Neʼe Tokoni Ki Te Mafola ʼo Te Moʼoni
NEʼE fakaʼaogaʼi te ʼapositolo ko Paulo moʼo faka mafola te mālama fakalaumālie “ ʼo aʼu ki te ʼu potu taupotu ʼo te kele.” Ko te meʼa ʼaē neʼe hoko ʼaki, “ko nātou fuli ʼaē neʼe lotolelei ki te maʼuli heʼegata neʼe nātou liliu ʼo tui.”—Gaue 13:47, 48, MN; Isaia 49:6.
Neʼe toe hā lelei te fia faka mafola ʼo te mālama fakalaumālie ʼi te maʼuli faka Kilisitiano pea mo te gāue kinakina ʼa te Tēhina ko William Lloyd Barry, ʼaē neʼe kau ʼi te Kolesi Pule ʼa te kau Fakamoʼoni ʼa Sehova. Neʼe mate te Tēhina ko Barry ʼi te ʼaho 2 ʼo Sūlio 1999, ʼi tana lolotoga faiakonaki ʼi he fakatahi faka tisitilike ʼi Hawaii.
Neʼe tupu ia Lloyd Barry ʼi Niusila ʼi te ʼaho 20 ʼo Tesepeli 1916. Neʼe kua fia logo tana tāmai pea mo tana faʼe ki te ʼu moʼoni faka Tohi-Tapu ʼaē neʼe fakahā ʼi te ʼu tohi ʼa C. T. Russell, ʼaē neʼe tā e te Watch Tower Bible and Tract Society. Koia, neʼe lahi ake te Tēhina ko Barry ʼi he loto fale faka Kilisitiano.
Logola tana leleiʼia te faigaoʼi pea mo te ʼu ako, tana maʼu pepa ʼi te ʼu meʼa fakapoto lalahi, kae neʼe tokaga tāfito e te Tēhina ko Barry ki te ʼu meʼa fakalaumālie. Koia, ʼi te ʼaho 1 ʼo Sanualio 1939, neʼe kamata ai tona minisitelio ʼi te temi katoa, ʼi tana kau ki te famili ʼo te Petele ʼi Ositalalia. ʼI te ʼosi tapuʼi ʼo te Sosiete e te puleʼaga ʼi te taʼu 1941, neʼe hoko atu pe te gāue pilō ʼa te Tēhina ko Barry, pea neʼe kole age ʼi ʼihi lakaga ke ina fai he ʼu tohi moʼo fakaloto mālohiʼi te ʼu tēhina. Neʼe toe gāue fakamalotoloto foki ʼi te minisitelio ʼi te ʼu ʼapi.
ʼI Fepualio 1942, neʼe ʼohoana te Tēhina ko Barry mo te tahi pionie. Ko tona ʼohoana agaʼofa ko Melba, neʼe kaugā gāue agatonu mo ia ʼi te ʼu potu kehekehe ʼo te malamanei lolotoga te ʼu taʼu fuli ʼaia. Neʼe nā fakahā tanā fia gāue ʼi he ʼu fenua matāpule ʼi tanā kau ʼi te 11 kalasi ʼo te Ako Faka Tohi-Tapu ʼo Kalaate ʼo te Sosiete Watchtower ʼi Amelika. Neʼe fekauʼi nāua ki he fenua ʼe hage kia tatou ʼe ko te ‘potu taupotu ʼo te kele,’ ʼe ko Saponia. ʼI tanā tau kiai ʼi te māhina ʼo Novepeli 1949, neʼe nā kamata gāue misionea ʼi te ʼuafu ʼo Kobe. ʼI te temi ʼaia, neʼe ko kaugā fai faka mafola e 12 pe ʼi Saponia. Neʼe ako e te Tēhina ko Barry te lea ʼo te fenua pea mo tona ʼu agaʼi fenua, pea neʼe tuputupu tona ʼofa ki te hahaʼi Saponia ʼaē neʼe gāue fakatahi mo nātou lolotoga taʼu e 25. Ko tona ʼofa kia nātou ʼaē “neʼe lotolelei ki te maʼuli heʼegata,” neʼe hā lelei ki te ʼu tēhina kaugamālie ʼi Saponia, pea neʼe ʼaoga te faʼahi ʼaia kia ia ʼi tana takitaki te filiale lolotoga ni ʼu taʼu.
