Ko He Lakaga Fakafiafia—ʼE Maʼu Pepa Te Kalasi 104 ʼo Kalaate
“KO TE ʼaho ʼaenī ʼe ko he ʼaho fakafiafia, pea ʼe tou fakafiafia fuli ai.” Neʼe ko te ʼu palalau ʼaia ʼaē neʼe fai e Carey Barber ʼo te Kolesi Pule ʼa te kau Fakamoʼoni ʼa Sehova, moʼo kamata ʼaki te polokalama fakafiafia ʼo te ʼaho maʼu pepa ʼo te kalasi 104 ʼo Kalaate, ʼi te ʼaho 14 ʼo Malesio 1998. Ko te toko 4 945 neʼe fakaafe ki te fono ʼaia pea ko te polokalama neʼe kamata ʼaki te hiva ʼo te katiko 208, ʼaē ko tona kupu tāfito ʼaenī “Ko he hiva fakafiafia.”
Ko He ʼu Tokoni ʼAoga Moʼo Taupau He Loto Fiafia
Ko te ʼuluaki koga ʼo te polokalama neʼe ko te ʼu akonaki nounou e nima, pea neʼe fakahā ai te ʼu tokoni ʼaoga moʼo taupau he loto fiafia ohage ko te fiafia ʼaē neʼe logoʼi ʼi te ʼaho ʼaia ʼo te kau maʼu pepa.
Neʼe fai te ʼuluaki akonaki e te tēhina ko Joseph Eames, ʼaē ʼe gāue ʼi te Selevisi ʼo te Faitohi. Ko tona kupu tāfito ʼaenī “Koutou Faʼifaʼitakiʼi Te Aga ʼo Te Kau Agatonu,” pea neʼe fakatafito ki te kapite 15 pea mo te 17 ʼo 2 Samuele. ʼE talanoa ai kia Apisalome, te foha ʼa Tavite, ʼaē neʼe fonofono moʼo faʼao te puleʼaga ʼaē neʼe tuku e Sehova ki tana tāmai, ʼo ina fakaneke te hahaʼi ke nātou agatuʼu. Kae ko ʼihi neʼe nātou nonofo agatonu ki te Hau ko Tavite ʼaē neʼe fakanofo e Sehova. Neʼe koteā tona ʼaoga ki te kau misionea? “Tatau aipe pe kofea te potu ʼaē ka fekauʼi koutou kiai, koutou agatonu ʼo koutou fakaloto mālohiʼi te gāue tahi mo te takitaki faka teokalatike pea mo te fakaʼapaʼapa kiai.” Pea neʼe fakaʼosi fēnei e te Tēhina ko Eames: “Koutou tokoni ki te ʼu tēhina fuli ke nātou fai feiā mo nātou.”
Neʼe hoa ki ai ia David Sinclair, ʼo ina fakamatalatala te Pesalemo 15 ʼaē ʼe talanoa ki te ʼu meʼa e hogofulu ʼaē ʼe fakamaʼua mai e te ʼAtua, ke feala ai hotatou fakaafe ki te fale fehikitaki ʼa Sehova. Ko tana akonaki “Koutou Haga Nofo ʼi Tokotou ʼUhiga Kau Fakaafe ʼi Te Fale Fehikitaki ʼo Tokotou Telituale Misionea,” neʼe fakaloto mālohiʼi ai te kau ako maʼu pepa ke nātou fakaʼaogaʼi te pesalemo ʼaia ki tonatou ʼu telituale, ʼaē neʼe fakaafe nātou kiai. Neʼe fakahā lelei e te Tēhina ko Sinclair te maʼuhiga ʼaē ke tou maʼuliʼi tuʼumaʼu te ʼu lekula fakaʼatua. Koteā anai tona fua? ʼE ʼui fēnei ia Pesalemo 15:5: “Ko ʼaē ʼe ina fai te ʼu meʼa ʼaia ʼe mole tūkia anai ia.”
