Neʼe Nātou Fai Te Finegalo ʼo Te ʼAtua

Ko Te Tāmai ʼe Ina Fakamolemole Gafua

NEʼE kua ʼui ko te kiʼi hisitolia ʼaenī ʼe lelei tokotahi pe, pea ʼe moʼoni te ʼui ʼaia. Ko te lea fakatātā ʼa Sesu ʼo ʼuhiga mo te ʼofa ʼo he tāmai ki tona foha neʼe kua puli, ʼe hage ko he matapā fakamālama ʼe feala hatatou sio ai ki te manavaʼofa fakaofoofo ʼo te ʼAtua ki te kau agahala ʼaē ʼe nātou fakahemala.

Kua Puli Ia Pea Kua Toe Maʼu

Neʼe ʼi ai te tagata ko tona ʼu foha e lua. Ko te muli, neʼe ina ʼui fēnei age kia ia: ‘ ʼE ʼau fia maʼu toku tofiʼa ʼi te temi ʼaenī, ʼe mole ʼau fia fakatalitali ke ke mate.’ Neʼe fai te faʼahi ʼaia e tana tāmai, ʼo lagi ina foaki age kia ia te vahe tahi ʼi te tolu ʼo tona ʼu koloā fuli​—ko te vahe ʼaē ʼe ʼamanaki kiai ia ia ʼaē ʼe muli mokā ʼe toko lua pe te ʼu foha, ʼo mulimuli ki te lao. (Teutalonome 21:17) Neʼe foimo tānaki ai e te tūpulaga ʼaia tona ʼu koloā pea neʼe ʼalu ki te fenua mamaʼo ʼo ina pulihi fuli ai tana paʼaga ʼi te ʼu aga fakalialia.​—Luka 15:11-​13.

Pea neʼe hoko te hoge fakamataku. ʼI tona lotomamahi ʼaupito, neʼe tali leva e te tūpulaga ʼaia te gāue, ʼe ko te leʼoleʼo ki te faga puaka​—ko he gāue fakalialia ki te kau Sutea. (Levitike 11:​7, 8) ʼI tona pakupaku ʼaupito, neʼe ina fia kai te ʼu fuaʼi ʼakau ʼaē neʼe foaki age ki te ʼu puaka! Moʼo fakaʼosi, neʼe toe mālama te ʼatamai ʼa te tūpulaga ʼaia. Neʼe manatu fēnei: ‘ ʼE kai lelei age te ʼu kaugana ʼa taku tāmai ia ʼau! ʼE ʼau toe liliu anai ki fale, ʼo fakahā taku ʼu agahala pea mo kole age ke ʼau liliu ko he tagata gāue ʼo taku tāmai.’a​—Luka 15:14-​19.

Neʼe toe liliu fakavilivili te talavou ʼaia ki tona ʼapi. ʼE mahino papau ia, neʼe kua fetogi ʼaupito te agaaga ʼo tona sino. Kae neʼe ʼiloʼi lelei ia ia e tana tāmai “logope la neʼe kei mamaʼo.” ʼI tona ʼofa mamahi ki ai, neʼe lele ki tona foha, pea fāʼufua kia ia pea mo “fekita kia te ia.”​—Luka 15:20.

Ko te tali ʼofa ʼaia ʼaē neʼe fai kia ia, neʼe faigafua ai ki te tūpulaga ʼaia ke toe lotomālohi. Neʼe ina ʼui fēnei: “Tāmai, kua ʼau agahala ki te lagi pea mo koe. ʼE mole kei tāu mo ʼau ke ʼui ko ʼau ko tou foha. Fai kia te ʼau ohage ko he tahi ʼi tau kau tagata gāue totogi.” Neʼe pāuiʼi e te tāmai tana ʼu kaugana. “Vave, koutou ʼaumai te teu matalelei ʼo faka tui kia te ia, tui he mama ki tona tuhi, mo hona ʼu sūlie kiliʼi pipi ki ʼona vaʼe, pea koutou ʼaumai te ʼuhiʼi vitulo gako ʼo tāmateʼi, pea tou kakai mo fakafiafia, koteʼuhi, ko te foha ʼaenī ʼoʼoku neʼe mate pea kua toe maʼuli, neʼe puli pea kua mau.”​—Luka 15:21-​24.

Neʼe fai leva te lafeti lahi, ʼo fai ai mo te musika pea mo te ʼu meʼe. Neʼe logo te taʼokete ki te logoaʼa ʼi tana liliu mai te gāueʼaga. ʼI tana ʼiloʼi kua liliu mai ki fale tona tēhina pea ko te tupuʼaga la ʼaia ʼo te fakafiafia, neʼe ʼita ai. Neʼe lāuga ʼo ina ʼui fēnei ki tana tāmai: ‘Ko taʼu e fia mo taku kaugana kia te koe, pea neʼe heʼeki ʼau talagataʼa kia te koe, kae neʼe mole ke foaki mai he vitulo ke ʼau fakafiafia mo toku ʼu kaumeʼa. Kae ʼi tau maʼu ʼo tou foha ʼaenī neʼe ina pulihi tau koloā, ʼe ke fai he lafeti maʼa ia.’ Pea neʼe tali fakalelei age e tana tāmai, ‘Fānau, ʼe ke fakatahi tuʼumaʼu mo ʼau, pea ko meʼa fuape ʼaʼaku ʼe ʼaʼau. Kae neʼe maʼua pe ke tou fiafia, koteʼuhi ko tou tēhina ʼaenī neʼe mate pea kua maʼuli. Neʼe puli pea kua maʼu ia.’​—Luka 15:25-​32.

