Neʼe Nātou Fai Te Finegalo ʼo Te ʼAtua

Neʼe Fakatahi Ia Sesu Mo Te ʼu Kiʼi Tamaliki

NEʼE kua ōvi mai te fakaʼosi ʼo te ʼu taʼu e tolu vaelua ʼaē neʼe fai faka mafola ai ia Sesu. Mole fualoa, pea hū anai ki Selusalemi ʼo hoko anai kia te ia he mate fakamamahi ʼaupito. Neʼe ina ʼiloʼi lelei te meʼa ʼaē ka hoko, he neʼe ina ʼui fēnei ki tana ʼu tisipulo: “Ko te Foha ʼo te tagata ʼe tonu ke tuku ki te ʼu nima ʼo te tagata, pea ʼe nātou matehi anai ia ia.”​—Maleko 9:​31.

ʼE mahino ia neʼe lahi te ʼu meʼa ʼaē neʼe loto e Sesu ke ina fai ʼi te ʼu ʼaho, mo te ʼu hola, mo te ʼu lakaga fuli ʼaē neʼe kei toe. Neʼe kei ʼaoga ke tokaga ki tana ʼu tisipulo. Neʼe sio ia Sesu neʼe kei ʼaoga ke ina foaki he ʼu tokoni mālohi ke nātou agavaivai pea ke nātou tokakaga ke ʼaua naʼa nātou tūkia. (Maleko 9:​35-​37, 42-​48) Neʼe toe ʼaoga ke akoʼi nātou ʼo ʼuhiga mo te nofo ʼohoana, mo te mavete pea mo te nofo selipatea. (Mateo 19:​3-​12) ʼI tana ʼiloʼi ʼaē kua ōvi mai tana mate, ʼe mahino papau ia neʼe palalau fakalelei pea mo palalau fakanounou ia Sesu kia nātou, pea neʼe ina fakahā te maʼuhiga ʼaupito ʼo te temi. ʼUhi ko te faʼahi maʼuhiga ʼaia, neʼe fai ai e Sesu te meʼa fakaofoofo ki muli age.

ʼE Tali Lelei e Sesu Te ʼu Kiʼi Tamaliki

ʼE ʼui fēnei e te fakamatala ʼo te Tohi-Tapu: “Neʼe ʼaumai kia te ia te ʼu kiʼi tamaliki ke fāfā kia nātou.” ʼI te sio ʼa te kau tisipulo ki te faʼahi ʼaia, neʼe nātou fakahā atu aipe tanatou ʼita. Neʼe nātou lagi manatu ʼe maʼuhiga fau ia Sesu peʼe maʼumaʼua fau ke tokaga ai ki te ʼu kiʼi tamaliki. Koutou fakakaukauʼi age muʼa te punamaʼuli ʼa te kau tisipulo ʼi te ʼita ʼa Sesu kia nātou! Neʼe ina ʼui fēnei: “Koutou tukunoaʼi te ʼu kiʼi tamaliki ke ʼōmai kia te ʼau; pea ʼaua naʼa koutou faigaʼi ke koutou tāʼofi ia nātou, heʼe ko te puleʼaga ʼo te ʼAtua ʼe ʼa nātou ʼaē ʼe tatau mo nātou ʼaenī.” Pea neʼe toe ʼui fēnei e Sesu: “ ʼE ʼau tala moʼoni atu kia koutou, ko ʼaē ʼe mole ina tali te puleʼaga ʼo te ʼAtua ohage ko he kiʼi tamasiʼi, ʼe mole hū anai ia kiai.”​—Maleko 10:13-​15.

Neʼe sio ia Sesu ki te ʼu kalitate matalelei ʼaē ʼe maʼu e te ʼu kiʼi tamaliki. ʼI te agamāhani, ʼe lahi te ʼu meʼa ʼaē ʼe nātou fia ʼiloʼi pea ʼe feala ke tou falala kia nātou. ʼE nātou fakalogo ki te ʼu meʼa ʼaē ʼe ʼui age e tanatou ʼu mātuʼa pea mo nātou palalau lelei ʼo ʼuhiga mo nātou ia muʼa ʼo te tahi ʼu tamaliki. ʼE tau mo feʼauga ke faʼifaʼitakiʼi e nātou fuli ʼaē ʼe fia hū ki te Puleʼaga ʼa te ʼAtua te fia logo pea mo te fia ako ʼa te ʼu kiʼi tamaliki. Ohage ko tona ʼui e Sesu, “ko te puleʼaga ʼa te ʼAtua ʼe ʼa nātou ʼaē ʼe tatau mo nātou.”​—Vakaʼi ia Mateo 18:​1-5.

Kae neʼe mole fakaʼaogaʼi pe e Sesu te ʼu kiʼi tamaliki ʼaia moʼo fai ʼaki he lea fakatātā. ʼE fakahā lelei e te fakamatala neʼe leleiʼia ʼaupito e Sesu tana fakatahi mo nātou. ʼE ʼui e Maleko ʼo ʼuhiga mo Sesu, “neʼe ina toʼo te ʼu tamaliki ʼi ʼona nima pea ina tapuakina ia nātou, ʼo ina hilifaki ʼona nima kia nātou.” (Maleko 10:16) ʼE ko Maleko tokotahi pe ʼaē ʼe ina fakamatala te ʼofa ʼa Sesu ʼi tana “toʼo te ʼu tamaliki ʼi ʼona nima.”a Neʼe fai ai e Sesu te meʼa ʼe lahi age ʼi te meʼa ʼaē neʼe ʼamanaki kiai te hahaʼi, he neʼe nātou ʼaumai te ʼu tamaliki ke “fāfā” pe kia nātou.