ʼI te vaelua ʼo te taʼu 1975, ʼi te temi ʼaē neʼe maʼu ai te toko 30 000 kau Fakamoʼoni ʼi Saponia, neʼe fekauʼi ai leva te Tēhina ko Barry pea mo tona ʼohoana ki Brooklyn, ʼi New York. ʼI tona ʼuhiga Kilisitiano kua fakanofo ʼaki te laumālie, neʼe fakaafe te Tēhina ko Barry ke kau ʼi te Kolesi Pule ʼa te kau Fakamoʼoni ʼa Sehova. (Loma 8:16, 17) Ko tona poto ʼi te faitohi neʼe ʼaoga ʼaupito, he neʼe gāue ʼi te Komite Faitohi ʼa te Sosiete. Tahi ʼaē meʼa, neʼe maʼuhiga tana kua māhani ʼi te gāue ʼi te ʼu filiale pea mo te ʼu fenua kehekehe ʼi te temi ʼaē neʼe kau ai ʼi te Komite Tā Tohi ʼa te Kolesi Pule.
ʼI te ʼu taʼu fuli ʼaia, neʼe taupau e te Tēhina ko Barry tana ʼofa ki te ʼu fenua ʼo Asia pea mo tana hahaʼi. Ko te kau ako ʼi Kalaate pea mo nātou ʼo te Petele, neʼe nātou ʼiloʼi ʼe ʼi ai tuʼumaʼu anai ʼi tana ʼu akonaki he ʼu fakamatala ʼo ʼuhiga mo te ʼu meʼa ʼaē neʼe hoko kia ia ʼi tana gāue misionea. Ko tana gāue fai faka mafola ‘ ʼo aʼu ki te ʼu potu taupotu ʼo te kele,’ neʼe hage ko he ʼu meʼa ʼe koutou sio moʼoni kiai mokā fakamatala fakamalotoloto e te Tēhina ko Barry. Ko ʼihi fakamatala ʼe hā ʼi te hisitolia ʼo tona maʼuli ʼaē neʼe tā ʼi Te Tule Leʼo Fakapilitānia ʼo te ʼaho 15 ʼo Sepetepeli 1960.
ʼE tou falala, ʼi tona ʼuhiga ‘kaugā tofiʼa mo Kilisito,’ ʼe haga tokoni anai te Tēhina ko Barry kia nātou ʼaē ʼe “lotolelei ki te maʼuli heʼegata.” ʼE mahino ia, kua lotomamahi ia nātou fuli ʼaē neʼe nātou feʼiloʼiʼaki mo ia pea mo nātou ʼoʼofa ki te tagata aga fakalaumālie ʼaia, ʼaē neʼe ina foaki katoa tona maʼuli kia Sehova pea neʼe ʼofa mamahi ki tana hahaʼi. Kae ʼe tou fiafia he neʼe nofo agatonu te Tēhina ko Barry ʼo kātaki ʼo aʼu ki te fakaʼosi ʼo tona maʼuli ʼi te kele.—Apokalipesi 2:10.
[Paki ʼo te pasina 16]
Ko Lloyd Barry pea mo John Barr ʼi te temi ʼaē neʼe fakahā ai te tohi “Étude perspicace des Écritures” ʼi te taʼu 1988
[Paki ʼo te pasina 16]
Ko te kau ako ʼo te 11 kalasi ʼo Kalaate, ʼe nātou fakatahi ʼi Saponia hili kiai taʼu e 40