ʼE Nātou ʼAmanaki Fai He Gāue ʼe Lahi Age

“NEʼE mole mātou fakataupiepie. Neʼe mātou loto fuli ke mātou maʼu tamatou ʼu pepa misionea,” neʼe ko te palalau ʼaia neʼe fai e Richard pea mo Lusia, ʼo ʼuhiga mo te ʼu kaugā ako ʼo te 105 kalasi ʼo te Faleako Faka Tohi-Tapu ʼo Kalaate ʼo te Sosiete Watchtower. “ ʼE mātou kehekehe fuli, kae neʼe maʼuhiga kia māua te kau ako fuli.” Ko Lowell, ʼaē neʼe kau ʼi te kalasi ʼaia, neʼe toe manatu feiā mo ia, pea neʼe ina ʼui fēnei: “Neʼe mātou feʼofaʼofani ʼuhi ko tamatou ʼu kehekehe ʼaia.”

Ko te kalasi ʼaia, ʼaē neʼe foaki tanatou ʼu pepa ʼi te ʼaho 12 ʼo Sepetepeli 1998, neʼe nātou kehekehe. Ko ʼihi neʼe nātou pionie ʼi te ʼu koga meʼa ʼaē ʼe ʼaoga lahi ai he kau kaugā fai faka mafola ʼo te Puleʼaga; ko ʼihi neʼe nātou tauhi agatonu ʼi tonatou fenua totonu. Ko te tokosiʼi, ohage ko Mats pea mo Rose-Marie, neʼe nā gāue loaloaga pea mo kinakina ke nā ako te lea Fakapilitānia ʼi muʼa ʼo tana kau ki te ako ʼaia. Tokolahi ia nātou neʼe nātou manatu ki te gāue faka misionea talu tanatou kei liliki. Neʼe fai e te taumatuʼa tana ʼu kole e 12 ke nā kau kiai; neʼe nā fiafia ʼaupito ʼi tanā maʼu tanā fakaafe ki te 105 kalasi!

Neʼe fakalaka fakavilivili te ʼu vāhaʼa e 20 ʼaē neʼe lahi ai te ʼu meʼa ʼaē neʼe nātou ako, he neʼe mole tokagaʼi pe la e te kau ako neʼe kua nātou aʼu ki tanatou gāue fakaʼosi ʼi te faleako pea mo tanatou ʼu fakafehuʼi fakaʼosi. Neʼe hoko mai leva te ʼaho ʼaē neʼe tufa ai tanatou ʼu pepa.

Ko Albert Schroeder te pelesita ʼo te polokalama, ʼe kau ʼi te Kolesi Pule ʼo te kau Fakamoʼoni ʼa Sehova, pea neʼe ina fakamanatuʼi age ki te kalasi ʼe nātou “ ʼamanaki fai he gāue lahi ʼi te gāue ʼaē ko te akoʼi ki te hahaʼi te Tohi-Tapu,” pea ʼe nātou fakatahi mo te ʼu tēhina e toko 7 000 ʼaē neʼe kua nātou kau ki te ako ʼo Kalaate. Neʼe ina fakatokagaʼi age kia nātou, lolotoga te temi vela ʼaia, neʼe maʼu e te kau ako ʼaia te pilivilesio ʼaē ke nātou fakatahi mo he kau misionea ʼāfea, he neʼe nātou ʼaʼahi te ʼu fale lalahi ʼo te Sosiete lolotoga te ʼu fakatahi faka malamanei.

Pea neʼe fakahā leva e te Tēhina ko Schroeder ia te Tēhina ko Max Larson, ʼaē ʼe kau ʼi te Komite Fai Fakatuʼutuʼu ʼo te Petele. Neʼe palalau ki te kupu tāfito “Te Ako ʼAē ʼe Ina Taki Ki Te Maʼuli Heʼegata.” Neʼe talanoa te Tēhina ko Larson ki te vaega ʼo Tāʼaga Lea 1:5, ʼaē ʼe ʼui fēnei ai: “ ʼE fakalogo anai ia ia ʼaē ʼe poto pea ʼe lahi anai te ʼu meʼa ʼaē ka ina ako, pea ko te tagata ʼaē ʼe mahino ʼe ko ia ʼaē ʼe ina maʼu he poto takitaki.” ʼE maʼua ke kita maʼu te poto ke fua lelei ai takita gāue misionea. ʼE tutuʼu te ʼu tagata popoto ʼi muʼa ʼo te ʼu hau. (Tāʼaga Lea 22:29) ʼI te ʼosi ʼo tanatou ako ʼaē neʼe fai lolotoga māhina e nima, neʼe kua maʼu katoa e te kau ako te ʼu meʼa ʼaē neʼe ʼaoga kia nātou ke nātou fakafofoga te ʼu Hau ʼaē ʼe lalahi tokotahi, ia Sehova ʼAtua pea mo Kilisito Sesu.

