2000—Ko He Taʼu Makehe Koa?

ʼE MAKEHE koa te taʼu 2000? ʼI te agamāhani, ko te hahaʼi ʼo te ʼu fenua ʼo te Potu Hahake ʼe nātou ʼui ʼe ko te ʼuluaki taʼu ʼaia ʼo te ʼu taʼu e tolu afe. ʼE lolotoga fai nei he ʼu fakatuʼutuʼu maʼuhiga moʼo fakafiafia ki te taʼu ʼaia. Kua fakatuʼu te ʼu foʼi ʼuasi lalahi ʼe fakahā ai te temi ʼaē ʼe kei toe ʼi muʼa ʼo te kamata ʼo te ʼu taʼu e tolu afe. Kua fakatuʼutuʼu ke fai he ʼu lafeti lahi ʼi te lakaga ʼaia. ʼI te ʼu fale koloā ʼo te ʼu kiʼi kolo liliki pea mo te ʼu kolo lalahi, ʼe fakatau ai te ʼu kofu sino ʼe tā ai kua vave ʼosi te ʼu taʼu e lua afe.

Ko te ʼu ʼēkelesia kehekehe ʼe nātou kau anai ki te ʼu lafeti ʼaē ka fai hoholo ʼi te taʼu ʼaia. ʼI te kamata ʼo te taʼu ʼaenī ka haʼu, ʼe ʼui ko te Tuʼi Tapu ko Soane Paulo 2 ʼe folau anai ki Iselaele moʼo takitaki te lafeti ʼa te kau Katolika Loma ʼaē neʼe fakahigoaʼi “ko te Lafeti ʼa te ’Ēkelesia Katolika Loma ʼo te ʼu taʼu e afe.” Neʼe fakafuafua ʼo ʼuhiga mo te taʼu ʼaenī ka haʼu, ko te toko lua miliona peʼe ono miliona hahaʼi ʼe nātou ʼaʼahi anai te fenua ʼo Iselaele, tatau aipe peʼe nātou tauhi lotu peʼe kailoa.

He koʼe ʼe fakatuʼutuʼu e te hahaʼi ke nātou ʼaʼahi ia Iselaele? ʼI tana fakafofoga te Tuʼi Tapu, neʼe ʼui fēnei e te Kaletinale ʼo te Vatikano ko Roger Etchegaray: “Ko te taʼu 2000 ʼe ko he fakamanatuʼi ʼo Kilisito pea mo tona maʼuli ʼi te fenua ʼaia. Koia ʼe mole tou punamaʼuli ai ki te ʼalu ʼa te Tuʼi Tapu ki te fenua ʼaia.” Koteā te pikipikiga ʼo te taʼu 2000 pea mo Kilisito? ʼI te agamāhani, ʼe ʼui ko te taʼu 2000 ʼe ina fakaʼosi te ʼu taʼu e 2 000 ʼaē neʼe kamata ʼi te tupu ʼa Kilisito. Kae ʼe moʼoni koa te faʼahi ʼaia? Koia la ʼaenī ka tou vakaʼi.

Ko te taʼu 2000 ʼe toe maʼuhiga foki ki te tahi ʼu lotu. ʼE nātou tui papau, ʼi te lolotoga ʼo te taʼu ʼaenī ka haʼu, ʼe toe liliu mai anai Sesu ki te Moʼuga ʼo Oliveto, pea ko te tau ʼo Halamaketone ʼaē ʼe talanoa kiai te tohi ʼo te Apokalipesi, ʼe fakahoko anai ʼi te mafa ʼo Mekito. (Apokalipesi 16:14-​16) Moʼo teuteuʼi te ʼu meʼa maʼuhiga ʼaia, ko te lauʼi afe hahaʼi Amelika ʼe nātou fakatau tonatou ʼapi pea mo ʼanatou ʼu meʼa fuli ke nātou ʼolo ʼo nonofo ʼi Iselaele. Maʼa nātou ʼaē ʼe mole feala ke nātou mavae ʼi tonatou ʼapi, neʼe fakapapau e te tagata fai faka mafola ʼi te televisio, ʼe ina puke anai te liliu mai ʼa Sesu ke nātou sioʼi ʼi te televisio!

ʼI te ʼu fenua ʼo te Potu Hahake, ʼe lahi te ʼu fakatuʼutuʼu ʼa te hahaʼi ke nātou hū ki te ʼu taʼu e tolu afe ʼaia. Kae ko te hahaʼi ʼo te tahi ʼu fenua, ʼe nātou hoko atu pe tanatou gāue māhani. Ko te hahaʼi ʼaia​—ko te teitei katoa ʼo te malamanei​—ʼe mole nātou faka tui, ko Sesu ʼo Nasaleti neʼe ko te Mesia. Tahi ʼaē meʼa, ʼe lagi mole nātou fakaʼaogaʼi te faʼahiga lau ʼo te ʼu taʼu ʼaē ʼe fakatafito kia Kilisito.a Ohage la, ʼe tokolahi te kau Mahometa ʼe nātou fakaʼaogaʼi tonatou kaletalio ʼa nātou totonu, pea kia nātou, ko te taʼu ʼaenī ka haʼu ʼe ko te taʼu 1420​—ka mole ko te taʼu 2000. ʼE lau e te kau Mahometa tanatou ʼu taʼu ʼo fakatafito ki te taʼu ʼaē neʼe hola ai te polofeta ko Muḥammad mai Mecca ʼo ʼalu ki Medina. ʼI te malamanei katoa, ʼe fakaʼaogaʼi te ʼu faʼahiga kaletalio kehekehe e 40.

ʼE maʼuhiga koa te taʼu 2000 ki te kau Kilisitiano? Ko te ʼaho 1 ʼo Sanualio 2000, ʼe ko he ʼaho makehe koa? ʼE fakahā anai te tali ki te ʼu fehuʼi ʼaia ʼi te alatike ʼaē ka hoa mai.

[Nota ʼi te lalo pasina]