mahino papau ia, ʼe kovi te ʼahiʼahiʼi ʼo te ʼAtua ʼaki he ʼu meo peʼe ko he muhumuhu, peʼe ko te mole falala ʼaē ʼe ko te ʼAtua ʼaē ka ina fakatokatoka ia meʼa fuli.” Neʼe ina fakaloto mālohiʼi fēnei ia nātou: “ ʼI takotou tau atu ki te fenua foʼou ʼaē ʼe fekauʼi koutou kiai, koutou tauʼi te taʼi manatu ʼaia.” Kae, koteā te faʼahiga fai ʼaē ʼe lelei moʼo ʼahiʼahiʼi ʼo te ʼAtua? Neʼe fakamahino fēnei e te Tēhina ko Liverance: “ ʼE tonu ke koutou tui ki te ʼu meʼa ʼaē ʼe ina ʼui atu, ke koutou mulimuli fakalelei ki te ʼu meʼa ʼaia, ʼo koutou tuku kia ia ke ina fakatokatoka te faʼahi ʼaia.” Ohage ko tona fakahā ia Malakia 3:​10, ʼe fakaafe e Sehova tana hahaʼi, ʼo ina ʼui fēnei: “Koutou fakalelei age, ka ke koutou ʼahiʼahiʼi ʼau.” Neʼe ina fakapapau mai, kapau ʼe nātou agatonu ʼo nātou ʼaumai tanatou vahe hogofulu ki te ʼu koloā ʼo te fale lotu, pea ʼe ina tapuakina anai nātou. Neʼe fehuʼi fēnei e te tēhina: “He koʼe koa ʼe mole koutou fai feiāʼi takotou gāue faka misionea? ʼE loto e Sehova ke koutou mālo ʼi te faʼahi ʼaia, koia koutou ʼahiʼahiʼi ia ia. Koutou pipiki ki te meʼa ʼaē neʼe fekauʼi koutou kiai. Koutou fai te ʼu fakatonutonuʼi ʼaē ʼe ina loto ke koutou fai. Koutou faʼa kātaki. Koutou ʼiloʼi papau ʼe ina tapuakiʼi anai koutou.” ʼI tokoni lelei leva kia nātou fuli ʼaē ʼe nātou tauhi kia Sehova!

ʼI te ʼosi hivaʼi ʼo te katiko, neʼe mole kei fai he ʼu akonaki, kae neʼe ko te ʼu fakafehuʼi fakafiafia ʼaē neʼe fai.

Ko He ʼu Palalau ʼAoga Ki Te Fai Faka Mafola

Ko Mark Noumair, ko he faiako foʼou ʼi te fale faiako ʼo Kalaate, neʼe ina fakaafe te kau ako ke nātou fakamatala he ʼu meʼa neʼe hoko kia nātou ʼi te fai faka mafola lolotoga tanatou kau ki te ako. Ko nātou ʼaia neʼe nātou faka maʼuhigaʼi te fai ʼo he ʼu fakatuʼutuʼu ʼi te fai faka mafola, pea neʼe nātou foaki ki te hahaʼi ʼaē neʼe fakalogo te ʼu manatu ʼaoga ke feala hanatou fakaʼaogaʼi.

Lolotoga te fakaʼosi ʼo tanatou ako, ko te kau ako ʼo te kalasi ʼaia ʼo Kalaate, neʼe nātou maʼu tāfito te fealagia ʼaē ke nātou fakatahitahi mo te hahaʼi ʼo te ʼu Komite ʼo te Filiale mai te ʼu fenua e 42, ʼaē neʼe kau mo nātou ki te ako makehe ʼaē neʼe hoko ʼi te Fale Faiako ʼo Patterson. Tokolahi ia nātou neʼe ko te kau misionea ʼāfea. ʼI te polokalama, neʼe fai te ʼu fakafehuʼi mo te kau misionea ʼaē neʼe nātou fakafofoga te 3, mo te 5, mo te 51, pea mo te 92 kalasi ʼo Kalaate, pea mo nātou ʼaē neʼe ʼōmai mai te Tahi Faleako ʼo Kalaate ʼi Siamani. Neʼe ʼaoga ʼaupito tanatou ʼu fakamatala!

