Ko Te Kau Ako ʼo Te Folafola ʼa Te ʼAtua ʼe Nātou Maʼu Pepa

OHAGE ko te kau Kilisitiano ʼo te ʼuluaki sēkulō, ʼe ʼiloa te kau Fakamoʼoni ʼa Sehova ʼi te malamanei katoa ʼuhi ko tanatou fai faka mafola ʼi te ʼu ʼapi. Ko te gāue ʼaia neʼe faka maʼuhigaʼi ʼi te ʼu ʼuluaki palalau ʼaē neʼe fai ʼi te polokalama ʼo te kau maʼu pepa ʼo te 102 kalasi ʼo te Faleako Faka Tohi-Tapu ʼo Kalaate ʼo te Watchtower.

ʼI te ʼaho 1 ʼo Malesio 1997, ko Albert Schroeder, ko te Tēhina ʼaē ʼe kau ki te Kolesi Pule ʼa te kau Fakamoʼoni ʼa Sehova, neʼe ina fakatokagaʼi te alatike neʼe tā ʼi te nusipepa Fakafalani Le Point. Neʼe talanoa te alatike ʼaia ki te ʼu fakatuʼutuʼu ʼaē neʼe fai e te ’Ēkelesia Katolika Loma moʼo kamata ʼo te gāue fai faka mafola ʼi te ʼu ʼapi ʼi Italia. Neʼe ʼui fēnei e te alatike: “Neʼe tā e te Vatikano te Evaselio ʼo sagato Maleko e tahi miliona, ʼo faka fealagia ai ki tana kau misionea ke mole nātou ʼolo ʼātea ki te telituale pea mo nātou tauʼi te faiva ʼaē ʼa te kau Fakamoʼoni ʼa Sehova, ʼi te ‘tuku’ ʼo te logo lelei ʼi te ʼu ʼapi.”

ʼE kau te kau maʼu pepa ʼaē e 48 kia nātou ʼaē neʼe nātou faʼifaʼitakiʼi te ʼu faʼahiga fai faka mafola faiva ʼa Sesu ʼi tana faka mafola te Folafola ʼa te ʼAtua. Neʼe nātou ʼōmai mai te ʼu fenua e 8 ki te Fale Faiako ʼo te Watchtower ʼo Patterson, ʼi New York. Lolotoga tanatou ako ia māhina e nima, neʼe nātou ako te Tohi-Tapu katoa. Ko te ako ʼaia, neʼe toe kau ai foki mo te hisitolia ʼo te kautahi ʼa te ʼAtua, te ʼu meʼa ʼaē ʼe ʼaoga ki te maʼuli faka misionea, pea mo te fua ʼo te laumālie ʼo te ʼAtua. Ko te ʼu meʼa fuli ʼaia neʼe fai pe ki te fakatuʼutuʼu e tahi​—moʼo teuteuʼi ʼo nātou ki tanatou gāue faka misionea ʼi te ʼu fenua e 17 ʼaē ka fekauʼi nātou kiai. ʼI te temi ʼaē neʼe nātou maʼu ai tanatou ʼu pepa, ko te ʼu tēhina mo tuagaʼane e toko 5 015 mai te ʼu fenua kehekehe neʼe nātou kau mo nātou ki te fiafia ʼi te lakaga ʼaia. Koteā te tokoni ʼaoga fakaʼosi ʼaē neʼe maʼu e te kau ako ʼaia ʼo Kalaate?

