Tou Tauhi Ki Te ʼAtua ʼAki Te Moʼoni

Kapau ʼe tou loto ke tali e te ʼAtua tatatou tauhi, pea ʼe tonu ke fakatafito ki te moʼoni. (Soane 4:​23) ʼE fakahā e te Tohi-Tapu ko te kau atolasio moʼoni ʼe nātou kau ki “te kokelekasio ʼo te ʼAtua maʼuli, ko he pou pea mo he lagolago ʼo te moʼoni.” (1 Timoteo 3:​15) Ko nātou ʼaē ʼe kau ki te kokelekasio ʼo te ʼAtua ʼe mole gata ʼaki pe tanatou tui ki te moʼoni ʼo te Folafola ʼa te ʼAtua, kae ʼe nātou toe maʼuliʼi foki te moʼoni ʼaia pea mo lagolago kiai, ʼo nātou faka mafola ʼi te kele katoa.​—Mateo 24:14; Loma 10:​9-​15.

KUA ʼiloa te kau Fakamoʼoni ʼa Sehova ʼuhi ko tanatou ako te Tohi-Tapu ki te hahaʼi, ʼaē ʼe nātou fai ʼi te temi nei ʼi te ʼu fenua e 200 tupu. ʼE nātou ako te Tohi-Tapu pea mo nātou tala ki te hahaʼi ʼe ko te moʼoni ʼaia, pea ʼe mole nātou hilifaki kiai te ʼu filosofia fakatagata. ʼE koutou ʼiloʼi koa tanatou ʼu akonaki faka Tohi-Tapu? ʼE tokolahi te hahaʼi ʼe mole nātou fia palalau mo te kau Fakamoʼoni ʼa Sehova ʼuhi ko te ʼu meʼa ʼaē ʼe lau ʼo ʼuhiga mo nātou. Kae ʼe fakaafe te hahaʼi fakamalotoloto fuli ke nātou vakaʼi e nātou totonu peʼe moʼoni peʼe kailoa te ʼu meʼa ʼaē ʼe faka mafola e te kau Fakamoʼoni. Ko te tonu maʼuhiga ʼaia, ʼe mole tonu anai ke fakatafito pe ki te ʼu meʼa ʼaē ʼe lau e te hahaʼi. ʼE tokolahi te hahaʼi neʼe nātou fakatotonu ke nātou sivisivi tonu te ʼu akonaki ʼa te kau Fakamoʼoni ʼa Sehova, pea neʼe fua lelei kia nātou.

Ko Te ʼIloʼi ʼo Te Moʼoni ʼe Ina Pulihi Te Mataku

Ohage la ko te meʼa ʼaē neʼe hoko kia Eugenia. Neʼe lahi ake ʼi te loto fale neʼe maʼuhiga ai te lotu Katolika. Neʼe kau tana tāmai ki te hahaʼi ʼaē neʼe nātou fakatuʼutuʼu te folau ʼa te Tuʼi Tapu ki Mexico ʼi te taʼu 1979. ʼI te tahi ʼaho, neʼe ʼalu ia Eugenia ʼo ʼaʼahi tona ʼu kaumeʼa, pea neʼe felāveʼi mo te kau Fakamoʼoni ʼa Sehova. ʼAki tanatou tokoni kia ia, neʼe kamata ai tana vakavakaʼi lelei ia te ʼu meʼa ʼaē ʼe ʼui e te Tohi-Tapu. ʼE ina manatuʼi fēnei: “ ʼI te kamata, neʼe ʼau mataku. Kua ʼau maʼu te moʼoni! Kae ko tona faka ʼuhiga, neʼe hala te ʼu meʼa fuli ʼaē neʼe ʼau faka tui kiai ʼi muʼa atu. Ko toku famili, mo toku ʼu kaumeʼa, pea mo te ʼu hahaʼi ʼaē neʼe ʼau ʼofa ki ai​—neʼe nātou faihala. Neʼe ʼau lotohoha. Neʼe ʼau feʼekeʼaki tuʼumaʼu ʼi toku loto peʼe tali feafeaʼi anai e toku famili te ʼu meʼa foʼou ʼaē kua ʼau ako. ʼAki te temi pea mo te tokoni ʼa Sehova, neʼe ʼau lavaʼi te ʼaluʼaga faigataʼa ʼaia. ʼI te tahi ʼaho, neʼe ʼau fakahā te faʼahi ʼaia ki te kaumeʼa ʼo toku famili, ʼe ko te polofesea fai teolosia. Neʼe ʼau fakamahino age ki ai taku holi ʼaē ke ʼau maʼu te moʼoni. Pea neʼe ina ʼui mai, ‘Kapau ʼe ke fia ʼiloʼi ia te moʼoni, pea ʼalu ʼo kumi te kau Fakamoʼoni ʼa Sehova.’ ”