Neʼe nātou fakamatala te ʼu meʼa ʼaē neʼe logoʼi e te kau misionea ʼi tanatou sisio ki te tuputupu ʼo lahi ia nātou ʼaē ʼe nātou vikiviki ia Sehova ʼi te ʼu fenua ʼaē neʼe fekauʼi ai nātou, heʼe kua liliu te tokosiʼi ko te lauʼi hogofulu afe. Neʼe nātou fakamatala tanatou kau ʼaē ki te ʼave ʼo te logo lelei ki te ʼu ʼapi ʼaē ʼe tuʼu mamaʼo ʼi te ʼu moʼuga ʼo te cordillère des Andes pea mo te ʼu kolo ʼaē ʼe tuʼu ʼi te matapuna ʼo te Vaitafe ʼo Amasone. Neʼe nātou fai faka mafola ki te hahaʼi ʼaē neʼe mole popoto ʼi te lautohi. Neʼe nātou fakamatala te faigataʼa ʼaē kia nātou te ako ʼo te ʼu lea foʼou, pea mo nātou talanoa ʼo ʼuhiga mo te temi ʼaē ka feala moʼoni ai ki te kau misionea ke nātou fai faka mafola, pea mo nātou fai he ʼu akonaki ʼi he tahi lea, ohage ko te lea faka Siaina. Neʼe nātou fai mo te ʼu faʼifaʼitaki ʼi te fai faka mafola ʼi te lea faka Sepania, pea mo te lea faka Siaina. Neʼe nātou fakahā ʼe lelei anai te gāue ʼa te kau misionea mo kapau ʼe nātou ako te lea ʼo te fenua, pea mo nātou ako peʼe feafeaʼi te faʼahiga manatu ʼa te hahaʼi. Neʼe nātou talanoa ʼo ʼuhiga mo te ʼu faigataʼaʼia ʼo te maʼuli, ʼaē ʼe tau hoko ʼi te ʼu fenua masiva, pea nātou ʼui fēnei: “ ʼE tonu ke ʼiloʼi e te kau misionea, ʼi ʼihi temi, ʼe hoko te ʼu ʼaluʼaga ʼaia ʼuhi ko te kaihaʼa ʼo te hahaʼi e te ʼu puleʼaga. ʼE lelei age ki he misionea ke ina faʼifaʼitakiʼi ia Sesu, ʼaē neʼe ʼofa mamahi ki te hahaʼi, ʼaē neʼe hage ko he ʼu ōvi neʼe mole ʼi ai honatou tagata tauhi manu.”

ʼI te ʼosi hivaʼi ʼo te katiko, neʼe hoko atu te polokalama ʼaki te akonaki ʼo A. D. Schroeder, ʼaē ʼe kau ki te Kolesi Pule. Neʼe ina maʼu te pilivilesio ʼaē ko te kau ʼi te kau ʼuluaki tagata faiako ʼo te Faleako ʼo Kalaate ʼi tona avahi ʼi te taʼu 1943. Neʼe tau mo feʼauga te akonaki fakaʼosi ʼo te polokalama, he neʼe talanoa ki te kupu tāfito ʼaenī “Koutou Fetapā Kia Sehova ʼi Tona ʼUhiga Tuʼi ʼAliki.” Ko te akonaki ʼo te Tēhina ko Schroeder ʼo ʼuhiga mo te kapite 24 ʼo Pesalemo, neʼe leleiʼia ʼaupito ʼe nātou fuli ʼaē neʼe kau ki te fakatahi, ʼi tana fakahā te pilivilesio lahi ʼaē ko te fetapā kia Sehova ʼi tona ʼuhiga Tui ʼAliki.

ʼI te ʼosi tufa ʼo te ʼu pepa ʼo te kau misionea, pea mo hivaʼi te katiko fakaʼosi, neʼe fai e Karl Klein, ʼaē ʼe kau ki te Kolesi Pule, te faikole fakaʼosi. Neʼe ko he polokalama ʼaoga pea mo fakamokomoko ʼi te faʼahi fakalaumālie!