Pea neʼe hoa kiai te Tēhina ko David Olson ʼo te Selevisi Gāue, ʼo palalau ki te “Tokoni ʼAē ʼe Ina Fakafiafia Te Loto ʼo Sehova.” Neʼe ina fehuʼi fēnei: “Koteā ʼaē ʼe feala ke fai e te ʼu hahaʼi agahala moʼo fakafiafia te loto ʼo te ʼAtua?” Koteā tana tali? ʼE feala ke nātou tauhi agatonu kia te ia pea mo nātou fai ʼaki te fiafia. ʼE loto e Sehova ke fiafia tana hahaʼi ʼi tanatou tauhi kia te ia. Kapau ʼe tou fai te finegalo ʼo te ʼAtua ʼaki te fiafia, pea ʼe tou fakafiafia ai tona loto. (Tāʼaga Lea 27:11) Neʼe lau e te Tēhina ko Olson te tohi mai te taumatuʼa misionea neʼe nā kau ʼi te 104 kalasi ʼo Kalaate. Neʼe nā fiafia koa ʼi tanā telituale foʼou ʼaia? Koʼeni te meʼa ʼaē neʼe nā tohi ʼo ʼuhiga mo te kokelekasio: “Ko kaugā fai faka mafola e toko 140, pea ʼe fakafuafua ko hahaʼi ʼe teitei toko 250 peʼe 300 ʼaē ʼe nātou kau ki te ʼu fono. Ko te fai faka mafola ʼe ko te faʼahi lelei ʼaupito. ʼE ma takitahi te ʼu ako e fā, pea ko ʼihi kua ʼōmai ki te ʼu fono.”

Ko Lyman Swingle, ʼo te Kolesi Pule, neʼe palalau ki te faʼahi ʼaenī: “Ko He Temi Ke Koutou Tuʼu Ai Pea Mo Koutou Fakafuafua Takotou ʼu Tapuakina.” Neʼe maʼu te ʼu tapuakina lahi ʼaki te ako ʼo Kalaate. Neʼe tokoni te ako ʼaia ki te kau ako ke lahi age tonatou ʼatamai mālama, ke tuputupu tanatou leleiʼia ia te kautahi ʼa Sehova, pea ke nātou maʼuliʼi he ʼu kalitate maʼuhiga, ohage ko te agavaivai. Neʼe ʼui fēnei e te Tēhina ko Swingle: “Neʼe koutou fakahā takotou agavaivai ʼi takotou ʼōmai ki henī pea mo fakaʼaogaʼi tokotou temi moʼo fakalogo ki te ako ʼaē neʼe fai atu kia koutou,” pea neʼe ina toe ʼui fēnei: “ ʼE koutou mavae ʼi henī kua koutou maʼu katoa te ʼu meʼa ʼaē ʼe ʼaoga kia koutou moʼo fakavikiviki ia Sehova.”

“ ʼE Ko He Fiafia Lahi ʼAē ʼe Koutou Maʼu​—He Koʼe Koa ʼe Koutou Hoha?” Neʼe ko te kupu tāfito ʼaia ʼo te akonaki ʼo te Tēhina ko Daniel Sydlik, ʼaē ʼe toe kau mo ia ʼi te Kolesi Pule. Ka hoko he ʼu fihifihia, neʼe ina fakaloto mālohi ke kumi tokoni ki te Tohi-Tapu. ʼI tana fakaʼaogaʼi te ʼu vaega neʼe ina toʼo ʼi te kapite 6 ʼo Mateo, neʼe fakahā e te Tēhina ko Sydlik peʼe lava feafeaʼi hanatou fai te faʼahi ʼaia. Ko te tui vaivai ʼe feala ke tupu ai hatatou lotohoha ʼo ʼuhiga mo he ʼu meʼa ʼe mole faʼa maʼuhiga, ohage ko te meʼa kai pea mo te ʼu mutuʼi meʼa. Kae ʼe ʼiloʼi e Sehova te ʼu meʼa ʼaē ʼe ʼaoga kia tatou. (Mateo 6:​25, 30) Ko te lotohoha ʼe ina toe fakaʼāsili te ʼu fihifihia ʼaē ʼe hoko kia tatou ʼi te ʼaho fuli. (Mateo 6:​34) ʼI te tahi faʼahi, ʼe tonu ke kita fai he ʼu fakatuʼutuʼu. (Vakaʼi ia Luka 14:28.) Neʼe fakamahino fēnei e te Tēhina ko Sydlik: “Neʼe mole ʼui e Sesu ʼe mole fakapotopoto te vakavakaʼi ʼo tatatou ka haʼu, kae neʼe ina ʼui ʼe mole ko he aga fakapotopoto hatatou lotohoha ʼo ʼuhiga mo te ka haʼu. Ko te faitoʼo ki te lotohoha ʼe ko te gāue. Kapau ʼe tou lotohoha, pea ʼe lelei ke tou kamata palalau [ki te hahaʼi] ʼo ʼuhiga mo te moʼoni.”