Ko John Barr, ʼaē ʼe kau ki te Kolesi Pule, neʼe ina fakatokagaʼi ko te hiva ʼo te ʼu katiko ʼi te ʼu fono ʼe ko he meʼa fakaloto mālohi. Kae koteā te hiva fakafiafia tokotahi ʼaē ʼe hivaʼi ʼi te kele katoa ia ʼaho nei? Ko te hiva ʼo te logo lelei ʼo ʼuhiga mo te Puleʼaga Faka Mesianike ʼo te ʼAtua. Koteā te ʼu fua ʼaē ʼe maʼu ʼaki te hiva ʼaia, ʼaē ko te faka mafola ʼo te Puleʼaga? ʼE tali fēnei e te lua koga ʼo te katiko 208: “ ʼAki te faka mafola ʼo te Puleʼaga pea mo te ako faka Kilisitiano, ko te hahaʼi tokolahi ʼe taki nātou ke nātou ʼōmai ʼo kau mo Sehova. ʼAki he loto fiafia ʼe nātou hiva pea mo kalaga ʼi te potu taupotu ʼo te kele.” Ei, ʼi te ʼaho fuli ko te teitei toko 1 000 kau tisipulo foʼou ʼe nātou papitema. Neʼe fakaʼosi fēnei e te Tēhina ko Barr tana akonaki: “ ʼE mole taulekaleka koa, ʼu tēhina mo tuagaʼane, te manatu ʼaē ʼe fekauʼi koutou ki he ʼu telituale ʼe koutou felāveʼi ai anai mo te ʼu hahaʼi ʼe nātou lolotoga fakatalitali atu heʼe nātou fia logo ki takotou hiva fakavikiviki?”
Ko James Mantz, ʼaē ʼe kau ki te Selevisi ʼo te Faitohi, neʼe ina fai te akonaki ʼaē ko tona kupu tāfito “Koutou Fagono Ki Te ʼu Palalau ʼo Te Kau Misionea Faiva.” Neʼe ina fakamahino ʼi ʼihi temi ʼe tonu muʼa ke kita ʼahiʼahi he ʼu meʼa ke kita mahino kiai. (Hepeleo 5:8) Kae ʼe fakaloto mālohiʼi mai e te Tāʼaga Lea 22:17 ke tou ‘fakafalele totatou taliga pea ke tou logo ki te ʼu palalau ʼo te kau popoto,’ pe ko nātou ʼaē kua lahi te ʼu meʼa ʼaē kua nātou māhani kiai. ʼE lahi te ʼu meʼa ʼaē ʼe feala ke ako e te kau misionea foʼou ʼaki te kau misionea ʼaē neʼe ʼuluaki fekauʼi ki te ʼu telituale ʼaia. Neʼe ʼui fēnei e te Tēhina ko Mantz: “ ʼE nātou ʼiloʼi peʼe feafeaʼi te faʼahiga fai fakatau ʼo te fenua. ʼE nātou ʼiloʼi pe ko te ʼu potu fea ʼo te kolo ʼe mole tonu ke koutou ʼolo kiai heʼe feala ke koutou tuʼutāmaki ai, peʼe ʼuhi ko te ʼu aga heʼeʼaoga ʼaē ʼe fai ai. ʼE nātou ʼiloʼi pe koteā ʼaē ʼe feala ke ʼiʼita ai peʼe lotomamahi ai te hahaʼi. ʼE ʼiloʼi e te kau misionea ʼaē kua fualoa tanatou gāue ai, pe koteā ʼaē ʼe ʼaoga kia koutou ke koutou fiafia pea mo koutou lavaʼi takotou gāue misionea.”
