Te Kau Maʼu Pepa ʼo Kalaate—“Ko He Kau Misionea Moʼoni!”
“KOTEĀ te faka ʼuhiga ʼo te misionea?” Ko te fehuʼi ʼaia neʼe fai e te nusipepa kua teitei hili kiai te ʼu taʼu e fāgofulu. Neʼe fakamatalatala e te tagata faitohi, ko te kau misionea moʼoni ʼe ko he ʼu meʼa gāue moʼo fai ʼo he ʼu fetogi faka sosiale pea mo faka ekonomike. Kae, ʼi te ʼAhotapu, ʼaho 5 ʼo Malesio, 1995, ʼi te Fale ʼo te ʼu Fakatahi ʼa te kau Fakamoʼoni ʼa Sehova ʼi Jersey City, neʼe fai ai te tali ʼe kehekehe ia. ʼI te lakaga fea? ʼI te temi ʼaē neʼe tufa ai te ʼu pepa ʼo te 98 kalasi ʼo te Faleako Faka Tohi-Tapu ʼo Kalaate ʼo te Sosiete Watchtower—ko he faleako ʼe ina fekauʼi te kau misionea ki te ʼu potu fuli ʼo te kele!
Hili pe te katiko ʼo te kamata pea mo te faikole, neʼe fakamālo ia Albert D. Schroeder ʼo te Kolesi Pule ki te toko 6 430 hahaʼi ʼaē neʼe kau ki te fono ʼaia. ʼI tana ʼu ʼuluaki palalau, neʼe fakamahinohino lelei e te Tēhina ko Schroeder te tupuʼaga ʼo te kehekehe ʼo te kau maʼu pepa ʼo Kalaate pea mo nātou ʼaē ʼe nātou fakahigoaʼi ko te kau misionea. Neʼe ina ʼui fēnei: “Ko te Tohi-Tapu ʼe ko te tohi tāfito ʼaia ki te kau maʼu pepa ʼo Kalaate.” Neʼe mole akoʼi te kau maʼu pepa ʼo Kalaate ke gāue ki he ʼu fetogi faka sosiale, kae neʼe akoʼi nātou ke nātou liliu ko he kau faiako ʼo te Folafola ʼa te ʼAtua. Koia, ʼe akoʼi tāfito ia nātou ke nātou tokakaga ki te meʼa fakalaumālie ʼaē ʼe ʼaoga ki te hahaʼi ʼi te ʼu fenua tai.
Ko te kau fai akonaki ʼaē neʼe hoa ki ai, neʼe nātou palalau ki te ʼu faʼahi kehekehe ʼe fakamoʼoni ai e te kau maʼu pepa ʼo Kalaate ko nātou ko te kau misionea “moʼoni.” Neʼe palalau age ia Charles Molohan kia nātou ʼaki te kupu tāfito ʼo tana akonaki “Koutou Haga Maʼu Te Fua Matalelei ʼi Tokotou ʼUhiga Misionea.” ʼAki tana fakatokagaʼi te palalau ʼa te ʼapositolo ko Paulo ʼaē ia Kolose 1:9, 10, neʼe fakamanatuʼi age e te Tēhina ko Molohan ki te kau maʼu pepa, ko te ʼu māhina e nima ʼaē kua hili neʼe tokoni kia nātou ke nātou tuputupu “ ʼi te ʼatamai mālama totonu ʼo ʼuhiga mo te ʼAtua.” Ko te faʼahi ʼaia ʼe tokoni anai kia nātou ke nātou fakatupu he ʼu fua ʼi te ʼu faʼahiga fai e lua: ʼaki tanatou maʼuliʼi te ʼu fua ʼo te laumālie ʼo te ʼAtua, pea mo tanatou vaevae te ʼu moʼoni ʼo te Tohi-Tapu mo niʼihi.
Neʼe hoa ki ai ia Daniel Sydlik ʼo te Kolesi Pule ʼaki te kupu tāfito fakatupu fakakaukau ʼaenī “ ʼAua Naʼa Koutou Fai He ʼu Fakatuʼutuʼu ʼe Fakatupu Tuʼutāmaki Ki Tokotou Maʼuli.” Neʼe ina fakahā te fehuʼi ʼaenī ʼa Sesu: “Koteā anai he meʼa ka foaki e he tagata moʼo fetogi ʼaki ʼo tona nefesi?” (Mateo 16:26) Neʼe fakatokagaʼi fēnei e te Tēhina ko Sydlik: “Ko te hahaʼi neʼe nātou fetogi tonatou maʼuli ke nātou maʼu he faʼahiga maʼuli ʼe faigafua age pea mo fīmālie age.” Kae, ko nātou ʼaē ʼe nātou maʼu he tui maʼuli ʼe mole feala ke nātou fakatō laloʼi tanatou tui mokā nātou felāveʼi mo he ʼu ʼahiʼahi. ʼE fakahā e te ʼu palalau ʼa Sesu, te maʼua ʼaē ke kita nofo teuteu ki te “foaki,” ko tona faka ʼuhiga, ko te sakilifisio moʼo maʼu ʼo he nefesi, peʼe ko te maʼuli. Neʼe fakaloto mālohiʼi te kau misionea foʼou ke nātou foaki tonatou nefesi katoa kia Sehova, mo te ʼu meʼa lelei ʼa nātou ki tana gāue!