Ko Te ʼu Tokoni Fakaʼosi ʼa Te Kau Faiako

Neʼe hoa kiai te ʼu akonaki neʼe fai e te ʼu tēhina e toko tolu ʼo te Faleako ʼo Kalaate. Neʼe ʼuluaki palalau ia Karl Adams ʼo ʼuhiga mo te kupu tāfito ʼaenī: “Koteā ʼAē Ka Koutou Liufaki Anai Kia Sehova?” Neʼe fakatafito tana akonaki ki te Pesalemo 116, ʼaē neʼe lagi hivaʼi e Sesu ʼi tona po fakaʼosi. (Mateo 26: 30, kiʼi nota ʼi te lalo pasina) Koteā ʼaē neʼe manatu kiai ia Sesu ʼi tana hiva fēnei: “Koteā anai he meʼa ke ʼau liufaki kia Sehova ʼo ʼuhiga mo te ʼu lelei fuli ʼaē neʼe ina foaki mai kia te ʼau”? (Pesalemo 116:12) Neʼe lagi ina fakakaukauʼi te sino haohaoa ʼaē neʼe teuteuʼi e Sehova maʼa ia. (Hepeleo 10:5) ʼI te ʼaho ake, neʼe ina foaki faka sakilifisio tona maʼuli, moʼo fakahā tona ʼofa lahi. Neʼe maʼu e te kau ako ʼo te 105 kalasi te ʼu lelei mai ia Sehova lolotoga te ʼu māhina ʼaia e nima. ʼI te temi leva ʼaenī, ʼe tonu ke nātou fakahā tanatou ʼofa ki te ʼAtua ʼo nātou gāue kinakina ʼi te telituale ʼaē ka nātou misionea ai.

Ko te lua akonaki neʼe fai e Mark Noumair, te Tēhina faiako ʼo Kalaate, pea neʼe tokoni ki te kau ako ʼaki te akonaki ʼaenī “Ke Hoko Atu Takotou Fai Te Meʼa ʼAē ʼe Totonu.” ʼI tona ʼave fakapōpula ki Esipito, neʼe kātakiʼi e Sosefo lolotoga taʼu e 13 tona gaohi koviʼi. Neʼe ina līaki koa tana tauhi ki te ʼAtua ʼuhi ko te ʼu meʼa kovi ʼaē neʼe hoko kia ia? Kailoa, kae neʼe hoko atu tana fai te meʼa ʼaē ʼe totonu. Pea ʼi te temi ʼaē neʼe kua fakakatofa e te ʼAtua, neʼe hāofaki ia Sosefo mai tona ʼu ʼahiʼahi. Neʼe mole kei nofo ʼi te fale pilisoni kae neʼe kua nofo leva ʼi te fale hau. (Senesi, kapite 37 ki te 50) Neʼe fehuʼi fēnei e te Tēhina faiako ki te kau ako: “Kapau ʼe mole hoko te ʼu meʼa ʼaē neʼe koutou ʼamanaki kiai ʼi tokotou telituale, ʼe koutou līaki anai koa takotou selevisi misionea? ʼE koutou lotovaivai anai koa? Peʼe ohage ko Sosefo, ʼe koutou faʼa kātaki anai?”