Ko Te ʼu Ako Kia Tatou

Ko te tāmai ʼi te lea fakatātā ʼa Sesu ʼe ina fakafofoga totatou ʼAtua manavaʼofa, ko Sehova. Ohage ko te foha ʼaē neʼe puli, ko ʼihi ʼe nātou mavae ʼi te ʼaluʼaga fīmālie ʼo te loto fale ʼo Sehova, pea ki muli age ʼe nātou toe liliu mai. Koteā te manatu ʼa Sehova ʼo ʼuhiga mo te hahaʼi ʼaia? Ko nātou ʼaē ʼe nātou toe liliu mai kia Sehova ʼaki he loto fakahemala moʼoni, ʼe feala ke nātou falala, “ ʼe mole ina fai anai he ʼu valoki ʼo talu ai, pea ʼe mole nofo anai ia mo hona loto fakaʼoʼola ʼo aʼu ki he ʼu temi ʼe mole ʼiloʼi honatou gataʼaga.” (Pesalemo 103:9) ʼI te lea fakatātā ʼaia, neʼe lele te tāmai moʼo tali tona foha. ʼO toe feiā pe, ʼe mole gata ʼaki pe tana loto kiai kae ʼe toe loto e Sehova ke foimo fakamolemole te kau agahala ʼaē ʼe nātou fakahemala. ʼE “fakamolemole gafua,” pea ʼe ina fakamolemole “lahi.”​—Pesalemo 86:5; Isaia 55:7; Sakalia 1:3.

ʼI te lea fakatātā ʼa Sesu, ʼaki te ʼofa moʼoni ʼo te tāmai, neʼe faigafua ai ki te foha ke mole mataku ʼi te toe liliu mai. Kae koutou fakatokagaʼi te meʼa ʼaenī: Koteā te meʼa ʼaē neʼe feala ke hoko mo kapau neʼe fakafisi te tāmai ki tona foha, peʼe mo kapau neʼe ʼita lahi ʼo ina ʼui age ke mole toe liliu mai ki fale? Ko te aga ʼaia neʼe feala ke tupu ʼaki ai he mavae ʼo te tama ʼo talu ai.​—Fakatatau mo 2 Kolonito 2:​6, 7.

ʼE feala ke tou ʼui, neʼe teuteuʼi e te tāmai te toe liliu mai ʼo tona foha ʼi te temi ʼaē neʼe mavae ai. ʼI ʼihi temi, ko te kau tagata ʼāfea ia ʼaho nei ʼe tonu ke nātou fakamavae ʼi te kokelekasio te kau agahala ʼaē ʼe mole nātou fakahemala. (1 Kolonito 5:​11, 13) ʼI tanatou fai te faʼahi ʼaia, ʼe feala ke nātou teuteuʼi te toe liliu mai ʼo ia ʼaē neʼe agahala, ʼo nātou fakahā age pe koteā te ʼu meʼa ʼaē ʼe tonu ke ina fai ke feala hana toe liliu mai. Ko he uga neʼe fai ʼaki he loto māfana neʼe ina ʼekenaki te tokolahi ia nātou ʼaē neʼe pupuli ʼi te faʼahi fakalaumālie, ke nātou fakahemala pea mo nātou toe liliu mai ki te loto fale ʼo Sehova.​—2 Timoteo 4:2.

Tahi ʼaē meʼa, neʼe fakahā e te tāmai tona manavaʼofa ʼi te temi ʼaē neʼe toe liliu mai ai tona foha. Neʼe sio atu aipe kua loto fakahemala moʼoni tona foha. Pea neʼe mole ina faigaʼi ke ina ʼiloʼi te ʼu hala fuli ʼo tona foha, kae neʼe ina tali lelei ia ia pea mo ina fakahā tana fiafia ʼi tona tali ia ia. ʼE feala ke muliʼi e te kau Kilisitiano fuli te faʼifaʼitaki ʼaia. ʼE tonu ke nātou fiafia ʼi te toe maʼu ʼo ia ʼaē neʼe puli.​—Luka 15:10.

ʼE hā lelei mai ʼaki te aga ʼa te tāmai, neʼe kua ʼamanaki talu mai fualoa ke toe liliu age tona foha ʼaē neʼe hēʼia. ʼE tou ʼiloʼi papau ko te meʼa ʼaia ʼe ko he fakatātā ʼo te ʼofa ʼo Sehova kia nātou ʼaē neʼe nātou mavae mai tona loto fale. “ ʼE mole loto ia ke fakaʼauha he tahi kae ʼe loto ia ke aʼu te hahaʼi fuli ki te fakahemala.” (2 Petelo 3⁠:⁠9) Ko nātou ʼaē ʼe nātou fakahemala, ʼe feala ke nātou tui papau ʼe tapuakiʼi anai nātou ʼaki “he ʼu temi mokomoko . . . mai te ʼafio ʼo Sehova.”​—Gāue 3:​19.

[Nota ʼi te lalo pasina]