Ki muli age, neʼe palalau ia William Van de Wall ʼo te Komite ki te Gāue, ki te manatu ʼaenī “Ko Te ʼApositolo Ko Paulo—Ko He Faʼifaʼitaki ʼe Tau Mo Feʼauga Ke Tou Muliʼi.” Neʼe fakamahino fēnei e te Tēhina ko Van de Wall: “Neʼe lagiaki e Paulo te gāue faka misionea ʼi te ʼuluaki sēkulō.” Koia, ko te ʼu faʼahi e fā neʼe fakahāhā lelei ʼo ʼuhiga mo he faʼifaʼitaki lelei neʼe tuku e te ʼapositolo ko Paulo ki te kau misionea ʼo te temi nei: (1) ko te tokaga fakamalotoloto ʼa Paulo pea mo tona ʼofa moʼoni ki te hahaʼi, (2) ko te fua lelei ʼo tana gāue ʼi te minisitelio, (3) ʼuhi ko tana fia mālalo, neʼe mole faiga ia ki he maʼu tuʼulaga, (4) pea mo tana falala mālohi kia Sehova.
Neʼe fai e Lyman A. Swingle ʼo te Kolesi Pule te akonaki ʼaki tona kupu tāfito ʼaenī: “Koutou Tuku Ke Sivisivi Koutou e Sehova ʼi Te Koga Meʼa Foʼou ʼAē Neʼe Hinoʼi Koutou Kiai.” ʼAki tana fakaʼaogaʼi te koga tohi ʼo te ʼaho, ʼaē ko te Pesalemo 139:16, neʼe fakamoʼoni e te Tēhina ko Swingle, ʼi tonatou ʼuhiga misionea foʼou, ʼe nātou felāveʼi anai mo he ʼu faigataʼaʼia pea ʼe ʼiloʼi e Sehova te ʼu puleʼaki. Neʼe ina fakaloto mālohiʼi fēnei: “Koutou kumi tokoni kia te ia, koutou palalau age ki ai mokā ʼe ʼi ai hokotou fihifihia. Koutou faigaʼi ke koutou mahino peʼe koteā tona finegalo.”
Neʼe palalau ia John E. Barr ʼo te Kolesi Pule, ki te manatu ʼaenī “ ʼE Tuputupu Fakaofoofo Takotou Tui.” (2 Tesalonika 1:3) Ia Luka 17:1, ʼe tou lau neʼe ʼui fēnei e Sesu: “ ʼE mole feala ke ʼaua naʼa hoko he ʼu meʼa fakatupu tūkia.” Ko ʼihi neʼe nātou tūkia ʼuhi ko te ʼu ʼuhigaʼi tagata ʼo tonatou ʼu kaugā misionea. Kae neʼe fakaloto mālohiʼi e te Tēhina ko Barr ke maʼu e te kau misionea te tui ʼaē ʼe ʼaoga moʼo fakamolemole. ʼIo, neʼe ko te ʼaluʼaga ʼaē neʼe fakaʼui fēnei ai e te kau tisipulo ʼa Sesu: “Foaki mai kia mātou he tui ʼe lahi ake.” (Luka 17:2-5) E lagi feala pe ke toe ʼahiʼahiʼi foki te tui ʼa te kau misionea e te ʼu fetofetogi kehekehe ʼo te kautahi. Neʼe fehuʼi fēnei e te Tēhina ko Barr, “ ʼE tou maʼu koa te tui ʼaē ke tou tali te ʼu faʼahi ʼaia, peʼe liliu anai koa te ʼu meʼa ʼaia ko he ʼu fihifihia ʼe nātou hage ko he moʼuga?”