Hili kiai ni ʼu ʼaho ʼi te kua ʼosi foaki ʼo te ʼu pepa ʼa te kau misionea, neʼe kamata folau te toko 48 kau misionea ʼaia ʼo te kalasi 100 ki te ʼu fenua e 17 ʼaē neʼe fekauʼi nātou kiai. Kae ʼe mole nātou foʼofoʼou ʼi te minisitelio katoa. Neʼe kua lahi tonatou ʼu taʼu ʼi te minisitelio katoa faka Kilisitiano. ʼI te fakaafe ʼo nātou ki Kalaate, neʼe nātou taʼu 33 pea neʼe ko taʼu e teitei 12 ʼaē kua nātou kau ai ki te minisitelio katoa. Ko ʼihi ia nātou neʼe nātou kau ki te ʼu Famili ʼo te Petele ʼo te Sosiete Watch Tower, ʼaē ʼe maʼu ʼi te malamanei katoa. Ko ʼihi neʼe ko te kau tagata taupau feʼaluʼaki. Ko ʼihi ʼi te kau ako neʼe kua ʼosi nātou kau ki te faʼahiga selevisi ʼi te ʼu fenua matāpule, ʼi Afelika, ʼi Eulopa, ʼi te Potu Toga ʼo Amelika, ʼi te ʼu motu, pea neʼe nātou gāue tahi mo he kūtuga lea kehe ʼi tonatou fenua. Kae ʼi te temi nei, ʼe nātou fakatahi mo ʼihi kau misionea kaugamālie, ʼo nātou fiafia ʼi te ʼui fēnei, ‘ ʼE mātou gāue anai ʼi te potu fuli pe ʼi te malamanei, ʼi te faʼahi ʼaē ʼe mātou ʼaoga ai.’ Ko te meʼa ʼaē ʼe nātou loto tāfito kiai, ʼe ko te fakaʼaogaʼi ʼo tonatou maʼuli moʼo fakavikiviki kia Sehova.

[Talanoa ʼo te pasina 27]

Ko Te ʼu Agaaga ʼo Te Kalasi:

Ko te lahi ʼo te ʼu fenua ʼaē neʼe fakafofoga: 8

Ko te lahi ʼo te ʼu fenua ʼaē neʼe hinoʼi nātou kiai: 17

Ko te hahaʼi ʼo te kau ako: 48

Ko te fakafuafua ʼo te ʼu taʼu ʼo te kau ako: 33,75

Ko te fakafuafua ʼo te ʼu taʼu ʼi te moʼoni: 17,31

Ko te fakafuafua ʼo te ʼu taʼu ʼi te gāue temi katoa: 12,06

[Paki ʼo te pasina 26]

Ko te 100 Kalasi ʼo Te Kau Misionea ʼo Te Faleako Faka Tohi-Tapu ʼo Kalaate ʼo Te Sosiete Watchtower

ʼI te lisi ʼaē ʼe tuʼu ʼi lalo, ʼe kamata mai muʼa ʼo aʼu ki muli, pea ko te ʼu higoa ʼaē ʼe tuʼu ʼi te lisi ʼe lau mai te faʼahi hema ki te faʼahi mataʼu.

(1) Shirley, M.; Grundström, M.; Genardini, D.; Giaimo, J.; Shood, W.; Phair, P.; Buchanan, C.; Robinson, D. (2) Pine, C.; Kraus, B.; Racicot, T.; Hansen, A.; Beets, T.; Berg, J.; Garcia, N.; Fleming, K. (3) Whinery, L.; Whinery, L.; Harps, C.; Giaimo, C.; Berg, T.; Mann, C.; Berrios, V.; Pfeifer, C. (4) Randall, L.; Genardini, S.; Kraus, H.; Fleming, R.; DʼAbadie, S.; Shirley, T.; Stevenson, G.; Buchanan, B. (5) Robinson, T.; Garcia, J.; Harps, P.; Racicot, D.; DʼAbadie, F.; Phair, M.; Stevenson, G.; Shood, D. (6) Beets, L.; Pfeifer, A.; Berrios, M.; Pine, J.; Mann, L.; Randall, P.; Grundström, J.; Hansen, G.