Neʼe Nātou Fai Te Finegalo ʼo Te ʼAtua

ʼE Lototoʼa Ia Paulo ʼo Fai Faka Mafola Ki Te ʼu Hahaʼi Maʼuhiga

NEʼE hā lelei te kehekehe ʼo te ʼu tagata e toko lua. Ko te tahi neʼe ʼai tona pale, kae ko te tahi neʼe seiniʼi. Ko te tahi neʼe ko te hau pea ko te tahi neʼe ko te tagata pilisoni. ʼI tana ʼosi nofo ia taʼu e lua ʼi te fale pilisoni, ʼe tuʼu leva ia Paulo ʼi te temi ʼaia ʼi muʼa ʼo te hau ʼo te kau Sutea, ia Helote Akilipa Lua. Ko te hau pea mo tona ʼohoana, ko Pelenika, neʼe nā ʼōmai “fakaʼaliʼaliki pea neʼe nā hū ki te fale fono ʼo heheka fakatahi mo te ʼu ofisie pea mo te ʼu hahaʼi maʼuhiga ʼo te kolo.” (Gāue 25:23) ʼE ʼui fēnei e te tohi: “Neʼe lagi ko te toko lauʼi afe hahaʼi ʼaē neʼe kau kiai.”

Neʼe ko te kovana foʼou ko Feseto ʼaē neʼe ina fakatuʼutuʼu te fono. Ko Felise, te kovana ʼaē neʼe muʼa ia ia, neʼe ina tuku ia Paulo ke nofo fualoa ʼi te fale pilisoni. Kae neʼe fia ʼiloʼi e Feseto pe neʼe moʼoni koa te ʼu tukugakovi ʼaē neʼe fai kia Paulo. ʼI te loto ʼaupito e Paulo ke ʼiloʼi neʼe mole ina fai he meʼa ʼe kovi, neʼe ina kole ai ke palalau kia Sesale! Neʼe fia logo te Hau ko Akilipa kia Paulo. Neʼe ina ʼui fēnei: “Mo ʼau foki la ʼe ʼau fia logo ki te tagata ʼaia.” Neʼe foimo fai ai e Feseto he ʼu fakatuʼutuʼu, he neʼe lagi ina fia ʼiloʼi pe koteā te manatu ʼa te hau ʼo ʼuhiga mo te tagata pilisoni makehe ʼaia.​—Gāue 24:⁠27–​25:22.

ʼI te uhu ake, neʼe tuʼu ia Paulo ʼi muʼa ʼo te hahaʼi maʼuhiga kaugamālie. Neʼe ina ʼui fēnei kia Akilipa: “Ko he meʼa fakafiafia kia te ʼau taku tuʼu ʼi ʼou muʼa ʼi te ʼaho ʼaenī ʼo fai ai toku hāofaki, tāfito heʼe ke ʼiloʼi lelei te ʼu agaʼi fenua mo te ʼu fihi ʼa te kau Sutea. Koia, ʼe ʼau kole atu ke ke kātaki ʼo fagono mai kia te ʼau.”​—Gāue 26:​2, 3.

Neʼe Palalau Ia Paulo ʼAki He Lototoʼa

ʼI te kamata, neʼe fakamatala e Paulo kia Akilipa pe neʼe feafeaʼi tona maʼuli ʼi te temi muʼa, ʼi te temi ʼaē neʼe ina fakatagaʼi ai te kau Kilisitiano. Neʼe ina ʼui fēnei: “Neʼe ʼau fia fakamālohiʼi nātou ke nātou fasituʼu, neʼe ʼau fakatagaʼi nātou ʼo aʼu ki te ʼu kolo ʼaē ʼi tuʼa.” Pea neʼe fakamatala e Paulo te meʼa fakamataku ʼaē neʼe hā kia ia, pea mo te fehuʼi age e Sesu ʼaē kua fakatuʼuake: “He koʼe ʼe ke fakatagaʼi ʼau? ʼE faigataʼa kia koe tau tauʼi tuʼumaʼu te ʼu ʼakau māsila.”a​—Gāue 26:​4-​14.

Pea neʼe fekauʼi e Sesu ia Paulo ke ʼalu ʼo fakamatala ki te hahaʼi ʼo te ʼu puleʼaga fuli pe, ‘te ʼu meʼa ʼaē neʼe sio kiai pea mo te ʼu meʼa ʼaē ka ina fakahā age ʼo ʼuhiga mo ia.’ Neʼe fakamatala e Paulo neʼe faiga fakalelei ke ina fakahoko te gāue ʼaē neʼe fakatotonu age ke ina fai. Kae neʼe ina ʼui fēnei kia Akilipa: “ ʼUhi ko te ʼu meʼa ʼaia, neʼe puke ai ʼau e te kau Sutea ʼi te fale lotu pea mo nātou faiga ke nātou matehi ʼau.” ʼI tana lagaʼi te fia logo ʼa Akilipa ki te Lotu Faka Sutea, neʼe fakahā e Paulo ʼe ina faka mafola “te ʼu meʼa pe ʼaē neʼe ʼui e te kau polofeta pea mo Moisese neʼe tonu ke hoko mai” ʼo ʼuhiga mo te mate pea mo te fakatuʼuake ʼo te Mesia.​—Gāue 26:15-​23.