Ko He Fakaloto Mālohi Ki Te ʼu Misionea Foʼou ʼi Tona Temi Totonu

ʼI te ʼosi fai e te pelesita te ʼu ʼuluaki palalau, ko Ralph Walls, ko te Tēhina ʼaē ʼe tokoni ki te Komite ʼo te Kolesi Pule ki te Hahaʼi Gāue, neʼe ina fai te ʼuluaki akonaki nounou ʼaē neʼe foaki ai he ʼu tokoni ʼe ʼaoga ki te kau misionea foʼou. Ko te kupu tāfito ʼo tana akonaki: “Koutou Manatuʼi Ke Koutou ʼOʼofa.” Neʼe ina fakahā ia 2 Timoteo kapite 3, neʼe fakakikite ʼi te Tohi-Tapu, ʼe tuputupu anai te heʼeʼofa ʼi te mālama. ʼO mulimuli ki te fakamatala ʼo te ʼofa ʼaē ʼe tuʼu ia 1 Kolonito 13:​1-7, neʼe ina fakamanatuʼi age ki te kau misionea foʼou te puani ʼaenī: “Ko koutou, ʼi tokotou ʼuhiga misionea, ʼe fakalaka age anai takotou ʼu hola ʼi te ʼu hola ʼaē ʼe tonu ke koutou fai. ʼE lagi lahi ʼaupito tokotou ʼatamai mālama ʼuhi ko takotou ako ʼi Kalaate. Peʼe lagi tou gāue kinakina ʼi totatou maʼua ʼi te ʼu filiale. Kae ko tatatou ʼu faiga fuli ʼaia pea mo tatatou ʼu sakilifisio, ʼe mole honatou ʼaoga mo kapau ʼe tou galoʼi te ʼofa.”

ʼI te hoko atu ʼo te polokalama, ko te Tēhina ko Carey Barber, ʼaē ʼe kau ki te Kolesi Pule, neʼe palalau ʼo ʼuhiga mo te akonaki “ ʼE Haga Takitaki Tatou e Sehova ʼo Aʼu Ki Te Mālo.” Talu mai te kamata ʼo te ʼosi ʼo te ʼUluaki Tau Faka Malamanei, neʼe takitaki e Sehova ʼAtua tana ʼu kaugana agatonu ki te mālo ʼi tanatou kalagaʼi ia te logo lelei ʼo tona Puleʼaga, logope la te ʼu fakataga. ʼI te taʼu 1931, ko nātou ʼaē neʼe fakahigoaʼi ʼi te temi ʼaia ko te kau Ako ʼo te Tohi-Tapu, neʼe nātou fetogi tonatou higoa ʼaki te higoa kau Fakamoʼoni ʼa Sehova, ʼo nātou fakatupu lotomamahi ki te kau takitaki lotu ʼo te Keletiate. Neʼe ʼui fēnei e te Tēhina ko Barber: “ ʼI te temi nei, ko te 102 kalasi ʼo te kau misionea ʼaē neʼe ako ʼi Kalate, kua nātou maʼu te pilivilesio lahi ke nātou kau mālohi ki te gāue faka kolōlia ʼaē ʼe faka fealagia ki te tokolahi ke nātou ako te higoa taputapu ʼaia.” ʼE nātou toe kau ki te lisi loaloaga ʼo te kau misionea e toko 7 131 ʼaē neʼe akoʼi ʼi te Faleako ʼo Kalaate pea neʼe nātou tokoni ki te mafola ʼo te fagonogono ʼo te Folafola ʼa te ʼAtua mai te ʼu fenua e 54 ʼi te taʼu 1943 ki te ʼu fenua e 233 ia ʼaho nei.

Ko te Tēhina ʼaē neʼe ina fai te akonaki ʼaē neʼe hoa mai, ko Lloyd Barry, ʼaē ʼe toe kau foki mo ia ki te Kolesi Pule, neʼe maʼu pepa ia ʼi te 11 kalasi ʼo Kalaate pea neʼe gāue faka misionea ʼi Saponia lolotoga taʼu e 25. Neʼe ina foaki he ʼu fakaloto mālohi ʼaki tana akonaki ko tona kupu tāfito ʼaenī, “Koutou Taupau Te ʼu Meʼa ʼAia.” Neʼe ina ʼui fēnei ki te kau ako: “Ko te lahi ʼo tokotou fiafia ʼe koutou maʼu tāfito anai ʼi te faʼa kātaki.” Koteā te ʼu fakapale ʼaē ʼe fakatupu e te faʼa kātaki ʼi te gāue faka misionea peʼe ʼi te tahi ʼu gāue faka teokalatike? “Ko te meʼa tāfito, ko tatatou faʼa kātaki ʼe ina fakafiafia te loto ʼo Sehova . . . ʼE ʼi ai te fiafia lahi mokā ʼe tou agatonu ʼi te ʼu ʼahiʼahi . . . Ke liliu te gāue misionea ko te fakatuʼutuʼu tāfito ʼo tokotou maʼuli . . . Ko tokotou fakapale ʼe ko he ʼui atu anai ‘ ʼe lelei’ ʼaki he lotomāfana.” (Mateo 25:21; Tāʼaga Lea 27:11) ʼI te fakaʼosi ʼo tana akonaki, neʼe tokoni te Tēhina ko Barry ʼaki he loto fakamalotoloto ki te kau misionea foʼou ke nātou “taupau te ʼu meʼa ʼaia” ʼo nātou tui papau ko te gāue faka misionea ʼe liliu anai ko honatou maʼuli moʼoni.​—1 Timoteo 4:​16.