ʼI tana akonaki, ko tana kupu tāfito “Koutou Leleiʼia Te Gāue Faka Teokalatike ʼAē ʼe Hinoʼi Atu Ke Koutou Fai,” ko Wallace Liverance, te tēhina faiako ʼo te Ako ʼo Kalaate, neʼe ina fakamatala, ʼe ko Sehova ʼaē neʼe ina hinoʼi ʼihi misionea ohage ko Paulo, mo Timoteo, pea mo Palenapasi, ʼaki tona laumālie maʼoniʼoni peʼe ko he fakaʼiloga faka milakulo. Kae ʼi te temi nei ʼe ko te “kaugana agatonu mo poto” ʼaē ʼe ina fekauʼi te kau ako maʼu pepa ʼo Kalaate ki tonatou telituale ʼi te malamanei. (Mateo 24:45-47) Neʼe ina fakatatau te ʼu telituale ʼo te kau misionea ki te ʼu potu ʼaē neʼe hinoʼi kiai e Seteone tana kau solia ʼaē neʼe tonu ke nātou tauʼi te kau Matianite. (Kau Fakamāu 7:16-21) Neʼe fai e te tēhina ko Liverance te fakaloto mālohi ʼaenī: “Koutou leleiʼia takotou gāue faka teokalatike ʼaē neʼe tuku atu kia koutou. Ohage pe ko te kau solia ʼa Seteone neʼe nātou ‘tahi tutuʼu ʼi te faʼahi ʼaē neʼe hinoʼi nātou kiai,’ ʼo toe feiā aipe, koutou faka ʼuhiga te telituale ʼaē ʼe fekauʼi koutou kiai, ko te potu ʼaē ʼe tonu ke koutou tutuʼu ai. Koutou tui ko Sehova ʼe feala ke ina fakaʼaogaʼi koutou ohage pe ko tana fakaʼaogaʼi te ʼu tagata e toko tolugeau ʼa Seteone.”
ʼE Fiafia Ia Nātou ʼAē ʼe Nātou Tokagaʼi Te Hahaʼi
Neʼe ʼui fēnei e Te Tule Leʼo ʼāfea: “ ʼE mole ko he aga fakapoto hatatou fakatafito totatou maʼuli ki te ʼu meʼa fakasino pea mo te ʼu koloā ʼo te mālama ʼaenī, he ko he ʼu meʼa faka temi pe ia, koia ʼaē ʼe fakapoto age hatatou tokagaʼi te hahaʼi pea mo tou ako peʼe feafeaʼi hatatou maʼu te fiafia ʼi tatatou tokoni ki te hahaʼi.” ʼO ʼalutahi mo te faʼahi ʼaia, ko te Tēhina ko Mark Noumair, ʼaē ʼe faiako ʼi te Faleako ʼo Kalaate, neʼe fai palalau mo ʼihi kau ako ʼo ʼuhiga mo te ʼu meʼa ʼaē neʼe hoko kia nātou ʼi te fai faka mafola, pea neʼe ina ʼui fēnei: “ ʼE koutou liliu anai ko he ʼu misionea faiva mo kapau ʼe koutou tokagaʼi te hahaʼi.”
Te ʼu Kalavi Ki Te Fiafia ʼi Te Fenua Matāpule
Koteā te ʼu kalavi ki te fiafia ʼi te gāue misionea pea mo te lava lelei ʼo te gāue ʼaia? Ko te tēhina ko Charles Woody ʼaē ʼe kau ki te Selevisi ʼo te Gāue, pea mo Harold Jackson, ʼaē neʼe misionea ʼi Amelika Latina pea ʼe tokoni ʼi te Komite ʼo te Faitohi, neʼe nā fakafehuʼi ʼihi tēhina ʼaē neʼe kau ʼi te kalasi hiva ʼo te ako ki te ʼu komite ʼo te ʼu filiale. Koʼeni he ʼu tokoni neʼe nātou fai:
Neʼe ʼui fēnei e Albert Musonda ʼaē ʼe haʼu mai Zambie: “Kapau ʼe ko te kau misionea ʼaē ʼe ʼuluaki ʼolo ʼo fakaʼalofa ki te ʼu tēhina, pea ʼe tupu ai anai he felogoi lelei, pea mo he feʼiloʼi leleiʼaki.”
