Te Avahi ʼo Te Faleako ʼo Te Sosiete Watchtower—Ko He Fakafiafia Kia Sehova

TALU mai te ʼu temi ʼāfea, neʼe ko he meʼa māhani te fai ʼa he ʼu lafeti fakafiafia ʼi te tauhi moʼoni. Ko ʼihi lafeti ʼi te Iselaele ʼāfea, neʼe fai lolotoga ni ʼaho pea neʼe kau ai te toko lauʼi afe kau atolasio ʼa Sehova. Ko te fakatapuʼi ʼo te fale lotu ʼo Salomone neʼe fai lolotoga ʼaho e fitu, pea neʼe hoa kiai te Lafeti ʼo te ʼu Fale Lau ʼaē neʼe fai ʼi te vāhaʼa katoa. Neʼe ko he faigamālie ʼaia ki te kau Iselaele ke nātou metitasioʼi te agalelei ʼa Sehova kia nātou. ʼOsi ʼaia pea neʼe nātou liliu kiō nātou kua nātou “fiafia pea mo loto fiafia ʼuhi ko te ʼu meʼa lelei fuli ʼaē neʼe fai e Sehova.”​—1 Hau 8:​66.

Ko te meʼa ʼaē neʼe hoko ʼi te Faleako ʼo te Sosiete Watchtower ʼi Patterson, ʼi New York, ʼi Amelika, ʼi te ʼaho 17 ki te ʼaho 22 ʼo Maio 1999, neʼe hage ko te ʼu lafeti ʼa te kau Iselaele ʼo te temi muʼa. Neʼe ko he vāhaʼa makehe ʼo ʼuhiga mo te ʼu gāue ʼaē neʼe fai ki te avahi ʼo te ʼu falefata e 28 ʼaē neʼe laga, moʼo fakahaʼele ki muʼa te ako ʼo te Tohi-Tapu ʼi te malamanei katoa. Lolotoga te vāhaʼa makehe ʼaia, neʼe fakatuʼutuʼu ke fakamahino fakalelei te ʼu pilō ʼo Patterson ki te toko 5 400 ʼo te Petele ʼo Brooklyn, mo Wallkill, pea mo Patterson. Ia nātou ʼaē neʼe fakaafe, neʼe kau ai te teitei toko 500 ʼo te kau gāue ʼaē neʼe nātou laga te faleako ʼaia pea mo he kau fakafofoga ʼo te ʼu filiale e 23, pea ko ʼihi neʼe ʼōmai mai te ʼu kokelekasio ʼaē ʼe feōvi mo te faleako​—ʼo lau ʼaia ko te toko 8 100.

ʼE Akoʼi Nātou Lolotoga Tanatou Mamata

Ke feala ki te hahaʼi ke nātou ʼiloʼi lelei te faleako, neʼe fakatuʼutuʼu ke fai he ʼu fakahāhā paki, mo he ʼu fime viteo, pea ke nātou mamata ki te ʼu fale ʼaia. ʼI te hūʼaga, ʼe tuʼu ai te kiʼi faʼu veliveli ʼo te fale lotu ʼo Selusalemi ʼi te temi ʼaē neʼe fai faka mafola ai Sesu. ʼI te tahi faʼahi, ʼe fakahā ai te Faleako Faka Tohi-Tapu ʼo Kalaate, mo te ʼu fakatahi ʼaē neʼe maʼuhiga ʼaupito, mo te ʼu fono ʼo te kokelekasio, pea mo te tuputupu ʼo te ʼu ako Tohi-Tapu ʼi totatou temi​—ʼaē ʼe fai kia hahaʼi ʼe lauʼi miliona ʼi te vāhaʼa fuli​—pea mo te gāue ʼaē ʼe fai e te Pilō ʼaē ʼe tokaga ki te faʼahi ʼo te lao ke feala ke fakahoko te gāue ʼaia moʼo fakalogo ki te fakatotonu ʼaē neʼe fai e Sesu.​—Mateo 28:19, 20.