“Koteā Te Meʼa ʼAē Ka Koutou Sisio Anai Kiai?” Ko te fehuʼi ʼaia neʼe fai e te Tēhina ko Karl Adams, ʼaē neʼe kau ki te akoʼi ʼo te ʼu kalasi kehekehe ʼo Kalaate. Neʼe ina fakahā, ko te ʼu meʼa ʼaē ʼe sio anai kiai te kau misionea ʼi tonatou telituale ʼe mole fakalogo pe ki tonatou ʼu mata fakasino, kae ʼe toe fakalogo foki ki te ʼu mata ʼo tonatou loto. (Efesi 1:​18) Neʼe fakatātā te faʼahi ʼaia ʼaki te ʼu meʼa ʼaē neʼe sisio kiai te ʼu malomu Iselaelite ʼi te temi ʼaē neʼe nātou ʼolo ʼo vakaʼi te Kele ʼo te Fakapapau. Neʼe tatau te ʼu meʼa ʼaē neʼe sisio kiai te ʼu malomu e toko 12 ʼi te faʼahi fakasino, kae ko te ʼu malomu pe e lua neʼe nā sisio ki te Kele ʼo te Fakapapau ʼaki te manatu ʼa te ʼAtua. ʼE toe feiā pe mo te kau misionea ʼe feala ke kehekehe tanatou ʼu faʼahiga sio. ʼI ʼihi ʼu fenua ʼaē ʼe feala ke nātou gāue ai, ʼe lagi nātou sio anai ki te hahaʼi māsisiva, ki te ʼu mamahi, pea mo te heʼe ʼamanaki. Kae ʼe mole tonu ke nātou manatu kovi pea mo nātou līaki tonatou telituale. Neʼe fakamatala e te Tēhina ko Adams ko te tuagaʼane misionea ʼo te kalasi neʼe hoki ʼosi atu, neʼe ina ʼui te meʼa ʼaenī: “ ʼAki te ʼu fihifihia ʼaia neʼe hoko, kua mahino kia ʼau ʼe tonu ke ʼau nofo ʼi henī. Ko te ʼu hahaʼi ʼaia, ʼe ʼaoga kia nātou he ʼamanaki ki te ka haʼu. ʼE ʼau loto ke ʼau fai he meʼa ke lelei age tonatou maʼuli.” Moʼo fakaʼosi, neʼe fakaloto mālohiʼi e te Tēhina ko Adams te kau misionea foʼou ke nātou sioʼi te ʼu fenua ʼaē ka nātou ʼolo kiai ohage ko he ʼu koga meʼa neʼe fakatuʼutuʼu e te ʼAtua ke kau ki Tona Palatiso Lahi, pea mo sioʼi te hahaʼi ʼaia ohage ko he ʼu hahaʼi ʼe kau anai ki te sosiete ʼo te mālama foʼou.

Ko te akonaki fakaʼosi ʼo te koga ʼaia ʼo te polokalama neʼe fai e te Tēhina ko Wallace Liverance, ʼaē neʼe gāue lolotoga ni ʼu taʼu ki te gāue faka misionea ʼi muʼa ʼo tana liliu ko he tagata faiako ʼi Kalaate. Ko tona kupu tāfito ʼaenī, “Koutou Gāue ʼAki He Fakasiosio Tonu ʼi Te ʼu Gāue Fakaofoofo ʼa Te ʼAtua.” Ko te fakasiosio tonu ʼe pipiki kiai te aga tokaga, mo te aga fakapotopoto, pea ke tonu tana ʼu manatu. ʼE ko he meʼa neʼe mole fai e te Hau ʼo Iselaele ko Saulo.​—1 Samuele 13:​9-​13; 15:​1-​22.