Ko Rolando Morales ʼaē ʼe haʼu mai Guatemala, neʼe ina ʼui, ka ʼavage e te hahaʼi he meʼa ʼinu ki te kau misionea foʼou, pea ʼe feala ke nātou tali ʼaki he agalelei pea mo he aga fakaʼapaʼapa: “Ko taku hoki haʼu ʼaē ki te fenua ʼaenī. Mālo tokotou ʼofa, kae ʼe mole feala ke tali e toku sino te ʼu meʼa foʼou ʼaia heʼe mole māhani kiai ohage ko takotou sino. Kae ʼaki te temi ʼe feala anai ke ʼau toʼo te meʼa ʼaia pea ʼe ʼau fiafia anai ʼi te fai ʼo te faʼahi ʼaia.” Koteā te ʼu fua lelei ʼo te faʼahiga tali ʼaia? “ ʼE mole ʼita ai anai te hahaʼi, pea ʼe fakahā ʼaki ai anai e te kau misionea tanatou agalelei ki te hahaʼi.”
Koteā ʼaē ʼe feala ke tokoni ki te kau misionea ke nātou faʼa kātaki ʼi tanatou ʼu telituale? Ko te Tēhina ko Paul Crudass, ʼaē neʼe kau ki te 79 kalasi ʼo Kalaate pea ʼe kua taʼu 12 tana gāue ʼi Lipelia, neʼe ina ʼui fēnei: “ ʼE ʼau ʼiloʼi ʼe lotomamahi te ʼu mātuʼa mokā mavae tanatou fānau. Pea ʼi ʼihi temi mokā faiga e te kau misionea ke nātou fakamāmāhani mo te fenua, mo te ʼu agaʼi fenua pea mo te hahaʼi, pea ʼe lagi nātou fia mavae mai ai pea mo nātou fia liliu kiō nātou mokā ʼe momoli age he tohi ʼe ʼui fēnei ai: ‘ ʼE mātou manatu tuʼumaʼu kia koe. ʼE faigataʼa tomatou maʼuli mokā ke puli.’ Koia ko te ʼu famili fuli ʼaē ʼi henī ʼi te ʼaho nei, ʼe maʼuhiga ʼaupito ke koutou manatuʼi te faʼahi ʼaia.”
ʼI te ʼosi ʼo te ʼu fakafehuʼi, ko Theodore Jaracz, ʼaē ʼe kau ki te Kolesi Pule, neʼe ina fai te akonaki fakamuli ʼo te polokalama. Ko tona kupu tāfito ʼaenī: “Koutou Fakamuʼamuʼa Te Puleʼaga ʼi Tokotou Maʼuli.” ʼE feala feafeaʼi ki te kau misionea ke nātou fakamuʼamuʼa tuʼumaʼu te Puleʼaga pea ke mole nātou tokagaʼi he ʼu meʼa ʼe mole faʼa maʼuhiga? Neʼe ina fakaloto mālohiʼi nātou ke nātou fakatuʼutuʼu lelei hanatou ako takitokotahi, heʼe tokoni anai kia nātou te faʼahi ʼaia ke nātou manatuʼi tuʼumaʼu te ʼu meʼa ʼo te Puleʼaga. Pea neʼe toe fai te fakamanatu ʼaoga ʼaenī: “Ko ʼihi misionea neʼe mole lahi tanatou ako takitokotahi ʼuhi ko tanatou tokagaʼi fau te ʼu masini gaoʼi, peʼe ko te ʼu olotinatea, peʼe ko te courrier électronique. ʼE tonu ke tou aga fakapotopoto ʼi tatatou fakaʼaogaʼi te ʼu masini ke ʼaua naʼa puli ai totatou temi, pea ke ʼaua naʼa nātou tāʼofi tatou ke tou ako takitokotahi te Folafola ʼa te ʼAtua.”