Pea palalau ia Feseto, ʼo ina ʼui fēnei: “Ko te lahi ʼo tou poto ʼaē kua ina fakaliliu koe ʼo vale.” Neʼe tali fēnei e Paulo: “ ʼE mole ʼau vale, hau lahi ko Feseto, kae ʼe ʼau fai taku ʼu palalau moʼoni pea mo fakapotopoto.” Pea neʼe ʼui fēnei e Paulo kia Akilipa: “Ko te hau ʼaē ʼe ʼau palalau fakahagatonu ki ai ʼe ina ʼiloʼi lelei te ʼu meʼa ʼaia; heʼe ʼau tui papau ʼe mole he meʼa ʼi te ʼu meʼa ʼaenī ʼe puli kia te ia, he neʼe mole fai te meʼa ʼaia ʼi he pokoʼi meʼa.”​—Gāue 26:24-​26.

Pea neʼe palalau fakahagatonu ia Paulo kia Akilipa. “Hau Akilipa, ʼe ke tui koa ki te kau Polofeta?” ʼE mahino papau ia neʼe mole faigafua kia Akilipa hana tali ki te fehuʼi ʼaia. Ei, neʼe tonu ke ina taupau te manatu ʼa te hahaʼi ʼo ʼuhiga mo ia, heʼe kapau neʼe manatu tahi mo Paulo pea neʼe ina tali te meʼa ʼaē neʼe fakahigoa e Feseto ko te meʼa “vale.” ʼI tana lagi sio ʼaē ki te lotolotolua ʼo Akilipa, neʼe tali tonu e Paulo ki te fehuʼi ʼaē neʼe ina fai, ʼo ina ʼui fēnei: “ ʼE ʼau ʼiloʼi ʼe ke tui ki ai.” Pea neʼe palalau leva ia Akilipa, kae neʼe mole ina fakahā lelei peʼe tui ki ai peʼe kailoa. Neʼe ina ʼui fēnei kia Paulo: “Kei toe siʼi pe pea ke fakatafoki ʼau ke ʼau liliu ko he Kilisitiano.”​—Gāue 26:27, 28.

Neʼe fakaʼaogaʼi fakapotopoto e Paulo te ʼu palalau ʼa Akilipa moʼo fakahā te puani maʼuhiga. Neʼe ina ʼui fēnei: “Peʼe nounou peʼe lahi te temi, kae ʼe ʼau fakaʼamu ia muʼa ʼo te ʼAtua ke mole gata ʼaki pe ia koe, kae toe kau ai mo nātou fuli ʼaē ʼe nātou fagono mai kia te ʼau ʼi te ʼaho nei, ke koutou liliu ohage ko ʼau totonu, gata pe ki te ʼu haʼi ʼaenī.”​—Gāue 26:29.

Neʼe sio e Akilipa pea mo Feseto neʼe mole fai e Paulo he meʼa neʼe tuha ai mo te mate peʼe ko te pilisoni. Kae ko tana kole ʼaē ke palalau kia Sesale neʼe mole feala ke molehi. Koia neʼe ʼui fēnei e Akilipa kia Feseto: “Neʼe feala ke faka ʼāteaina te tagata ʼaenī mo kanapaula neʼe mole tagi kia Sesale.”​—Gāue 26:30-​32.

Te Ako Kia Tatou

ʼE ko he faʼifaʼitaki maʼuhiga kia tatou ʼaē neʼe tuku mai e Paulo ʼi tana fai faka mafola ʼi muʼa ʼo te hahaʼi maʼuhiga. ʼI tana palalau ki te Hau ko Akilipa, neʼe palalau fakaʼeteʼete ia Paulo. ʼE mahino papau ia neʼe ina ʼiloʼi te aga heʼeʼaoga ʼaē neʼe fai e Akilipa pea mo Pelenika. Neʼe nā ʼohoana kae ko Pelenika ʼe tau tuagaʼane totonu mo Akilipa. Kae ʼi te lakaga ʼaia neʼe mole fia talanoa ia Paulo ki te aga heʼeʼaoga ʼaia. Kae neʼe talanoa tāfito ki te ʼu faʼahi ʼaē neʼe feala ke felogoi ai mo Akilipa. Tahi ʼaē meʼa, logope la neʼe akoʼi ia Paulo e te tagata Faliseo ʼiloa ko Kamaliele, kae neʼe mahino kia ia ko Akilipa neʼe ko he tahi neʼe ina ʼiloʼi lelei te ʼu agaʼi fenua faka Sutea. (Gāue 22:3) Logope la te ʼu aga heʼeʼaoga ʼo Akilipa, kae neʼe palalau fakaʼapaʼapa ia Paulo kia ia, ʼuhi ko tona tuʼulaga hau.​—Loma 13:7.

Ka tou palalau ʼaki he lototoʼa ʼo ʼuhiga mo tatatou lotu, pea ʼe mole tou fia tala peʼe fakamāuʼi te ʼu aga heʼemaʼa ʼo nātou ʼaē ʼe tou faka mafola ki ai. Kae ke faigafua hanatou tali te moʼoni, ʼe tonu ke tou fakahā te ʼu faʼahi lelei ʼo te logo lelei, ʼo tou faka maʼuhigaʼi te ʼamanaki ʼaē ʼe foaki mai kia tatou fuli. Ka tou palalau kia nātou ʼaē kua matutuʼa peʼe ko te hahaʼi pule, pea ʼe tonu ke tou fakaʼapaʼapa ki tonatou tuʼulaga. (Levitike 19:32) Kapau ʼe tou fai feiā, pea ʼe tou faʼifaʼitaki anai kia Paulo, ʼaē neʼe ina ʼui fēnei: “Neʼe ʼau liliu ko meʼa fuli maʼa te faʼahiga hahaʼi fuli pe, ke feala haku hāofaki ʼihi.”​—1 Kolonito 9:​22.

[Nota ʼi te lalo pasina]