ʼE hā te fakasiosio tonu ʼa he tahi ʼi tana tali te ʼu fihifihia ʼaē ʼe hoko mokā ina faigaʼi ke fai he ʼu fetogi ʼi tona maʼuli, ʼo kau kiai mo te ako ʼo he lea foʼou pea mo te ako ʼo te ʼiloʼi ʼo te hahaʼi. Ko te ʼu meʼa ʼaē ʼe hoko ki te kau misionea ʼi tanatou tau mo te ʼu fihifihia pea mo tanatou mālo ʼi te ʼu fakataga, ʼe feala ke nātou fakamālohiʼi nātou ʼi te faʼahi fakalaumālie, ohage pe ko te fakaloto mālohiʼi ʼo Sosue mo Kalepe ʼi tanā hū ki te fenua ʼaē neʼe foaki age e te ʼAtua kia nāua.

Ko Te ʼu Fai Fakafehuʼi

ʼI te hoko atu ʼo te polokalama, neʼe kau kiai te ʼu fakafehuʼi. Ko Harold Jackson neʼe ina fai fehuʼi kia Ulysses Glass, ko te sikalaipe pea mo te tagata faiako ʼo te Faleako ʼo Kalaate talu mai fualoa, pea kua taʼu 85 ʼi te temi nei. ʼE tokolahi te kau misionea ʼaē ʼe kei ʼi te selevisi ʼe nātou manatuʼi lelei tona ʼu taʼu ʼaē neʼe agatonu ai ʼi te fai akonaki pea mo te tagata faiako. ʼOsi ʼaia, pea neʼe haʼu ia te Tēhina ko Mark Noumair, ko te tagata faiako ʼo Kalaate ʼaē neʼe gāue ʼi te selevisi lolotoga ni ʼu taʼu ʼi Afelika ʼi muʼa ʼo tana kau ki te hahaʼi gāue ʼo te Faleako ʼo Kalaate. Neʼe fai fehuʼi ki te kau ako ʼo ʼuhiga mo tonatou minisitelio ʼi te ʼu māhina ʼaē e 5 ʼo tanatou ako. Ko te ʼu meʼa ʼaē neʼe hoko kia nātou ʼe hā ai ʼe ʼi ai te ʼu hahaʼi ʼe nātou fia logo ki te Folafola ʼa te ʼAtua ʼi te telituale ʼaia.

ʼOsi ʼaia, pea neʼe fai palalau ia Robert Ciranko pea mo Charles Molohan mo te ʼu tagata popoto ʼaē neʼe kau ki te tahi ako ʼi Patterson, neʼe ko te ako ki te hahaʼi ʼo te ʼu filiale. Ko tanā tokoni ki te kalasi ʼaē neʼe maʼu pepa, neʼe ʼaoga ke fakahā he agavaivai pea mo gāue fakatahi ki te logo tahi ʼa te kokelekasio. Neʼe fakamahino ki te kau maʼu pepa, neʼe mole tonu ke nātou fai fakatomuʼa he ʼu manatu hala ʼo ʼuhiga mo te meʼa ʼaē ka hoko ʼi te gāue faka misionea, kae ʼe tonu ke nātou tali ʼaki he lotolelei te ʼu faʼahiga ʼaluʼaga kehekehe. ʼE mahino papau ia, ko te maʼuliʼi e te kau misionea te tokoni ʼaia ʼe tokoni anai kia nātou ke nātou fakahoko tonatou ʼu maʼua ʼi tonatou ʼuhiga tagata faiako ʼo te Folafola ʼa te ʼAtua.

