Ko Te Kau Faka Mafola ʼo Te Puleʼaga ʼe Nātou Fakamatala
“Ko Tau Hahaʼi ʼe Nātou Foaki Fakamalotoloto Anai Ia Nātou”
ʼE KILIA ia Naamane, te pule mālohi ʼo te kautau Silia. Kapau ʼe mole faitoʼo, pea ʼe feala ʼaki te mahaki fakalialia ʼaia, ke fetogi te agaaga ʼo te sino pea mo mate ai. Koteā ʼaē ka fai e Naamane? ʼI te loto fale ʼo Naamane, ʼe ʼi ai te kiʼi taʼahine, “neʼe puke mai te fenua ʼo Iselaele.” ʼE palalau te kiʼi taʼahine ʼaia ʼaki he lototoʼa ʼo ina fakahā ʼe gata pe mo te polofeta ko Eliseo te fealagia ʼaē ke ina fakamālōlō ia Naamane.—2 Hau 5:1-3.
ʼUhi ko te lototoʼa ʼa te kiʼi taʼahine, ʼe ʼalu ai ia Naamane ʼo kumi ia Eliseo, pea ʼe fakamālōlō ai tona mahaki. Tahi ʼaē meʼa, ʼe liliu ia Naamane ko te tagata tauhi ʼa Sehova! Ko te fakamatala ʼaia, ʼaē ʼe tuʼu ʼi te Tohi-Tapu, neʼe hoko ʼi te hogofulu sēkulō ʼi muʼa ʼo totatou temi. (2 Hau 5:4-15) Ia ʼaho nei, ʼe tokolahi te kau tūpulaga ʼe nātou fakahā te taʼi lototoʼa ʼaia, ʼo nātou palalau ki te ʼu meʼa ʼo te Puleʼaga. ʼE fakamoʼoni te faʼahi ʼaia e te meʼa ʼaenī ʼaē neʼe hoko ʼi Mozambique:
Ko Nuno ʼe taʼu ono, pea ʼe ko he kaugā fai faka mafola ʼo te logo lelei kae mole heʼeki papitema. Māʼiape la ʼi muʼa ʼo tana liliu ko he kaugā fagona, neʼe fakamāʼopoʼopo e Nuno te ʼu tamaliki ʼo tona vāhaʼa fale, ʼo faikole mo nātou, pea mo ina akoʼi kia nātou te Tohi-Tapu, ʼo ina fakaʼaogaʼi te Recueil d’histoires bibliques.
Neʼe lahi te ʼu Moeaki neʼe ʼala ake ai ia Nuno ka kei uhuuhu ʼo ina fakamanatuʼi fēnei ki tona famili: “ ʼI te ʼaho ʼaenī, ʼe tou ʼolo ʼo fai faka mafola.” ʼE ʼi ai te tahi ʼu ʼaluʼaga ʼe hā ai tana fakamalotoloto ʼi te minisitelio. ʼI tana kaugā ʼolo mo tana ʼu mātuʼa ʼo fai faka mafola ʼi te ala, ʼi Maputo, ʼe tautau ʼalu tokotahi ia Nuno ki te hahaʼi. ʼI te tahi lakaga, neʼe ʼalu age te tagata gāue fakakoloa pea ina fehuʼi fēnei age: “He koʼe ʼe ke fakatau te ʼu nusipepa ʼaia?” Neʼe ʼui fēnei e Nuno: “ ʼE mole ʼau fakatau te ʼu nusipepa, kae ʼe ʼau tali lelei te falā ʼaē ʼe foaki mai e te hahaʼi moʼo tokoni ki te gāue fai faka mafola.” Neʼe tali fēnei e te tagata gāue fakakoloa: “Logope la ʼe mole ʼau fia logo ki te faʼahi ʼaia, kae ʼe ʼau punamaʼuli ʼi tau aga pea mo tou poto. ʼE ʼau fia foaki he meʼa ʼofa ki te gāue ʼaia.”
ʼI te tahi lakaga, neʼe fakaōvi ia Nuno ki te tagata ʼi te ala pea ina foaki age te tohi La paix et la sécurité véritables : comment est-ce possible ? Neʼe fehuʼi fēnei age e te tagata: “ ʼE mole ke ako koa la ʼi te faleako ʼaē age?” Neʼe tali fēnei e Nuno: “Ei, ʼe ʼau ako ai, kae ʼi te ʼaho ʼaenī, ʼe ʼau fakahā te logo maʼuhiga ʼaē ʼe tuʼu ʼi te tohi ʼaenī. ʼE fakahā mai ai ʼe feala ke koutou maʼuli ʼi te mālama foʼou ʼaē ka foaki mai e te ʼAtua, ohage ko tona fakahā ʼi te paki ʼo te tohi ʼaenī.” Neʼe mole ʼiloʼi e Nuno ko te tagata ʼaē neʼe fai palalau mo ia, neʼe ko te tagata faiako ʼo tona faleako. Neʼe tali e te tagata faiako te tohi ʼaia, pea ʼe tautau ʼavage e Nuno te ʼu nusipepa ʼo Te Tule Leʼo pea mo te Réveillez-vous!
Ka fehuʼi age kia Nuno pe koʼe ʼe ina leleiʼia te kau ki te gāue fai faka mafola, ʼe ina ʼui fēnei: “ ʼE ʼau fia palalau ki te hahaʼi pea mo akoʼi age kia nātou pe ko ai ia Sehova pea mo tona ʼAlo, ia Sesu Kilisito.” ʼE ina toe ʼui fēnei: “Pea kapau ʼe mole fia logo kiai te hahaʼi, pea ʼe mole tonu ke tou lotomamahi ai.”
ʼI te malamanei katoa, ko te lauʼi afe kau tūpulaga ohage ko Nuno ʼe nātou “foaki fakamalotoloto ia nātou” moʼo akoʼi pea mo fai faka mafola ki te hahaʼi ʼo ʼuhiga mo te Puleʼaga ʼo te ʼAtua. (Pesalemo 110:3) Kae ʼe mole ko he meʼa ʼe hoʼi hoko feiā pe. ʼE lahi anai te ʼu tapuakina ʼaē ka maʼu e te ʼu mātuʼa mokā nātou akoʼi tanatou fānau ʼo ʼuhiga mo Sehova talu mai tanatou kei liliki, mo nātou tuku he faʼifaʼitaki lelei ʼi te minisitelio pea mo nātou kumi fakamalotoloto te ʼu meʼa ʼo te Puleʼaga.