Moʼo fakaʼosi, ko te Tēhina faiako ʼo te Faleako ʼo Kalaate, ko Wallace Liverance, neʼe ina takitaki te fai palalau fakafiafia mo te kalasi, ko tona kupu tāfito: “Koutou Tala Ki Te Hahaʼi Te Hau Pea Mo Tona Puleʼaga.” Neʼe fakamatala e ʼihi kau ako te ʼu meʼa ʼaē neʼe hoko kia nātou ʼi tanatou fai faka mafola ʼi te ʼu ʼapi, ʼi te ʼu fale koloā, pea ʼi te ala. Neʼe fakahā e ʼihi pe neʼe feafeaʼi tanatou fai faka mafola ki te hahaʼi ʼaē neʼe mole nātou lea tahi. Pea ko ʼihi neʼe nātou fakahā pe neʼe feafeaʼi tanatou faka mafola ki he ʼu hahaʼi lotu kehekehe. Neʼe fakaʼaogaʼi fakamalotoloto e te kau maʼu pepa fuli ʼaia tonatou temi katoa ki te minisitelio ʼi tonatou telituale misionea.

Ko He Fiafia Loaloaga ʼe Maʼu e Te Kau Misionea

Ko te kupu tāfito ʼo te akonaki ʼaē neʼe hoa kiai “Te Fiafia ʼAē ʼe Maʼu Mai Te Tauhi Faka Misionea,” neʼe fai e Robert Wallen pea neʼe fakafehuʼi ai te ʼu tēhina e toko fā ʼo te Petele ʼaē, mole heʼeki faʼa fualoa, neʼe fakaloto mālohiʼi nātou e te kau misionea ʼaē neʼe fakatahitahi mo nātou. Neʼe ʼui e te kau misionea ʼaia neʼe faigataʼa kia nātou hanatou ako he lea foʼou, mo mulimuli ki te ʼu agaʼi fenua, pea mo fakamāmāhani mo te fetogitogi ʼo te temi. Pea neʼe nātou tauʼi mo tanatou toe fia liliu ki tonatou fenua. ʼI ʼihi temi, neʼe nātou mahahaki. Logope la te ʼu faʼahi ʼaia, kae neʼe lotomālohi te kau misionea ʼaia, pea neʼe tapuakiʼi tanatou faʼa kātaki. Ko ʼihi neʼe nātou tokoni ki te tokolahi ke nātou ʼiloʼi ia Sehova. Pea ko ʼihi leva neʼe nātou tokoni ʼi he ʼu ʼaluʼaga kehekehe ki te tuputupu ʼo te gāue ʼo te Puleʼaga ʼi tonatou fenua.

Ko Carey Barber, ʼaē ʼe kau ʼi te Kolesi Pule, neʼe ina fai te akonaki fakamuli. Neʼe ina toe fakamanatuʼi te ʼu faʼahi maʼuhiga ʼo te fakatahi “Te Faʼahiga Maʼuli ʼAē ʼe Fakamaʼua Mai e Te ʼAtua.” Neʼe ina fehuʼi fēnei ki te hahaʼi: “Neʼe koteā te ʼu fua ʼo te fakatahi ki takotou ʼu felogoi mo Sehova?” Pea neʼe fakahā e te tēhina ʼaia te ʼu tapuakina kehekehe ʼaē ʼe tou maʼu mokā tou mulimuli ki te ala ʼa te ʼAtua pea mo te ikuʼaga fakaʼofaʼofa ʼo nātou ʼaē ʼe nātou mulimuli ki te ala ʼo te mālama. ʼO ʼuhiga mo te hala ʼaē neʼe fai e Moisese ʼi Melipā, neʼe ina fai te fakatokaga ʼaenī: “Tatau aipe peʼe tauhi agatonu he tahi lolotoga ni ʼu taʼu, kae ʼe mole tuku feiā e Sehova te talagataʼa ʼa he tahi ki Tana ʼu lao faitotonu, tatau aipe peʼe veliveli tana talagataʼa.” (Faka au 20:​2-​13) Tou fakaʼamu ke haga tapiki maʼu te ʼu kaugana fuli ʼa te ʼAtua ʼi te kele katoa, ki te ʼu pilivilesio maʼuhiga ʼaē ʼe tuku age kia nātou ʼi tanatou tauhi kia Sehova!

Neʼe hoko mai leva te temi ʼaē ke foaki ai te ʼu pepa ʼo te kau ako. Pea neʼe nātou lau tanatou tohi ʼaē neʼe nātou fakahā ai tanatou loto fakafetaʼi ki te ʼu meʼa ʼaē neʼe akoʼi age kia nātou. ʼI te hili ʼo te katiko fakaʼosi pea mo te faikole, neʼe fakaʼosi ai leva te polokalama ʼo te kau maʼu pepa. Kae neʼe ko te kamataʼaga ʼaia maʼa te 105 kalasi koteʼuhi ko te kau misionea neʼe nātou “ ʼamanaki fai he gāue ʼe lahi age.”