ʼI te fale ʼaē ʼe tafa kiai, ko ʼona ʼu hekaʼaga e 1 700, pea ʼe fakahā ai ki te hahaʼi ʼaē neʼe ʼōmai ki te avahi ʼo te faleako, te foʼi fime viteo e minuta 33, ko tona kupu tāfito “Mole ʼAki Te Mālohi​—Kae ʼAki Toku Laumālie!” Neʼe fakahā e te foʼi fime viteo ʼaia pe neʼe kamata feafeaʼi te Faleako ʼaia. Ko te ʼu fakafehuʼi ʼaē neʼe fakamatala ai te ʼu fihifihia ʼaē neʼe hoko lolotoga te laga ʼo te faleako ʼaia, neʼe hā lelei ai neʼe takitaki e Sehova te gāue pea neʼe ina tapuakiʼi te ʼu faiga fuli ʼaē neʼe fai moʼo fakaʼosi te gāue ʼaia ia taʼu e 15. Ei, ko te lauʼi afe hahaʼi neʼe nātou kau ki te laga fale ʼaia. ʼI te tahi lakaga ʼo te taʼu 1994, neʼe ko te toko 526 hahaʼi gāue, pea neʼe kau ai te toko 350 neʼe nātou gāue temi katoa, mo te toko 113 neʼe gāue faka temi, pea mo te toko 63 neʼe ʼōmai ʼi te ʼaho fuli moʼo tokoni ki te gāue ʼaia. Neʼe tokolahi age ia nātou ʼaē neʼe nātou lagolago ki te gāue ʼaki tanatou ʼu meʼa ʼofa. ʼE nātou ʼiloʼi fuli neʼe lavaʼi te faʼahi ʼaia ʼaki pe te laumālie ʼa Sehova.​—Sakalia 4:6.

Ko te hahaʼi ʼaē neʼe ʼōmai ʼo ʼaʼahi te fale, neʼe nātou fakatokagaʼi ko te fakatuʼutuʼu tāfito ʼo te gāue ʼaē ʼe fai ʼi te faleako, ʼe ko te fakahaʼele ki muʼa te ako fakaʼatua. ʼI te hūʼaga ʼo te Faleako ʼo Kalaate ʼi te ʼuluaki laufata, ʼe fakahā lelei ai te tōfiga fakalaumālie pea mo te hisitolia ʼo te faleako. Talu mai te ʼuluaki kalasi ʼaē neʼe fai ʼi te taʼu 1943 ʼi te ʼuluaki faleako ʼi South Lansing, ʼi New York, ko te toko 7 000 kua ako ʼi te Faleako ʼo Kalaate ki te gāue faka misionea. ʼI te lua laufata ʼo te faleako, ʼe fakahā ai te Ako ʼaē ʼe fai ki te hahaʼi ʼo te ʼu Komite ʼo te Filiale pea mo te Ako ʼo te ʼu Tagata Taupau Feʼoloʼaki, pea ʼe fai ai te ako ʼo te ʼu kalasi ʼaia e lua. Talu mai tona kamata ʼi Novepeli 1995, neʼe akoʼi ai te toko 360 hahaʼi ʼo te ʼu Komite ʼo te ʼu Filiale mai ia fenua e 106.

ʼI te hoko atu ʼo tanatou ʼaʼahi, neʼe mahino kia nātou ʼe mole gata ʼaki pe te ʼu fakahāhā paki. Neʼe nātou hū ki te tahi ʼu fale, ʼo nātou mamata ki te ʼu pilō pea mo te tahi ʼu fale gāue, pea nātou sio ai ki te gāue katoa ʼaē ʼe fai ai. Ko te faʼahi maʼuhiga ʼo te ʼaʼahi ʼaia neʼe ko te falefata ʼaē ʼe puke ai te ʼu foʼi fime puke leʼo pea mo te ʼu fime viteo. ʼE ko he ʼu fakatuʼutuʼu lelei ʼaupito ʼe fakaʼaogaʼi moʼo fakahaʼele ki muʼa te ako ʼo te Tohi-Tapu! Neʼe fakahāhā he ʼu paki pea mo nātou sioʼi he ʼu fime viteo nounou, pea neʼe tokoni ai ki te kau ʼaʼahi ke nātou mahino peʼe feafeaʼi te puke ʼo te ʼu leʼo pea mo te teuteuʼi ʼo te ʼu foʼi fime viteo. Neʼe nātou sio ai ki te faigataʼa ʼo te ʼu meʼa ʼaē ʼe teuteuʼi pea mo te ʼu teu. Neʼe nātou sio ʼe mole totogi kovi te ʼu meʼa ʼaē ʼe nātou fakaʼaogaʼi moʼo fai ʼaki te ʼu teuteu, kae ʼe nātou tokaga ke matalelei. Neʼe nātou sio peʼe feafeaʼi te fai ʼo te musika ke hage maʼa te hahaʼi ʼe nātou kau moʼoni ki te meʼa ʼaē ʼe nātou lolotoga sio. Talu mai te taʼu 1990 neʼe fai e te Sosiete te ʼu foʼi fime viteo e hogofulu ia lea e 41, ʼe fakahā ai te ʼu faʼahi kehekehe ʼo te Tohi-Tapu, ʼo hilifaki kiai mo te ʼu foʼi fime maʼa te hahaʼi tuli.