Ohage ko te meʼa ʼaē neʼe tuʼaniaʼi e Eugenia, neʼe kapu ia ia e tona famili ke mavae ʼi tonatou ʼapi. Kae ko te kau Fakamoʼoni neʼe nātou haga tokoni aipe kia ia ʼi te faʼahi fakalaumālie. ʼE ina ʼui fēnei: “Neʼe fakaloto mālohiʼi ʼau ke ʼau lagolago ki te moʼoni. Neʼe mahino kia ʼau, ʼe ʼau maʼu anai he ʼu fua lelei mo kapau ʼe ʼau lagolago kiai. Neʼe tali leleiʼi ʼau e te kau Fakamoʼoni ʼa Sehova pea neʼe maʼuhiga ʼaupito kia ʼau. Neʼe ʼau logoʼi ai te ʼofa ʼaē ʼe maʼu ʼi te kokelekasio faka Kilisitiano. Ko taku fakaōvi ki te kautahi ʼa te ʼAtua neʼe ko he tokoni ʼaia ke ʼau tauʼi taku mataku, he neʼe ko ʼau tokotahi pe ʼi te famili neʼe kau ki te moʼoni.”

Koʼeni te tahi faʼifaʼitaki. Ko Sabrina neʼe lahi ake ʼi te famili neʼe māhani ʼi te fai palalau ʼo ʼuhiga mo te Tohi-Tapu. ʼI tona fakahagatonu, neʼe nātou faʼufaʼu tanatou faʼahiga ‘lotu faka famili.’ Neʼe māhani ʼi te fai palalau mo te hahaʼi ʼo te tahi ʼu lotu moʼo fakahā age kia nātou tanatou ʼu hala. ʼI te ʼaho ʼaē neʼe fakaafe ai ia ia e te Fakamoʼoni ʼa Sehova ke nā ako te Tohi-Tapu, neʼe ina tali atu aipe he neʼe ina fakatuʼutuʼu ke ina fakahā age ʼe hala tana ʼu akonaki. ʼE ina manatuʼi: “Neʼe kua fakalaka taku ako ʼi te taʼu katoa, pea neʼe ʼau kamata mataku naʼa puli ‘taku moʼoni.’ ʼI te agamāhani, neʼe ko he meʼa faigafua haku fakahā te hala ʼo te ʼu lotu kehekehe ʼaē neʼe ʼau felāveʼi mo nātou, kae neʼe faigataʼa ʼaupito taku fai ʼo te faʼahi ʼaia mo te kau Fakamoʼoni ʼa Sehova.”

ʼI tana mataku, neʼe fakagata ai e Sabrina tana ako Tohi-Tapu mo te kau Fakamoʼoni ʼa Sehova. Kae ʼaki te temi, neʼe ina logoʼi neʼe mole kei ina maʼu te meʼa ʼaē neʼe ʼaoga kia ia ʼi te faʼahi fakalaumālie. Neʼe ina fakatotonu ai leva ke ina toe fai tana ako pea ki muli age, neʼe ina tali te moʼoni foʼou ʼaia ʼaē neʼe ina maʼu. Neʼe tuputupu ia Sabrina ʼi te faʼahi fakalaumālie pea neʼe ina fia fakahā ki te hahaʼi te ʼu meʼa ʼaē neʼe ina ako. Neʼe ina kole ke mulimuli ki te kau Fakamoʼoni ʼi tanatou fai faka mafola ʼi te ʼu ʼapi. ʼE fakamahino fēnei e Sabrina: “ ʼI muʼa ʼo te fakagafua ʼaē ke ʼau fai faka mafola mo te kau Fakamoʼoni ʼa Sehova, neʼe fai mai te fehuʼi ʼaenī: ‘ ʼE ke fia liliu moʼoni koa ko he Fakamoʼoni ʼa Sehova?’ Pea neʼe ʼau tali fēnei ‘Kailoa!’ Pea neʼe ʼau toe mataku ai.” ʼAki te temi, ʼi tana haga kau tuʼumaʼu ki te ʼu fono pea mo tana sio ki te hahaʼi ʼa te ʼAtua ʼe nātou maʼuliʼi te ʼu pelesepeto ʼo te Tohi-Tapu, neʼe mahino ai kia Sabrina, ʼe ko te moʼoni. Neʼe papitema pea ʼe ko te pionie katoa ʼi te temi nei.