ʼI te ʼosi faiakonaki ʼo te Tēhina ko Jaracz, neʼe foaki te ʼu pepa ki te kau ako, pea neʼe nātou lau tanatou tohi ʼaē ʼe nātou fakahā ai tanatou loto fakafetaʼi. Ko te tēhina ʼaē neʼe ina fakafofoga te kalasi katoa, neʼe ina fakahā fēnei te meʼa ʼaē neʼe logoʼi ʼi te loto ʼo te kau ako fuli: “Neʼe hā lelei kia mātou te ʼofa ʼaē neʼe talanoa kiai ia Sesu ʼi tana ʼui ʼaē, ko te ʼofa ʼe ko te fakaʼiloga ʼo tana kau tisipulo, pea ʼe ko he meʼa fakaloto fīmālie kia mātou tamatou ʼiloʼi papau ʼaē, tatau aipe pe koteā te potu ʼaē ʼe mātou ʼolo kiai, kae ʼe ʼi ai he kautahi ʼe ʼofa pea mo tokaga kia mātou ohage ko he faʼe, pea mo lagolago kia mātou. ʼAki te tokoni ʼaia ʼe mātou lotolelei ke mātou ʼolo ki te potu taupotu ʼo te kele.” Neʼe fakaʼosi te polokalama fakafiafia ʼo te kau maʼu pepa ʼo te kalasi 104 ʼo Kalaate ʼaki te ʼu palalau fakalave loto ʼaia.
[Talanoa ʼo te pasina 24]
KO TE ʼU AGAAGA ʼO TE KALASI
Ko te lahi ʼo te ʼu fenua ʼaē neʼe fakafofoga: 9
Ko te lahi ʼo te ʼu fenua ʼaē neʼe hinoʼi nātou kiai: 16
Ko te hahaʼi ʼo te kau ako: 48
Ko te hahaʼi ʼo te ʼu taumatuʼa: 24
Ko te fakafuafua ʼo te ʼu taʼu ʼo te kau ako: 33
Ko te fakafuafua ʼo te ʼu taʼu ʼi te moʼoni: 16
Ko te fakafuafua ʼo te ʼu taʼu ʼi te gāue temi katoa: 12
[Talanoa ʼo te pasina 25]
Ko Te Kalasi 104 ʼo Te Faleako Faka Tohi-Tapu ʼo Kalaate ʼo Te Sosiete Watchtower
ʼI te lisi ʼaē ʼe tuʼu ʼi lalo, ʼe kamata mai muʼa ʼo aʼu ki muli, pea ko te ʼu higoa ʼaē ʼe tuʼu ʼi te lisi ʼe lau mai te faʼahi hema ki te faʼahi mataʼu.
(1) Romero, M.; Howarth, J.; Blackburne-Kane, D.; Hohengasser, E.; West, S.; Thom, S. (2) Colon, W.; Glancy, J.; Kono, Y.; Drews, P.; Tam, S.; Kono, T. (3) Tam, D.; Zechmeister, S.; Gerdel, S.; Elwell, J.; Dunec, P.; Tibaudo, H. (4) Taylor, E.; Hildred, L.; Sanches, M.; Anderson, C.; Bucknor, T.; Hohengasser, E. (5) Howarth, D.; Ward, C.; Hinch, P.; McDonald, Y.; Sanches, T.; Thom, O. (6) Drews, T.; Tibaudo, E.; Elwell, D.; Dunec, W.; Blackburne-Kane, D.; Ward, W. (7) Anderson, M.; Zechmeister, R.; McDonald, R.; Bucknor, R.; Glancy, S.; Gerdel, G. (8) Romero, D.; Hinch, R.; Hildred, S.; Taylor, J.; Colon, A.; West, W.
[Paki ʼo te pasina 26]
Ko ʼihi ʼu tēhina faiako ʼo te Kalasi 104: (ʼo kamata mai te faʼahi hema) W. Liverance, U. Glass, K. Adams, M. Noumair