Ko te tokolahi ʼo te hahaʼi ʼaē neʼe ʼolo ʼo ʼaʼahi, neʼe nātou ʼolo ki te Fale ʼaē ʼe fufulu ai te ʼu paki, te Selevisi ʼaē ʼe pena paki, te Pilō ʼo te ʼu Fakafelogoi, ʼaē ʼe akoʼi ai ki ʼihi te gāue olotinatea pea mo tokoni kia nātou ʼi te faʼahi ʼaia, mo te Selevisi Gāue, ʼaē ʼe tokaga ki te gāue ʼo te toko 11 242 kokelekasio pea mo te ʼu tagata taupau feʼoloʼaki e toko 572, pea mo te Selevisi ʼaē ʼe tali ki te ʼu fehuʼi faka Tohi-Tapu, ʼaē ʼe vakavakaʼi ai te ʼu fehuʼi e 14 000 ʼi te taʼu fuli. Neʼe nātou punamaʼuli ʼi te ʼu kumi ʼaē ʼe fai ki te ʼu tohi ʼaē ʼe momoli age, pea mo te tokaga fakalelei kia nātou ʼaē ʼe nātou fakahā ʼi tanatou ʼu fehuʼi tanatou faiga ʼaē ke nātou kātakiʼi te ʼu fihifihia mamafa ʼaē ʼe tau mo nātou.

Neʼe hahaʼi tuʼumaʼu ia nātou ʼaē neʼe ʼolo ʼo ʼaʼahi te Selevisi ʼo te Fakaliliu. Neʼe nātou punamaʼuli ʼi tanatou ʼiloʼi ʼaē ʼi te ʼu taʼu e nima ʼaē kua hili, neʼe hilifaki ia lea e 102 ʼi te ʼu tohi faka Tohi-Tapu ʼaē ʼe tufa e te Sosiete. ʼI te malamanei katoa, ko te toko 80 ʼi te teau ʼo te kau Fakamoʼoni ʼa Sehova, ʼe nātou lau te ʼu tohi ʼo te Sosiete ʼi tonatou lea. Moʼo foaki te ʼu meʼa ʼaē ʼe ʼaoga kia nātou, ʼe gāue te toko 1 700 hahaʼi ʼi te selevisi fakaliliu, ia fenua e 100. Neʼe fakahā te ʼu paki ʼo Te Tule Leʼo ʼi te ʼu lea ʼo te ʼu fenua Amelika, mo Eulopa, mo Asia, pea mo Afelika. Neʼe sio te hahaʼi ki te ʼu fakaliliu e 31 ʼo te Tohi-Tapu Les Saintes Écritures — Traduction du monde nouveau. Neʼe nātou ʼiloʼi ai kua maʼu ʼaki te temi te ʼu tohi ʼo te Sosiete Watch Tower ia lea e 332, pea ko te kaupepa Koteā ʼAē ʼe Fakamaʼua Mai e Te ʼAtua Kia Tatou? neʼe tā ia lea e 219.

Neʼe fakamamata kia nātou te Selevisi ʼo ʼuhiga mo te lao, te ʼu meʼa kehekehe ʼaē ʼe hoko ʼi te malamanei, ʼaē ʼe tonu ke fakaʼaogaʼi ai te lao. ʼI te foʼi fime viteo, neʼe nātou sio ai ki te faifakamāu neʼe hoko moʼoni, neʼe palalau ai te avoka ʼaē ko te Fakamoʼoni ʼa Sehova ʼo ʼuhiga mo te ʼu foʼi huki toto. Neʼe nātou toe ako ai pe koteā te ʼu meʼa ʼaē ʼe fai ke lava ai te faka mafola tuʼumaʼu ʼo te logo lelei ki te hahaʼi. (Filipe 1:7) Neʼe fakahā age kia nātou te tonu ʼaē neʼe fai ʼi Malesio ʼo te taʼu ʼaenī, e te telepinale ʼo te kolo ko Oradell, ʼi New Jersey, ʼi Amelika, ke ina fetogi tana ʼu lao ke molehi ai te ʼu fakamaʼua ʼaē ki te kau Fakamoʼoni ʼa Sehova ke ʼi ai hanatou fakagafua pea mo hanatou kate ki tanatou faka mafola ʼi te ʼu ʼapi ʼi te kolo ʼaia.