Moʼo fakaʼosi, ko Theodore Jaracz, ʼaē ʼe kau ki te Kolesi Pule, neʼe ina fai te akonaki kia nātou ʼaē neʼe nātou kau ki te fakatahi ʼaia, ko tona kupu tāfito ʼaē “ ʼE Lave Koa Te ʼu Meʼa ʼo Te Mālama Kia Tatou, Peʼe Ko Tatou Koa ʼAē ʼe Lave Ki Te Maʼuli ʼo ʼIhi?” Neʼe ina fakamahino, mokā tou fakahā ʼi totatou ʼuhiga Kilisitiano te fua ʼo te laumālie, ʼe feala ke tou uga te hahaʼi ki te meʼa ʼaē ʼe lelei. Neʼe ina toe ʼui fēnei, “Ko te kau misionea ʼaē ʼe fekauʼi e te kautahi ʼa Sehova, ʼe lahi tanatou ʼu fakamatala ʼe hā mai ai neʼe nātou fetogi te manatu ʼa te hahaʼi, ʼi te faʼahi fakalaumālie.” ʼOsi ʼaia, pea neʼe toe talanoa ki te ʼu fakamatala neʼe fai e ʼihi neʼe tokoniʼi ke nātou tauhi ki te ʼAtua, ʼaki te ʼu faʼifaʼitaki lelei ʼaē neʼe tuku e te kau misionea. Moʼo fakaʼosi, neʼe ina ʼui fēnei: “ ʼOfa pe ke koutou taupau maʼu te matagafua ʼaē neʼe maʼu e te hahaʼi ʼa Sehova pea mo haga fisifisi te ʼu matapā ʼo tokotou telituale ʼaē neʼe hinoʼi atu ʼo koutou kumi te ʼu hahaʼi ʼaē ʼe tau mo te logo lelei . . . Tahi ʼaē meʼa, ʼaki takotou aga faitotonu mo takotou aga maʼa, koutou fakafeagai ki te mālama ʼaenī, pea mo koutou uga te hahaʼi ke nātou vikiʼi pea mo faka maʼuhigaʼi ia Sehova.”

ʼI te fakamanatuʼi ʼo te polokalama, ko te pelesita neʼe ina lau te ʼu ʼalofa ʼo te ʼu fenua kehekehe pea neʼe ina fakahā te ʼu pepa ʼo te kalasi pea mo te ʼu fenua ʼaē ʼe hinoʼi kiai te kau misionea. ʼOsi ʼaia, pea ko te tahi ʼi te kau maʼu pepa neʼe ina lau te tohi ʼaē neʼe fai e te kalasi moʼo fakamālo ki te ako ʼaē neʼe fai age kia nātou. ʼE mahino ia, ko te polokalama ʼaē neʼe foaki ai te ʼu pepa ki te 102 kalasi neʼe ina fakaloto mālohi te hahaʼi fuli ʼaē neʼe kau ki te fakatahi ke nātou toe fakapapau ke nātou fai mālohi te faka mafola ʼo te Folafola ʼa te ʼAtua.

[Paki ʼo te pasina 31]

Ko Te 102 Kalasi ʼo Te Kau Misionea ʼo Te Faleako Faka Tohi-Tapu ʼo Kalaate ʼo Te Sosiete Watchtower

ʼI te lisi ʼaē ʼe tuʼu ʼi lalo, ʼe kamata mai muʼa ʼo aʼu ki muli, pea ko te ʼu higoa ʼaē ʼe tuʼu ʼi te lisi ʼe lau mai te faʼahi hema ki te faʼahi mataʼu.

(1) Duffy, C.; Alexis, D.; Harff, R.; Lee, J.; Corey, V.; Nortum, T.; Mora, N.; Journet, F. (2) Djupvik, L.; Singh, K.; Hart, B.; Kirkoryan, M.; Lee, S.; Rastall, S.; Zoulin, K.; Kollat, K. (3) Singh, D.; Pitteloud, J.; Pitteloud, F.; Bokoch, N.; Torma, C.; Muxlow, A.; Richardson, C.; Nortum, D. (4) Harff, J.; Journet, K.; Barber, A.; Loberto, J.; Loberto, R.; Muxlow, M.; Mora, R.; Hart, M. (5) Torma, S.; Rastall, A.; Diaz, R.; Diaz, H.; Weiser, M.; Weiser, J.; Kirkoryan, G.; Zoulin, A. (6) Alexis, R.; Barber, D.; Djupvik, H.; Duffy, C.; Kollat, T.; Richardson, M.; Bokoch, S.; Corey, G.