He Koʼe Koa ʼe Kehe Age Ia?

Kae ʼe feala pe ke kita feʼekeʼaki, ‘pe koʼe koa ko te ʼu akonaki ʼa te kau Fakamoʼoni ʼa Sehova ʼe kehe age ia mo te tahi ʼu lotu?’ Kapau ʼe koutou vakaʼi fakanounou te ʼu meʼa ʼaē ʼe faka tui kiai te kau Fakamoʼoni, pea ʼe mahino anai kia koutou ko nātou ko te kau Kilisitiano fakamalotoloto ʼe nātou ako fakalelei te Tohi-Tapu. ʼE mātou fakaloto mālohiʼi koutou ke koutou vakaʼi ʼi takotou Tohi-Tapu te ʼu vaega ʼaē ʼe maʼu ʼi te fakamatala fakanounou ʼaē ʼe tuʼu ʼi ʼoluga ʼo ʼuhiga mo tanatou ʼu akonaki tāfito.

Kapau ʼe koutou vakaʼi fakalelei te ʼu meʼa ʼaē ʼe faka tui kiai te kau Fakamoʼoni ʼa Sehova pea mo tanatou faʼahiga maʼuliʼi ʼo te ʼu akonaki ʼo te Tohi-Tapu, ʼe tapuakina anai koutou ʼaki te ʼāteaina ʼaē ʼe foaki mai e te moʼoni. (Soane 17:17) ʼE mole tonu ke kita mataku ki te moʼoni. Koutou manatuʼi te fakapapau ʼa Sesu: “ ʼE koutou ʼiloʼi anai te moʼoni, pea ko te moʼoni ʼe ina faka ʼāteaina anai koutou.”​—Soane 8:​32.

[Talanoa ʼo te pasina 6]

KO HE ʼU AKONAKI TĀFITO ʼA TE KAU FAKAMOʼONI ʼA SEHOVA

◯ Ko Sehova ko te ʼAtua māfimāfi. Ko tona huafa ʼe hā tuʼa 7 000 tupu ʼi te ʼu tohi ʼāfea ʼo te Tohi-Tapu.​—Pesalemo 83:18.

◯ Ko Sesu Kilisito ʼe ko te ʼAlo ʼo te ʼAtua, pea neʼe hifo mai ki te kele ke ina momoli tona maʼuli maʼa te malamanei. (Soane 3:​16, 17) Ko te kau Fakamoʼoni ʼa Sehova ʼe nātou mulimuli ki te ʼu akonaki ʼa Sesu ʼaē ʼe maʼu ʼi te ʼu Evaselio.

◯ Ko te higoa ʼa te kau Fakamoʼoni ʼa Sehova ʼe fakatafito kia Isaia 43:10, ʼaē ʼe ʼui fēnei ai: “ ‘Ko koutou ko taku kau fakamoʼoni,’ ko te ʼui ʼaia ʼa Sehova.”

◯ Ko te Puleʼaga ʼaē ʼe faikole kiai te hahaʼi ʼi te faikole ʼaē ko te “Tāmai ʼi Selo,” ʼe ko he puleʼaga ʼi selo pea kua ʼamanaki ke ina pulihi te ʼu mamahi ʼi te malamanei, ʼo ina fetogi ʼaki te Palatiso ʼaē ʼe fakapapauʼi mai e te Tohi-Tapu.​—Isaia 9:​6, 7; Taniela 2:​44; Mateo 6:​9, 10; Fakahā 21:​3, 4.

◯ Ko nātou fuli ʼaē ʼe nātou fai te finegalo ʼo te ʼAtua ʼe feala ke nātou maʼu te ʼu tapuakina ʼo te Puleʼaga ʼo heʼegata.​—Soane 17:3; 1 Soane 2:​17.

◯ ʼE tonu ki te kau Kilisitiano ke nātou haga mulimuli tuʼumaʼu ki te ʼu meʼa ʼaē ʼe ʼui e te Tohi-Tapu. ʼE tonu ke nātou faiga ke nātou aga fakahagatonu, ke maʼa tonatou maʼuli pea mo nātou fai te ʼu aga ʼaē ʼe lelei, pea ke nātou ʼofa ki te kāiga.​—Mateo 22:39; Soane 13:35; 1 Kolonito 6:​9, 10.

[Paki ʼo te pasina 5]

Ko te kau Fakamoʼoni ʼa Sehova ʼe nātou faka mafola te moʼoni ʼa te Tohi-Tapu ia fenua e 200 tupu