Neʼe mole gata ʼaki pe te ʼu meʼa ʼaia. Neʼe nātou toe sio foki ki te fakahāhā ʼo te ʼu laga fale ʼi te Fale Tānaki Simā, pea neʼe nātou ʼaʼahi mo te ʼu fale ʼaē ʼe nātou fakaʼalu te ʼu vai ʼuli, te fale hila, mo te fale ʼaē ʼe fakamaʼa ai te vai ke feala hona ʼinu, pea mo te ʼu fale ʼaē ʼe tokaga ki te haʼele lelei ʼo te ʼu meʼa ʼaia. Neʼe ko he ʼaʼahi makehe ʼaia.

ʼE Talanoa Tāfito Te Polokalama ʼo Te Avahi Ki Te Ako Fakaʼatua

Neʼe kamata te polokalama ʼo te avahi ʼo te fale ʼi te Feliafā, ʼaho 19 ʼo Maio, ʼi te hola 4 hili hoʼatā. Neʼe kau ʼi te toko 6 929 hahaʼi fiafia, ia nātou ʼo te Petele, mo nātou ʼaē neʼe fakaafe e te Sosiete, pea mo te toko 372 ʼaē neʼe fakatahitahi ʼi te filiale ʼo Kanata, ʼo sio ʼi te televisio te avahi ʼaia ʼo te Faleako.

Neʼe fiafia te hahaʼi ʼi tanatou logo ki te ʼu ʼuluaki palalau fakaloto māfana ʼaē neʼe fai e Milton G. Henschel, te pelesita ʼo te Sosiete Watch Tower. Ko Theodore Jaracz, ʼaē ʼe kau ʼi te Kolesi Pule pea neʼe pelesita ʼi te fakatahi ʼaia, neʼe ina fakahā te akonaki ʼaē ka fai e William Malenfant. ʼI tana fakahā “Te ʼu Lakaga Maʼuhiga ʼo Te Polokalama Laga Fale,” neʼe ina fakafehuʼi te ʼu tēhina e tolu neʼe maʼuhiga tanatou gāue ʼi te haʼele ki muʼa ʼo te laga ʼo te Faleako, pea mo te fai ʼo tona paki. ʼI te fai ʼo te ʼu fakafehuʼi, neʼe ʼui ai lolotoga te ʼu taʼu ʼaē neʼe laga ai te fale, neʼe ko te toko 8 700 kau gāue faka temi neʼe nātou totogi tanatou ʼōmai ki te gāue ʼaia. ʼE ko he fakamoʼoni lelei ʼaia ʼo te logo tahi, pea mo te loto fia foaki ʼaē neʼe maʼu ʼaki te ako fakaʼatua!

Neʼe hoa kiai te akonaki neʼe koga fā, ko tona kupu tāfito “Ko Te Ako Fakaʼatua ʼi Te Malamanei Katoa.” Neʼe fai e te ʼu tēhina ʼe toko fā ʼo te Kolesi Pule. Neʼe fakahā tāfito e John E. Barr ʼe maʼu te tafitoʼaga ʼo te ako fakaʼatua ʼi te Folafola ʼa te ʼAtua, te Tohi-Tapu, ʼaē ʼe ina fakaloto mālohi te kau Kilisitiano ke nātou maʼu he ʼu “fua i te gaue lelei fuape pea mo . . . lakalaka ki mua i te iloi o te Atua.” (Kolose 1:​10) Neʼe fakahā e Daniel Sydlik peʼe feafeaʼi te fakatuʼutuʼu faka teokalatike ʼo te ako fakaʼatua, ʼaē ʼe foaki mai e te pule ʼo te kokelekasio faka Kilisitiano, ia Sesu Kilisito, ki te fale fakatautehina ʼi te malamanei katoa. (1 Kolonito 12:12-​27) Ko te ʼu koga fakaʼosi e lua ʼo te akonaki, ʼaē neʼe fai e Gerrit Lösch pea mo Carey Barber, neʼe fakahā ai pe koteā ʼaē ʼe ako e te kau Fakamoʼoni ʼa Sehova ke nātou liliu ko he kau minisi, ʼe nātou ʼolo anai ʼo faka mafola ki te hahaʼi ʼi te ʼu potu fuli pe, pea mo akoʼi nātou ke nātou haʼele ʼi te ala ʼa te ʼAtua.​—Isaia 2:​1-4; 2 Kolonito 3:5.