Neʼe hoa mai kiai te ʼu tagata faiako e lua ʼo nā fai te ʼu tokoni. Neʼe uga e Jack Redford te kau maʼu pepa ke nātou taupau he aga ʼe lelei. Neʼe ina ʼui neʼe ʼi ai te misionea neʼe mavae ʼi tona telituale ʼuhi ko te ʼu palalau neʼe fai e te ʼu kaugā misionea. Kae, ʼe fakatokaga mai e te Tohi-Tapu ke ʼaua naʼa tou hoko ʼita. (Tagata Tānaki 7:9) Neʼe ina fakaloto mālohi fēnei, “Koutou maʼu te aga ʼaē ʼe lelei, koutou fakamolemole te ʼu kiʼi hala ʼo nātou ʼi ʼokotou tafa.”
Neʼe fehuʼi fēnei e Ulysses Glass, te sikalaipe ʼo Kalaate: “Kua koutou teuteu koa ke koutou tauʼi ʼo maui mālie ‘te ʼu temi pea mo te ʼu meʼa fakafokifā ʼe hoko’ ”? (Tagata Tānaki 9:11) Neʼe fakatokagaʼi fēnei e te Tēhina ko Glass, “ ʼe tonu ke tou teuteu tuʼumaʼu ke ʼi ai he ʼu fetogi ʼi totatou faʼahiga maʼuli, pea ko ʼihi fetogi ʼe feala ke hage ʼe fakatupu mamahi.” Neʼe fokifā pe neʼe felāveʼi ʼihi misionea mo te mahamahaki, mo te ʼu fihifihia faka famili, ʼo tupu ʼaki ai he mavae ʼa niʼihi ʼi te telituale ʼaē neʼe hinoʼi nātou kiai. Neʼe ʼui fēnei e te Tēhina ko Glass, “logo aipe he faʼahiga meʼa ʼe feala ke hoko fakafokifā kia koutou, ʼe koutou ʼiloʼi ko Sehova ʼe mālama ki te faʼahi ʼaia pea ʼe tokaga ia kiai. Kapau ʼe tou tuku tatatou falala kia te ia, ʼe tou ʼiloʼi ʼe tou mālo anai!”
Neʼe fakaʼosi te ʼu akonaki ʼo te uhu ʼaki te akonaki ʼaenī pea koʼeni tona kupu tāfito “Neʼe Tuku Keheʼi Nātou Ki Te Gāue Misionea.” Neʼe fai e Theodore Jaracz ʼo te Kolesi Pule te fehuʼi ʼaē neʼe lagaʼi ʼi te kamataʼaga, ʼaē, “Koteā te faka ʼuhiga ʼo he misionea?” Moʼo tali ki te fehuʼi ʼaia, neʼe talanoa ki te ʼu kapite 13 pea mo te 14 ʼo te tohi ʼo te ʼu Gāue, ʼo ʼuhiga mo te gāue faka misionea ʼo Paulo pea mo Palanapasi. ʼE mahino ia, neʼe mole tokaga te gāue ʼaia ki he fakatokatoka ʼo te ʼu fihifihia faka sosiale, kae neʼe tokaga ia ki te ‘kalagaʼi ʼo te logo lelei.’ (Gāue 13:32) Neʼe fehuʼi fēnei e te Tēhina ko Jaracz: “ ʼE mole koutou ʼio koa la neʼe fakahā e Paulo pea mo Palanapasi peʼe tonu ke feafeaʼi te misionea moʼoni?” Pea neʼe fehuʼi age ki te misionea kua māhani ko Robert Tracy ʼo Mekesike ke ina fakamatalatala te ʼu meʼa ʼe malave ʼi te loto, neʼe hoko kia ia ʼi tona ʼuhiga tagata faka mafola evaselio.
Neʼe fakaʼosi te polokalama ʼo te uhu ʼaki te tufa ʼo te ʼu pepa e te Tēhina ko Schroeder ki te toko 48 kau maʼu pepa. Neʼe ōfo ia nātou ʼaē neʼe nātou kau ki te fono ki tanatou logo ki te lau ʼo te ʼu fenua e 21 ʼaē ka hinoʼi kiai te kau misionea: Barbades, Bénin, Costa Rica, Côte dʼIvoire, Ekuatole, Estonie, Guinée-Bissau, Guinée Équatoriale, Honduras, Latvia, Lepupilika Centrafricaine, les Îles sous le Vent, l’île Maurice, Mosapike, Nikalakua, Palakuai, Pelu, Polivia, Senekale, Taiuani, pea mo Venesuela.