[Talanoa ʼo te pasina 23]

KO TE ʼU AGAAGA ʼO TE KALASI

Ko te lahi ʼo te ʼu fenua ʼaē neʼe fakafofoga: 9

Ko te lahi ʼo te ʼu fenua ʼaē neʼe hinoʼi nātou kiai: 17

Ko te hahaʼi ʼo te kau ako: 48

Ko te hahaʼi ʼo te ʼu taumatuʼa: 24

Ko te fakafuafua ʼo te ʼu taʼu ʼo te kau ako: 33

Ko te fakafuafua ʼo te ʼu taʼu ʼi te moʼoni: 16

Ko te fakafuafua ʼo te ʼu taʼu ʼi te gāue temi katoa: 12

[Talanoa ʼo te pasina 24]

Neʼe Nātou Fili Te Selevisi Temi Katoa

Neʼe ʼui fēnei e Ben, ʼaē neʼe kau ki te kau maʼu pepa ʼo te 105 kalasi: “ ʼI taku kei tūpulaga, neʼe mole ʼau fakatuʼutuʼu ke ʼau pionie. ʼI taku manatu neʼe gata pe kia nātou ʼaē neʼe maʼu tanatou ʼu fealagia makehe pea mo he ʼu ʼaluʼaga faigamālie neʼe feala ke nātou pionie. Kae neʼe ʼau manako ki te gāue fai faka mafola. Koia neʼe ʼau manatu ai, kapau ʼe ʼau loto ke lahi taku faka mafola, pea ʼe tonu ke ʼau pionie. Neʼe hoki mahino ai leva kia ʼau, neʼe feala ke ʼau liliu ʼo pionie.”

ʼE fakamatala fēnei e Lusia: “ ʼI toku famili, neʼe maʼuhiga ʼaupito te ʼu tēhina mo tuagaʼane ʼaē neʼe gāue temi katoa.” ʼE ina manatuʼi te fiafia ʼaupito ʼo tana kokelekasio ʼi te temi ʼaē neʼe ʼōmai ai te kau misionea ʼo ʼaʼahi nātou. ʼE ina ʼui fēnei: “ ʼI taku lahilahi ake, neʼe kua ʼau fakatuʼutuʼu ke ʼau kau ki te gāue temi katoa.”

Neʼe taʼu 15 ia Theodis ʼi te temi ʼaē neʼe mate ai tana faʼe. ʼE ina ʼui fēnei: “ ʼI te temi ʼaia, neʼe tokoni moʼoni kia ʼau te kokelekasio, koia neʼe ʼau feʼekeʼaki ʼi toku loto, ‘Koteā te meʼa ʼe feala ke ʼau fai moʼo fakahā toku loto fakafetaʼi?’ ” Neʼe ina toʼo te selevisi temi katoa pea ʼi te temi nei kua misionea.

[Paki ʼo te pasina 25]

Ko Te Kalasi 105 ʼo Te Faleako Faka Tohi-Tapu ʼo Kalaate ʼo Te Sosiete Watchtower

ʼI te lisi ʼaē ʼe tuʼu ʼi lalo, ʼe kamata mai muʼa ʼo aʼu ki muli, pea ko te ʼu higoaʼaē ʼe tuʼu ʼi te lisi ʼe lau mai te faʼahi hema ki te faʼahi mataʼu

(1) Sampson, M.; Brown, I.; Heggli, G.; Abuyen, E.; Desbois, M.; Pourthié, P. (2) Kassam, G.; Lindberg, R.; Dapuzzo, A.; Taylor, C.; LeFevre, K.; Walker, S. (3) Baker, L.; Pellas, M.; Woggon, E.; Böhne, C.; Asplund, J.; Haile, J. (4) Pourthié, T.; Whittaker, J.; Palmer, L.; Norton, S.; Gering, M.; Haile, W. (5) Walker, J.; Böhne, A.; Groenveld, C.; Washington, M.; Whittaker, D.; Abuyen, J. (6) Gering, W.; Washington, K.; Pellas, M.; Desbois, R.; Heggli, T.; Asplund, Å. (7) Woggon, B.; LeFevre, R.; Taylor, L.; Brown, T.; Groenveld, R.; Palmer, R. (8) Norton, P.; Sampson, T.; Baker, C.; Lindberg, M.; Kassam, M.; Dapuzzo, M.