Moʼo faka fealagia ki te hahaʼi ʼaē neʼe ʼōmai ki te fakatahi ʼaia, ke nātou mahino ki te ʼu ako kehekehe ʼaē ʼe fai ʼi te faleako ʼaia, neʼe fai te ʼu fakafehuʼi pea mo te ʼu fai palalau mo te ʼu tēhina faiako pea mo nātou ʼaē neʼe lagolago ki te fakaʼaluʼalu ʼo te ʼu meʼa ʼaia. Neʼe fakahā ai te fakatuʼutuʼu ʼo te ʼu ako takitahi ʼaia moʼo fakahoko te polokalama ako fakaʼatua ʼi te malamanei katoa. Neʼe fakahā lelei ai ko te Faleako ʼo Kalaate ʼe tokaga tāfito ke akoʼi e te ʼu tēhina mo tuagaʼane te ʼu tohi fuli ʼo te Tohi-Tapu, mo te hisitolia ʼo te hahaʼi ʼa Sehova ʼo totatou temi, pea mo teuteuʼi nātou ki te gāue faka misionea. Ko te Ako ʼo te ʼu tēhina ʼo te ʼu Komite ʼo te Filiale ʼe fai moʼo fakamahino fakalelei te ʼu gāue ʼaē ʼe nātou fai. ʼE fai te Ako ki te ʼu Tagata Taupau Feʼoloʼaki moʼo akoʼi kia nātou te ʼu meʼa ʼaē ʼe ʼaoga ki tanatou gāue, kae ʼe toe akoʼi ai nātou ke nātou foaki te tokoni fakalaumālie ʼaē ka fua lelei anai ki te ʼu kokelekasio.

Moʼo fakaʼosi te polokalama lelei ʼaia, neʼe fai e Lloyd Barry ʼaē neʼe kau ki te Kolesi Pule, te akonaki ki te avahi ʼo te fale pea ko tona kupu tāfito ʼaenī: “Neʼe Laga ʼAki Te Tokoni ʼo Totatou Tupuʼaga Lahi.” Neʼe ina fakahā lelei ko te Tupuʼaga, ia Sehova, ʼe fiafia ʼi te ʼu meʼa fuli ʼaē neʼe ina fakatupu pea ʼe ina fakaafe tatou ke tou fiafia mo ia. (Isaia 65:18) Mai tona ʼaluʼaga ʼaē “ko te tufuga o meafuape e ko te Atua,” koia ko te ʼu fakavikiviki fuli ʼo ʼuhiga mo te laga ʼaia ʼo te fale ʼe tonu ke fai kia Sehova ʼAtua. (Hepeleo 3:4) ʼI tana ʼosi fakahā te ʼu manatu ʼaia, neʼe fai ai leva e te tēhina te faikole neʼe lave loto, ʼo ina fakahā ko te Faleako ʼo te Sosiete Watchtower, ʼe fakaʼaogaʼi anai maʼa Sehova, totatou Tupuʼaga Lahi.a

ʼE mahino papau ia ʼe mole toe galo anai te fakatahi fakafiafia ʼaia e te ʼu tēhina mo tuagaʼane ʼaē neʼe kau kiai. He koʼe ʼe mole koutou fakatuʼutuʼu ke koutou ʼaʼahi te Faleako ʼaia ʼo Patterson? ʼE mātou tui papau, kapau ʼe koutou ʼaʼahi te faleako ʼaia, pea ʼe ko he fakaloto mālohi anai kia koutou ʼi takotou faiga ʼaē ke koutou ako he tahi ʼu meʼa ʼo ʼuhiga mo totatou Tupuʼaga ʼofa, pea mo takotou fia mulimuli ki tana ʼu lekula faitotonu.

[Nota ʼi te lalo pasina]

[Paki ʼo te pasina 10]

Neʼe hahaʼi ʼaupito te fale fono pea mo kaugamālie te fale kai

[Paki ʼo te pasina 10]

Neʼe ko he meʼa fakafiafia te ʼu ʼaʼahi ʼaē neʼe fai