ʼI te hili ʼo te temi kai, neʼe fakatahi ia nātou ʼo te fono ki te ako ʼo Te Tule Leʼo, neʼe mahōlō tona fai pea neʼe takitaki e Robert P. Johnson ʼo te fakatuʼutuʼu ki te gāue. Ko nātou ʼo te 98 kalasi neʼe nātou tali ki te ʼu fehuʼi. Neʼe hoa ki Te Tule Leʼo te ʼu fakafehuʼi fakafiafia neʼe fai e nātou ʼaē ʼe gāue ʼi Kalaate. Neʼe lahi te fakaloto mālohiʼi ʼo nātou ʼaē neʼe kau ki te fono ki te ʼu fakamatala ʼo te kau maʼu pepa ʼo ʼuhiga mo te ʼu meʼa neʼe hoko kia nātou ʼi te gāue faka mafola, pea mo tanatou fakahā te ʼu meʼa neʼe nātou logoʼi ʼo ʼuhiga mo te ʼu telituale faka misionea ʼaē ʼe hinoʼi nātou kiai.
Lolotoga te ʼu taʼu e ono vaelua, neʼe fakatuʼu te faleako ʼo Kalaate ʼi te ʼu Pilō ʼo te Sosiete Watchtower ʼi Wallkill, ʼi New York. Kae talu mai te māhina ʼo ʼApelili 1995, neʼe hiki te faleako ʼaia ki te Fakatafitoʼaga ʼo te Ako ʼo te Sosiete Watchtower ʼi Patterson, ʼi New York. Koteā te meʼa ʼe logoʼi e nātou ʼo te famili ʼo te Petele ʼi Wallkill ʼo ʼuhiga mo te fetogi ʼaia? ʼI te tufa ʼaia ʼo te ʼu pepa, neʼe fakafehuʼi niʼihi ʼo Wallkill. Neʼe ʼiloga ʼi tanatou ʼu palalau ʼe malave ki te loto, neʼe fakaʼiloga lahi te kau ako ʼo Kalaate ia nātou. ʼE mahino ia, ko te ʼu tagata mo te ʼu fafine ʼaia ʼe nātou lotolelei ʼe ko he ʼu misionea moʼoni—ʼe nātou agavaivai, mo sakilifisioʼi tonatou maʼuli, pea mo lahi tanatou tokakaga ki te tokoni ki niʼihi.
ʼI te fakaʼosi ʼo te tufa ʼo te ʼu pepa, neʼe falala ia nātou fuli ʼaē neʼe nātou kau ki te fakatahi ʼaia, ʼe hoko atu anai te fua lelei ʼo te Faleako ʼo Kalaate ohage pe ko tona fai ʼi te ʼu taʼu e 50 tupu kua hili—tana ʼekenaki he kau misionea moʼoni!
[Talanoa ʼo te pasina 18]
Ko Te ʼu Agaaga ʼo Te Kalasi:
Ko te lahi ʼo te ʼu fenua ʼaē neʼe fakafofoga: 8
Ko te lahi ʼo te ʼu fenua ʼaē neʼe hinoʼi nātou kiai: 21
Ko te hahaʼi ʼo te kau ako: 48
Ko te fakafuafua ʼo te ʼu taʼu ʼo te kau ako: 32,72
Ko te fakafuafua ʼo te ʼu taʼu ʼi te moʼoni: 15,48
Ko te fakafuafua ʼo te ʼu taʼu ʼi te gāue temi katoa: 10,91
[Talanoa ʼo te pasina 18]
Ko Te 98 Kalasi ʼo Kalaate, Te Faleako Faka Tohi-Tapu ʼo Te Sosiete Watchtower
ʼI te lisi ki lalo age, ʼe lau te ʼu ʼatu mai muʼa ki muli pea ko te ʼu higoa ʼe kamata mai te faʼahi hema ki te faʼahi mataʼu.
(1) Eszlinger, A.; Mann, T.; Rivera, G.; Baruero, M.; Vaz, M.; Durga, K.; Silweryx, H.; Alvarado, D. (2) Toth, B.; Segarra, S.; Hart, R.; Rooryck, I.; Escobar, P.; Ejstrup, J.; Sligh, L.; Rivera, E. (3) Archard, D.; Snaith, S.; Marciel, P.; Koljonen, D.; Waddell, S.; Blackburn, L.; Escobar, M.; Archard, K. (4) Hart, M.; Toth, S.; Koljonen, J.; Bergman, H.; Mann, D.; Blackburn, J.; Park, D.; Vaz, F. (5) Segarra, S.; Sligh, L.; Leslie, L.; Bergman, B.; Baruero, W.; Alvarado, J.; Leslie, D.; Park, D. (6) Silweryx, K.; Eszlinger, R.; Waddell, J.; Snaith, K.; Durga, A.; Rooryck, F.; Ejstrup, C.; Marciel, D.