Koteā tona faka ʼuhiga ʼo te ʼui ʼaē ko Sesu neʼe ina “hilifaki ʼona nima” ki te ʼu tamaliki? ʼE mole faka ʼuhiga ia ki he toʼotoʼoga faka lotu, ohage ko he papitema. Logope la ʼi ʼihi ʼu ʼaluʼaga ʼe hilifaki te ʼu nima moʼo fakanofo he tahi ki he gāue, kae ʼi te tahi ʼu ʼaluʼaga, ʼe faka ʼuhiga pe ia ki he tapuakina. (Senesi 48:14; Gāue 6:6) Koia neʼe loto pe e Sesu ke ina tapuakinaʼi te ʼu tamaliki.

Tatau aipe pe koteā tona faka ʼuhiga, kae ʼe fakaʼaogaʼi e Maleko te kupu “tapuakina” (ka·teu·lo·geʹo), moʼo fakahā te mālohi ʼo te kupu ʼaia. ʼE hā ai te fakamalotoloto, mo te agalelei, pea mo te ʼofa ʼa Sesu ʼi tana tapuakiʼi te ʼu tamaliki. Koia neʼe mole manatu ia ʼe pulinoa tona temi ʼi tana fakatahi mo te ʼu tamaliki.

Te Ako Kia Tatou

Ko te aga ʼa Sesu ki te ʼu kiʼi tamaliki pea mo te hahaʼi lalahi, neʼe mole ko he meʼa fakaufiufi kia ia peʼe ko hona fakalainoaʼi. ʼE ʼui fēnei e te tohi: “ ʼE mahino, neʼe malimali pea mo kata fakafiafia.” ʼE mahino papau ia neʼe leleiʼia e te hahaʼi ʼaē neʼe taʼu kehekehe tanatou fakatahi mo ia. ʼI tatatou faʼifaʼitakiʼi ia Sesu, ʼe feala ke tou feʼekeʼaki fēnei, ‘ ʼE faigafua koa kia ʼihi hanatou fia ʼōmai ʼo palalau mai kia ʼau?’ ‘ ʼE ʼau maʼumaʼua fau koa ke mole ʼau tokaga ai ki te hahaʼi?’ Ko te tokaga moʼoni ʼaē ki te hahaʼi ʼe ina uga anai tatou ke tou fakaʼaogaʼi totatou temi maʼa ʼihi, ohage ko tona fai e Sesu. ʼE logoʼi anai e ʼihi tatatou tokaga ʼaē kia nātou pea ʼe nātou fia palalau anai mo tatou.​—Tāʼaga Lea 11:25.

Ohage ko tona fakahā e te fakamatala ʼa Maleko, neʼe leleiʼia e Sesu tana fakatahi mo te ʼu kiʼi tamaliki. Neʼe ina sioʼi tanatou gaoʼi, heʼe ʼi tana tahi lea fakatātā neʼe talanoa ki tanatou ʼu faigaoʼi. (Mateo 11:16-​19) Neʼe lagi kei veliveli fau te ʼu tamaliki ʼaē neʼe tapuakiʼi e Sesu, ke feala hanatou ʼiloʼi te lelei ʼo tanatou fakatahi mo ia pea mo te ʼu meʼa ʼaē neʼe ina akoʼi age kia nātou. Kae neʼe mole manatu e Sesu ʼe pulinoa tona temi. Neʼe ina fakaʼaogaʼi hona temi ke fakatahi ai mo nātou he neʼe ʼofa kia nātou. ʼE mahino papau ia, ko te tokolahi ʼo te ʼu kiʼi tamaliki ʼaē neʼe felāveʼi mo Sesu lolotoga tana minisitelio, neʼe nātou tali ki muli age tona ʼofa ʼo nātou liliu ko hana ʼu tisipulo.

Kapau neʼe fakaʼaogaʼi e Sesu hona temi ke fakatahi ai mo te ʼu kiʼi tamaliki lolotoga te ʼu vāhaʼa fakamuli pea mo fakamataku ʼo tona maʼuli, pea ʼe mahino ia ʼe feala ke tou fakatuʼutuʼu he temi ke tou fakatahi mo nātou liliki. ʼE tonu ke tou tokakaga tāfito kia nātou ʼaē ʼe ʼaoga lahi kiai te faʼahi ʼaia, ohage ko te ʼu kiʼi tamaliki tagata pea mo fafine ʼaē ʼe mole hanatou tāmai. Ei, ʼe tuputupu lelei te ʼu kiʼi tamaliki liliki fuli mokā tou tokaga kia nātou, pea ʼe loto e Sehova ke tou ʼofa pea mo tou tokoni kia nātou.​—Pesalemo 10:⁠14.

[Nota ʼi te lalo pasina]